قاتناشمايچۇ مەجلىسكە(ساتىرا)ئەنگەر

angar

	قاتناشمايچۇ مەجلىسكە بېرىڭ رۇخسەت باشلىقىم، قاتناشمايچۇ مەجلىسكە، يوقتۇر مېنىڭ ساقلىقىم قاتناشمايچۇ مەجلىسكە، بەك سىقىلدى بۇ ئىچىم ،قاتناشمايچۇ مەجلىسكە، تۈگەپ بولدى تاقىتىم قاتناشمايچۇ مەجلىسكە. سەۋەبىنى سورىماڭ ،سۆزلەپ كەلسەم گەپ تولا، ھەر قاتناشسام مەجلىسكە گۈل چىرايىم تۇتۇلا، دەۋېتىڭچۇ بىر قېتىم –قاتناشمىساڭ بوپتۇلا، ئاشسۇن سىزگە ھۆرمىتىم قاتناشمايچۇ مەجلىسكە. ئالدىڭىزغا كەلدىمغۇ بۇ يۈزۈمنى داپ قىلىپ، دىگۈدەكمەن ھەممىنى يۈرىكىمنى قاپ قىلىپ، دەيدىغاننى دەۋالاي يىسىڭىزمۇ  ھاپ قىلىپ، تۆكۈلسىمۇ ئىززىتىم قاتناشمايچۇ مەجلىسكە. مەجلىس بولسا مەيلىتى ئەھمىيەتلىك قىممەتلىك، ئەھمىيىتى نە تۇرماق ئېچىلىدۇ ئاپەتلىك، ياخشى قىپسەن دىمەستىن تىللاپ كېتەر «ھۆرمەتلىك››، ئاتالساممۇ بىجىقىم قاتناشمايچۇ مەجلىسكە. كىم تويمايدۇ مەجلىستىن كۇندە ئۈچ ۋاق ئېچىلسا، سەھەر ئېچىپ توختىماي تۇن كەچلەردە يېپىلسا، ئىش ئۇستىگە ئىش تولۇپ يوق ۋەزىپە  قېتىلسا، قاتتى ئەجەپ بۇ بېشىم ،قاتناشمايچۇ مەجلىسكە. تەلمۈرىدۇ بالىلار قاچان كىرەر مالىم دەپ، باشلىق ئاچار مەجلىسنى مېنىڭ نىمە كارىم دەپ، بىزلەر دەيمىز ئۈنتىنسىز  ئاشتى مېنىڭ  زارىم دەپ، بولسىمۇ گەر بەك موھىم قاتناشمايچۇ مەجلىسكە. تەكرار تەكرار ئوقىلار قىزىل باشلىق ھۆججەتلەر، (ئەمما سۈسىز قالىدۇ ،قاغچىرىغان كۆچەتلەر،) تېرەك كەبى ئۆسىدۇ قەغەزدىلا سۈپەتلەر، تۇتىلسىمۇ مۇئاشىم قاتناشمايچۇ مەجلىسكە. بىرى دىسە قول شىلتىپ ئىش تۈگمىسە ئاتىمەن، ھېلى چىقساڭ سۆرەمدىن،ساپانغىمۇ قاتىمەن، گەر كەينىدە قېلىشساڭ پۇت قولۇڭنى چاقىمەن، توختىماستا تىنىقىم قاتناشمايچۇ مەجلىسكە. قاتناشماستىن مەجلىسكە مەن باللارنى ئوقىتاي، شامدەك ئېرىپ كەتسەممۇ دىللىرىنى يۈرىتاي، ھە-،دىسىڭىز خۇشلۇقتا  سىزگە ناۋات چاي تۇتاي، ئۈشبۇ مېنىڭ تەكلىپىم قاتناشمايچۇ مەجلىسكە. 2014.1.7

ipar1

	قەلىمىڭىز ھارمىغاي،كۆڭلىمىزدىكىنى ئپادىلەپسىز

3678

	قەلىمىڭىز ئۆتكۈركەن يەنىمۇ تىرىشىڭ !!!!

nurjahan0997

	ياپونىيەدە پىلان كۆپ،جۇڭگۇدا يىغىن دەپ ئاڭلىغان ئىدىم. يوقتۇر مېنىڭ ساقلىقىم قاتناشمايچۇ مەجلىسكە، ماۋۇ گەپ نەق جايىغا چۈشۈپتۇ

gulsay

	نىمانچە ياخشى يېزىلغان شېئىر بۇ....خۇددى ھەممىمىزنىڭ ئىچىدىكىنى تېپىۋالغاندەكلا

gulqikiz09

	ۋاي بۇ مېنىڭ ھەم شۇنداقلا خزمەتداشلىرمنىڭ يۈرەك سۈزكەنغۇ .ئەجەپ بىىزار بۇلدى شۇ ئايقى چىقماس يىغندىن .

dawakol1

	تەكرار تەكرار ئوقىلار قىزىل باشلىق ھۆججەتلەر، (ئەمما سۈسىز قالىدۇ ،قاغچىرىغان كۆچەتلەر،) بەكلا ياقتۇردۇم، ئىشلىرىڭىز ئاسان بولغاي.

sayramkizi

	سىزنىڭ بۇ شېئىرىڭىز ئاتاقلىق شائىر  مەرھۇم  تېيۇپچان ئىليۇپنىڭ «ۋالاقتەككۈرۈپنىڭ ئۆلىمى» دىگەن شېئىرنى ئىختىيارسىز ئەسلىتىپ قويدى.جەمئىيەتتە سىز قامچىلىغاندەك ئىللەتلەر ھېلھەم تۈگىگىنى يوق .  سىزنىڭ بۇ ساترىك شېئىرىڭىزنى قۇتلۇقلاش بىلەن بىللە قەلىمىڭىزگە يەنىمۇ زور ئۇتۇق ۋە بەرىكەت تىلەيمەن.

faruh193

	ھارمىغايسىز

zubayda0997

	بەكلا ياقتۇردۇم