ئۇزىتىش

muslina216

	ئۇزىتىش گۆھەر ئابلا ھەممىمىز بۇ يەرگە جەم بولۇپ ئولتۇرۇپ، ئۇچۇرما بولۇش ئالدىدا تۇرغان قۇش بالىسىغا ئوخشاش 365 قانىتىنى يېيىپ پىشايۋاندا تۇرغان كونا يىلنى ئۇزاتماقتىمىز. ئۇنىڭ قاناتلىرىغا قارايدىغان بولساق، ئەۋۋىلىسىدە قار پەسلىدىن باشلىنىپ، باھار چىچەكلىرىگىچە، تومۇز ئىسسىقتىن مول ھۇسۇللۇق كۈز پەسلىگىچە ھەر بىر قانىتى بىزگە ئۆزگىچە بەخت، ئۆزگىچە شاتلىق، ئۆزگىچە پۇرسەتلەرنى بەخش ئەتتى. ئۇ بىزگە زىمىستاننىڭ ۋەھىمىسىنى زىننەتلەپ، يېڭى ئەتىنىڭ گۈزەللىكىنى نامايەن قىلىدى. بۇ قۇش ئۆز ئۇۋىسىدا پەرۋاسىزلىق بىلەن، بىزنىڭ شاۋقۇن- سۈرەنلىك گاھىدا پىغانلىق كەچمىشلىرىمىزنى سۈكۈت ئىچىدە قەلىب خانىسىگە سىغدۇرۇپ، رىئاللىق بىلەن چۈشلەر تەبىرى گىرەلىشىپ كەتكەن، ئىچەلىسەڭ شىكەر سالغاندەك، ئىچەلمىسەڭ شىكەرسىز قىرتاق تۇرمۇش قەھۋەسىنى سۇندى. ئۇ بىزگە سېخيلىق بىلەن ھاياتلىقنىڭ رەڭدار سەھنىسىنى ھازىرلاپ بەردى، بىز رەڭلەر دۇنياسى ئىچىدە ئۆزىمىزنى پەردازلاپ، گاھى سەيياھتەك، گاھى مەدداتەك، گاھى شاھدەك، گاھى گادايدەك رولارنى ئالدۇق. گويا ئۇ بىزنى ساقلاپ تۇرىدىغاندەك... ھالا بۈگۈن بۇ قۇش ئۇچماقچى بولىۋاتىدۇ، ئەمما ئۇ يېڭى قۇش ئۇۋىسىغا قاراپ نىدا قىلماقتا؛ ئەي ئىنسان مەن سېنى قانداق ھەسرەت- نادامەتكە، بەخت- ئامەتكە ھامىلدار قىلاي بۇ يېڭى قۇش ئۇۋىسىدا سەن نىمىلەرنى ئارمان قىلىسەن؟ ئاڭلىدىڭىزمۇ ئۇنىڭ بۇ ساداسى يەردىن ئۈنۈپ كۆككە تارىماقتا، ئېتىز- ئېرىق قىرلىرىدىن دېڭىزلارغا شۇڭغىماقتا، دېكابىرنىڭ قەلبىدىن ياڭراۋاتقان باھار سىمپونىيەسىدەك قەلىبلەرنى لەرزىگە سالماقتا.... چېچەكنىڭ توزۇشى مېۋىدىن دېرەك. ئاپپاق چاچلىق بۇ قۇش ھالسىرىغىنىغا قارىماي تولىمۇ مەردانە قەدەملىرى بىلەن شۇنداق خىتاپ قىلماقتا؛ مەن كېتىمەن، ئەمما يېڭى بىر ئەتىنى تۇغۇپ، قەدىرلىگىن ياشلىق گۈلۈڭنى، قويمىغىن بوغۇپ. شىجائەت بېغىدا قاز بىلىم كانى، ئارزۇ شاخلىرىڭ ۋىسال مېۋىسى كەتمىسۇن قۇرۇپ... كۆرىۋاتامسىز؟ 