دەسمايە

maymah

	(1) دەسمايە -بۇنىڭ ھەممىسى سىزنىڭ خاتالىقىڭىز!، سىز ماڭىمۇ، ئۆزىڭىزگىمۇ قىلدىڭىز! ئويلاپ بېقىڭ سىزنىمۇ بىر ئەركەك دىگىلى بولامدا؟ قاراپ بېقىڭە بىزنىڭ تۇرقىمىزغا شېركەتتىن! پۇلدىن! ھوقۇقتىن! ھەممە نەرسىدىن مەھرۇم بولدۇق. بىزنىڭ ھازىر كوچىدىكى يالاڭتۆشلەردىن نېمە پەرقىمىز؟ مەن سىزنى كەچۈرمەيمەن! ھەرگىز كەچۈرمەيمەن! سىزنى چوقۇم بۇ بالىلارچە قىلمىشىڭىز ئۈچۈن بەدەل تۆلەتكۈزىمەن! ،-ئاننا توختىماي چالۋاقايتتى. ۋەھالەنكى مېنىڭ ئۇنىڭ چالۋاقاشلىرىغا پەرۋايىم پەلەك ئىدى. مېنىڭ قورسىقىم ناھايىتى ئېچىپ كەتكەنىدى. سوتنىڭ ھەلەكچىلىكى بىلەن ماڭا تاماق يىگۈدەكمۇ ئارام بولمىغانىدى. ھە راس ئۇنىڭمۇ شۇنداق. شۇنىڭ بىلەن بۇ ئەمەلى مەسىلىنى ھەل قىلىشنىڭ كويىغا كىردىم. ۋەھالەنكى بۇ مەسىلىنى ھەل قىلىشتىكى بىرىنچى توساق، دەل ئاننا ئىدى. -سىزگە قايىل بولدۇم، ھازىرغىچە تاماق يېمىگەن تۇرۇقلۇق، توختىماي كاپشىيالاۋاتىسىز. ئەگەر خالىسىڭىز بىرگە تاماق يەيلى. مېنىڭ ھامبورگ يىگۈم كېلىۋاتىدۇ. قانداق مەيلىڭىز بارمۇ؟ ئەگەر ئاشخانىغا بارغىچە، بىر ئېغىزمۇ گەپ قىلماي ماڭسىڭىز، سىزگە مۇكاپات سۈپىتىدە ياڭيۇ قەلەمچىسى ئېلىپ بېرىمەن.،-دىدىم ئۇنى قەستەن تېرىكتۈرۈپ. -ئەلۋەتتە يەيمەن. سىزنىڭ مېنى ۋە ئۆزىڭىزنى ۋەيران قىلىش بەدلىگە ئېرىشكەن توي خېتى قولىڭىزدا تۇرۇپتۇ. سىزنىڭ مېنى بېقىش مەجبۇرىيىتىڭىز بار. لىكىن سىز دىگەن ھازىر بىر يالاڭتۆش!!! سىزنىڭ پۇرتمالىڭىزدىن تارتىپ بانكىدىن ئېلىپ كەتتى. سىز ۋەيران بولدىڭىز!!ھا..ھا...ھا!! سىز يالاڭتۆشنىڭ خوتونىغا تاماق ئېلىپ بەرگۈدەكمۇ پۇلى يوق!! ھا!ھا!ھا! سىز مېنى باقالمىغاندىكىن ھازىرلا نىكاھتىن ئاجرىشىشنى تەلەپ قىلىمەن!! سىز مەرەزدىن مەڭگۈ قۇتۇلىمەن!!!،- ئۇ زىياننىڭ دەردىدە ئېلىشىپ قالايلا دەپ قالغانىدى. -قاراڭ ئاننا، ئەگەر ۋەيران بولدۇم دەپ ئويلىسىڭىز، ئۇ سىزنىڭ قارىشىڭىز. لېكىن مەن ئۇنداق قارىمايمەن، سىزنى بېقىشمۇ مەن ئۈچۈن ھېچقانچە گەپ ئەمەس، ئاجرىشىش مەسىلىسىگە كەلسەك، سىز ئۇخلىماي چۈش كۆرمەڭ. مەن دادامنىڭ ۋەسىيىتىنى دەپلا سىز بىلەن توي قىلدىم. شۇنىڭ ئۈچۈن ھەم سىز بىلەن ئاجراشمايمەن. ئەمەلىيەتتە سىز قانداق ئويلاڭ  مەن ئۈچۈن بەرىبىر. لېكىن نەگە بارىمەن دېسىڭىز ئۆزىڭىزنىڭ ئىختىيارى. مەن سىزنىڭ نىكاھىمىزغا خائىنلىق قىلمايدىغانلىقىڭىزغا ئىشىنىمەن. لېكىن بىز نىيۇيوركتا ئەمەس. بەلكى ئۈرۈمچىدە.  