ئەتراپىمدىكى كىشىلەر ۋە مەن

mihribanmm

	ھەركىم ئۆز تەقدىرىنىڭ تۆمۈرچىسى...                                                                                                                           _ئابابەكرى مۇختەر    ئاۋات كوچىلاردا كېتىپ بارىمەن، ئەتراپىمدا ھەرخىل ئادەملەر. خىلۋەت يوللاردا مېڭىۋاتىمەن، ئەتراپىمدا ھەرخىل ئادەملەر. قىستاڭ ئاپتوبۇستا ئولتۇرىۋاتىمەن، ئەتراپىمدا ھەرخىل ئادەملەر. ھەيۋەتلىك خىزمەت بىنالىرى، ئەتراپىمدا ھەرخىل ئادەملەر. ئاددىيغىنا ئۆي، ئەتراپىمدا ھەرخىل ئادەملەر. كېسەل كارىۋاتلىرى كارىدورلارغىمۇ تولغان دوختۇرخانىلار، ئەتراپىمدا ھەرخىل ئادەملەر. ئاددىيغىنا خىزمەت ئورنى، ئەتراپىمدا ھەرخىل ئادەملەر...  ئۆ تەقدىرى ئۈچۈن تىنىم تاپماي ئالدىراش مېڭىۋاتقانلار ھەم. كەشپىيات، ئىجادىيەت ئۈستىلىدە نەچچە كۈنلەپ ئۇيۇقسىز قېلىۋاتقانلىقىنىمۇ ئۇنتۇپ قېلىۋاتقانلارمۇ ھەم. تۇرمۇش بېسىمىنىڭ ئېغىرلىقى تۈپەيلى چىرايىنى غەم باسقانلارمۇ ھەم. ئۆز خىزمىتىدىن، ئائىلىسىدىن، ئەتراپىدىكىلەردىن ئاغرىنىپ ئېغزى-ئېغزىغا يەتمەي قاخشىغانلارمۇ ھەم.  بىر-بىرىگە ھەسەت كۆزلىرى بىلەن قاراۋاتقانلارمۇ ھەم.  ئالدىدا دوستۇم دەپ، كەينىدىن غاجىلاۋاتقانلارمۇ ھەم.  كۆزلىرىدىن مۇھەببەت ئۇچقۇنلىرى چاقناۋاتقانلارمۇ، غەزەپ ئوتلىرى يالقۇنجاۋاتقانلارمۇ، ئۈمۈدسىزلىك باسقانلارمۇ ھەم. غەمسىز ئوماقلارنىڭ تاتلىق كۈلكىلىرى، ئويناقلاشلىرىمۇ ھەم. خىزمىتىنى سۆيۈپ، ئەل، ۋەتەن، مىللەت، يۇرت ئىشقىدا تىنىم تاپماي يۈگرەۋاتقانلارمۇ، كۈنبويى قۇرۇق پاراڭ، تور ئويۇنلىرى بىلەن بىر كۈنلۈك خىزمەت ۋەزىپىسىنى ئادا قىلىپ كۈن ئۆتكۈزىۋاتقانلارمۇ ھەم. بالىسىنىڭ ئالىي مەكتەپنى مۇۋەپپىقىيەتلىك تاماملىشى ئۈچۈن  ھاردىم-تالدىم دېمەي بىر بۇردا نان يېسىمۇ بالىسىغا گېلى سىقىلىۋاتقان ئاتا-ئانىلارمۇ ھەم، ئاتا-ئانىسىنىڭ ئىقتىسادىي يۈكىنى يىنىكلىتىش ئۈچۈن دەرستىن سىرتقى ۋاقىتلىرىدا ئۆز تۇرمۇش خىراجىتىنى توپلاش ئۈچۈن تىرىشىۋاتقان سىتودىنتلارمۇ ھەم. ئاتا-ئانىسى ئەۋەتكەن پۇللارنى كىيىم-كېچەك، ئويۇن-تاماششا، ھاراق-تاماكا ئۈچۈن ئىسراپ قىلىۋاتقانلارمۇ ھەم، ئاتا-ئانىسىنى پۇلنى ئاز ئەۋەتتى دەپ قاخشاپ، ھەرخىل ناتوغرا يوللار ئارقىلىق چوڭقۇر ھاڭلارغا پېتىپ كېتىۋاتقانلارنى ھەم. ئۆز مىللىتىنى ئويلىمىسىمۇ ئۆزىنىڭ غورۇر-ۋىجدانىنىمۇ ئۇنتىغان ناكەستىلەرنىڭ ئادەم سودىسى قىلىشى، بوۋاقلارنى يېيىشى، ئەزالىرىنى قالايمىقان سېتىشىمۇ ھەم. ئاق تاماكا، زەھەر ئۈچۈن ئاتا-ئانىسى، ئىللىق ئائىلىسىنى خانە-ۋەيران قىلىۋاتقانلارمۇ ھەم.... ئەتراپىم مانا مۇشۇنداق ھەرخىل ئادەملەر بىلەن تولغان. مەنمۇ ھەم شۇنىڭ ئىچىدە.        كىم راست، كىم يالغان بۇنى بىلىشىم بەزىدە ھەقىقەتەن قىيىن. چۈنكى ئادەم دېگەن مۇكەممەل بولمايدىكەن.بەزىلەرنىڭ بىلىمىدىن، مۇۋەپپىقىيىتىدىن پەخىرلەنسىڭىز، ئۇنىڭ ئائىلىسىگە بولغان مەسئۇلىيىتىنى ئۇنتىغان ھالدا قىلغان بىر قىسىم قىلىقلىرى كۆزلىرىڭىزدىن نەپرەت ئۇچقۇنلىرىنى ياندۇرىدىكەن. بىرسىنىڭ ئاق چېكىپ يۈرگىنىدىن سەسكىنسىڭىز، ئۇنى شۇ يولغا باشلىغان ئېچىنىشلىق قسمەتلىرى يەنە ئىختىيارسىز ھالدا كۆزلىرىڭىزدىن ياش ئەگىتىدىكەن. بەزىلەرنىڭ ناھايىتى مۇلايىم، دىنايەتلىك قىياپىتىنى كۆرۈپ ئۇنىڭغا ئىچىڭىز كۆيسە، ئەپسۇس ئۇنىڭ بىر قىسىم ناشايان قىلىقلىرى ئۇنىڭ ئاشۇ مۇلايىم قىياپىتىنى شۇنچىلىك يىرگىنىشلىك كۆرسىتىپ قويىدىكەن. بىر قىسىملار ئەمەلىيەتتە شۇنداق ئويۇنچى، مەسئۇلىيەتسىز كۆرۈنسىمۇ، ئۇنىڭ ئىچكى دۇنياسىدىكى يۇرتقا، مىللەتكە بولغان مەسئۇلىيەتچانلىقى سىزنى ھەيران قالدۇرىدىكەن.بەزىلەرنىڭ چىرايىدىن بەخت تۇيغۇسى بىلىنىپ تۇرسىمۇ لېكىن ئائىلىسىدىكى نۇرغۇنلىغان ئوڭۇشسىزلىقلارنى بىلگىنىڭىزدە ئۇنىڭ مانا مۇشۇنداق غەيرەت-شىجائىتىدىن ھەيران بولىدىكەنسىز. بەزى كىشىلەر تولىمۇ ئاددىي-ساددا كۆرۈنسىمۇ ئۇنىڭ ئىچكى دۇنياسىنىڭ رەڭدارلىقىنى، نۇرغۇنلىغان بايلىقلارنىڭ مۇجەسسىمى ئىكەنلىكىنى بىلگىنىڭىزدە ئۇ ئادەم سىزگە تولىمۇ سېھىرلىك تۇيىلىدىكەن. بەزىلەر سىزنىڭ ئىچكى دۇنيارىڭىزنىڭ گۈزەللىكىدىن سىزنى دوستلۇققا تاللىسا، بەزىلەر سىزنىڭ ئۇنىڭغا مەلۇم جەھەتتىن نەپ يەتكۈزەلەيدىغىنىڭىز ئۈچۈن سىز بىلەن يېقىنلىشىدىكەن. بەزىلەر سىزنى چىن كۆڭلىدىن ياخشى كۆرۈپ، ئۆمۈرلۈك ھەمراھى قىلىپ تاللاش ئۈچۈن