كۆزۈم(ھېكايە)

ئۇتغۇر

	كۆزۈم (ھېكايە) ھەسەنجان ئابدۇراخمان 1     ‹‹يادەك ئۇزۇن كىرپىكلىرىڭ ئارىسىدا، قاپقارا قاشلىرىڭ ئاستىدا، ھەر شەيئىگە ھەر نەزەر سالغىنىڭدا خۇددى سۈزۈك سۇ ئىچىدە شوخلۇق بىلەن ئوينايدىغان بېلىقتەك ئويناقشىپ تۇرىدىغان شۇ نۇرلۇق، سېھىرلىك قوي كۆزلىرىڭ مېنىڭ يالغۇزلۇقتا نېمىگىدۇر تەلمۈرۈپ قارايدىغان نۇرسىز كۆزلىرىم بىلەن قاچان ئۇچراشتى، مېنىڭ شۇ ھەرىكەتسىز كۆزلىرىم قايتىدىن جانلاندى، كۆرۈنمەس نۇرلار ئوتقاشتەك چاقنىدى، لېكىن بۇنىڭلىق بىلەن ئىش تۈگىمىدى: كۆزلىرىمدىن بەدىنىمگە تارقالغان ئىللىق ھارارەت يۈرۈكۈمگە كېلىپ توختىدى، نازۇك يۈرۈكۈم تۇيۇقسىز بىر نەرسىگە ئۈسكەندەك قاتتىق سىلكىنىپ، يىنىك بولمىغان يارا شەكىللەندۈردى، بۇ يارا قايتىدىن ئۇلۇغ جەڭگە ئاتلانغان تۇلپاردەك تىز چاپقان يۈرىكىمنى ئېچىشتۇردى، يۈرىكىم ھەر قېتىم مۇشۇنداق سوققىنىدا بولسا، شۇ كىچىك يارا مېنى تاتلىق ئازابقا سۆرەپ كىردى. بەس! بۇنىڭ شىپاسى قېنى؟ يۈرۈكۈمدىن شۇنداق بىر سادا كەلدىكى: ئۇ ھېلىقى قوي كۆزدۇر! سېنىڭ كۆزۈڭ ئۇنىڭغا ئۇچراشقىنىدا يۈرۈكۈڭ ئارام تاپقۇسى. بارغىن، ئۇ شىپالىق كۆزگە تويماي قارىغىن... ئىھ، قوي كۆزلۈكۈم! كەلگىنە، ماڭا داۋا بولغىنە، مېنى بىتاب قىلىپ ئۆلتۈرەي دەمسەن؟! ياق! قوي كۆزۈڭنىڭ جىنايەتچى بولۇپ قېلىشىنى ھەرگىز خالىمەيمەن، مەڭگۈ! سەنمۇ شۇنداق ئويلايدىغانسەن؟     مىھراي، مىھرىڭ ئايدەك بولمىسۇن، ئونبەش كۈنلۈكلا؛ كۈندەك بولمىسۇن، ئادەمنى كۆيدۈرۈپ كۈل قىلىسەن. قوي كۆزلىرىڭ چولپان يۇلتۇز كەبىي چاقنىسۇنكى، دائىم جىمىرلاپ تۇرسۇن...››     كىتابىمنىڭ ئارىسىغا قىستۇرۇپ قويۇلغان چىرايلىق كونۋېرتنى سۇغۇرۇپ ئېلىپ، خۇددى بىرسى كۆرۈپ قالىدىغاندەك ھۇجرامغا كىرىپ ئەينەك ئالدىدا ئولتۇرۇپ، بۈرجەكلىرىگە ھەرخىل يۇلتۇزلار سىزىلغان بۇ سۆيگۈ ئەلچىسى ــــــ قەغەزدىكى ئوتلۇق قۇرلارنى قايتا-قايتا ئوقۇدۇم.