سىزدەك سېرىق چاچلىق، پەقەت كېنولاردىلا كۆرگىلى بولىدىغان   نازىزنىن قىز ئۈچۈن بۇ يەرنى ئانچە بىخەتەر دەپ كەتكىلى بولمايدۇ.  ئەگەر يەنە قاىل بولمىغان بولسىڭىز ئاۋۋال تاماق يەۋېلىپ ئاندىن كاپشىڭ،- دىدىمدە ئۇنىڭ قولىدىن يىنىك تارتىپ، ئۇنى باشلاپ ماڭدىم. قورساقنىڭ گېى چىققاندىن كېيىن، قورسىقى ئېچىشقا باشلىدىمۇ ياكى قىشىمدا پۇلنىڭ يوقلىقىنى بىلگەچكە، قېنى ھالىڭنى كۆرىمەن دەپ ئويلىدىمۇ بىلمىدىم ئۇ قولۇمنى سىلكىۋەتكەندىن كېيىن، ھومايغىنىچە، كەينىمدىن ئەگىشىپ ماڭدى. مەن ئۇنى باشلىغىنىمچە ئۇدۇل خەلق مەيدانىنىڭ يېنىدىكى مەخسۇس چەت ئەللىكلەر پىركازچىكلىق قىلىپ،داڭلىق ماركىلىق بويۇملارنى ساتىدىغان سودا ساراينىڭ ئالدىغا كېلىپ توختۇدۇم. ئۇ ماڭا مەسخىرە مەنىسىدە قاراپ تۇراتتى. -سىزنىڭ مۇشۇ يەرگە بىر ئېغىز گەپ قىلماي كەلگەنلىكىڭىزدىن ئىنتايىن مەمنۇنمەن. نەق گەپكە كەلسەك سىزگە مەلۇم بولغىنىدەك بىزدە ھازىر پۇل يوق. لىكىن بىزدە دەسمايە بار، بۇ دەسمايىنى پۇل قىلىش ئۈچۈن سىزنىڭ ئازراق ياردىمىڭىزگە مۇھتاجمەن. ئەگەر ياردەم قىلىشنى خالىمىسىڭىز، تاماق ۋاقتى يەنە 4 سائەت كەينىگە سۈرىلىشى مۇمكىن. بۇنى ئۆزىڭىز قارار قىلىڭ، مەن ئاچلىققا خېلى چىدايمەن. ئۇنىڭ ئۈستىگە ئاز گەپ قىلىمەن..... -بولدى، بولدى...تىلىڭىزنى چاينىماي گاچ گەپ قىلىڭ. مېنىڭمۇ سىزدەك ئادەمنىڭ تامىقىنى بىكارغا يىگۈم يوق. قېنى ئۇ دەسمايە؟،- دىدى ئۇ قاپاقلىرىنى پۈرۈشتۈرۈپ. ئۇنىڭ قورسىقى راسا ئاچقان بولسا كېرەك. -مانا....،-دېدىممەن ئۇچامدىكى ئەرزان باھالىق چاپاننى قولۇمغا ئېلىپ. -نېمە؟...مۇشۇ ئەرزان باھالىق، ماركىسى ساختا، تېخى ئىسسىقتا ئۇچىڭىزغا كىيىپ تەر پۇرىتىۋەتكەن چاپىنىڭىزنى دەسمايە دەۋاتامسىز؟،- ئۇ بىگىز بارمىقى بىلەن چاپىنىمنى كۆرسۈتۈپ، كۆزلىرىنى يۇمۇشتۇرغىنىچە، مېنىڭ ‹‹دەسمايەم››نىڭ بارلىق ئەيىبىنى تاپماقچى بولىۋاتاتتى. لىكىن مېنىڭ داۋاملىق بۇلارنى ئاڭلاشقا تاقىتىم يوق ئىدى. -قاراڭ ئاننا. مالنىڭ باھاسىنىڭ قانداق بولىشىنى مالنى كىمنىڭ سېتىشى، قانداق سېتىش بەلگىلەيدۇ.  