يېڭى سورت( فېليەتون) (پەيلىمۇچ)

goldiway

	يېڭى سورت                  (فېليەتون)                مەمتىمىن ئابلىز ( پەيلىمۇچ) ئاچچىق-چۈچۈك نەرسىلەرنى يازغاندا باش قەھرىماننىڭ ئىسمىنى ئەتراپلىق ئويلىنىپ دىيارىمىزدا كەم ئۇچرايدىغان ئىسىملارنى قوللىناتتىم. شۇنداقىمۇ يەنە قۇيرىقىدا شالتىقى بار بەزى ئۇلۇغ ئۇششاق ئاقساقاللارنىڭ ئىسمى بىلەن ئوخشاش چىقىپ قېلىپ ئۇلارنىڭ «قىلىقىمىزنى ئوچۇق يازغاننىڭ ئۈستىگە  ئىسمىمىزنىمۇ ئەينەت يېزىپ قويسا سېپى ئۆزىدىن چوڭ دېلو بولۇپ قالمامدۇ، تەشكىل ئۆزى ئۇقۇپ تەكشۈرسىمۇ بۇنداق يېيىۋەتمەيدىغان تۇرسا» دەپ يىراقتىن قارىغا ئېلىپ تۇيۇقسىز زەربە بېرىدىغان ئاسىي دۈشمىنىگە ئايلىنىپ قالدىم. ئېرىشكىنىم ئەجرىمگە بويلاشماي ئاران نېنىمنى تېپىپ يەۋاتقان مەندەك بىر ئۇششاق يازغۇچىغا نىسبەتەن ئاڭلاپلا ھۆكۈم چىقىرىدىغان پىچىقى ئىتتىك تۆرەملەرنىڭ غەزىپىگە ئۇچراش چۆمۈلىگە زەمبىرەك ئاتقاندەك كۆتۈرۈپ قوپقىسىز چوڭ زەربە بولۇپ بىر يىقىلسام بىر قانچە يىلغىچە ھۇشۇمغا كېلەلمەيتىم. شۇڭا بۇ قېتىم كاۋاپمۇ كۆيمەيدىغان، زىخمۇ كۆيمەيدىغان ئەپلىك چارىدىن بىرنى تاپمىغىچە كۆزۈمگە ئۇيقۇ كىرمەي قەلىىمىمگە يۈگەن سېلىپ سەگەكلىك بىلەن باش قاتۇردۇم.   ئۆزۈم تۇرۇشلۇق ناھىيىدىكى چوڭ-كىچىك ئەمەلدارلانىڭ ئىسمىنى تىزىىملاپ قاتاردا يوق ئىسىمنى قوللىناي دېسەم، ۋىلايات بويىچە تىزىملاشتا چىقىپ قالدى. ۋىلايەت بويىچە يوق ئىسىمنى قوللىناي دېسەم ئۆلكە بويىچە تىزىملاشتا چىقىپ قالدى. دائىرە كېڭەيگەنسىرى ئەمەلنىڭ دەرىجىسى ۋە ئوخشاپ قېلىش مۇمكىنچىلىكى تەڭ چوڭىيىپ مېنى تېخىمۇ ئەنسىرىتىۋەتتى. قەلەمنى تاشلاپ  خوتۇننىڭ ئوچىقىغا ئوت قالاپ ئولتۇرسام مېنى بىرسى نىمىشقا يازمايسەن دەپ سوراققا تارتماستى دەپمۇ ئويلىدىم. لىكىن شەيتىنىم مازاق قىلىپ ئۇنچىۋالامۇ قورقۇپ كەتمە ئەمەلدارلار دېگەن ئەدەبىي نەرسىلەرنى كۆرمەيدۇ. كۆرسىمۇ ئۇنچىلا كۆرۈپ تاسقاپ يۈرمەيدۇ دېسە، ئەقلىم قوپۇپ سەل چاغلاشقا بولمايدۇ ئوقۇپ تەھلىل قىلىپ ئېقىنى قارا قىلىپ يەتكۈزىدىغانلارمۇ مۇ يوق ئەمەس دەپ سەگىتىپ قۇياتتى.   شۇنچە سەۋەپ قىلسام  سۆۋەتتە سۇ توختىماسمۇ زادى!؟ ئويلاپ كېلىپ ئادەملەرنىڭ ئىسمىنى قوللىنىشتىن  ئۈمىت ئۈزۈپ  ھايۋانلارنىڭ ئىسمىنى قوللىنىشنى  ئويلاپ روھلىنپ قالدىم. لىكىن قوللىنىپ بولۇپ سۈت ئىچكەندە ئاغزى كۆيگەن ئادەم قېتىقنى پۈۋلەپ ئىچكەندەك ئىككىلىنىپ قالدىم: ھايۋان دېگەننىڭ  ئالىسى تېشىدا مانا مەن دەپ چىقىپ تۇرسا، ئادەمدەك يوشۇرۇن پايلاپ يۈمەي ئۇدۇل كېلىپلا چىشلەپ، تېپىپ يەنچىۋەتسە مېيىپ بولۇپ قالمامدىم!.    باشنى قاتۇرىۋەرسە ئەقىلنىڭ ئىشلىمەي ئىلاجى يوقكەن. ئاخىرى سۆۋەتتە سۇ توختىدى. ئەڭ بىخەتەر ئىسىم ئەتراپىمدا تۇرسا بىلمىگىنىمنى قاراڭ! ئۆسۈملۈكلەرنىڭ ئىسمىنى قوللانسام كۆز قۇلىقى، پۇت، قولى يوق؛ كېسىپ كۆيدۈرىۋەتسىمۇ ۋايجان دېمەيدىغان تۇرسا شۇلارنىڭ ئىسمىنى قوللانسام بولمامدۇ!؟ ئەقلىمگە بارىكاللا ئېيتىپ، غەمدىن بىراقلا خالاس بولۇپ، خاتىرجەم يېزىشقا كىرىشىپ «يېڭى سورت» دېگەن فىليەتونىمنى  مۇنداق باشلىدىم:   - قاپاق يېزا باشلىقى بولۇپ ئۇزۇن ئۆتمەي نوگاينى كەنت مۇدىرلىقىغا كۆرسەتتى. قارىغاي، سۇۋادانلار كېسىلىپ باراڭ ياسالدى. قوغۇن، تاۋۇزلار قاپاقسىمان، ئالما، ئامۇتلار نوگايسىمان تۈس ئېلىپ باغۋەنچىلىك كەسپىدە ەسەۋۋۇردىن ھالقىغان پوخاقسىمان«يېڭى سورت» بارلىققا كەلدى...

