ئۇستاز تەرجىمان توختى باقى ئارتىشى ئالەمدىن ئۆتتى

mahammatjan

	ئۇستاز تەرجىمان توختى باقى ئارتىشى ئالەمدىن ئۆتتى          ھازىرقى زامان ئۇيغۇر تەرجىمىچىلىكىنىڭ باشلامچىسى، ئۇستاز تەرجىمان، پېشقەدەم نەشرىياتچى توختى باقى ئارتىشى 2013-يىلى 12-ئاينىڭ 29-كۈنى كەچقۇرۇن ئۈرۈمچىدە ئۇ دۇنياغا سەپەر قىلدى.         توختى باقى ئارتىشى 1922-يىلى ئاتۇش ناھىيىسىنىڭ ئىتارچى كەنتىدە دېھقان ئائىلىسىدە تۇغۇلغان. 1939-يىلى ئۈرۈمچى دارىلمۇئەللىمىنگە كېلىپ، بىر يىلدىن كېيىن ئوقۇش خىراجىتىنى تۆلىيەلمەي ئامالسىز مەكتەپتىن چېكىنىپ «شىنجاڭ گېزىتى» ئىدارىسىدە ئىشچى، ھەرپ تىزغۇچى، تەھرىر بۆلۈم خادىمى بولۇپ ئىشلىگەن. 1942-يىلىدىن 1944-يىلىغىچە ئەينى چاغدىكى ئۈرۈمچى ساقچى ئوفىتسېرلەر مەكتىپىدە ئوقۇغۇغان. 1944-يىلى مەكتەپنى پۈتتۈرگەندىن كېيىن قەشقەرگە بېرىپ خىزمەت قىلغان. 1946-يىلى ئۈرۈمچىگە كېلىپ «ھەقىقەت» گېزىتى ۋە «ئالغا» گېزىتىدە تەرجىمان، مۇھەررىر، شىنجاڭ پېداگوگىكا ئىنستىتۇتىدا ئوقۇتقۇچى بولۇپ ئىشلىگەن. ئۇ 1953-يىلى مەركىزىي مىللەتلەر نەشرىياتىنىڭ تەسىس قىلىنىشىغا قاتنىشىپ، تەرجىمە ۋە تەھرىرلىك خىزمىتى بىلەن شۇغۇللانغان ۋە شۇنىڭدىن باشلاپ لۇشۈن ئەسەرلىرىنى ئىزچىل تەرجىمە قىلىشقا كىرىشكەن. 1962-يىلىدىن كېيىن «شىنجاڭ گېزىتى»، «شىنجاڭ خەلق نەشرىياتى» قاتارلىق ئورۇنلاردا تەرجىمان، مۇھەررىر بولۇپ ئىشلىگەن، 1986-يىلى دەم ئېلىشقا چىققان.         توختى باقى ئارتىشى  كۆپ يىللىق تەرجىمانلىق ھاياتىدا سىياسىي نەزەرىيىۋىي ئەسەرلەر، پەن-تېخنىكا ئەسەرلىرى، ئەدەبىي ئەسەرلەر، گېزىت-ژۇرنال ماقالىلىرى، كىنو-تېلېۋىزىيە ئەسەرلىرى قاتارلىق تۈرلۈك مەزمۇن ۋە ژانىردىكى ئەسەرلەرنىڭ تەرجىمىسى بىلەن شۇغۇللاندى: «يېڭى باتۇرلار»، «تۈن يانغاندا»، «كەپىگە ئۈچ قېتىم زىيارەت»، «لۇشۈن ئەسەرلىرى» (22 توم) قاتارلىق چوڭ تىپتىكى ئەسەرلەرنى تەرجىمە قىلدى؛ «تەرجىمە تەجرىبىلىرىدىن تەرمىلەر»، «لۇشۈن تەرجىمە توغرىسىدا»، «تەرجىمە توغرىسىدا»، «قانداق تەرجىمە قىلىش كېرەك؟» قاتارلىق نۇرغۇن ئىلمىي ئەسەرلەرنى يازدى؛  «كەتمەن چاپقان گۇناھمۇ؟»، «ھەق گەپ قىلغان گۇناھ ئەمەس» (2 توم)، «كۆڭۈلدىن-كۆڭۈلگە يول» قاتارلىق ماۋزۇلاردىكى تاللانما تەرجىمە توپلاملىرىنى نەشردىن چىقاردى، «چۈشنىڭ ماھىيىتى ۋە تەبىرى» ناملىق چڭ ھەجىملىك ئىجادىي تەرجىمە ئەسىرىنى نەشرگە تاپشۇردى.

arka1

	ئۇستازىمزنڭ ياتقان يىرى جەننەتتە بولسۇن ……

كۈركۈم

	ئاللاھ ياتقان يېرىنى جەننەت قىلسۇن.

Gvlmisal

	ئاللاھ ئۇ دۇنيالىقىنى بەرسۇن!!!ھەقىقەتەن مول ھوسۇللۇق تەرجىمان ئىدى بۇ زات

ئاشقىن1

	ئاللاھ ئۇستازىمىزنىڭ ئىلىم يولىدا بىر ئۆمۈر تەر تۆككىنى ئۈچۈن ئۇنىڭغا ئالىي شاپائەت ياغدۇرسۇن،ئامىن.......

ئەلچۈن

	ئۇ دۇنيالىغى ياخشى بولغاي!   مەرھۇم تېرىشچانلارنىڭ ئۆلگىسى، مېھنەتكەشلەرنىڭ ئۆلگىسى، تۆھپىكارلارنىڭ ئۆلگىسى ئېدى. يېشىنىڭ شۇنچە چوڭىيىپ قالغىنىغا قارىماي كىتاپ كۆرۈشنى ۋە مېھنەت قىلىشنى تاشلىمىغان، ھاياتىنىڭ ئاخىرىغىچە ئەلگە ھوسۇل بېرىپ كەلگەن مۆتىۋەر زات ئېدى!...........

mahatjan

	ئىلىم يولىدا بىر ئۆمۈر تەر تۆككىنى ئۈچۈن ئاللاھ ئۇ دۇنيالىقىنى بەرسۇن.

Nimjan

	1 ئايلىق خىزمەتدىشىم ئىدى، ھەق رەھمىتىگە كېتىپسىز، اللەھنىڭ جەنەتتىن جاي بېرىشىگە دۇئا قىلىمىز!

سەفەر

	بۇ ئۇستازغا اللاھ جەننەتتىنئورۇن بەرگەي ...

ARKZAT

	ھەي...............يەنە بىر تىلشۇناس  تەۋەررۈك ئالىمىمىزدىن ئايرىلىپتۇق! قۇدرەتلىك اللاھ مەرھۇمغا جەننەت، ئائىلە-تاۋاباتلىرىغا سەۋرى-تاقەت ئاتا قىلغاي.