مەن دەل مۇشۇ يەردە، مۇشۇ چاپاننى دەسمايە قىلىپ، بۇندىن كىيىنكى پۈتۈن مەسىلىلەرنى ھەل قىلىشىم كېرەك، ئەڭ ياخشىسى سىز يولدىشىڭىزنىڭ ئالدىدا سۈپىتىڭىزنى ساقلاپ، ماڭا ئاكتىپ ماسلىشىڭ،-دىدىممەن گەپنى ئۈزۈپلا. -لىكىن سىز قىلماقچى بولغان بۇ سودىدا ھېچقانچە ئەمەلى ئۈنۈم مەۋجۈد ئەمەس. ئۇنىڭ ئۈستىگە سىزنىڭ بۇ ئەسكى چاپاننى مۇشۇ ھەشەمەتلىك ساراينىڭ ئالدىدا ساتماقچى بولغانلىقىڭىز ئىقتىسادى نۇقتىدىن ئېلىپ ئېيتقاندا تۈپتىن خاتا. سىز ھېچ بولمىغاندا بۇ چاپاننى نامراتلار مەھەللىسىدە ساتسىڭىز بولاتتى. ھېچ بولمىسا ئىككى بولكىنىڭ پۇلى چىقاتتى. بۇ يەردە بۇ چاپاننى سېتىش ۋاقىت ئىسراپچىلىقى خالاس!،- ۋەھالەنكى بۇ كىچىككىنە ئىقتىسادى رىئاكسىيە بۇ ئىقتىسادشۇناس قىزنىڭ نېرۋىسىنى بىردەمدە خېلىلا غىدىقلاپ بولغانىدى. -قاراڭ ئاننا، سىزنىڭ خارۋارددا ئۆگەنگەن بۇ ئاقماس نەزىرىيەرىڭىزنى مېنىڭ ئالدىمدا ئاقتۇرىمەن دېمەڭ. بۇ يەردە سىز ئويلاشمىغان بىر مەسىلە مەۋجۈت. بۇ چاپان مېنىڭ. قانداق سېتىش، نەدە سېتىش مېنىڭ ئىختىيارىم. سىز تاللاشقا تىگىشلىك مەسىلە پەقەت ماڭا ياردەملىشىپ تاماقنى ھازىر يەمسىز؟ ياكى بىرەر يەردە بىر نەچچە سائەت مېنىڭ پۇل تېپىپ قايتىپ كېلىشىمنى ساقلامسىز؟،- ئۇ سۆزلىرىمنى ئاڭلىغاندىن كىيىن، ئامالسىز مېنىڭ پىلانىمنى ئاڭلاپ بېقىشقا ماقۇل بولدى ۋە يەنە بىرمۇنچە خىزمەت ئىشلەشلەردىن كېيىن مېنىڭ پىلانىمنى بىر قېتىم سىناپ بېقىشقا ماقۇل كەلدى. ھازىر بولسا ھەممە ئىشلا پۈتۈپ ‹‹سودا››غا كىرىشىپ كەتتۇق.     نىنا توختىماي چاپاننى ماڭا ئىتتىرەتتى، مەن  ‹‹چاپاننىڭ ئىككىلا تاش يانچۇقى بارلىقىنى ئۆزەڭلار ئوچۇق دېمىگەن تۇرساڭلار. مەن نېمىشقا سىلەرگە تۆلەم تۆلىگۈدەكمەن؟ ›› دەپ چاپاننى ئۇنىڭغا ئىتتىرەتتىم. ئويلىغىنىمدىكىدەك بۇ گۈزەل نازىنىن بىلەن بىر ئاۋارە يىگىتنىڭ دە-تالىشى بىر دەمدىلا، چەت ئەللىكلەرنى يەكلەيدىغانلارنىڭ، چەت ئەللىككە چوقۇنىدىغانلارنىڭ ۋە ئېسىل بويۇملاردىن ئۆزىنىڭ بەھرىمان بولالمايدىغانلىقىدىن ئاغرىنىش ھېس قىلىدىغان كىشىلەرنىڭ دېھقىتىنى تارتىپ، ئەتراپىمىزغا ئادەم ئولاشتى. كىشىلەر مەن رازى بولغىدەك توپلاشقاندىن كېتىن مەن سودىنى كولمىناتىسىيە پەللىسىگە يەتكۈزۈپ،ئاننانى يىقىلمىغىدەك دەرىجىدە ئىتتىرىپ قويدۇم.