قاباھەت ئىچىدىكى جۇدالىق

musilina

	نىجات بىلەن گۈلنار ھەر ئىككىلىسى ئىچكى كېسەللكلەر دوختۇرلىرى بولۇپ، شىنجاڭ تىبئىي  ئىنىستوتىغا بىر يىللىق بىلىم ئاشۇرۇش ئۈچۈن كەلگەن ئىدى، گۈلنار كەلگەن كۈنى نىجاتنىڭ ئارقىسىدا بىر ئورۇن بوش بولغاچقا شۇ يەردە ئولتۇردى، بىرلىكتە دەرس ئاڭلاش ، ئەمىلىي پاراكتىكا قىلىش.....جەريانىدا ئىككىسىنىڭ مىجەزى چىقىشىپ قالدى.ھەر ئىككىلىسى بىر قىسىم بىلىم ئاشۇرۇشقا كەلگەن كەسپداشلىرىغا ئوخشاش ‹‹بىلىم ئاشۇرۇش ئويۇن –تاماشىنىڭ ئوبدان پۇرسىتى››دەپ قارايدىغانلاردىن بولمىغاچقا،مەيلى نەزىرىيە دەرسىدە بولسۇن ،مەيلى ئەمىلىي مەشخۇلاتلار جەريانىدا بولسۇن، ئۆزلىرىنىڭ ئىلگىرى تولۇقلاپ بولالمىغان بىلملىرىنى تولۇقلاش ئۈچۈن تىرىشاتتى، يولۇققان تۈرلۈك كېسەللىك توغرىسىدىكى مەسىلىلەر ئۈستىدە مۇلاھىزە ئېلىپ باراتتى ياكى يېتەكچى مۇئەللىملىرى بىلەن بىرلىكتە  ھەل قىلىش ئۇسۇللىرى ئۈستىدە پىكىر ئالماشتۇراتتى.    شۇنداق قىلىپ بەزىبىر تۇرمۇش ئۇسۇللىرى ئوخشىشىپ كېتىدىغان،پىكىرلىرىمۇ ئاساسەن دېگۈدەك بىر يەردىن چىقىدىغان بۇ بىر جۈپ ياشنىڭ قەلبىدە بىر –بىرىگە نىسپەتەن باشقىچە بىر خىل سېزىم پەيدا بولۇپ ،يۈرىكىدە مۇھاببەتنىڭ گۈللىرى چېچەكلەشكە باشلىدى.بىر قېتىملىق كۇرسانتلارغا ئۆتكۈزۈپ بېرىلگەن كۆڭۈل ئېچىش پائالىيىتىدە ئازىراق ئىچىپ قىزىۋالغان نىجات گۈلنارغا ئۆز كۆڭلىنى ئىزھار قىلدى، كۆڭلىدىكى كۈتكەن مىنۇتلارنىڭ يېتىپ كەلگەنلىكىدىن ئالەمچە شادلىققا چۆمگەن گۈلنارنىڭ دەرھاللا -ماقۇل ،-دەۋەتكۈسى بولسىمۇ، يەنىلا قىزلىق شەرمى –ھايا ئۇنى كونتورۇل قىلىپ تۇرغاچقا ئويلىنىپ كۆرۈش جاۋابىنى بەردى.ئارىدىن نەچچە كۈن ئۆتۈپ نىجاتنىڭ تاماق يېيىش ۋە بىرلىكتە مەشخۇلات ئېلىپ بېرىش جەريانىدا كۆزلىرىگە ئۈمىد بىلەن تىكىلىشلىرى، ‹‹ماقۇل ››جاۋابىنى سۈيلىشى بىلەن ئۇنىڭغا رازىلىق بىلدۈردى.شۇنداق قىلىپ كۆڭلىگە بىمارلارنى كېسەللىك ئازابىدىن قۇتۇلدۇرۇشتىن ئىبارەت يۈكسەك ئارزۇنى پۈككەن بۇ بىر جۈپ ياش مۇھاببەت بېغىدىكى بىر گۈپ قىزىل گۈلگە ئايلاندى.    ھەم ئالدىراشلىق ھەم شېرىن مۇھاببەتلىك دەملەر بىلەن ئۆتكەن بۇ بىر يىل بىلىم ئاشۇرۇش ۋاقتىمۇ توشۇپ قالدى. -ھەش –پەش دېگۈچە بىر يىل ۋاقىتمۇ توشۇپ كېتىپتۇ، ئەمدى ئايرىلىپ كەتسەك كېيىن پۇرسەت پىشىپ يېتىلىپ توي قىلىپ بولغۇچە ،كۈندە بۇنداق بىللە بولۇش پۇرسىتىمۇ يوق دېيەرلىك بولۇپ قالىدۇ،نېمىشقىمۇ ئىككىمىز ئىككى شەھەردىن بولۇپ قالغان بولغىيتۇق؟ سىزنى كۆرمەي قانداقمۇ چىدارمەن گۈلنار؟- دېدى نىجات ماڭىدىغانغا ئىككى كۈن قالغان بىر كۈنى كەچتە گۈلنارنىڭ قولىنى تۇتۇپ تۇرۇپ ھەسرەت بىلەن.    -كۈندە تېلىفوندا ياكى توردا كۆرۈشۈپ تۇرايلى،راستىنى ئېيتسام سىزدىن ئايرىلىشقا مېنىڭمۇ كۆزۈم قىيمايدۇ نىجاد، لېكىن تەقدىرنىڭ ئورۇنلاشتۇرىشى شۇكەن،ئامال يوق، ۋەدىمىز بويىچە يا سىز يا مەن تېزراق يۆتكىلىپ تويىمىزنى قىلساق،ئاندىن بىر بىرىمىزدىن ئايرىلمايدىغان كۈنلەر كېلىدۇ،-دېدى گۈلنارمۇ غەمكىن ئاۋازدا. -تېلىفون ياكى توردىغۇ كۆرۈشۈپ تۇرىمىز، بىراق ئۇنداق كۆرۈشۈشلەر ھازىرقىدەك بىر يەردە بىر –بىرىمىزنىڭ ئوتلۇق نەپسىنى تىڭشاپ كۆرۈشۈشكە قانداقمۇ يەتسۇن!- دېدى نىجات گۈلنارنى ئۆزىگە تارتىپ.خىجىل بولغان گۈلنار ئاستا ئۆزىنى تارتتى.    -يۇرتقا  بېرىپلا  ئاچىڭىزغا ئىككىمىزنىڭ ئىشىنى ئېيتىپ،ئۇنىڭ ماقۇللىقىنى قولغا كەلتۈرۈڭ،مەنمۇ ئۆيدىكىلەرگە ئېيتىپ، ئىككىلىمىزدىن بىرىمىزنىڭ يۆتكىلىدىغان ئامالىنى قىلاي،قانچە ئىتتىك بولسا شۇنچە ياخشى گۈلنار، بولمىسا سىزنى سېغىنىپ ئۆلەي دەپ قالىمەن،-دېدى نىجات ئىلتىجالىق كۆزلىرىنى گۈلنارغا تىكىپ. - خۇدايىم بۇيرىسا ،بېرىپلا ئىككىمىزنىڭ ئىشىنى ئاچامغا  ئېيتىمەن،ئاتا –ئانامدىن كىچىكلا ئايرىلىپ قالغاچقا ئاچامنىڭ مېنى بېقىپ، ئوقۇتۇپ ھازىرقىدەك ياخشى خىزمەتكە چىقىرىشى ئاسانغا توختىمىدى،、ئاچام قوشۇلمىسا بۇ توينى قىلغىلىمۇ بولمايدۇ، لېكىن ئىككىلىمىزدىن بىرىمىزنىڭ يۆتكىلىشى تەسكە توختاپ كېتەرمىكىن دەيمەن، -دېدى گۈلنار.    - خاتىرجەم بولۇڭ،يۆتكۈلۈش ئىشىمىز ھەل بولماي قالسا خىزمەتتىن ئىستىپا بېرىپ ئۆز ئالدىمىزغا دوختۇرخانا ئاچساقمۇ ياكى بىرەر دوختۇرخانىدا تەكلىپ بىلەن ئىشلىسەكمۇ بولىدۇ، بولدى ،كۆزىڭىزنى چەكچەيتمىڭا، مەن پەقەت ئېھتىماللىقنى دەۋاتىمەن،پۇل كەتسىمۇ ئىمكان بار يۆتكىلىدىغان ئىشنى قىلايلى،ئىككىلىمىز بېرىپلا بۇ ئىش ئۈچۈن يول ماڭايلى، قانچە تېز بولسا شۇنچە ياخشى،سىز ئىمكان بار ئاچىڭىز بىلەن ئاكىڭىزنىڭ ماقۇللىقىنى ئېلىش ئۈچۈن تىرىشىڭ  -دېدى نىجات.ئۇلا ئەنە شۇنداق پىلانلارنى تۈزىشىپ خېلى بىر كەم بولغاندا ،ئاندىن بىر –بىرىگە قىيالماسلىق بىلەن ياتاقلىرىغا كىرىپ كېتىشتى. يۈرەكلەرنى ھېجرانغا تولدۇرغان ئايرىلش مىنۇتلىرى يېتىپ كەلدى،نىجات بىلەن گۈلنار قىيالماسلىق ئىچىدىكى كۆز بېقىشلار بىلەن ئايرىلشتى،ھەر ئىككىلىسى خىزمەت ھەلەكچىلىكى بىلەن جىددىي بولۇپ كەتكەن بولسىمۇ، لېكىن يەنە توردا ياكى تېلىفوندا كۆرۈشۈپ سېغىنىش تەشنالىقىغا ئارام ئىزدەشەتتى، نىجاد بىلەن گۈلنار نىجادنىڭ گۈلنارنىڭ يۇرتىدىكى بىرەر دوختۇرخانىغا ئالمىشىش ئۈچۈن يول مېڭىش ئىشىنى گۈلنار ئىشلەيدىغان دوختۇرخانا باشلىقى ،ساۋاقداشلىرى ۋە مۇناسىۋەتلىك كىشىلەر ئارقىلىق باشلىۋەتكەن ئىدى،بىراق يۆتكىلىش ئىشى ئېغىزدا دېمەك ئاسان بولغان بىلەن بىلەن ئەمىلىيەتتە تەس ئىدى،شۇنداقتىمۇ ھەر ئىككىلىسى بەل قويىۋەتمەي تىرىشچانىلق كۆرسىتىۋاتاتتى. ئۇلار كۈندە دېگۈدەك تېلىفوندا ئالاقىلىشىپ تۇراتتى، نۆۋەتچىلىك قىلمىغان كۈنلىرى توغرا كېلىپ قالسا توردا سائەت –سائەتلەپ بىر –بىرىگەبولغان يۈرەك سۆزلىرىنى ،ئۆزلىرى داۋالاۋاتقان كېسەللەرنىڭ ئەھۋالىنى ۋە يولۇققان كېسەللىك ئەھۋالىنى سۆزلىشپ چىقاتتى. يۆتكىلىش ئىشلىرى ۋە يۆتكەلگەندىن كېيىنكى توي ئىشلىرى ھەتتا كەلگۈسىدىكى تۇغۇلماقچى بولغان بالىسىغا ئىسىم قويۇشقىچە بولغان ئىشلار توغرۇلۇق شېرىن خىياللارنى قىلىشاتتى، شۇنداق قىلىپ ھەش –پەش دېگۈچە ئارىلىقتا بىر يىل ۋاقىت ئۆتۈپ كەتتى، ئۇلارنىڭ يۆتكىلش ئىشى ھېچ ھەل بولمايۋاتاتتى،نىجادنىڭ خىزمەتنى تاشلاپلا كېلىش پىلانىغا گۈلنار ،بولۇپمۇ ئۇنىڭ ئاتا –ئانىسى ‹‹خىزمەت تاپماق شۇنداق تەس تۇرسا، بولۇپمۇ دوختۇرلۇق كەسپىي دېگەن ھازىر ھەممە ئادەم كۆز تىكىۋاتقان، ھەممە ئادەم ئارزۇلايدىغان كەسپ تۇرسا،خىزمەتنى تاشلىۋەتسەڭ كېيىن قانداق قىلىسەن؟››دېگەن ئەمىلىي پىكىرلىرى ئارقىلىق ئۇنى توختۇتۇپ قويدى،ئۇمۇ ئۇلارنىڭ پىكىرلىرىنى ئورۇنلۇق ھېس قىىلپ ،خىزمەتتىن بىر يولىلا ۋاز كېچىش ئويىدىن يالتىيىپ يەنىلا يۆتكۈلۈش ئۈچۈن يول مېڭىش ئىشىنى داۋاملاشتۇردى.گۈلنارمۇ ئولتۇرسا –قوپسا  نىجادنىڭ  ياخشى تەرىپىنى قىلىپ ،ئۇنى ماختاپ كۆككە كۆتۈرۈپ ماختاپ ،ئۇنىڭ ئوبرازىنى  ئاچىسى ۋە ئاچىسىنىڭ يولدىشىنىڭ قەلبىدە خېلى يۇقۇرى ئورۇنغا كۆتۈردى ۋە ئۇلارنىڭ ماقۇللىقىنى قولغا كەلتۈردى. گۈلنارنىڭ ئاچىسىنىڭ تويغا قوشۇلغانلىق خەۋىرىنى نىجادنى بەكلا خوشال قىلىۋەتتى،ئۇ دەرھاللا بۇ خۇشخەۋەرنى ئاتا –ئانىسىغا يەتكۈزۈپ ئۇلارنى گۈلنارنىڭ ئۆيىگە يۈز كۆرۈشۈشكە بېرىشقا ئالدىراتتى، ئاتا –ئانىسى ئىككى  ھەپتىدىن كېيىن  گۈلنارنىڭ ئۆيىگە يۈز كۆرۈشۈشكە بېرىشقا ماقۇل بولدى. نىجاد بۇ خەۋەرنى  ھاياجان ئىچىدە  گۈلنارغا تېلىفون ئارقىلىق ئۇقتۇردى.تەشنا نەپەسلەرنىڭ قوشۇلۇش دەملىرىنىڭ يېقىنلاپ قالغانلىقىدىن ،ھەر ئىككىلىسىنىڭ خوشاللىقى ئىچىگە سىغماي قالغان ئىدى.