ئوغلۇمغا

narkas

	ئوغلۇمغا         ئوغلۇم ، سىز مېنىڭ   يۈرەك پارەم .  سىز ئاللاھنىڭ قۇدرىتى بىلەن بۇ يورۇق دۇنياغا كۆز ئاچقان ۋاقتىڭىزدا  ئانا بولۇشنىڭ بۇ دۇنيادا  تېپىلغۇسىز بەخت ئىكەنلىكىنى ھېس قىلىش بىلەن بىرگە ، سۆيۈملۈك ئوغلۇمنى يەنى سىزنى ئەخلاق - پەزىلەتلىك كىشىلەردىن قىلىپ يېتىشتۈرۈشتىن ئىبارەت بىر خىل مەسئۇلىيەتنىڭ زىممەمگە يۈكلەنگەنلىكىنىمۇ ھېس قىلغان ئىدىم ، ئەنە شۇنىڭدىن ئېتىبارەن سىزنى كۆز قارچۇقۇمنى ئاسرىغاندەك ئاسرىدىم ، بارلىق مېھرى - مۇھەببىتىمنى سىزگە سىڭدۈردۈم ، قەھرىتان قىشنىڭ ئۇزۇن كېچىلىرىدە ، باھارنىڭ مەيىن شامىلى جۇلا تاشلاۋاتقان گۈزەل باھار كېچىلىرىدە ، مەن ئېيتان مۇڭلۇق  ئەللەي ناخشىسى سىزگە ھەمراھ بولدى ، مەن ئېيتقان  گۈزەل ساماۋىي چۆچەكلەر سىزگە ھەمراھ بولدى .  گەرچە سىز كىچىك بولسىڭىزمۇ ، لېكىن قەلبىڭىزدە تەسۋىرلىگۈسىز بىر خىل تۇيغۇنىڭ مەۋج ئۇرۇپ تۇرۇۋاتقانلىقىنى ھېس قىلىپ تۇراتتىم . بۇ باشقا نەرسە ئەمەس ، دەل سىزنىڭ قەلبىڭىزدە ئويغىنىۋاتقان مۇھەببەت ئىدى ، چۈنكى پەقەت مۇھەببەتتىنلا مۇھەببەت تۇغۇلىدۇ . ئىنسانلار ئارىسىدا مېھرى - مۇھەببەت بولغاچقىلا بۇ دۇنيا گۈزەللىككە ئىگە ، مېھرى - مۇھەببەت بولغاچقىلا ئىنسانلار بىر بىرىگە ئىللىقلىق يەتكۈزۈپ تۇرىدۇ . ئەگەر مۇھەببەتنىڭ ئورنىنى نەپرەت ئىگىلىسە ، ئۇنىڭ ئىنسانغا ئېلىپ كېلىدىغىنى پەقەتلا تراگىدىيەدۇر ، شۇڭا مېھرى - مۇھەببەتسىز دۇنيانى تەسەۋۋۇر قىلىش تولىمۇ قورقۇنچلۇق !       ئوغلۇم ، سىز چوڭ بولىۋاتىسىز ، شۇڭا سىزگە شۇلارنى دېگۈم كېلىدۇ : بىز ياشاۋاتقان بۇ دۇنيا تولىمۇ مۇرەككەپ ، مەيلى كىم بولسۇن ، ياشاش جەريانىدا تالاي بوران - چاپقۇنلارغا ئۇچرايدۇ ، چۈنكى ھاياتتا تۈپتۈز داغدام يول يوق . كىمدۇر بىرىنىڭ شۇنداق دېگەنلىكى يادىمدا : ‹‹ قايغۇ ۋە ئازاپ بىر تۇغقان ›› . شۇڭا سىز ياشاش جەريانىدا تالاي ئوڭۇشسىزلىقلارغا ئۇچرىشىڭىز مۈمكىن ، مەيلى قانداق قىيىنچىلىقلارغا ئۇچرىشىڭىزدىن قەتئىنەزەر ئۆزىڭىزدىكى ئەڭ مۇھىم نەرسىنى يەنى ئادىمىيلىكنى يوقاتماڭ ! چۈنكى ھەرقانداق ئادەم ئۈچۈن ئادىمىيلىك ئەڭ قىممەتلىك بايلىق ، ئۇنى نۇرغۇن پۇل خەجلەپمۇ سېتىۋالغىلى بولمايدۇ . ئاشۇ ئىشلار  يادىڭىزدىمۇ ؟ سىز نەچچە قېتىم ‹‹ سىنىپىمىزدىكى نامرات ئوقۇغۇچىلارغا ياردەم قىلىمەن ›› دەپ بىزدىن پۇل بېرىشنى تەلەپ قىلدىڭىز ، مەن سىزنىڭ قەلبىڭىزدە بىخ سۈرىۋاتقان ، سىزنىڭ ۋۇجۇدىڭىزدا يىلتىز تارتىۋاتقان باشقىلارغا ياردەم قىلىشتىن ئىبارەت گۈزەل پەزىلەتتىن تولىمۇ سۆيۈندۈم ، ئاتا - ئانىلار يىغىنىغا بارغان ۋاقتىمدا ئوقۇتقۇچىڭىزنىڭ سىزنى ‹‹ بەك ئاقكۆڭۈل ، قولى ئوچۇق ، ساۋاقداشلىرىغا ياردەم قىلىشنى خۇشاللىق دەپ بىلىدۇ ... ›› دەپ  ماختىغىنىنى ئاڭلاپ ھاياجاندىن كۆزلىرىمگە ياش كەلگەن ئىدى ، سىزدەك باشقىلارنىڭ قەلبىنى ئىللىتالايدىغان ئوغلۇمنىڭ بولغانلىقىدىن  تولىمۇ سۆيۈنگەن ئىدىم . چۈنكى ھەرقانداق ئادەم ئۈچۈن ئادىمىيلىك بىلىمدىنمۇ مۇھىم ! ھەرقانداق ئائىلە ئۈچۈن گۈزەل - پەزىلەتلەرنى ھەمراھ قىلغان پەرزەنتنىڭ بولۇشى بەخت ، ئەكسىچە بولسا بەختسىزلىكتۇر . ئاللاھ بارلىق پەرزەنتلەرنىڭ كۆڭلىگە ئىنساپ بەرگەي !     ئوغلۇم ، ئاخىرىدا مەن سىزدىن شۇلارنى كۈتىمەن : ھاياتنىڭ خىلمۇ خىل سىناقلىرىغا بەرداشلىق بېرەلەيدىغان چىدام - غەيرەت سىزدە بولسۇن ،ئاجىزلارغا ھېسداشلىق قىلىدىغان ،  باشقىلارغا ياردەم قىلىشنى خۇشاللىق دەپ بىلىدىغان گۈزەل قەلب سىزدە بولسۇن ، سىزگە ئازار بەرگەنلەرنى كەچۈرۋېتەلەيدىغان كەڭ قورساقلىق سىزدە بولسۇن ، ئۆزىڭىز تونۇيدىغان ۋە تونۇمايدىغان نۇرغۇن كىشىلەرگە  يەتكۈزەلەيدىغان مېھرىبانلىق سىزدە بولسۇن ، ئۆزىڭىزنى ۋە مىللەتنى بۈيۈكلۈككە ئېلىپ بارىدىغان بىلىم ۋە ئىقتىدار سىزدە بولسۇن ! مەن كەلگۈسىدە سىزنىڭ قانداق ھەشەمەتلىك تۇرالغۇلاردا ، قانداق ئېسىل ماشىنىلاردا ئولتۇرغانلىقىڭىزنى كۆرۈشنى ئەمەس ، بەلكى  سىزنىڭ ۋۇجۇدىڭىزدا بەرق ئۇرغان گۈزەل خىسلەتلەرنى كۆرۈشنى ، سىزنىڭ قانچىلىك ئادەمگە ئىللىقلىق ئاتا قىلغانلىقىڭىزنى كۆرۈشنى بەخت ھېساپلايمەن !                                                      مەنبە : ئۆزۈم