سىزنى قوغلاشسا، بەزىلەر كۆڭۈل خۇشى ئۈچۈن ھىسسىياتىڭىز بىلەن چاقچاقلىشىدىكەن. بەزىلەر تەقدىر-قىسمەت تۈپەيلى ئامالسىز سىزدىن ۋاز كەچسە، بەزىلەر  سىزنىڭ ئۇنىڭغا زۆرۈرىيىتىڭىز قالمىغانلىقى ئۈچۈن سىزدىن يىراقلىشىدىكەن. بەزىلەر يىراق جايلاردا تۇرۇپ سىزگە ئۈن-تۈنسىز بەخت تىلەپ دۇئا قىلسا، بەزىلەر يېنىڭىزدا تۇرۇپ سىزنى قاغايدىكەن. بەزىلەر كىسەك كارىۋاتلىرىدا ھاياتىنىڭ ئەڭ ئاخىرقى تىنىقلىرىنى ئۈمىد ئىچىدە ئۆتكۈزۈش ئۈچۈن كۈلۈمسىرىسە، بەزىلەر ئۆزىنىڭ نېمە ئۈچۈن بۇ دۇنياغا كۆز ئاچقىنىدىن ئۈمۈدسىزلىنىپ ئۆزىنىڭ ئۆلۈپ كەتمىەىنىدىن ئاغرىنىدىكەن. بەزىلەر گەرچە قىسمەت تۈپەيلى جىسمانىي جەھەتتىكى بىجىرىملىقتىن مەھرۇم بولغان بولسىمۇ، ئۆزىنى، ئائىلىسىنى، مىللىتىنى گۈللەندۈرۈش، ئۇلار ئۈچۈن يۈك بولۇپ قالماسلىققا تىرىشسا، يەنە بەزىلەر بەش ئەزايى ساق تۇرۇپ، بۇلاڭچىلىق، ئالدامچىلىق، ناشايان ئىشلار ئارقىلىق ئۆز روھىيىتىنى ئۆزى ۋەيران قىلىدىكەن. ئەلۋەتتە شۇ ۋىجدانسىز كىشىلەرنىڭ قۇلىغا ئايلىنىپ، شۇ يوللاردا مېڭىپ قالغان نارسىدىلىرىمىزمۇ بار. مانا بۇلار ئەتراپىمدىكى ئادەملەر ۋە مەن.    ئادەم دېگەن ئاجايىپ بولىدىكەن. ئۆز خاتالىقىنى باشقىلارنىڭ كەچۈرىۋېتىشىنى ئۈمىد قىلىدىكەنيۇ، باشقىلارنىڭ خاتالىقلىرىنى كەچۈرىۋېتەلمەيدىكەن. خاتالىقىنى تونۇپ توغرا يولدا ماڭسا بولدىغۇ دەيدىكەمنىز، ئەمما شۇ كىشىنىڭ بىر قىسىم ئۆتمۈشى شۇ كىشىنىڭ پىشانىسىگە مۆھۈر بولۇپ بېسىلىدىكەن. بەندىنىڭ خاتالىقىنى مېھىر-شەپقەتلىك ئاللاھلا ھەقىقىي كەچۈرىۋېتىدىكەن، بىراق ئىنسانلار بۇنىڭغا ئاجىزكەنمىز. كىشىلەرنىڭ ئاقكۆڭۈللىكىدىن، مىھرىبانلىقىدىن پايدىلىنىپ ھەرخىل يوللار ئارقىلىق ئۇلارنى ئالدايدىكەنمىز. ئالدامچىلارغا ئالدىنىپلا ھەممە كىشى كۆزىمىزگە ئالدامچى كۆرىنىپ كېتىدىكەن، يۈرەكلىرىمىزمۇ ئاستا-ئاستا قېتىپ كېتىدىكەن. بىر قىسىملىرىمىز باشقىلارغا ئۈن-تۈنسىز ياردەم قولىمىزنى سۇنساق، بىر قىسىملىرىمىز كىچىىككىنە ياردەم قىلىپ توختىماي ئۆز-ئۆزىمىزدىن ماختىنىپ كېتىدىكەنمىز. بىر قىسىملىرىمىز ئەل-يۇرتنىڭ تىنچ-ئامانلىقىنى ئويلاپمۇ قويماي بىگۇناھلارغا زىيانكەشلىك قىلساق، بىرقىسىملىرىمىز يۇرتىمىزنىڭ، مىللىتىمىزنىڭ ئابرويىنى قوغداش ئۈچۈن يات ئەللەردە باشقىلارنىڭ كۆزىمىزگە قولىنى كۆرسىتىپ تۇرۇپ «شىنجاڭلىق!»