خەتتىن بېشىمنى كۆتۈرۈپ ئەينەككە قارىغىنىمدا چوڭ كۆزلىرىمدىن ئالەمچە خۇشاللىقنى كۆردۈم. خىيال كەپتىرىم بۇغداي ئۆڭ، قارا قاش، پاكىز، رەتلىك كىيىنىدىغان، يۈزىدىن تەبەسسۇم كەتمەيدىغان، ئوتتۇرا بوي، كۆزلىرىمنىڭ ئېغىر ‹‹زەربىسى›› گە ئۇچرىغان ھېلىقى يىگىتنىڭ ئەتراپىدا توختىماي پەرۋاز قىلاتتى. كەپتىرىم ئۈنلىدىكى: نەمتۇلدىن كەمچىلىك كۆرمىدىم! توغرا، ئۇنىڭ ماڭا بەرگەن تەسىرى، ئۇ ناھايىتى ئەخلاقلىق يىگىت. ‹‹مىھراي، ئۇنىڭ ساڭا ھاياسىزلاچە قارىغان كۆزلىرىنى نېمە دەيسەن؟›› ئەلۋەتتە، بۇنىڭغا كۆزۈم سەۋەبچى! ‹‹مىھراي، ئۇنىڭ ۋاقىتلىق ھاياجان بىلەن يېزىلغان ئاددىي خەتلىرى ئۈچۈنلا، ئۇ يىگىتكە كۆڭۈل بۆلىۋاتامسەن؟ بۇ قاملاشمىدى!›› ياق يۈرىكىم، ئۇ ئاللىبۇرۇن سېنى ئىگىلەش ئۈچۈن كۈرەش قىلغان، ئەمدى بۇ ئۇتۇق ئۇنىڭغا تەۋە...      تۇيۇقسىز تېلفۇنۇم جىرىڭلىشى بىلەن تاتلىق خىياللىرىم ئۈزۈلدى.      ــــــ ۋەي، تېچلىقمۇ؟      ــــــ تېچلىق،ئۆزۈڭچۇ قوي كۆز؟      مېنىڭ سىردىشىم، ھايات خاتىرە دەپتىرىم، ئەڭ يېقىن دوستۇم گۈزەلئاينىڭ بۇ تاتلىق ئەركىلىتىشى بىلەن مەنمۇ بولۇشتۇم:      ــــــ ياق، تازا ئەمەس جۇمۇ؟      ــــــ يەنە نىمە بولدى ساڭا؟      ــــــ گۈزىلىم، سەن بىلەن كۆرۈشكۈم كېلىپ قالدى.      ــــــ ھى-ھى-ھى ــــــ ئۇنىڭ كۈمۈش قوڭغىراقتەك ياڭرىغان كۈلكىسى مېنىمۇ ھۇزۇر بىلەن كۈلدۈردى، ــــــ سېغىنىپ قاپسەن-دە جېنىم، نەدە كۆرۈشىمىز؟      ــــــ بىز دائىم بارىدىغان ھېلىقى چايخانىدا، يېرىم سائەتتىن كېيىن كۆرۈشەيلى ئەمىسە.      ــــــ بۇلىدۇ، مەن بۇرۇن بېرىپ ساقلىۋالاي. ھى-ھى-ھى...      ــــــ ئەسكى، ئەمىسە شۇنداق بولسۇن، ھېلى كۆرۈشەيلى.      ــــــ ھە.      تېلفۇنۇمنى كارۋات ئۈستىگە تاشلاپ قويۇپ، كۆز چاقنىتىدىغان ھەسەن-ھۈسەندەك پارقىرايدىغان ئەتلەس كۆينىكىمنى كىيىپ، قارا ياغلىقىمنى چىرايلىق چىگىۋالدىم. ئەلۋەتتە، ئازراق گىرىممۇ قىلىۋالدىم. تېلفۇننى ئېلىپ سائەتكە قارىدىم ۋە ئۇماق، كىچىك مارجانلىق سومكامنى قولتۇقلاپ ھۇجرىدىن چىقتىم.      مەنبە: ھەسەنجان ئابدۇراخمان ئۆز قەلىمى.      كەچۈرۈڭلار تورداشلىرىم. خانقىزلار خۇددى ئۆز ئېرىگە كۆيۈمچان ئايال ئۇنىڭ ئىشتىن كېلىشىنى ساقلىغاندەك، يىگىتلەر ئۆز سۆيگىنىنىڭ ۋەدىلەشكەن ئورۇنغا بالدۇرراق كېلىشىنى ساقلىغاندەك ساقلاپ قالىدىغان بولدۇڭلار!(داۋامى بار...)