ئۇلار ئالدىراشلىق ئىچىدە يۆتكۈلۈش ئىشىلرى ئۈچۈن تېخىمۇ كۈچەپ مېڭىشقا باشلىدى. نىجادنىڭ ئاتا –ئانىسى يۈز كۆرۈشۈشكە كېلىدىغانغا ئاز قالغاندا گۈلنارنىڭ ئاچىسىنىڭ يولدىشى تۇرغۇننىڭ يۈرەك كېسىلى قوزغۇلۇپ  تۇيۇقسىزلا يىقىلپ چۈشتى.ئۇلار يىغا –زارە بىلەن ئۇنى دوختۇرخانىغا ئېلىپ كەلدى،دوختۇرلار تەكشۈرۈپ دىئاگنوز قويۇش ئارقىلىق ،تاجىسىمان يۈرەك كېسىلى ئىكەنلىكىنى، دەرھال ئۈرۈمچىگە ئاپىرىپ يۈرەككە كۆۋرۈك سېلىش ئوپراتسىيىسى قىلدۇرۇش كېرەكلىكىنى ئېيتتى، بۇ گەپلەرنى ئاڭلاپ ئۇلارنىڭ  بېشىغا تاغ يىقىلغاندەك بولدى.گلنارنىڭ ئاچىسى دەرھال يولدىشىنى ئېلىپ ئۈرۈمچىگە ماڭدى، ئاچىسىنىڭ ئوتتۇرا مەكتەپتە ئوقۇۋاتقان ئىككى  بالىسىنىڭ ھالىدىن گۈلنار خەۋەر ئېلىپ تۇرىدىغان بولدى.بۇ كېلىشمەسلىك بىلەن نىجادنىڭ ئۆيىدىكىلەرنىڭ گۈلنارنىڭ ئۆيىگە يۈز كۆرۈشۈشكە كېلىشىمۇ كېيىنگە سۈرۈلدى.ھەممەيلەننىڭ كۆڭلى غەشلىككە تولدى،ئۇلارغا  ئەمدى گۈلنارنىڭ تۇرغۇن ئاكىسىنىڭ ئۈرۈمچىدىكى چوڭ دوختۇرخانىدا داۋالىنىپ ساق –سالامەت قايتىپ كېلىشىنى كۈتمەكتىن باشقا ئامالى يوق ئىدى. گۈلنار بىر تەرەپتىن خىزمەت قىلغاچ بىر تەرەپتىن ئاچىسىنىڭ ئىككى بالىسىنىڭ ئاش –تامىقىنى ئېتىپ، كىر –قاتلىرىنى يۇيۇپ ،ئۆي –ۋاقىلارنى تازىلاپ بەكمۇ جاپادا قالدى، ئۇ شۇندىلا بىر ئۆينىڭ مۇشەققىتىنى ئازىراق چۈشەنگەندەك بولۇپ ئاچىسىغا بەكلا ئىچى ئاغرىدى.نىجاد بىلەن ئىككىسى دائىم توردا ياكى تېلىفوندا كۆرۈشۈپ تۇراتتى،ھەر ئىككىلسىنىڭ  گەپ –سۆزلىرىدىن بىر خىل تاقەتسىزلىك ئىپادىلىنەتتى،شۇنداقتىمۇ يەنە بىر –بىرىگە تەسەللى بېرىپ كۆڭلىنى ئاۋۇندۇراتتى. مۇشۇ يېقىنقى كۈنلەردە نىجادنىڭ كەيىپىياتى شۇنداق ناچار، مىجەزىمۇ ئوساللىشىپ قالغان ئىدى، ئۆزى مەسئۇل بولغان بىمارلارغىمۇ شۇنداق قوپاللىق بىلەن مۇئامىلە قىلاتتى،بىمارلار خۇددى ئۇنى بۈگۈنلا كۆرىۋاتقاندەك ھەيرانىلق بىلەن ‹‹نىجاد دوختۇرغا نېمە بولغاندۇ؟ ئۇنداق ئەمەستى،ئەجەب بوپ قاپتا...؟››دەپ بىر –بىرىگە سوئال قويىشاتتى، نىجادنىڭ بۇنداق بولۇپ قېلىشىنىڭ سەۋەبچىسى گۈلنار ئىكەنلىكى باشقىلارغا بىر سىر ئىدى ئەلۋەتتە،نىجاد گۈلنار بىلەن كۆرۈشمىگىلى ئىككى ھەپتىدىن ئاشقان ئىدى، تېلىفون قىلسا تېلىفونى ئېتىك چىقتى.چ چ سىنى ئېچىپ باقتى، تورغىمۇ چىقمىغان ئىدى،چ چ سىغا بىرمۇنچە خەت قالدۇرۇپ قويغان ئىدى، بۇ خەتلەرگىمۇ جاۋاب يوق. ‹‹ ئۇنىڭغا نېمە بولغاندۇ؟ نېمىشقا تېلفونىنى ئېتىۋالىدىغاندۇ؟نېمىشقا مەن بىلەن كۆرۈشمەيدىغاندۇ.....؟››دېگەن  سوئاللار ئۇنى قىينايتتى،ئۇ ئادەتتە گۈلنار بىلەن تېلىفوندا ياكى توردىلا ئالاقە قىلغان بولغاچقا  بولغاچقا يا ئاچىسىنىڭ،يا  بىرەر  دوستلىرىنىڭ،ھېچ بولمىسا ئىشخانىسىنىڭ تېلفون نومۇرىنىمۇ بولسا يېزىۋالمىغانلىقىدىن ئۆزىنى ئۆزى دۆتتىن –دۆتكە سېلىپ ئەيىپلەيتتى. ئىشلىگەن كۈنلىرى كۈنبويى قاپىقى ئېچىلماي خارامۇش يۈرەتتى،بىمارلارغىمۇ قوپال تېگىدىغان بولۇپ قالغان ئىدى.خىزمىتىمۇ سەل نورمالسىز بولۇپ قالغان ئىدى،ئارىدىن يەنە نەچچە كۈنلەر ئۆتتى، نىجاد يەنىلا گۈلنار بىلەن ئالاقىلىشالمىدى، ئۇنىڭ ئىچى تىتىلداپ ئۆزى بىلەن ئۆزى زەردىگۆش بولاتتى،ئۇ بارغانسېرى بەرداشلىق بېرەلمەي قېلىۋاتاتتى،بارا – بارا كەچلىرى ھوجرا ئۆيىدە ئۆزى يالغۇز ھاراق ئىچىدىغان ئادەتنى تېپىۋالدى،بۇنداق ۋاقىتتا  ئاتا –ئانىسىنىڭ ‹‹جېنىم بالام، نېمە بولدۇڭ، سەن بۇنداق بالا ئەمەستىڭ، ئۇنداق قىلما....!››دېگەن يېلىنىش سۆزلىرىگىمۇ ئانچە پەرۋا قىلىپ كەتمەيتتى،ھاراقنى  ئىچىپ بولغاندىن كېيىن بېشىنى ئۈستەلگە قويۇپ ھۆڭگرەك ئېتىپ يىغلايتتى،‹‹سەن نېمىشقا  ماڭا تېلىفون قىلمايسەن گۈلنار؟ تېلىفونۇڭنى نېمىشقا ئېتىۋالىسەن؟مەندىن يۈز ئۆرۈپ كەتسەڭمۇ خەۋىرىڭنى بىر بېرىۋەتسەڭ بولمامدۇ؟سەن شۇنداق ۋىجدانسىز بولۇپ كەتتىڭمۇ...؟...