توزىغان گۈل

yiltez5203

	توزىغان گۈل ھايات گۈلزارلىقىمدىن ھۆسنىگە تولغان ھىلال ئايدەك گۈزەل بىر گۈلنى كۆردۈم. ئۇنىڭ قان كەبى قىزىل مەرۋايىتتەك بەرگىللىرى خۇددى نازىنىننىڭ چوغ لىۋىدەك يىقىشلىق ۋە شىرىن ئىدى. ئۇنىڭ ھەر بەرگىسىدىن تارالغان ھىد مىنى مەسىت-خامۇش قىلاتتى، ئەقلىمدىن ئازدۇراتتى. مەن گۈل مىھرىگە قىنىش ئۈچۈن ئۇنىڭغا تىمتاس يىقىنلاشتىم ۋە ئۇنى باغرىمغا بىسىش ئۈچۈن قولۇمنى ئاستا ئۇزاتتىم. ئەمما ئۇنىڭ نەشتەر كەبى تىكەنلىرى قولۇمنى قاناتتى، يۈرۈكىمنى يىغلاتتى. بىراق مەن ئۇ گۈلگە چىدىمايىتىم، ئۇنىڭدىن بىر دەقىقە ئايرىلىشقىمۇ بەرداشلىق بىرەلمەيىتتىم.ئۇنىڭ نەشتەرلىرى مىنىڭ ھىجرانىمغا مەلھەم، يوپۇرماقلىرى قان ياشلىرىمغا تەسەللى، ھەر بەرگىللىرى مۇھاببىتىمنىڭ شاھىدى ئىدى.لىكىن ئۇ بۇنى بىلمىدى. مەن گۈلگە ئۆزۈمنىڭ بۇلبۇل ئىكەنلىكىمنى ئىيتقان ئىدىم. ئۇنىڭ ئىچىلىشىنى كۆرۈش ئۈچۈن ھەر كىچە تاڭ ئاتقۇچە ساقلىغان ئىدىم. گۈلزارلىقتىكى نۇرغۇن گۈللەر ئارىسىدىن پەقەت ئۇنى تاللىغان ئىدىم. ئۇنىڭ بىخەتەر ئۆسۈشى ئۈچۈن پەرۋانە بولغان ئىدىم. مەن ئۇنىڭغا ئىشىنەتتىم، ئۇنى شۇ قەدەر سۆيەتتىم، ئۇنىڭ ئىشقىدا سايرايىتتم. ئەپسۇس ، تولىمۇ ئەپسۇس....... مىنىڭ كىچىككىنە بىخەستەلىكىم تۈپەيلى ئۇ كىپىنەككە ئالداندى. تۈگىدى، ھەممىسى تۈگىدى...... مىنىڭ ئەقىدەم بەربات بولدى. پۈتكۈل ھۇجۇدۇم بىلەن، ئەقىل ۋە روھىيىتىم بىلەن تىكلىگەن بىر جان-بىر گىياھلىق مۇھاببىتىم ئاخىرلاشتى. يەتمەكچى بولغان ئارزۇلۇرۇم چۈشكە ئايلاندى.                گۈل تولا گۈللۈكتە، ئەمما ھەممىسى گۈلنار ئەمەس، تۈرلىرى كۆپتۇر ۋە لىكىن بارچىسى دىلدار ئەمەس.                 گۈل تولا گۈللۈكتە، ئەمما ھەممىسى گۈلزار ئەمەس، گۈل ئۆزى گۈللۈكتىكى ھەر بىرى ئەسرارى  ئەمەس. گۈل تولا گۈللۈكتە، ئەمما ھەممىسى ئىزھار ئەمەس، توزىسا گۈل بەرگىسى ئۇ ساڭا دىل يارا   ئەمەس. گۈل تولا گۈللۈكتە، ئەمما ھەممىسى توزغاق ئەمەس، گۈل ھۆسنىگە چۈشسە شەبنەم، ئۇ ساڭا كۆز ياش ئەمەس. گۈل تولا گۈللۈكتە، ئەمما ھەممىسى مودەن ئەمەس، گۈللۈكتىكى بارچە گۈللەر، كۈزگىچە تۇرغان ئەمەس. گۈل تولا گۈللۈكتە، ئەمما ھەممىسى غۇنچە ئەمەس، گۈل ئىچىلسا تاڭ سەھەردە بارچىسى پۇرىغان ئەمەس. گۈل تولا گۈللۈكتە، ئەمما ھەممىسى ئۆز يار ئەمەس. تىكەنلىكتۇر گۈزەل گۈللەر، ئۈزمەككە ئاسان ئەمەس. ئەمدى گۈل كىپىنەكنىڭ، كىپىنەك بۇلبۇل ئەمەس. مانا كىپىنەك خالىغاندا گۈل ھۆسنىدىن، شىرىن لىۋىدىن، مەسىتخۇش ھىدىدىن، گۈل پىتىدىن ئىختىيارىچە ھوزۇرلىنىپ كىتىدۇ. خالاس.    گۈل كىپىنەكنىڭ ئىلكىدە....... ئەمدى گۈل ھۆسنى سۇلىدۇ، بەرگىللىرى تۆكىلىدۇ، يوپۇرماقلىرى سارغىيىدۇ، تىكەنلىرى قۇرۇيدۇ. گۈل ئۆزىنىڭ ئالدانغانلىقىنى مانا مۇشۇ ۋاقىتتا ھىس قىلىدۇ ۋە تولىمۇ كىچىككەنلىكىنى ھەم تونۇپ يىتىدۇ. گۈل ناھايىتى تىزلا كۈز ئايلىرىنى كۈتىۋالدى. لىكىن تىخى ۋاقتى ئەمەس ئىدى.ئەمما  ئۇ توزىغان گۈلگە ئايلاندى. ھازىر ئۇنىڭ قۇرۇپ قاقشال بولغان غولىلا قالدى. غولىدا قۇرۇپكەتكەن تىكەنلىرى ئاندا-ساندا كۆرۈنىپ تۇراتتى. بۇ غولدا نە يوپۇرماق، نە بەرگىللىرى بولسۇن. ھەتتا كىپىنەكمۇ ھەم كۆرۈنمەيىتتى. دىمەك كىپىنەك گۈلنى تاشلاپ كەتكەن ئىدى. گۈل ھەم يىگانە، يىگانە پىتى ئىچىنىشلىق تەغدىرگە بوي سۇنغان ھالدا ھىجران ئازابىنى قاماللاپ جىمجىتلىققا ھۆكۈمران بولغان ئىدى. ئۇ ئەمدى گۈل ئەمەس........ ئۇنىڭ گۈزەل ھۆسنىنىڭ ئورنىغا زەپىرانلىق، شىرىن لىۋىنىڭ ئورنىغا چىرىندىلىك، مەسىتخۇش ھىدىنىڭ ئورنىغا بەتبۇيلۇق دەسسىدى. بۇ ئەمدى گۈلزارلىق ئەمەس، قەبرىگاھ بولدى. گۈلگە ئۆز غولى قەبرە تاش بولدى. گۈل ئەتراپىنى مۇدھىش-زەئىپلىك قاپلىدى. زىمىننى كۆكۈش تۇمان باستى. خۇددى جان ئالغۇچى پەرىشتە پۈتكۈل زىمىننى ۋەيران قىلىدىغاندەك سۈرلۈك ئىدى. ھەممە بۇ ئەزگۈلەر ئىچىدە ئۆزى ئۈچۈن ئويلىنىۋاتقاندەك سۈكۈتتە ئىدى. مەن غولدىن ئىبارەت بۇ قەبرە تاشقا ئىككىمىزنىڭ ئىچىنىشلىق تىراگىدىيىمىزنى مەڭگۈگە پۈتۈھ قىلىپ مۆھرىلىدىم. گۈل بىلەن بۇلبۇلنىڭ مۇھاببەت ھېكايىسى مەڭگۈلۈك ئابىدە بولدى.بۇندىن كىيىنكى ئاشىق -مەشۇقلار  بۇنىڭدىن ئىبرەت ئالسۇن. مەن كەتتىم. ئۆز بەختىمنى ئىزدەپ ماڭدىم. ئۇچىۋاتىمەن. قاناتلىرىم ئىغىر، يوللۇرۇم ئۇزۇن، ھەرتىنىقلىرىم ھەسرەتلىك، سايراشلىرىم ئازاپلىق. ئالدىمغا قارىدىم. ئەتراپ تۇمانلىق، نىشانىم ئىنىق ئەمەس، مەن ئىزدەپ ماڭغان بەخىتنىڭ نەدىلىكىنى ھەم بىلمەيمەن. چەكسىز ئاسمان . ئۆزۈم يالغۇز ، ئەتراپ جىمجىت، ئاۋازىمنى قويىۋىتىپ شۇنداق سايرۇغۇم كەلدى. بىراق ھىجران ئازابىدىن تىللىرىم گەپكە كەلمەي قالغان ئىدى. قىسقىغىنا ۋاقىت ئىچىدە يۈز بەرگەن بۇ فانتازىيە مىنى گاڭگىرىتىپ قويدى. مەن ھەم ئاچچىق ئەسلىمىلەر ئىچىدە تولغاندىم، زارلاندىم، ئۆلگىدەك بولدۇم. يار كىلىپ ياردەم قىلىپ ئالسا جىنىمنى مىنىڭ، ھىجراندا ئۆلسەم تۆكۈلمىسە قانلىرىم مىنىڭ. مەن رازى قان تۆكمەي ئۆلسەم يار ئىتەكلىرىدە، يار تۇتۇپ قولۇم، ئۆلتۈرسە بوغۇپ گىلىم مىنىڭ. ئاپتۇرى: ئاق تۈرك                         2014.3.8                          ئۈرۈمچى

