ئالتۇن بىلەيزۈك(ھىكايە)

madina520

	شەنبە كۈنى ئىدى. ئەتىگەندىلا ئىشىك قېقىلدى، كىچىك ئوغلۇم چىقىپ ئىشىكنى ئېچىۋىدى، قوشنىمىز سارىخان ھەدەم تارتىنغان ھالدا كىرىپ كەلدى. ئولتۇرۇپ ئەھۋاللاشقاندىن كېيىن: −ئۇكام، خەۋەرلىرى بار، كىچىك كېلىنىمىزنىڭ قىرىقى توشقىلى بىر- ئىككى ھەپتە بولۇپ قالدى، شۇڭا چىرايلىق يارىشىقىنى قىلىپ ئەكېلىۋالايلى دەپ ئالدىنقى ھەپتە دادىسى بىلەن 1000 يۈەن پۇل ئېلىپ بارساق، «قىزىمىز مۇشتۇمدەك تۇرۇپ ھەر قايسىلىرىغا ئوماققىنا بىر ئوغۇل تۇغۇپ بەردى، شۇڭا، بىر تال بىلەيزۈك ئېلىشسىلا» دەپ ئاغزىمىزنى تۇۋاقلاپ يولغا سالدى. نەچچە كۈندىن بېرى سودا قىلىپ تاپقان پۇلىمىزنى يىغىپ 500 يۈەن قىپتىمەن، لېكىن بازاردا 1500 يۈەنگە ھەرگىزمۇ بىلەيزۈك كەلمەيدىكەن. يوتقانغا بېقىپ پۇت سۇنمىساق بولامدۇ، ئۇكام، مۇشۇ پۇل بىلەن بىر ئامال قىلىپ ياندۇرۇپ ئەكېلىلى دېگەن. ئايال قۇدام ئايشەمخان ئادەمگە گەپ بەرمەيدىغان بىر ئايال، شۇڭا ئۆزلىرى كادىر بولغاندىكىن گەپنى يارىشىقىدا قىلىپ، ئاسانراق بىر ياندۇرۇپ ئەكېلىدىغاننىڭ ئامالىنى قىلىشىپ بېرەمدىكىن دەپ كىرىۋىدىم،−دېدى. ـ قاچانراق بارىدىغان ئىشتى؟ ـ دەپ سورىدىم. ـ سائەت بىرلەردە بارساق بولارمىكىن دەيمەن. - ـ ماقۇل سارىخان ئاچا، مەن بىللە باراي، ئايال قۇدىلىرى بىلەنمۇ خېلى سالام-سائىتىمىز بار، يۈزۈمنى قىلار.  ـ رەھمەت ئۇكام، شۇغىنىسى ئاران بىر كەلگەن دەمئېلىشلىرىدە ئىشلىرىنى قىلغىلى قويماي... سارىخان ئاچا شۇنداق دېگەچ تۇتقىنىمغا ئۇنىماي خوشلىشىپ چىقىپ كەتتى. چۈشكىچە ئۆيلەرنى تازىلاپ، بالىلارغا چۈشلۈك تاماق ئېتىپ بەرگەندىن كېيىن، جابدۇنۇپ سارىخان ئاچامنىڭكىگە چىقتىم. ئۇلارمۇ تەييار بولۇپ تۇرۇشقانىكەن. قۇدىلارنىڭ ئۆيىمۇ ئانچە يىراق بولمىغاچقا، ھايال بولمايلا بېرىپ بولدۇق. ئىشىك ئالدىغا بېرىشىمىزغىلا ھەشەمەتلىك ھويلىدىن ئايشەمخان ئاچا چىقىپ كەلدى. ھەممەيلەن بىلەن كۆرۈشۈپ سالاملاشقاندىن كېيىن بىزنى ئادەم ئەيمەنگىدەك ياسىداق ئۆيگە باشلىدى. قول سۈيى ئېلىنىپ، چاي تارتىلىپ بولغاندىن كېيىن، سارىخان ئاچام كۆزىنىڭ قۇيرۇقىدا ماڭا قارىدى، مەن «ئاۋۋال ئۆزلىرى گەپ باشلىسىلا» دېگەندەك كۆز ئىشارىسى قىلدىم. سارىخان ئاچا: −ئەمدى قۇدام، بىز ئۇششاق تىجارەتچى خەقنىڭ ھال كۈنى تايىنلىق بولىدىكەن، بىر ھەپتىدىن بۇيان، سودا-سېتىق قىلغان پۇلىمىزنى يىغىپ، ئۆتنە-يېرىم قىلىپ دېگەندەك ئاران دېگەندە 1500 يۈەن قىپتىمىز، ئاز بولسىمۇ...