nurjahan0997

	ھەر بىر ئاتا-ئانا بولغۇچىنىڭ ئاللاھنىڭ ئامانىتى بولغان تاتلىقلىرىنى ياخشى تەربىيلىشىنى ئۈمىد قىلىمەن

aa0998

	سىز ئاللاھنىڭ قۇدرىتى بىلەن بۇ يورۇق دۇنياغا كۆز ئاچقان ۋاقتىڭىزدا  ئانا بولۇشنىڭ بۇ دۇنيادا  تېپىلغۇسىز بەخت ئىكەنلىكىنى ھېس قىلىش بىلەن بىرگە ، سۆيۈملۈك ئوغلۇمنى يەنى سىزنى ئەخلاق - پەزىلەتلىك كىشىلەردىن قىلىپ يېتىشتۈرۈشتىن ئىبارەت بىر خىل مەسئۇلىيەتنىڭ ھەمە ئاتا-ئانىنىڭ باش تارتىپ بولمايدىغان مەجبۇريىتى.ھەقىققەتتەن ياخشى يىزپسىز قەلەم تۇلپارڭىز ھارمىسۇن .

gultaj

	ئىسىل تىما يوللاپسىز

dawakol1

	پاھ !!ئېسىل تىما!!! بالىلارنىڭمۇ ئۆزىگە دىيىلىۋاتقان مۇشۇ سۆزلەر توغرىسىدا ئويلىنىپ كۆرىشىنى ئۈمۈد قىلىمەن.

mahmut0996

	بالىلار ئۇچۇن بارلىقىنى ئاتاش ، ھەر بىر ئاتا -  ئانىنىڭ مۇققەددەس بۇرچى ، ھاياتلىق ئالىمى مۇشۇنىڭ بىلەن مەنىلىك ئوتىدۇ ، ياخشى تېما يوللاپسىز . رەھمەت .