دەپ يىراق قاچقىنىنى كۆرسەكمۇ يەنە ئاستا يۈرىكىمىزدە قان يىغلاپ، چىرايىمىزدا ئۇلارغا كۈلۈمسىرەپ، ۋەياكى بەزىدە زۆرۈرىيىتى تۇغۇلغاندا ئۇلارغا بەزى ئەھۋاللارنى چۈشەندۈرۈپ، ئۇلاردىن ئەپۇ سوراپ ئۆز يولىمىزغا راۋان بولۇشقا مەجبۇر بولىدىكەنمىز.    مېڭىۋاتىمەن. كاللامدا ھەرخىل چىرماش خىياللار. ئەلۋەتتە ھەربىر ئادەمنىڭ ئۆز قىلمىشىغا سەۋەبى تېپىلىدىكەن. ياخشى ئىشنىڭمۇ سەۋەبى بولىدىكەن، ياماننىڭمۇ ھەم. بىرقىسىملىرىمىز مىللىتىم ئۈچۈن، خەلقىم ئۈچۈن نېمە ياخشى ئىش قىلىپ بەرسەم بولار؟ دەپ باش قاتتۇرسا، بىرقىسىملار باشقىلارنىڭ تىنچلىقىنى ۋەيران قىلىش بەدىلىگە خۇشاللىق تاپىدىكەن.«ھەركىم ئۆز تەقدىرىنىڭ تۆمۈرچىسى.»  بەزىلەر ئۆز تەقدىرى ئارقىلىق باشقىلارغىمۇ سايىۋەن بولسا، بەزىلەر ئۆز تەقدىرى ئارقىلىق، باشقىلارغا خەنجەر سانجىيدىكەن. بەزىلەر ئۆز تەقدىرى ئارقىلىق، باشقىلارنىڭ دەردىگە-دەرمان بولسا، بەزىلەر يارا ئېغىزىغا تۇز سېپىدىكەن. بەزىلەر ئۆز تەقدىرى ئارقىلىق باشقىلارنىڭ تەقدىرىنىڭمۇ گۈزەل بولىشى ئۈچۈن تاۋلانسا، بەزىلەر ئۆزىنىڭ كاج تەقدىرى تۈپەيلى ئەتراپىدىكى باشقا كىشىلەرنىمۇ ئۆز تەقدىرىنىڭ ئاچچىق ئىسلىرىدا تۇنجۇقتۇرۇپ قويىدىكەن. بەزىدە بىر ئادەم ئۆز تەقدىرىنىڭلا تۆمۈرچىسى بولۇپ قالماي، ئائىلىسىدىكىلەرنىڭ، يۇرتىنىڭ، مىللىتىنىڭ، ھەتتا دۆلىتىنىڭ تەقدىرىنىمۇ ھەرخىل قىسمەتلەرگە دۇچار قىلىپ قويىدىكەن. ئۆزىنى سۆيگەن كىشى ئائىلىسىنى سۆيەلەيدىكەن. ئائىلىسىنى سۆيگەن كىشى، مەھەللىسىدىكىلەرنى سۆيەلەيدىكەن. مەھەللىسىنى سۆيگەن كىشى، يۇرتىنى سۆيەلەيدىكەن. يۇرتىنى سۆيگەن كىشى مىللىتىنى سۆيەلەيدىكەن. ئالدى بىلەن ئۆزىمىزنى تونۇغاندىلا، ئائىلىمىزدىكىلەرنى، ئەتراپىمىزنى تونىيالايدىكەنمىز. ئەتراپىمىزدىكىلەرنىڭ خاتالىقلىرىنى كەچۈرۈپ، ئۇلارنىڭ ياخشىلار سېپىگە قوشۇلىشى ئۈچۈن شارائىت يارىتىپ بەرسەك، ئۇلارغا ئىشەنسەك، ئاندىن ئۇلارمۇ ھەقىقەت يولىغا قايتالايدىكەن. ...       مەنبە: ئۆز قەلىمىم