،− دەپ ئاغزىدىن چىقىرىپ بولغۇچە، ئايشەمخان ئاچا: −نېمە دەۋاتىلا سارىخان، تىجارەتچىدەك گەپ قىلسىلا، 1500 يۈەنگە بىلەيزۈك ئەمەس، تۈزۈكرەك ئۈزۈكمۇ كەلمەيدۇ جۇمۇسىلا ھازىرقى بازاردا. −بىزنى ئويلىمىدى دەمدىلا قۇدام، بىزمۇ ئويلىغان، ئەمدى، بالا بولغاندىن كېيىنمۇ پۇل كېتىدىغان گەپ، قولىمىزغا كۆپرەك پۇل كىرگەندە بىزمۇ قاراپ تۇرماسمىز،−دېدى سارىخان ئاچا قىزارغان ھالدا. −ئۆتكەندە بىز بىر ئامال قىلىلى دەپ كېتىۋىدىلە، ئامال قىلغانلىرى مۇشۇمىدى، مەن بارغۇ، بۇ بالىنى ئەتىۋارلاپ، كۆز قارىچۇقۇمغا دەسسىتىپ چوڭ قىلغان. ھەر قايسىلىرىغا بىر تال بىلەيزۈك ئېغىر كەلگەن بولسا قېپقالسۇن، بالا دېگەن ئاش-نان يەپ چوڭ بولىدۇ. −ئايشەمخان ئاچا، بالىلار چىرايلىق ئۆتسە، قىلمىغاننى قىلىۋالغىلى بولار، ھەر قايسىلىرىمۇ پۇل-ئاش كۆرگەن ئادەم بولغاندىكىن،−دېدىم مەنمۇ گەپ قىستۇرۇپ. : −ۋاي بۇلارنىڭ تولا تەرىپىنى ئالمىسىلا خانىم، تويدىمۇ قولىمىز قىسقا ئىدى، كېيىن ئېپبېرەرمىز دېسە ماقۇل دېگەن گۇناھ ئۆزۈمدە، شۇ چاغدىمۇ نىسىي قالغان بىلەيزۈك يەنە نىسىي قالسا قانداق بولىدۇ؟- دەپ توڭ تەگدى ئايشەمخان ئاچا.       ئەمدى ماڭىمۇ گەپ قىلىشقا يول قالمىغان ئىدى.   −بىزمۇ ئېلىپ بەرمەيدىغان يەردە ئەمەس قۇدام، ئىككى بالا ئالىي مەكتەپتە ئوقۇۋاتىدۇ، شۇڭا قولىمىز بەك قىسقا كېپقالدى. ئۇنداق تەڭلىكتە قويمىسىلا،−دەپ يېلىندى سارىخان ئاچا.      ـ ۋاي قۇدام، تولا گەپنى يورغىلاتمىسىلا بولدى. ئاۋۇ مەرەمنىساخاننىڭ قىزى تۇغۇۋىدى، بىلەيزۈكتىن بىرنى، بىر جۈپ ئۈزۈك ئېلىپ يۆتكىدى. مەن بىر تال بىلەيزۈككە كۈچى يەتمەيدىغان قەلەندەرلەرگە قىز بەرگەن ئادەم بولغاندىكىن، ئۆزۈمنىڭ شورى، بولدى، قىزىمىزنىڭ خېتىنى بەرسىلە،−دېدى ئايشەمخان ئاچا تەرىنى تۈرۈپ.   ـ ۋاي نېمە دېگەنلىرى بۇ، كىمكەن قەلەندەر؟ بالىمىزنىڭ كۆڭلىنى دەپ ئېگىز ئوقۇرغا ئېسىلغان گۇناھىمىز بار، نېمانداق قاملاشمىغان گەپ قىلىدىلا؟−دېدى سارىخان ئاچا ئۆڭسۈلى ئۆچكەن ھالدا. −سىلى قەلەندەر، ئالتۇندەك ئوغۇل تۇغۇپ بەرسە بىر تال بىلەيزۈككە چىدىمىغان ئادەم قەلەندەر بولماي نېمىدى، بولدى، قىزىمنىڭ خېتىنى بەرسىلە.      −ماقۇل، شۇنداق قىلىلى، قىزلىرىنى بايغا بېرىۋالارلا، يۈرسىلە خانىم، بۇ ئايالنىڭ ئۈنچىۋالا يۈزسىزلىكىنى بىلمەي، سىلىنىمۇ باشلاپ كەپتىمەن،−دەپ سارىخان ئورنىدىن قوزغالدى.       −ۋاي، يول بولسۇن، تېزەكلىرى چۈشۈپ قالمىسۇن، تېز بولۇشسىلا، −ئايشەمخان شۇنداق سېسىق گەپلەر بىلەن ئۇزىتىپ قويدى.   سارىخان ئاچاملار بىلەن ياقىمىزنى چىشلىگەن ھالدا يېنىپ چىقىشتۇق. قارىماققا خېلى ئوڭلۇق كۆرۈنىدىغان ئايشەمخان ئاچىنىڭ بۇنچىۋالا ئوسال مىجەزىنىڭ بارلىقىنى ئويلاپمۇ باقماپتىكەنمەن. ئۇزاق ئۆتمەيلا ئۇلار ئاجرىشىپ بالىنى يېتىم قىلىشتى.   ھەي، بىزدە شۇنداق ئالتۇن بىلەيزۈك، ئالتۇن ئۈزۈكلەرنىڭ قۇربانىغا ئايلانغان يېتىم بالىلاردىن يەنە زادى قانچىسى باردۇرـ ھە؟