ئوتتۇرا قولدەك بىر ئەركىشنىڭ چىۋىقتەك  بىر چەت ئاللىك نازىنىنى قوپاللىق بېلەن ئىتتىرىۋەتكەنلىكىنى كۆرگەن خالايىق، چىداپ تۇرالماي، يۈگرۈپ ئالدىمغا كەلگىنىچە  مېنى بىر يانغا ئىتتىرىۋەتكەندىن كېيىن، ئاننانى يۆلەپ ئاخىرى   ئۆزى كۆرۈۋاتقان بۇ كىنوغا ‹‹ئارتىست›› بولۇپ كىردى. ئاننا پۇرسەتنى تۇتۇپ ئۇلارغا مېلىمىزنىڭ ئېلانىنى بېرىشكە باشلىدى. -بۇ چاپاننى كارخانىمىزنىڭ ئىتالىيەلىك مەشھىۇر تىككۈچىسى تىككەن ئىدى.  تۈنۆگۈن بۇ ئەپەندىم چاپاننى ياقتۇرۇپ قالدىم دەپ 68مىڭ يۈەنگە ئېلىپ كەتكەنىدى. بۈگۈن كېلىپ تاش يانچۇقى ئاران ئىككىكەن ،قايتۇرىمەن دەپ تۇرىۋالدى. لىكىن ئۇ چاپاننى كىيىپ قويۇپتۇ. بۇنداق ئېسىل چاپانلارنى بىرلا كىيىپ قويسا، كىيىنكى سېتىلىش باھاسىغا ئېغىر تەسىر يېتىدۇ. شۇڭلاشقا بىزنىڭ چاپاننى ئەسلى پېتىگە ياندۇرۇش ئۈچۈن كېتىدىغان ھەقنى تەلەپ قىلساقمۇ، ئۇ بەرگىلى ئۇنىمايۋاتىدۇ،- دەپ گەپتىن توختىدى ئاننا . بۇ چاپاننىڭ غايەت زور باھاسى بىر دەمدىلا ئەتراپىمىزغا ئولاشقانلار ئوتتۇرىسىدا غۇلغۇلە قوزغىدى. -نېمە؟ مەن نېمە دەپ پۇل تۆلىگىدەكمەن؟!! ئەسكى چاپىنىڭلار مېنىڭ ئېسىلزادىلەرگە خاس بەدىنىمگە ئارتىلالىغانلىقىغا خوش بولسا بولىدۇ. ھىم... بىلىپ قويۇش سەن ئەجنەبىلەرنىڭ بۇنداق بىنالىرىنى مەن بىر پارچە قاشتېشىغىلا سېتىۋالالايمەن! تېخى مۇشۇ ئەسكى چاپاننىڭ بىر كۈنلۈك كىيىش ھەققى مىڭ يۈەنمىش! !!،- مەن شۇنداق دېگەچ غەزەپلەنگەن قىياپەتتە چاپاننى يەرگە تاشلاپ نەچچىنى دەسسىۋەتكەندىن كېيىن، قولۇمغا ئېلىپ كىشىلەر توپىغا تەڭلىدىم. -بىلىپ قويۇڭلار، بۇ ئەجنەبىلەرنىڭ ماللىرى ھېچنىمىگە ئەرزىمەيدۇ. مۇلازىمىتىمۇ ئوسۇرۇققا تەڭ. مەن ئۇلارنىڭ ئەڭ ئۇستا تىككۈچىلىرىنى پايپىقىمغىمۇ تەڭ قىلمايمەن. مەن بۇلارنىڭ سارىيىنىڭ ئالدىدا بۇلارنىڭ ئەتىۋارلىق مېلىنى بىر كۈنلۈك كىيىش ھەققىگە سېتىپ،  پۇلىنى ماۋۇ ئەجنەبى نايناققا سەدىقە قىلىۋىتىمەن! ئالىدىغانلار بارمۇ؟،- چاپاننى شۇنداق تەڭلىگىنىمنى بىلىمەن. لېكىن كىمنىڭ چاپاننى يۇلۇپ ئېلىپ مىڭ يۈەن پۇلنى قولۇمغا تۇتقۇزۇپ قويغانلىقىنىمۇ سەزمەپتىمەن.  مىڭ يۈەننى ئانناغا زەرب بىلەن ئېتىپ بەرگەندىن كېيىن، ئالدىنئالا دىيىشىپ قويغان يېرىمىزدە ئۇچراشقاندىن كىيىن ، تاماق يىگىلى يۈرۈپ كەتتۇق. ئۇنىڭ پۇلنى چىڭ سىقىمدىغان قوللىرى توختىماي تىترەيتتى. بەلكىم ئۇ مىنىڭ كەينىمگە كىرىپ، تۇنجى قېتىم ئالدامچىلىق قىلىپ پۇل تاپقانلىقىدىن قاتتىق ئازاپلانغان بولسا كېرەك. مەنمۇ ئازاپلىنىۋاتاتتىم. ئاپتورى: مايماق