tirikjassat

	قەلىمىڭىز بەك ئۆتكۈر ئىكەن...ئادەمگە بىر خىل ھۇزۇر بېغىشلايدىكەن،...

subat786

	ئالامەت تەسىرلىك يېزىپسىز سىزنىڭ كەسپىڭىز نىمە؟

alixir13

	بەك ياخشى يېزىپسىز ، قەلەم تۇلپارىڭىز ھارمىغاي .

گۈلقاش

	قەلىمىڭىز ھەقىقەتەن ئۆتكۈركەن ، ئىنتايىن قايىل بولدۇم....ماڭا قويۇپ بەرسە بىر مىسرانىمۇ جايلاپ يازالماسلىقىم مۇمكىن......ھارمىغايسىز...

yiltez5203

	رەخمەت قىرىنداشلا! ياقتۇرغىنىڭلادىن بەك خۇش بولدۇم. مىنىڭ ئەسلى كەسپىم گۈزەل-سەنئەت.

laylim

	ئىلھامىڭىزغا   ھەم  شۇ   ئۆتكۈر   قەلەملىرىڭىزگە  بارىكاللا

tizimlitiman

	بىرەر رەسىمنى تەسۋىرلىدىڭىزمۇ       خىلى گۇزەل رەسىم  ئوخشايدۇ ھە

Gvlmisal

	يازمىڭىزنىڭ مۇۋەپپىقىيىتى دەل ئوقۇرمەنلەرنىڭ يۈرىكىگە تەسىر قىلالىغانلىقىدا. قەلەملىرىڭىز بەرىكەتلىك بولسۇن!بىچارە گۈلگە ئىچىم ئاغرىۋاتىدۇ.

زەردار007

	laylim يوللىغان ۋاقتى  2014-3-9 02:11 PM ئىلھامىڭىزغا   ھەم  شۇ   ئۆتكۈر   قەلەملىرىڭىزگە  بارىكا ... ئەگەشتىم.