ئۇ دۇنيادىمۇ ئىناۋەتلىك كارتا

boraoghli

	ئۇ دۇنيادىمۇ ئىناۋەتلىك كارتا تۇرغۇنجان ئەرشىدىن ساتۇقنىڭ يانفونىغا ئۇچۇر كەلدى، قارىۋىدى بۇ ئايلىق مائاشىنىڭ بانكا كارتىسىغا ئۇرۇلغانلىق ئۇقتۇرۇشى ئىكەن. «شۈكرى!» دېدى ئۇ بىلىنەر – بىلىنمەس تەبەسسۇم بىلەن. ئاندىن ئىنتېرنېتنى ئېچىپ بىر مۇنازىرە مۇنبىرىگە چىقتى. يېڭى تېمىلارغا بىرەر قۇر كۆز يۈگۈرتىۋەتكەندىن كېيىن ئارىدىكى بىر ياردەم تېمىسىنى ئاچتى. ياردەم ئۇچۇرىنى كۆرۈپ قارشى تەرەپكە ھېسداشلىق قىلىپ ئامانلىق تىلىدى ۋە ئۈستەلدىكى قەغەز باغاقچىدىن بىرنى ئېلىپ بىر مۇنچە نومۇرلارنى خاتىرلىۋالدى. ئاندىن باغاقچىنى ئىككى قاتلاپ ھەميانىغا ئاۋايلاپ سېلىپ قويدى. سائەت 12دە ئۇ ئىشتىن چۈشتى، خىزمەت بىناسىدىن چىققاندا يوللاردا قىزىل، كۆك كىيىملەرنى كىيگەن مەكتەپ ئوقۇغۇچىلىرى تولۇپ كەتكەن بولۇپ، گاھىلىرى بىر نېمىلەرنى سۆزلەپ كۈلۈشۈپ، گاھىلىرى ئالدىراپ، گاھىلىرى ئېزىلىپ دېگەندەك ئۆيىگە قايتىشىۋاتاتتى. بالىلارغا قاراپ ئۆزىنىڭ ئوقۇغۇچىلىق ۋاقتى يادىغا كەلدىمۇ ئەيتاۋۇر ئۇلارغا زوقى كېلىپ پەلەمپەي ئۈستىدە بىر ھازا تاماشا قىلىپ تۇرۇپ قالدى. كەينىدىن چىققان خىزمەتداشلىرى «ساتۇق، خىزمەتكە قانماي تۇرۇپ قالدىڭىزمۇ؟» دەپ چاخچاق قىلغاندىلا ئاندىن كۈلۈمسىرگىنىچە پەلەمپەيدىن چۈشۈپ پىيادىلەر يولىغا چىقتى. بىر ئاز مېڭىپ كۈندە ئالدىدىن ئۆتىدىغان لېكىن مائاش چىقسا ئاندىن كىرەلەيدىغان بانكىنىڭ ئىچىگە كىردى. مائاش ئالىدىغانلار ئۆچرەت تۇرۇشقانىدى. ئۇ ئۆچرىتى قىسقىراق بىر پۇلبەرگۈنىڭ ئالدىغا بېرىپ ئۆچرەتتە تۇردى. بايامقى قەغەز باغاقچىنى ھەميانىدىن ئېلىپ ئۈستىدىكى نومۇرلارغا يەنە بىر قۇر قاراپ چىقتى. بىر ئازدىن كېيىن ئۇنىڭغا نۆۋەت كەلدى. ئۇ پارولنى كىرگۈزۈپ بولۇپلا ھېساب يۆتكەش مۇلازىمىتىنى تاللاپ قەغەز باغاقچىدىكى نومۇرنى تولدۇردى، ئۇ كۇنۇپكا بېسىشقا ئۇستا ئىدى، 21خانىلىق نومۇرنى تاسىلدىتىپ بىردەمدە كىرگۈزۈپ بولدى – يۇ، سومما كىرگۈزىدىغان يەردە سەل ھايال بولۇپ قالدى. 