زۇلھايا~

	ھى  ھى    مەن تۇنجى  بولۇپ  ئىنكاس  يازغۇچىكەنمەن         ياخشى بىر  ئەسەرنىڭ   باشلانغانلىقىغا    تەشەككۈر     قوللىرىڭىز    ھارمىغاي

sanjay

	ياشلىقىنى ئەسلىتىپ يۈرەكنى ياشارتاي دەپتۇق دە                  Kabhi Khushi Kabhie Gham

sayam

	مەن ئەڭ ياخشىسى ھەممىنى يېزىپ بولغاندا ئوقاي جىمۇ ، ئاخىرغا بەك تەشنا بولۇپ كىتىدىكەن ئادەم .

ئۇتغۇر

	2     تاملىرىغا داڭلىق شائىرلارنىڭ كلاسسىك شېئىرلىرى ھەرخىل نەقىشلەردە بېزەلگەن، ئىچىدىكى مىسرالىرى بەكمۇ چىرايلىق ھۆسىن خەتلەر بىلەن تولغان چوڭ قەغەزلەر چاپلانغان، تورۇسى بولسا گەنچ بىلەن نەقىشلەنگەن ئازادە، پاكىز چايخانىنىڭ ئىچىگە دائىم دېگۈدەك زەن سالساممۇ، بۈگۈن تەپسىلى قاراپ چىقتىم. كۈتكۈچى قىز ئالدىمغا كېلىپ ئورۇن كۆرسىتىپ بولغۇچە گۈزەلئاينىڭ قىزلارغا خاس نازۇك ئاۋازى ئاڭلاندى:    ــــــ قوي كۆزلۈكۈم، قېنى بۇ يەرگە مەرھەمەت.    ئۇ بۈگۈن بەكمۇ چىرايلىق بولۇپ كېتىپتۇ: ئۇزۇن قارا رەڭلىك تار يوپكىسى بىلەن زەپ ياراشقان شاپتۇل چېچىكى كوپتىسى ئۇنى بەكمۇ گۈزەللەشتۈرگەن ئىدى. ئۇزۇن شارپا ياغلىقىنى ئۇماق ئېغىزى، چىمدىپ قويغاندەكلا كۆرۈنىدىغان ئىنچىكە، ئۇزۇن بۇرۇنى، چوڭ، يا كەبى كىرپىكلىرى ئاستىدىكى شەھلا كۆزى، ئىنچىكە، قارا قاشلىرى... پۈتۈنلەي گۈزەللىك قاپلىغان ئات يۈزىنى تولىمۇ ياراشتۇرۇپ چەگكەن ئىدى...    ــــــ دېگەندكلا بالدۇر كېلىۋاپسەن. ھى-ھى-ھى...    ــــــ ئەسسالام جېنىم دوستۇم، ئائىلەڭدىكىلەرنىڭ ئەھۋالى قانداقراق؟ ــــــ گۈزەلئاي بىلەن يۈز يېقىپ ئەھۋاللاشتۇق.    ــــــ ئاللاھ خالىسا، ياخشى ئاداش. ئۆزۈڭنىڭچۇ، ئۆيدىكىلىرىڭنىڭچۇ، ياخشىدۇ؟    ــــــ ئىنشا ئاللاھ، ھەممىسى سالامەت. قېنى ئولتۇرە.    گۈزەلئاي، يېنىكى ئۇرۇندۇقنى تارتتى ۋە كۈتكۈچى قىزغا ئىككى ئىستاكان قىزىل گۈل چېيى بۇيرىتىپ قويدى. مەنمۇ ئورۇندۇقنى تارتتىپ ئۇنىڭ بىلەن ئۇدۇلمۇ-ئۇدۇل ئولتۇردۇم.    ــــــ مېنى ئەجەپ ئىككى كۈن كۆرمىسەڭ، كۆزلىرىڭ نېمىنىدۇر ئىزدەپ كەتكەندۇ، جانىم؟    ــــــ شۇنى دېمەمسەن، بەكلا كۆرگۈم كەلدى سېنى گۈزىلىم. قويە ئۇنداق تېلفۇن دېگەننى، يەنىلا يۈز تۇرانە كۆرۈشۈش بۆلەكچى دېگىنە.    ــــــ ئۇغۇ شۇ. ھە، ئىككى كۈندىن بېرى ئىشلىرىڭ قانداقراق ئاداش؟    ــــــ قانداق بولاتتى، بۇرۇنقىدەكلا: ئىشقا بارىمەن، ئىشتىن كېلىمەن، ئاتا-ئانامنىڭ ئەركىلەتمىلىرى بىلەن ئۆي ئىشلىرى قىلىمەن، كىتاب ئوقۇيمەن، تېخى سەن بىلەن تېلفۇندا پاراڭلىشىمەن. ھى-ھى-ھى...    ــــــ ۋوي تېخى، پاراڭلاشما قېنى، قانداق قىلىمەنكىن؟    