365 تال ياپرىقى بىلەن ھۆپپىدە ئېچىلغان بۇ گۈل، گۈزەل بىر ئەتىنى تۇغدى، ئۇنىڭ مېۋىسى بولغان بۇ ئەتە، بىزنى ئانىسىغا ئوخشاش ھەر بىر ياپرىقىغا يېڭى ھېكمەتلەرنى يېزىشىمىز ئۈچۈن چاقىرماقتا... ئاڭلىدىڭىزمۇ؟ تەڭرى تېغىنىڭ قارلىق چوققىلىرىدىن، زەرەپشاننىڭ مۇزلۇق ئېقىنلىرىدىن، يورۇڭقاشنىڭ سۈزۈك تاشلىقلىرىدىن ئۆملۈك ناخشىسى ياڭرىماقتا... دېكابىرنىڭ ھەپىلدەپ قالغان تىنىقىدىن باھار ھىدى تارىماقتا... ئەنە بوسوغىمىزدا يانۋار كۈلمەكتە... كېلىڭ قولنى قولغا تۇتۇشۇپ، ئانا يەر باغرىنى يېرىپ بىخ سۈرۈپ كۆكلەپ، ئىجداھات ۋە ساداقەتتە، مېھنەتلىك تەرلىرىمىزدىن تارتىنچاق يانۋارنىڭ كۆكسىگە گۈللەر تاقايلى. پۈتۈن ۋۇجۇدىمىزدىكى مۇھەببەت بىلەن دېكابىرنىڭ قارلىق كېچىلىرىنى ئېرىتىپ، يانۋارنى باھار بۈشىكىگە بۆلەيلى ھاياتلىق ئىزنالىرىمىز بىلەن... ئۇزىتىش نەپەسلىرى ھارغىن دېكابىر، ئاپپاق گۈلنى قىستى چېكەمگە. سېغىنىشنى قوزغاپ دىلىمدا، مېنى يانداپ ئۆتتى غىپپىدە. سىلاشتۇردۇم ئۈچ يۈز كۈنۈڭنى، سۈكۈتلىرىم بۇزۇلدى شۇ تاپ. تۇتالمىدىم ماڭار چېغىڭدا، چۈشلىرىمنى كەتتىڭ ئوغۇرلاپ. بوسۇغامغا چىقتىڭ كۆزۈم ياش، خەير دىدىم ئۇزاتتىم سېنى. قارار تاپسۇن جىمجىتلىقىڭغا، ئېلىپ كەتكىن ھەممە سىرىمنى. كەل يانۋار باغرىڭنى ئاچقىن، باغۇ-بوستان قىلاي چۆلۈڭنى. ئۈز يۈز ئاتمىش نەچچە كېچەڭدە، ئېچىلدۇراي بەخت گۈلۈمنى. يېڭى يىل ئاللا قاچان كىرىپ بولدى، تېما مەلۈم سەۋەپلەر تۈپەيلدىن ۋاقتىدا مۇنبەردىكىلەر بىلەن ئەسرالىشالماي قالدى. شۇنداق بولسىمۇ بۇ تېمىنىڭ يەنىلا تورداشلار بىلەن كېچىكسىمۇ ئەسرالاشقۇسى بار ئىكەن، ئەزىزلەرنىڭ توغرا چۈشىنىشىنى ئۈمۈد قىلىمەن.

orhunogli

	شۇنداق ياخشى يېزىلىپتۇ. كەچۇرۇڭلار!قەشقەر شەھەر ئىچىدىن باشقۇرغۇچى دوسلار بارمۇ؟جىددى ياردەم كىرەك ئىدى،ياردەم قىلساڭلار.

baharim1

	بىر يىل ئۆتىدىكەن بىلمەيلا قالىدىكەنمىز

zubayda0997

	ياخشى يېزىلىپتۇ ، ئىجات تۇلپىرىڭىز ھارمىغاي.

URUKJAN

	يېڭى يىل كىردى. كونا يىلنى ئۇزاتتۇق. بىر ياش چوڭ بولدۇق. زىممىمىزدىكى مەسئۇلىيەت بىر پەللە يۈكلەندى. ئەجەل بىر قەدەم يېقىنلاشتى....