››دەپ ئۆزىگە ئۆزى سۆزلىگنىچە ئۇخلاپ قالاتتى ياكى قەپەز ئىچىگە سولانغان شىردەك ئۆينىڭ ئىچىدە ئۇيان –بۇيانغا مېڭىپ تاملارنى مۇشلاپ قاتتىق ئاۋازدا ۋارقىرايتتى،يۈرىكىنى بىرەر مىڭ قۇرۇت غاجىلاۋاتقاندەك بىئارام بولاتتى، بۇنداق ۋاقىتتا بىچارە ئاتا –ئانىسى ئامالسىز ھالدا ئۇنىڭغا ئېچىنىپ ئۈنسىز ياش تۆكمەكتىن باشقا ئامال يوق ئىدى.    نىجادنىڭ خىزمەتتە بارا –بارا چېكىنىپ كېتىۋاتقانىلقى بۆلۈم مەسئۇلىنىڭ دىققىتىنى تارتتى، ئۇ نىجادتىن خىزمەتتىكى سۇسلۇشىپ كېتىش سەۋەبىنى سورىدى،نىجاد دەسلەپتە گەپ قىلغىلى ئۇنىمىدى، كېيىن ئەھۋالنى ئېيتتى، بۇ ئەھۋالنى ئۇققان بۆلۈم مەسئۇلى ئۇنىڭ دەم ئېلىشىنى ئېلىپ بېرىدىغانلىقىنى، گۈلنارنىڭ قېشىغا بېرىپ ھەقىقىي ئەھۋالنى ئۇقۇپ كېلىشىنى ئېيتتى،بۆلۈم باشلىقىنىڭ گېپىنى ئاڭلاپ  نىجاد  بەكلا خوشال بولدى، ئۆزىنىڭ ئەھۋالىنى بالدۇرراق ئېيتمىغىنىغا پۇشايمان قىلدى. شۇ كۈنى ئۇنىڭ كەيپىياتى خېلى ياخشى بولۇپ قالدى.چۈشتىن كېيىن ئىشقا كەلگەن نىجاد ئۆزىنىڭ ئورۇندىقىدا ئولتۇرغان ئۇچىسىغا قارىلىق كىيىملىرى كىيىۋالغان ناتونۇش بىر قىزنى كۆرۈپ ،‹‹بىمارلارنىڭ ئۇرۇق –تۇققانلىرى ئوخشايدۇ›› دەپ  ئويلاپ ئانچە ئېرەن قىىلپ كەتمىدى.    -    ياخشىمۇسىز، سىز نىجاد بولىسىزغۇ دەيمەن؟-دېدى ھېلىقى قىز.    - ھە، مەن نىجاد بولىمەن،-دېدى نىجاد جاۋابەن.    -مەن گۈلنارنىڭ يېقىن دوستى زىبىرەم بولىمەن.ئۆزۈم پىلانلىق تۇغۇتتا ئىشلەيمەن،- قىزنىڭ گېپى تېخى ئاياقلاشمىغان ئىدى ،ئۆزى كېچە –كۈندۈز سېغىنغان، ئىنتىزار بولغان، تەلمۈرگەن ‹‹گۈلنار›› دېگەن ئىسىمنىڭ ئاڭلاپلا نىجادنىڭ كۆزلىرى چەكچىيىپ ،نەپسى ئىتتىكلەشكە باشلىدى.    -گۈلنارغا  نېمە بولدى ؟ ئۇ تېلىفونىنى نېمىشقا ئېتىۋالىدۇ؟ ماڭا نېمىشقا تېلىفون قىلمايدۇ؟ مەندىن نېمىشقا ئۆزىنى قاچۇرىدۇ؟- نىجادنىڭ كەينى –كەينىدىن قويغان سوئاللىرى ئاستىدا قىز قايسىسىغا جاۋاب بېرىشنى بىلمىگەندەك تەمتىرەپ قالدى.    - ئالدىرىماي تۇرۇڭ، سىز چۈشتىن كېيىن ئىشلەيدىكەنسىز،كەچتە سىز ئىشتىن چۈشكەندىن كېيىن  مەن ھەممە ئەھۋالنى سىزگە ئېيتىپ بېرىمەن،-دېدى.نىجاد ئالدىرىماي قانداقمۇ تۇرالىسۇن؟ لېكىن قىز دېگەندەك ئۇ چۈشتىن كېيىن نۆۋەتچى ئىدى، دوختۇرلۇق خىزمىتى دېگەن جانغا مۇناسىۋەتلىك ،مەسئۇلىيىتى ئىنتايىن ئېغىر خىزمەت، سەللە بىخەستەلىك قىلنسا ياكى مەسئۇلىيەتسىزلىك قىلىنسا ئېغىر ئاقىۋەتلەر كېلىپ چىقىشى مۈمكىن ئىدى،شۇڭا ئۇ ئامالسىز ھېلىقى قىزنىڭ تېلىفون نومۇرىنى يېزىۋېلىپ  كەچ بولىشىنى تاقەتسىزلىك بىلەن كۈتۈشكە باشلىدى.    نىجاد كەچتە ئىشتىن چۈشىشى ھامان زىبىرەمگە تېلىفون قىلىپ، ئۇ چۈشكەن مېھمانخانىنىڭ ئالدىدا ئۇنى ساقلاپ تۇردى.زىبىرەم چۈشكەندىن كېيىن ئىككىسى بىر تاماقخانىنىڭ  ئايرىم جايغا كىرىپ ئولتۇردى.تاماق بۇيرۇتۇپ بولغاندىن كېيىن نىجاد تاقەززالىق بلىەن زىبىرەمنىڭ ئاغزىغا تەلمۈردى.    -    سىزنىڭ گۈلنارنىڭ خەۋەرىنى ئۇقشقا ئالدىراۋاتقانلىقىڭىزنى ئۇقىمەن، ئالدىرىماي تۇرۇڭ، مەن سىزگە ھەممە ئەھۋالنى ئېيتىپ بېرىمەن.ئۆزىڭىزنى بېسىۋېلىپ ،گېپىمنى ئاڭلاڭ. -دېدى زىبىرەم، نىجاد پۈتۈن زېھنىنى يىغىپ زىبىرەمنىڭ سۆزلىرىنى تىڭشىدى. -سەلىمە ئاچام تۇرغۇن ئاكامنى  ئۈرۈمچىگە ئوپراتسىيە قىلدۇرۇشقا ئېلىپ ماڭغانلىقىدىن سىزنىڭمۇ خەۋىرىڭىز بار ئىدى. ئۇلار كەتكەندىن كېيىن سەلىمە ئاچامنىڭ بالىلىرىنىڭ ھالىدىن گۈلنار خەۋەر ئېلىۋاتاتتى،بىر كۈنى چۈشتىن كېيىن گۈلنارغا نۆۋەتچىلىك كەپتۇ، ئۇ نۆۋەتچىلىكىنى تۈگىتىپ ئىشتىن چۈشكەندە كەچ سائەت ئون بولغان ئىكەن،ئىزىغا ئالماشقان نۆۋەتچى دوختۇرغا ئىشنى ئۆتكۈزۈپ بولغاندىن كېيىن ئۆيگە مېڭىپتۇ.