ياخشى كۈت

(شەيدا)

	ياخشى كۈت ئىڭڭەلەپ يىغلىغان تۇنجى يىغاڭدىن، كۆزىدە ياش تۇرۇپ كۈلىدۇ يەنا. بەختىڭنى ئۇنىڭدەك تىلىمەس ھېچكىم، ئالەمچە مىھىردە سۆيىدۇ ئانا. ئانا قۇش ئانامدىن ئۆگەندى بەلكىم، «بالا»نى قانداقچە ياخشى بېقىشنى. ئۇتۇڭدا كۆيگەنلەر بىلمىسە كېرەك، ئانىدەك سۈيۈڭدە قانداق ئېقىشنى. ئەركىلەپ كۈلۈشىڭ ئۇنىڭ ھۇزۇرى، يىغاڭدىن كېلىدۇ ئاڭا جىمى غەم. ھېچقاچان سېنىڭدىن ۋايساپ باقمىدى، كۆڭلىگە مىڭ ئازار بەرگەندىمۇ ھەم. ھەر مەرتەم دۇئاغا كۆتۈرگەندە قول، بەختىڭچۈن تاراملاپ تۆكىلەر يېشى. سەن ئۈچۈن بىر-بىرلەپ ئۆتۈپ كەتتىغۇ، ئۆمرىنىڭ باھارى،يېزى ھەم قىشى. چوڭ بولدۇڭ،بىر ئۆيگە تۈۋرۈك ئاتالدىڭ، شۇندىمۇ غېمىڭدە كۆيەر بالام دەپ. كاج پەلەك قىستىسا بويۇن قىسىشقا، سەن ئۈچۈن كىملەرگە يۈرەر «سالام» دەپ؟. شۇم ئەجەل ئانامنى چىللاپ كەتكىچە، ياخشى كۈت، رازىلىق ئالغىن بىرەر رەت. سەن ئۈچۈن قىلغاننىڭ مىڭدىن بىرىگە، تەڭ بولماس ئانامچۈن تارتقان مىڭ كۈلپەت. مەنبە: ئابلەت ئوسمان( شەيدا )

(شەيدا)

	ئادىشىم (مۇۋەششەھ) مۇھەببەتتىن يۈرەككە ئوتنى ياققان ئادىشىم، ئوتقا كىرسەم تەڭ كىرىپ،سۇدا ئاققان ئادىشىم. ئۇزۇق بىرىپ دوستلۇقنىڭ يىلتىزىغا مىھرىدىن، يامان كۆزگە نەپرەتتىن ئوقنى ئاتقان ئادىشىم. ھېكمەت باركى ھەر ئېغىز سۆزلىرىدە مىڭلارچە، شۇ ھېكمەتلىك سۆز بىلەن دىلغا ياققان ئادىشىم. ئەسكى خۇيۇڭ تاشلىغىن،ياخشى ئىشنى باشلىغىن!- دەپ پېقىرغا تۇنجى رەت ئېغىز ئاچقان ئادىشىم. مەيلى يىسەك ھالالدىن زاغرا ياكى ئۇماچ دەپ، شۈبھىلەنگەن بەتتىگە توپا چاچقان ئادىشىم. ماڭا گاھى دوق قىلىپ،سۆزلىرىنى ئوق قىلىپ، خاتا باسقان قەدەمگە مىخنى قاققان ئادىشىم. ئەل بەختىنى كۆزلەيدۇ،ھەقنى ھەق دەپ سۆزلەيدۇ، ناھەق كۆرسە كۆزىدە چاقماق چاققان ئادىشىم. تەبەسسۇمنى چىھرىدىن يىراق قىلماس ھېچقاچان، دىل ئازارى شۇڭىمۇ يىراق قاچقان ئادىشىم. ئېغىرىمدىن ۋايسىماي كۈلۈپ ئۆتتى تالاي رەت، چىن دوستلۇقنىڭ مىھرىدە مېنى باققان ئادىشىم. لالە گۈللەر پۇرەكلەپ ئېچىلغاندا ئىزىدىن، شۇ قاتارغا مېنىمۇ كەل دەپ قاتقان ئادىشىم. ئىگەم قىلسا سالامەت،چىن دوستلۇقنىڭ كۆكىدە، ھارماي گۈزەل ئەتىگە قانات قاققان ئادىشىم. مەنبە: ئابلەت ئوسمان شەيدا 8-فىۋرال كېچە

چىمەنA

	شېئىرىڭىزنى ياقتۇردۇم .

(شەيدا)

	چىمەنA يوللىغان ۋاقتى  2014-2-17 11:47 PM شېئىرىڭىزنى ياقتۇردۇم . ياقتۇرغىنىڭىزدىن خوش بولدۇم

تارىم

	شىئېرىڭىـز ناھايىتى ياخشى چىقىپتۇ قېرىندىشىم، ياخشى يىزىپسىز، قەلىمىڭىز تېخىمۇ بەرىكەتلىك بولسۇن…

ihbal99

	مەن دۆتمۇ قانداق ھېچ بىر مۇۋەششەھ ئىكەنلىكىنى ھېس قىلالمىدىمغۇ؟

چىمەنA

	چىن دوستنى ياخشى تەرىپلەپسىز ! ھەممەيلەننىڭ مۇشۇنداق چىن دوستلىرىنىڭ كۆپىيشىگە تىلەكداشمەن !

abdul915

	ihbal99 يوللىغان ۋاقتى  2014-2-18 12:09 AM مەن دۆتمۇ قانداق ھېچ بىر مۇۋەششەھ ئىكەنلىكىنى ھېس قىلا ... ھەر بىر مىسرا ياكى ھەر بىر كۇبلېتنىڭ بېشىدىكى ھەرىپ ياكى سۆزنى قوشۇپ، شېئىردىكى باش قەھرىمان ياكى ھادىسىنى ئىپادىلەيدىغان شېئىرىي شەكىلنى «مۇۋەششەھ» دەپ ئاتايمىز...

ئالمىچى

	شىئىر يىزىشنى سىزدىن ئۈگەنسەم بولغىدەك

ihbal99

	abdul915 يوللىغان ۋاقتى  2014-2-18 12:19 AM ھەر بىر مىسرا ياكى ھەر بىر كۇبلېتنىڭ بېشىدىكى ھەرىپ ي ... باش قەھرىمان ياكى ھادىسە ئەمەستۇ ؟ بەلكى ھەربىر كوبلىت ياكى ھەربىر مىسرانىڭ بېشىدىكى ھەرىپلەرنى قۇراشتۇرسا مەنىلىك سۆز ياكى كىشى ئىسمى چىقىدىغان شېئىر شەكلىدۇ ؟ ئىش قىلىپ ئىككىمىزنىڭ دېگەنلىرى ئاساسى جەھەتتىن ئوخشاشكەن . شۇنداقتىمۇ  مەن قۇراشتۇرۇپ ھېچ نەرسە چىقىرالمىغاچقا ئۆزەمنى دۆتمىكى دەپ ئويلاپ قالدىم .