ــــــ قىزغىن دېگىنە تېخى گۈزىلىم، قىزغىن پاراڭلىشىمەن سەن بىلەن.    ــــــ مېھراي، ئەجەپ ئويناقشىپ تۇرىدىغان قوي كۆزلىرىڭدىن بىر نېمە ھېس قىلىۋاتىمەن جۇمۇ مەن.    ــــــ ۋاي ساراڭ، ئارتۇق خىيال قىلما. ــــــ شۇنداق دېدىم-دە، ۋاللىدە ئوت ئالغان قىزىل يۈزۈمنى ئۇنىڭدىن قاچۇردۇم. ھېلىمۇ ياخشى كۈتكۈچى قىزنىڭ كېلىشى بىلەن خىجىللىقىم ئۇنىڭغا بىلىنمىدى.    چىرايلىق ئالتۇنرەڭ پەتنۇستا خۇشخۇي قىزىل چېيى كەلتۈرۈلدى. بىز چاي تەمىدىن ھوزۇرلانغاچ پارىڭىمىزنى قىلىشتۇق:    ــــــ تېخى مەندىن يۇشۇرماقچىمۇ؟ خەپ سېنى! ــــــ دوستۇم ئەركىلەپ تۇرۇپ خۇددى كىچىك بالىدەك دومسايدى.    ــــــ ھى-ھى-ھى... قاراڭ ماۋۇ ئۇمىقىمنىڭ قىلىقىغا.    ــــــ چاق-چاق قىلماي ئېيتيقىنچۇ؟    ــــــ ئەمىسە مېنى قېلىن دەپ، كۆزلىرىمنى جىنايەتچى دەپ ئەيىبلىمىگىن جۇمۇ!    ــــــ ھە، ئۆزۈڭ قېلىن، كۆزۈڭ گۇناھكار بولۇپ بولدى، دېگىن؟ ــــــ دوستۇم مېنى قەستەن تىرىكتۈرمەك بولاتتى. مەن دوستۇمغا نەمتۇلنىڭ خېتىنى ۋە نەمتۇلغا بولغان چۈشەنچەمنى ئەستايىدىللىق بىلەن سۆزلەپ ئۆتتۈم. گۈزىلىمنىڭ ماڭا بەخىت تىلەۋاتقان كۆزلىرى بىردىنلا ئويناقشىپ كەتتى ۋە:     ــــــ ھىم، ئەسلى مۇنداق ئىش باركەن-دە كۆزلىرىڭنىڭ ئىچىدە. مەن چىدىماي كېتىپ بارىمەن جۇمۇ. ھى-ھى-ھى... ــــــ دېدى ماڭا يالغاندىن ھەۋەسلىنىپ تۇرۇپ.     ــــــ قويە ئاداش ئۇ گەپلىرىڭنى، ۋىيەي...     ــــــ ھى-ھى-ھى... ئوينىشىپ قويدۇم قوي كۆزلۈكۈم. سېنىڭ بەختىڭ مېنىڭ بەختىم جېنىم دوستۇم...     ئۇنىڭ چەكسىز دوستلۇق مېھرى چىقىپ تۇرىدىغان بۇ يېقىملىق سۆزلىرى مېنى سۆيۈندۈردى.     ــــــ قايتامدۇق، مىھراي ئاداش؟ ــــــ ئۇ قاراڭغۇلۇق يېپىلىشقا باشلىغان سىرتقا قاراپ شۇنداق دېدى.     ــــــ قايتايلى ئاداش، سائەت سەككىزدىن ئېشىپتۇ. ــــــ ئۇنىڭ سومكىسىنى ئاختۇرۋاتقانلىقىغا قاراپ: ــــــ بولدى، مەن مېھمان قىلىمەن. ــــــ دىدىم.     ــــــ ياق، بۈگۈن سېنى تەبرىكلىگىنىم بولۇپ قالسۇن، يەنىلا مەن مېھمان قىلاي.     ئۇ ئۇنىمىغىنىمغا قارىماي پۇل ئالغۇچى خانقىز بىلەن ھېسابات قىلدى.     بىز چايخانىدىن چىقىپ قىزىقارلىق پاراڭلار بىلەن بىرگە ماڭدق ۋە ئۆيگە بارىدىغان دوقمۇشقا كەلگەندە:     ــــــ تېلفۇن قىلىشنى ئۇنتۇپ قالما جۇمۇ؟     ــــــ بىلدىم، سەنمۇ شۇ. ــــــ دىيىشىپ ئىككىلىمىز ئۆز ئۆيىمىز تەرەپكە قاراپ مېڭىشتۇق. بۈگۈن دوستۇمغا بۇ سىرنى ئاشكارلاپ ياخشى قىلغانلىقىمدىن رازى بولدۇم.     (داۋامى بار...)      مەنبە ھەسەنجان ئابدۇراخمان ئۆز قەلىمى.