شرئەلى118

	ياخشى يېزىپسىز مايماق ئەپەندى

dilnaz911

	مايماق،،ئىسمىڭىز ئۆزگىچىكەن،، بۇ تەرجىمە ئەسەرمۇ ياكى ئىجادىيىتىڭىزمۇ؟

nurihsan55

	بۇ ئىجادىيىتىڭىز ئوخشىمامدۇ  ؟     ئۈرۈمچىنى تىلغا ئېلىۋاتىسىز      .....

fathullah

	چەتئەللىك قىز بىلەن توي قىلغان ئۇيغۇر يىگىتى؟ خېلى جانلىق چىقىپتۇ.چاتما ھىكايىلەرمۇ بۇ؟

uyguri

	خېلى قىززىقارلىككەن ،تىجارەت بىر مەيدان ئويۇن خالاس كىم ئۇستا بولسا شۇ كېڭىيىپ يېڭىدۇ ، ئەمما بۇ ئويۇننى قاملاشتۇرۇپ ئويناش بەك تەس ، ئەمما بۇھېكاينىڭ مەركىزىي ئىدىيىسىنى ۋە نىمىنى يورۇتۇپ بەرمەكچى بولغىننى پەقەتلا چۈشەنمىدىمغۇ يا كاللام بەك ئاددىيمۇ ؟

sewdaye1

	مەن بۇ ھىكايىنى بىر فانتازىيلىك ھىكايىمىكىن دىدىمغۇ ئويلىغىنىم توغرىمىدۇ؟؟

بەرگى

	دەسمايىنى شۇنداق قىلىپ نادان ،شۆھرەتپەرەس  تازا ماختىنىپ كىيدىكەندە

چاقنار

	ياخشى يېزىپسىز مايماق  ئەپەندى،،،،

مەلىكە

	ئەسسالاممۇ ئەلەيكۇم مايماق، باركەنسىز، بۇ ئۆزىڭىزنىڭ ئىجادىيىتىمۇ؟ قەلىمىڭىز بەكلا ياخشى جۇمۇ...