zinak11

	ۋاي توۋا قانداق ئاتا -ئانىلاردۇ شۇ،مېنىڭ ئاپامنى يودۇشۇم بېشىغا ئېلىپ كۆتۈرسە بولغىدەك جۇمۇ،مەن بوشانغاندا ماڭا 200كويغا بىر مايكا ئېلىپ كەپتىكەن،ئاپام چاندۇرماي يەنە ‹مەيلى بالام سەن كىيمىگەن كىيىم كېچەك،تاقىمىغان ئالتۇن جابدۇق ئەمەس تۇمۇشۇڭلار خاتىرجەملا بولسا مەن ئېلىپ بېرىمەن› دەپ ئۆزى ماڭا قىزىمغا بىر مۇنچە نەرسە كېرەك ئېلىپ يولغا سالغان،مانا ھازىرغىچە قىزىمنى ئۆزى بىر قوللۇق بېقىپ بېرىۋاتىدۇ،بىزدىن بىر ئەقەللى ئىچىدىغان سۈتىنىڭمۇ پۇلىنى ئالغىلى ئۇنىمايدۇ،كىيىم كېچەك ،ئىچىدىغان دورا ھەممىسى ئىنى -سىڭىللىرىم تەمىنلەيدۇ دېسەممۇ بولىدۇ،بولمىسىغۇ يولدوشۇم تەرەپنىڭ تورمۇشى ناچار ئەمەس.تېخى بىزدىن ياخشى دېسەممۇ بولىدۇ.