Uyghurbufet

	كىشىلەرنى ، كىشىلەر ئارىسىدىكى مۇناسىۋەتنى ، ئۇلارنىڭ خوشاللىق ھەم قايغۇلىرىنى بەكمۇ ئىنچىكىلىك بىلەن كۈزۈتىپسىز ۋە تەسۋىرلەپسىز！ ئادەم ئۆزىنى چۈشەنگەندە، ئائىلە ۋە تۇققانلىرىنى سۆيگەندە، ھاياتقا كۈلۈپ باققاندا، ياشاشنى پۇرسەت، ھاياتنى رىقابەت دەپ بىلگىنىمىزدە ، ئاندىن باشقىلارغا زىيان سېلىشتىن ھەزەر ئەيلەپ ، ناشايىن ئادەملەر ۋە ئىشلارغا ھىچ بولمىغاندا يانتاياق بولماي، كۆڭلىمىزدە بولسىمۇ نارازىلىق بىلدۈرۈپ ، تەن ۋە روھىمىزنى پاكلاپ، باشقىلارنىڭ تەجىربىلىرىدىن ئىبرەت ۋە ئۆرنەك ئېلىپ ، ياخشىلارنى قوللاپ ،ئئىلىم ئىگىلىرىنى ھۆرمەتلەپ ۋە ئۇلارنىڭ قەدرىنى قىلىپ، ھاياتىمىزنى مەنىلىك ئۆتكۈزگىلى بولىدۇ……

xuhrat85

	ئۇزنى چۈشەنمەي تۇرۇپ باشقىلارنى چۈشەنگىلى بۇلمايدۇ .

fathullah

	ھەركىم ئۆز تەقدىرىنىڭ تۆمۈرچىسى دىگەن سۆز شەيخ سەئىدى شىرازىنىڭ سۆزى.تۈزىتىپ قويۇشىڭىزنى ئۈمىد قىلىمەن.

mihribanmm

	fathullah يوللىغان ۋاقتى  2014-5-5 01:50 AM ھەركىم ئۆز تەقدىرىنىڭ تۆمۈرچىسى دىگەن سۆز شەيخ سەئىدى  ... ئەسكەرتىش.       كۆپچىلىككە تېخىمۇ تۇنۇش بولسۇن ئۈچۈن بۇ سۆزنى شەيخ سەئىدىنىڭ دېگەنلىكىنى تەكىتلەش مەقسىتىدە ئەمەس، ئابابەكرىنىڭ ئۆزىنىڭ تۇرمۇشىدىكى ئۆرنەك قىلغان سۆزى بولۇش سۈپىتى بىلەن شۇنداق يېزىلدى.

Uyghurbufet

	fathullah يوللىغان ۋاقتى  2014-5-5 01:50 AM ھەركىم ئۆز تەقدىرىنىڭ تۆمۈرچىسى دىگەن سۆز شەيخ سەئىدى  ... قوللايمەن. ئەسلىگە ھۆرمەت قىلىش كىرەك!

rahiyma

	تۇرمۇش تولىمۇ رەڭدار. خاپىلىقى ، قايغۇسى، ئازابى ئادەمنى قىينىسىمۇ يەنىلا رەڭدار ھاياتنىڭ بىر قىسمى سۈپىتىدە يېنىمىزدا، ھەتتا ئۆزىمىزنىڭ تۇرمۇشىدا نامايەن بولۇپ تۇرىدۇ.