نەچچە ۋاقىتلاردىن كەچلىك سىمېنادا ئىشلىگەن كۈنلىرى تۇرغۇن ئاكام ئۆزى  ئالغىلى كېلەتتى، ئۇ كۈنلەردە تۇرغۇن ئاكام بولمىغاندىكىن ئىلاجىسىز ئۆزى تاكسى توسۇپ قايتىپ كېلىۋاتاتتى، ئۆيگە كەلمەي دىجۇرنى ئىشخانىسىدا  ياتاي دېسە بالىلاردىن ئەنسىرەپ قېلىپ،ئۆيگە قايتىپ كېلىۋاتاتتى.ئۇ كۈنى نۆۋەتچىلىكنى ئۆتكۈزۈپ بولۇپ يولغا چىقىپ تاكسى ساقلاپ تۇرسا،قېشىدا ئۇيغۇر بالا ھەيدىگەن بىر تاكسى توختاپتۇ،گۈلنار تاكسىغا چىقىپ بارىدىغان يېرىنى دەپ بېرىپتۇ.بىرئاز ماڭغاندىن كېيىن يولدا تاكسى توسۇپ تۇرغان ئىككى بالا ئۇچراپتۇ، تاكسى شوپۇرى ئۇلارنى ماشىنىغا چىقارماقچى بولۇپ توختاپتۇ، گۈلنار قورقۇپ كېتىپ ئۇلارنى چىقارماسلىقنى ئېيتپتۇ،بىراق تاكسى شوپۇرى مۇسۇلماندارچىلىقتىن شېپى كەلتۈرۈپ ئۇلارنى تاكسىغا چىقىرىۋاپتۇ، گۈلنار چۈشۈپ كېتەي دېسە ئىشلەيدىغان دوختۇرخانا شەھەردىن سەل چەتتىرەك بولغاچقا ئاسان تاكسى كەلمەيتتى ،شۇڭا ئىلاجىسىز ئولتۇرۇشقا مەجبۇر بوپتۇ.بىرئاز ماڭغاندىن كېيىن شوپۇر  تاكسىنى باشقا تەرەپكە ھەيدەپتۇ، گۈلنار ‹‹ ئالدى بىلەن مېنى بارىدىغان جايىمغا  ئاپىرىۋېتىپ  ئاندىن،بۇلارنى ئاپىرىپ قويۇڭ››دەپتۇ، تاكسى شوپۇرى ئۇنىڭ گېپىگەن قۇلاق سالماي تاكسىنى ھەيدەپ مېڭىۋېرىپتۇ،ئىشنىڭ چاتاقىلقىنى سەزگەن گۈلنار ئەمدى ۋارقىرىماقچى بولغان ئىكەن،يېنىدا ئولتۇرغان بىرسى ئۇنىڭ قولياغلىقتەك بىرنەرسە بىلەن ئاغزىنى ئېتىۋاپتۇ، ئۇ شۇ يەردىلا ھۇشىدىن كېتىپتۇ.بۇ مەلئۇنلار گۈلنارنى شەھەر سىرتىغا ئەپچىقىپ نومۇسىغا تەككەندىن كېيىن، كېيىن ئۆزلىرىنى پاش قىلپ قويۇشىدىن ئەنسىرەپ ئۆلتۈرىۋېتىپتۇ،ئەتىسى  كۈن چۈش بولغاندا ئۆيى  شۇ يەرگە يېقىن ،كېرەكسىز نەرسە –كېرەكلەرنى يىغىدىغان بىر خەنزۇنىڭ بالىلىرى ئويناۋېتىپ گۈلنار ئۆلتۈرۈلگەن جايغا بېرىپ، ئۇنىڭ قانغا مىلەنگەن جەسىتىنى كۆرگەندىن كېيىن قىيا –چىيا قىلىشىپ ئانىسىنى چاقىرىپ كەپتۇ، ئانىسى دەرھال ئەھۋالنى جىددىي مەلۇم قىلىش رازۋېتكا ئەترىتىگە دىلو مەلۇم قىپتۇ، ساقچىلار نەق مەيدانغا كېلىپ ،ئۇنىڭ يېنىنى ئاختۇرۇپ  ھېچنەرسە تاپالماپتۇ،ئەتراپنى تەكشۈرپمۇ مۇناسىۋەتلىك ھېچقانداق نەرسىلەرنى تاپالماپتۇ،ۋەھشى قاتىللار ئۇنىڭ  يانفونى،زەنجىر-ھالقا قاتارلىق زىبۇ –زىننەتلىرى،ئىشقىلىپ قولىغا چىققانلىكى ھەممە نەرسىنى ئېلىپ كېتىپتۇ،خۇداغا شۈكرى ھېلىمۇ ياخشى جىنايەتچىلەر ئۇنىڭ چىرايىنى بۇزىۋەتمەپتىكەن، ساقچىلار ئۇنىڭ چىرايىنى سۆرەتكە تارتىپ تېلىۋېزوردا ئېلاپ بېرىپتۇ، گۈلنارنىڭ كېچىچە ،ئەتىسىمۇ ئۆيگە كەلمىگەنلىكىدىن قاتتىق ئەنسىرىگەن سەلىمە ئاچامنىڭ بالىلىرى دوختۇرخانىغا كېلىپ ئۇنىڭ ئاخشام ئىشتىن چۈشۈپ ئۆيگە كەتكەنلىكىنى ئاڭلاپ ، ئۇنىڭ دوستلىرىدىن ،ئۇرۇق –تۇققانلاردىن سۈرۈشتە قىلىپ ،دېرىكىنى ئالالماي ئاتا –ئانىسىغا تېلفون قىپتۇ،سەلىمە ئاچام بىلەن تۇرغۇن ئاكام گۈلناردىن ئەنسىرەپ قايتىپ كەلمەكچى بوپتۇ،كەچتە بالىلار تېلىۋېزوردا بېرىلگەن ئادەم ئىزدەش ئېلانىدىكى گۈلنارنى تونۇپ يىغا –زارە بىلەن ئۇرۇق –تۇققانلىرىغا خەۋەر قىلىپ ئۇلار بىلەن بىرگە جامائەت خەۋىپسىزلىك ئىدارىسىگە كەپتۇ ۋە گۈلنارنىڭ جگسىدىگە ئۆزىنى ئېتىپ ھۆڭگىرەك ئېتىپ يىغلىشىپتۇ.ئەتىسى سەلىمە ئاچام كسىلى تېخى بىر پۈتۈن ياخشى بوپ  بولالمىغان تۇرغۇن ئاكامنى ئايروپىلان بىلەن ياندۇرۇپ ئەكەپتۇ،ئۇلارنىڭ كېلىپ كۆرگنى گۈلنارنىڭ مۇزدەك جەسىدى بوپتۇ،سەلىمە ئاچام ئۆزىنى گۈلنارنىڭ جەسىدىگە  ئېتىپ ،جەسەتنى قۇچاقلىغىنىچە ئۈن سېلىپ يىغلاپتۇ،قىرقى نەزىرى بېرىلىپ بولغاندىن كېيىن ئۇنى ئۆلتۈرگەن قاتىللار قولغا چۈشۈپ ئوچۇق سوت ئېچىلدى، بۇ ياۋۇزلار  گۈلنارنى بۇلاپ بولۇپ ئۆلتۈرىۋەتكەندىن كېيىن،بىر – ئىككى ھەپتىگىچە جىم يۈرىشىپ ، ئاندىن يەنە زەھەرلىك قولىنى ئەتراپقا ئۇزۇتۇشقا باشلاپتۇ، بىراق بۇ قېتىم ئۇلار ئۆزىدىن كۈچلۈك رەقىپكە دۇچ كېلىپ قاپتۇ، ئۇلارنىڭ بۇلىماقچى بولغىنى باشقا شەھەردىن كەلگەن بىر خەنزۇ مۇخبىر بولۇپ ،مۇخبىر تاكسى شوپۇرىنىڭ تاكسىغا يەنە ئىككى ئادەمنى چىقارغىنىنى كۆرۈپ،ئەھۋالنىڭ چاتاقلىقىنى سېزىپ ئۇلارغا تۇيدۇرماي، جىددىي ئەھۋالغا يولۇققاندا ئەھۋال مەلۇم قىلىدىغان مەخپىي سىگنالنى بېسىۋېتىپتۇ،بۇ سىگنالنى قوبۇل قىلغان 110نىڭ ساقچىلىرى سىگنال تارقالغان ئورۇننى مۆلچەرلەپ ،ئۇ يەرگە بېرىپ  تاكسىنىڭ ئارقىسىغا چۈشۈپ ئاخىرى بۇ ياۋۇز ،قارا نىيەتلەرنى قولغا چۈشۈرۈپتۇ،ھېلىقى تاكسى ئەسلى ساختا نومۇر تاختىسى بېكىتىلگەن تاكسى بولۇپ،بۇ مۇناپىق شوپۇر كۈندۈزى كىرا قىلدىكەن،  كەچتە تاكسىنىڭ  نومۇر تاختىسىنى ئالماشتۇرۇپ،شەھەرنىڭ بۇلۇڭ –پۇچقاقلىرىدىن ئۆزلىرىگە  ئولجا  ئىزدەپ،تاكسىغا چىققانلارنى بۇلايدىكەن، ‹‹ئۆزلىرىگە خەۋپ يەتكۈزىدۇ›› دەپ قارىغانلىرىنى ئۆلتىرىۋېتىدىكەن، بۇ قارا نىيەتلەرنىڭ ئىچىدىكى بىرسى مۇنداق بۇلاڭچىلىق، ئادەم ئۆلتۈرۈشلەرگە خوردا بولۇپ كەتكەن بولۇپ،تېخى تۈرمىدىن چىققىلى ئۇزاق بولمىغان ئىكەن ،مۇناپىق تاكسى شوپۇرى دەسلەپتە  ئۇلارنىڭ دامىغا چۈشۈپ كېتىپتۇ، كېيىن ئۇلارنىڭ تەھدىت سېلىشى بىلەن ،بۇ ياۋۇزلارنىڭ شېرىكىگە ئايلىنىپتۇ،ئۇلار ئوچۇق سوتتا جىنايىتىنى تاپشۇرغاندا گۈلنارغا باسقۇنچىلىق قىلىپ ،ئۇنى ئۆلتۈرىۋەتكەنلىكىنى ھەم بىر خەنزۇ ئايالنىمۇبۇلاپ بولغاندىن كېيىن  ئۆلتۈرىۋەتكەنلىكىنى ئىقرار قىپتۇ،نەچچە ۋاقىتتىن ئېنىقلاش قىيىن بولغان گۈلنارنىڭ دىلوسى شۇنىڭ بىلەن ئېنىقلىنىپتۇ. سوت بۇ ياۋۇز قارانىيەتلەرگە تېگىشلىك جازا ھۆكۈم قىلدى،بۇ دېلونىڭ ئەمىلىي ئەھۋالى تېلىۋېزوردىمۇ كۆسىتىلگەن ئىدى، بۇ مۇناپىقلار بارار جايىغا بېرىپ ،قىلغانلىرى ئۈچۈن تېگىشلىك جازاسىنى تارتتى، لېكىن مېنىڭ ئاقكۆڭۈل،كۆيۈمچان  دوستۇم بىزدىن مەڭگۈ  ئايرىلدى،-دېدى زىبىرەم ئۈن سېلىقپ يىغلىغاچ.ئۇنىڭ سۆزلىرىنى ئاڭلاپ ئولتۇرغان نىجادنىڭ غەزەپتىن بىردەم كۆزلىرى چەكچىيەتتى ،بىردەم مۇشتلىرى مەھكەم تۈگىلەتتى، ئۇ ئۆزىنىڭ سۆيۈملۈك دىلبىرىنىڭ بۇنداق ئېچىنىشلىق قىسمەتلەرگە يولۇققىنىنى ئاڭلاپ ئۆزىنى يوقۇتۇپلا قويغان ئىدى،شۇ تاپتا ئۇنىڭ ئۆز نىگارىنى ۋەھشىلەرچە ئۆلتۈرىۋەتكەن، ئۆزىنى جۇدالىق ئازابىغا قويغان بۇ ياۋۇزلارنى بوغۇپ ئۆلتۈرىۋەتكۈسى كەلگەن ئىدى. نىجاد بىلەن زىبىرەم ئىككىسى ئۈستەلگە بېشىنى قويۇپ بىر ھازاغىچە  يىغا –زارە قىلىشتى، ئاندىن  زىبىرەم سەل ئۆزىنى بېسىۋېلىپ نىجادقا تەسەللى بەردى.    -مەن ئۇنىڭ بۇنداق پاجىئەگە يولۇققىنىنى ئۇقمىغاندىن كېيىن ئۇنى بىھۇدە ئەيىپلەپ يۈرۈپتىمەن، ئاھ مېنىڭ گۈلنارىم، مېنىڭ دىلبىرىم، مېنى مۇشۇنداق تاشلاپ كەتتىڭىزمۇ .....؟-نىجادنىڭ نالە –پەريادلىق ئاۋازى يەنە كۆتۈرۈلدى.تاماقخانىدىكى باشقا ئۈستەللەردە ئولتۇرۇشقان كىشىلەر بۇ يىغا ئاۋازىنى ئاڭلاپ ھەيرانلىق بىلەن ئەتراپىغا قارىشاتتى.    - ئۆزىڭىزنى بېسىۋېلىڭ نىجاد،مېنىڭمۇ يىغلىسام ئىچىمدىن مىڭ تاغار يىغا تۆكىلىدۇ، سەبرى قىلىڭ،ھەممىمىز ئۆلۈم ئەھلى ئىكەنمىز،  ئۆلۈم –يىتىم ھەممىمىزنىڭ بېشىدا بار ئىشكەن، سەبرى قىلايلى،گۈلنار ئۆلۈپ كېتىشتىن بۇرۇن ئىككىڭلارنىڭ ئىشىنى ماڭا ئېيتقان ئىدى، ئۇ سىزنى بەكلا ياخشى كۆرەتتى، ئۇ  ماڭا سىزنىڭ تېلىفون نومۇرىڭىزنى، ئىشلەيدىغان ئورنىڭىزنى ئېيتىپ بەرگەن ئىدى،بىچارە دوستۇم بېشىغا كېلىدىغان بۇ شۇملۇقلارنى يۈرىكى تۇيۇپ، ‹‹شۇنداق بىر ئىشلار بولۇپ قالسا سەن خەۋەر قىل››دېگەننى ئويلىغاندەكلا ماڭا تېلىفون نومۇرىڭىز بىلەن  ئىشلەيدىغان يېرىڭىزنى ئېيتىپ بېرىپتىمىكىن،ئەسلى گۈلنارنىڭ ئۆلۈمىدىن كېيىنلا سىزگە خەۋەر قىلماقچى ئىدىم، بىراق يانفونۇم يوقاپ كەتتى، نومۇرىڭىزنى يانفونغىلا كىرگۈزىۋاپتىكەنمەن، يانفون بولمىغاندىكىن نومۇرىڭىزنى ئۇقالماي قالدىم، ئاخىرى ئۆزۈمنىڭ دوستلۇق بۇرچىنى ئادا قىلىش  ئۈچۈن بۇ شەھەرگە كېلىپ سىز بىلەن كۆرۈشتۈم، ئەمدى ئەتە قايتىپ كېتىمەن،- دەپ سۆزىنى ئاياقلاشتۇردى زىبىرەم.    - مەنمۇ سىز بىلەن بىرگە بېرىپ ،گۈلنارنىڭ قەبرىسىنى يوقلايمەن، دەم ئېلىشىمنىمۇ ئېلىپ بولغان ،ئەتە سىز بىلەن بىرگە يولغا چىقىمەن،-دېدى نىجاد.ئەتىسى چۈش بىلەن نىجاد زىبىرەم بىلەن گۈلنار تۇرۇشلۇق شەھەرگە قاراپ ماڭدى.    - جېنىم گۈلنار، مېنى تاشلاپ كېتىشكە يۈرىكىڭىز قانداق چىدىدى؟ سىزسىز بۇ ھاياتنىڭ ماڭا نېمە لەززىتى بولسۇن...؟! مېنى داغدا قويۇپ كەتتىڭىزغۇ گۈلنار! مېنىمۇ بىللە ئېلىپ كەتسىڭىز بولمامدۇ؟سىز بىلەن بىر قېتىم بولسىمۇ يۈز كۆرۈشەلمىدىمغۇ گۈلنار....!ئاۋازىڭزنى بىر قېتىم بولسىمۇ ئاڭلىيالمىدىمغۇ...!مېنى كەچۈرۈڭ گۈلۈم، مەن سىز بىلەن كۆرۈشەلمىگەندىن كېيىن سىزدىن ئورۇنسىز گۇمانلارنى قىلىپ سىزنى ئەيىپلەپتىمەن،مەن ئەيىپلىك گۈلنار....مېنى كەچۈرۈڭ.....! تەقدىر نېمىشقا ئىككىمىزنى ئايرىۋېتىدىغاندۇ....؟جېنىم گۈلنار،مەن سىزنىڭ ئادەم قېلىپىدىن چىققان نىجىس مەلئۇنلار تەرىپىدىن ۋەھشىلەرچە ئۆلتۈرىلىشىڭىزنى، بىزنىڭ ئايرىلىشىمىزنىڭ قاباھەت ئىچىدىكى جۇدالىق بولۇپ قېلىشىنى پەقەتلا ئويلىمىغان ئىدىمغۇ.......!- مانا گۈلنارنىڭ تۇپرىقىغا باغرىنى يېقىپ، يەر قاساپ نالە –پەرياد ئۇرۇپ يىغلاۋاتقان يىگت نىجاد ئىدى.ئۇ يىغلاۋېرىپ ئايلىنپ قالاي دېگەن ئىدى.بىر كەمدە ئۇنىڭ بىلەن بىرگە تۇپراق بېشىغا چىققان ،كۆزلىرى ياش بىلەن تولغان سەلىمە ئاچىنىڭ ئوغلى نىجادنى ئاستا قولتىقىدىن يۆلىدى.    - ئۆزىڭىزنى بېسىۋېلىڭ نىجاد ئاكا، ئاچام بىزدىن مەزگىلسىز ئايرىلدى،شۇم مەلئۇنلار ئاچامنى بىزدىن جۇدا قىلدى، اللاھ بۇ مەلئۇنلارنىڭمۇ جازاسىنى بەردى،ئاچام سىزنى بەك ياخشى كۆرەتتى، بىزگە دائىم سىزنىڭ گېپىڭىزنى قىلىپ بېرەتتى، ئۇ رەسىمىڭىزنى بىزگە كۆرسۈتۈپ تۇرۇپ‹‹ اللاھ خالىسا، تۇرغۇنجان ئاكام تېنچ –ئامان ساقىيىپ قايتىپ كەلسە،نىجادنىڭ       يۆتكۈلۈش ئىشىلىرى ئوڭۇشلۇق بولسا تويىمىزنى بۇ يىل قىش كىرگۈچە قىلىۋالساق...››دېگەن ئىدى،بىراق....،-بالا گېپىنى داۋاملاشتۇرالماي گېلى بوغۇلۇپ قالدى.ئىككەيلەن يەنە بىردەم يىغا –زارە قىلىشتى.    ئۇلار تۇپراق بېشىدىن يېنىپ ئۆيگە قايتىپ كەلگەندىن كېيىن ئۆي ئىچىنى يەنە بىر پەس يىغا –زارە قاپلىدى.ئەتىسى نىجاد تاماق ۋاقتىدا سەلىمە ئاچىغا قاراپ:    -    مېنىڭ يۆتكۈلىدىغان ئىشىممۇ ھەل بولاي دەپ قالغان ئىدى، مەن قالغان ئىشلىرىمنىڭمۇ چالىسىنى پۈتكۈزۈپ بۇ يەرگە يۆتكۈلۈپ كېلىمەن،- دېدى.ھەممەيلەن ئۇنىڭ چىرايىغا ھەيرانلىق نەزىرى بىلەن تىكىلدى.    - گۈلناردىن ئايرىلىپ قالدىم، ئەمدى ئۇنىڭ تۇپراق بېشىنى بولسىمۇ يوقلاپ تۇرۇش مېنىڭ مەجبۇرىيىتىم، بولمىسا ئۇنىڭ روھى قورۇنۇپ قالىدۇ، مەن ئۇنىڭ قەبرىسىگە بولسىمۇ ھەمراھ بولسام، سۇنۇق كۆڭلۈم بىر ئاز بولسىمۇ تەسەللى تاپىدۇ،  بۇ يەرگە كەلمەي ئۆز يۇرتۇمدا تۇرىۋەرسەم ،ئۇنى تولا ئويلاپ نېرۋامدىن ئادىشىپ قېلىشىم مۈمكىن، گۈلنار تىرىك ۋاقتىدا ماڭا بۇ يەرگە كېلىشكە نېسىپ بولمىدى ھەم رىسقىمىزمۇ  قوشۇلمىدى،ئەمدى بولسىمۇ  بۇ يەرگە كېلىپ  ئۇنىڭ تۇپراق بېشىغا، ئۇنىڭ روھىغا ھەمراھ بولىمەن، -دېدى نىجاد بىر خىل قەتئىيلىك بىلەن.نىجادنىڭ  ئاتا –ئانىسىنى قايىل قىلىپ ،يۆتكۈلۈش ئىشلىرىنى بېجىرىپ،گۈلنار بار شەھەردىكى بىر دوختۇرخانىغا ئىشقا چۈشكىلى ئىككى يىل بولاي دەپ قالدى. ئۇ ھەر پەيشەنبە كۈنى ئەتىگەندە گۈلنارنىڭ تۇپراق بېشىغا چىقىپ ئۇنىڭ روھىغا ئاتاپ دۇئا –تىلاۋەت قىلىپ،ئۇنىڭ روھى بىلەن مۇڭدىشىدۇ،ئۇ ھازىر گۈلنارنىڭ دوستى زىبىرەم بىلەن خېلى ياخشى ئۆتۈپ كېتىۋاتىدۇ، اللاھ خالىسا ئۇلارنى رىسقى قوشۇلۇپ، گۈلنارنىڭ روھىمۇ خوش بولىدىغان ئىش بولغۇسى . مەنبە ئۆز قەلىمىم