sahiba33

	ياخشى يېزىپسىز. ئىككى قىزنىڭ دوسىتلۇقى كىشىنى سۆيۈندۈرىدىكەن. يەنە بىر تەرەپ بۇ ئەسەردەخۇتەن قىزلىرىنىڭ كىيىنىشلىرى ،بىر قىسىم ئادەتلەر تىپىك  گەۋدىلىنىپتۇ، خۇتەنگە يەنە بىر بارغاندەك،شۇ قىزلارنى ئۆز كۆزۈم بىلەن كۆرگەندەك ھېس قىلىپ قالدىم......

sahiba33

	ياخشى يېزىپسىز. ئىككى قىزنىڭ دوسىتلۇقى كىشىنى سۆيۈندۈرىدىكەن. يەنە بىر تەرەپ بۇ ئەسەردەخۇتەن قىزلىرىنىڭ كىيىنىشلىرى ،بىر قىسىم ئادەتلەر تىپىك  گەۋدىلىنىپتۇ، خۇتەنگە يەنە بىر بارغاندەك،شۇ قىزلارنى ئۆز كۆزۈم بىلەن كۆرگەندەك ھېس قىلىپ قالدىم......

ئۇتغۇر

	sahiba33 يوللىغان ۋاقتى  2014-5-22 11:23 AM ياخشى يېزىپسىز. ئىككى قىزنىڭ دوسىتلۇقى كىشىنى سۆيۈندۈ ... رەھمەت سىزگە. خوتەن سىزنى ھەر ۋاقىت قارشى ئالىدۇ.

sahiba33

	سىزگىمۇ رەھمەت.