musilina

	بىر قىسىم ئاتا -ئانىلار بار خۇددى مۇشۇ ھېكايىدە تەسۋىرلەنگەندەك ئابرويپەرەسلىك،ھەشەمەتچىلىك قىلىپ ،بىر ئوبدان ئۆي تۇتىۋاتقان پەرزەنتلىرىنى بەختسىز قىلىپ،بالىلىرىنى يېتىم قىلىدىغان........ ئەمەلىي تۇرمۇش كارتىنىسى ياخشى يورۇتۇپ بېرىلىپتۇ...

salkin-ay

	بىر بىلەيزۈك ئۈچۈن بىر بالىنى يىتىم قىلىشقا قانداق چىدىغاندۇ يۈرىكى

SIRDAX520

	نىمىدىگەن ئابرويپەرەسلىك بۇ .....تويماس خوتۇنكەن ئۇ ....ۋاي ئۆلسەك قالىدۇ شۇ ئالتۇن بىلەيزۈك ،ئالتۇن جابدۇقلار ، ئەلۋەتتە بىر بالىنى يىتىم قىلغىچە چىرايلىق ئۆيى تۇتقۇزسا بولمامدۇ . بىر بىلەيزۈكنىڭ قولىدىن نىمە كىلىدۇ . قىزنى بۇزغان ئانىسى دىگەن مانا مۇشۇ .ئىشقىلىپ ئاتا-ئانىلىرىمىزنىڭ كۆڭلىگە ئىنساپ بەرسۇن جۇمۇ !!!!!

kaqvr

	قىزنىڭ ئانىسىغۇ بىلەيزۈكنى دەپ ئاجراشتۇرۋاپتۇ ، لىكىن قىزىدىن ئاجراشقۇڭ بامۇ يا بالاڭنى باقامسەن دەپمۇ سورىمىغانمىدۇ ؟

ئەخمەد

	يا ئاللا توۋا دېگىلۈك،مانداق ئىشلار بىزنىڭ بېشىمىزغا كەپ قالسا چاتاق جۇمۇ،مەنغۇ تېخى توي قىلمىغان لېكىن شۇنداقتىمۇ بېشىمىزدا بولىدىغان ئىش بولغانكىن ئادەمنى ئەنسىرتىپ قويىدىكەن،ئاۋۇ بالا تۇغقان خىنىم گەپ قىلمايلا يېتىپلا بەرگەن ئوخشىمامدا؟؟؟!

ئەخمەد

	kaqvr يوللىغان ۋاقتى  2013-12-29 05:00 PM قىزنىڭ ئانىسىغۇ بىلەيزۈكنى دەپ ئاجراشتۇرۋاپتۇ ، لىكىن ... شۇ شۇ،مەنمۇ سىزدەك ئويغا كەپ قېلىپ ئۇ خانچاقنىڭ نېمە دېگىنىنى بىلگۈم كەپ قالدى دەيمەن؟!

madina520

	ھازىر جەمىيتىمىزدە بۇنداق ئىشلار كۆپ

asenat

	ھەي ،ئىنساپ نەلەرگە يوقالغاندۇ،بۇدۇنيادا شۇ بالىدەك ئابرويپەرەسلىك،پۇل ،مال-دۇنيا دەپ تۇغۇلۇپلا يىتىم قالغانلاردىن كەلگۈسىدە قانداق بالىلار يىتىشىپ چىقار~~~؟كىچىكلىكىدە ھېچنىمە بولمىغان بىلەن چوڭ بولغاندا چاتاق  دەيمەن،ھەي ئىنسانلار ياخشىراق ئويلىنىڭلار تۇرمۇش ئىشىڭلانى~~~~~~~!