yurkimzida

	ياخىشى يېزىپسىز ،ئۆلگەنگە زەئىپ دەيدىغان بىر گەپ بار كونىلاردا ،بىراق مىنىڭچە ھايات قالغان ئادەمگە بولدىكەن ھەممە ئىش

nurihsan55

	ھەي   ئاخىرىنى ئۆلۈم بىلەن ئاياغلاشتۇرۇپسىزغۇ    خېلى  ياخشى چىقىپتىكەن بولمىسا

sanjay

	ئىبرەتلىك   ھىكايە بوپتۇ        ،  بەزى ئىشلاردا  دىققەت قىلمىسا    بولمايدۇ   ، قىزلارمۇ بىخەتەرلىك تەدبىرلىرىنى بىلىپ قويغان تۈزۈك   ، ۋاختى كەلگەندە  ئەس قاتىدۇ دە

XAHZAD

	ئاخىرى ئادەمنى مەيۈسلەندۈرۈپ قويىدىكەن .ياخشى يېزىپسىز

نىسا

	يىغلىتىۋەتتىڭىزغۇ.

nazpari

	مەزگىلسىزلا ئايرىلىپ كىتىپتتۇغۇ بۇ بىر جۈپلەر. گۈلنارغا بەكلا ئىچىم ئاغرىدى. نىجاتنىڭ مەردانىلىكىگە ئاپىرىن ئېيتماي تۇرالمىدىم....

nazpari

	ئاۋۇ ئۈچ مۇناپىققا قانداق جازا بېرىلگەنلىكىنى ئەسكەرتمەپسىزغۇ؟

musilina

	nazpari يوللىغان ۋاقتى  2014-6-4 09:17 PM ئاۋۇ ئۈچ مۇناپىققا قانداق جازا بېرىلگەنلىكىنى ئەسكەرت ... ھېكايە مەزمۇنىنى كۆپەيتىۋەتمەسلىك  ئۈچۈن ھەم قانۇنغا ئۇيغۇن بولمىغان ىلىپ سالماسلىقىم ئۈچۈن ‹‹بۇ مۇناپىقلارنىڭ جىنايەتلىرى كۆپ بولغاچقا قانۇن بويىچە جازاغا تارتىلدى ››دەپلاقىسقارتىۋەتتىم....