abdulahad

	ئاجايىپ تەسەۋۋۇر !!!

vincent

	قەلىمىڭىزنى مۇنداقلا  تەۋرەتسىڭىز  ئۈنچە ياغىدىكەن قېرىندىشىم......تەسەۋۋۇرغا ئىگە ئىكەنسىز!

0102.

	ئوبدان، ماڭا ئوخشاش ئۈزىڭىزنىڭ ئىسمىنىمۇ يېزۋېلىڭ

wolf007

	ئىشەك تەختكە چىقسا  جىمى خەلىق ھاڭرامىش ...

dawakol1

	بىر ئىت شەپىگە قاۋىسا ئون ئىت ئەگىشىپ قاۋاپتۇ  دەپ سىز دىگەندەكلەرمۇ خېلى باركەن، ئەمما ئاۋۇ ئاخىرقى بىر بۆلەك دەششەت چىقىپتۇددە،بىر كۈلىمەن بىر ئويلىنىپ تۇرۇپ قالىمەن،ھەيييييييي

سىم@سىم

	ما چارە بۇلىدىكەن .

karwan3027

	ھەي  ھەقىقەتەن پەيزى يېزىۋىتىپسىز . مۇقەددىمىسى  شۇنچە جېق بولسىمۇ .  فېليەتونىڭىز  شۇنداق  شۇنداق  يېغىنچاق .ۋە مەزمۇنلۇق

sirdax998

	مەنىسى چوڭقۇركەنغۇ...

a.dolan

	مەمتىمىن ئابلىز- فېليەتون يولىدا ئۇزۇندىن بېرى قەلەم تەۋرىتىپ كېلىۋاتقان فېليەتون يازغۇچىسى، .ئۇنىڭ بۇندىن كىيىنكى ئىجادىيىتىگە زور ئۇتۇق تىلەيمەن. ئۇيغۇر فېليەتونچىلىقى مۇشۇنداق ئوت يۈرەك ئەزىمەتلەرگە مۇھتاج.