ھەققانىي: پىنھان جاي (ساتىرا )

akkani

	پىنھان جاي ( ساتىرا) ئاپتۇرى: ئابدۇۋەلى راخمان ھەققانىي دوراپ ئەينەن ئىشرەتنىڭ سۈرىتىنى سىزغان جاي، ئىچەرمەننى شىرەگە پات-پات جۇغ-جەم قىلغان جاي، ئىسراپچىلىق-چوڭچىلىق كىلىپ چاڭگا تىزغان جاي، ئاددى ئۆرپە-ئادەتنى ھەشەمەتتە بۇزغان جاي، ئەجەپ پەيدا بوپ قالدىڭ ئايرىمخانە-پىنھان جاي. ** تەخسىكەشلەر تەخسىنى تەڭلىمەككە قۇلايلىق، يەڭ سودىسى قىلماققا بۇ جاي خىلۋەت ئوڭايلىق، لەببەيچىلەر ياسىغان گەپ-سۆز ئەجەپ چىرايلىق، ئۈزى شۇنداق جەلىپكار،نەفىس، گۇڭگا تۇمانلىق، ياخشى-يامان مۇجەسسەم ئايرىمخانە- پىنھان جاي. ** نىمكەش چاپان نامراتنى ياراتمايدۇ-يەكلەيدۇ، پۇلدار كەلسە پەم بىلەن بىردەمدىلا ئەپلەيدۇ، تېجەشلىكنى داغۋازلىق تۇيدۇرماستىن چەكلەيدۇ، بەزەنلەر بار بۇ جايدىن زادى يىراق كەتمەيدۇ، تۈرلۈك ئىللەت يامرىغان ئايرىمخانە-پىنھان جاي. ** قىلدى ۋەيران قانچىنى ئايرىپ ئوقەت-مۈلكىدىن، تالايلارنى ئايرىدى قەدىناستىن-جۇپتىدىن، ۋەيران بولدى بەزىلەر چىقىپ كەتتى يۇرتىدىن، بىلەلمەيمىز بۇ ئۆينى قاراپ بېقىپ سىرتىدىن، سىرلىق ئىشلار ئامبىرى ئايرىمخانە-پىنھان جاي. ** شۇنداقلار بار تىڭشىماي دەرتمەن پۇخرا زارىنى، كۈن ئۆتكۈزەر بۇ ئۆيدە تەڭشەپ ئىشرەت سازىنى، رەڭلىك سورۇن تۈزەيدۇ چىرلاپ خەقنىڭ يارىنى، ھەتتا ئالۇر بۇ جايدا پەملەپ سوۋغات-پارىنى، ئاچكۆزلەرگە پۇرسەت ئەپ،ئايرىمخانە-پىنھان جاي. ** ئېھتىياجتىن ئاشقىچە نازۇ-نىممەت تىزىقلىق، يەپ-ئىچكەننىڭ ھىسابى ئىدارىگە يېزىقلىق، بەش-ئالتىسى بۇ ئاخشام،بىر دېھقاننىڭ بىر يىللىق- كىرىمىنى يەپ-يۇتسا،ئەمەسمۇ بۇ چىرىكلىك، بەدخەجلىكنىڭ ماكانى ئايرىمخانە-پىنھان جاي. ** خام سۈت ئەمگەن بەندىنىڭ سەندە گېلى مايلىنىپ، ھاڭغا چۈشسە ئۆز شورى،مەيدىن بېشى ئايلىنىپ، سەن گۇناھسىز نە قىلاي ھەجۋىي يېزىپ ئاغرىنىپ، كۈچ-مەدەتتۇر كەڭ بازار، يۈكسىلىۋەر جانلىنىپ، ھەر كويلارغا باپ سورۇن،ئايرىمخانە-پىنھان جاي. ********

yultuzay0997

	ياخشى يېزىپسىز بەزەن بىر كىشلەرگە ساۋاق بولغۇدەك

gultaj

	ئەجرىڭىزگە رەخمەت

sardor0908

	ياخشى يېزىپسىز

قارلۇقە

	ئاشۇنداق كىشلەرگە ئىنسان بەرسۇن ئاللاھىم...ھەققىقەتەنمۇ ئەمەلىي يېزىپسىز...

intikam2

	ھەقىقەتەنمۇ ھەق گەپنى يېزىپسىز، ئىسمى-جىسمىڭىزغا لايىق ياخشى يېزىلغان  ساتىرالىرىڭىز مۇنبەردەىن ئايرىلمىسۇن!

yigana521

	ھەقىقەتەن ياخشى يېزپسىز ....قولىڭىزغا دەت بەرمىسۇن   ،،...

lostba

	ھەق گەپ ، ھەققانى گەپ، سىزنىڭ ساتىرالىرىڭىزنى بەك ئوقۇغۇم كېلىدۇ

koxbarmak

	شۇنداقلا بىر ئوقىسىكەن .

سەنجەر

	راس ، ياخشى يېزىپسىز ... قۇڭىزغا دەت بەرمىسۇن .