100 رەقىمىنى كىرگۈزۈپ بولۇپ ئۆچۈرىۋىتىپ 200نى كىرگۈزدى، جەزىملەشنى باسىدىغان چاغدا يەنە ئويلىنىپ قالدى، بۇ ئاي بالىسى ئىككى ياشقا تولۇپ ئانىسى ئۇنى سۈتتىن ئايرىماقچى، بالىسىغا بۇ ئاي كۆپىرەك يېمەكلىك سېتىۋىلىشى كېرەك. ئۇ 200نى ئۆچۈرۈۋەتتى، يەنە قايتىدىن 100نى كىرگۈزدى – دە، جەزىملەش كۇنۇپكىسىنى بېسىۋەتتى. نەچچە سېكۇنت ئىچىدىلا پۇل يۆتكىلىپ تالۇن بېسىلدى. ئۇ تالۇننى قولىغا ئېلىپ، «ئاللاھ، پەقەت سىزدىنلا ئەجىر تىلەيمەن» دەپ دۇئا قىلدى. ئاندىن قالغان مائاش پۇلىنىڭ ھەممىسنى چىقىرىۋالدى – دە، ھەميانىغا سېلىپ بىرخىل خۇشاللىق ھېسىياتىدا بانكىدىن ئايرىلدى. ئۇ خىزمەتكە چىققاندىن بېرى ھەر قېتىم مائاش ئالغىنىدا مەلۇم مىقداردا پۇلنى ياردەمگە مۇھتاج كىشىلەرگە ئىئانە قىلاتتى. بەزىدە ئاز، بەزىدە كۆپرەك دېگەندەك. شۇ ئارقىلىق ئۇ خېلىلا يېنىكلەپ قالغاندەك، قەلبى نۇرلىنىپ قالغاندەك بولاتتى. لېكىن بۇ «ئەقىل»نىڭ ئاساسلىق سەۋەبچىسى مېھرىبان ئانىسى ئىدى. ئۇ يېڭى خىزمەتكە چىققاندا ئانىسى ئۇنىڭ بېشىنى سىلاپ تۇرۇپ: «بالام، خۇداغا شۈكرى، خىزمەتكە چىقىپ خاتىرجەم بولدۇڭ، تۇرمۇشۇڭ كاپالەتكە ئىگە بولدى. لېكىن بەك مەغرۇرلىنىپ كەتمە، يانچۇقۇڭدىكى كارتاڭ ساڭا مەڭگۈ ئەس قاتمايدۇ. ھەممىمىز ھامىنى ئۆلىمىز، ئۇ دۇنيادىكى نامراتلىق ھەممىدىن يامان، شۇڭا قۇربىڭنىڭ يېتىشىچە ياخشى ئىشنى كۆپ قىل، سەدىقە – ئېھسان قىلىپ تۇر. ئاخىرەتتە ساڭا لازىملىق پۇل سېنىڭ يانچۇقۇڭدىكى كارتىدىن ئەمەس باشقىلارنىڭ يانچۇقىدىكى كارتىدىن چىقىدۇ!» دېگەن ئىدى. شۇ ۋاقىتتا بۇ تېتىملىق گەپ ئۇنىڭغا بەك تەسىر قىلغان ئىدى. توغرا، ھەقىقەتەن ئاخىرەتتىمۇ ئىناۋەتلىك كارتا يانچۇقىمىزدىكى كارتا بولماستىن بەلكى باشقىلارنىڭ يانچۇقىدىكى كارتا ئىدى. 1435-يىلى، سەپەرنىڭ 10-كۈنى، جۈمە،  بورتالا

326ayixa

	بەك تەسىرلىك ئىكەن . ياخشىلىق قىل قولۇڭدىن كەلسە .

تەقدىر07

	ياخشى تىما بوپتۇ.

سەنجەر

	بىر ئىنساندا گۈزەللىك بار دىيىلسە ؛ ئۇ - دەل ئەخلاق ۋە سېخىلىقتۇر . دەپ يازغان مەن ھىكمەت خاتىرەمگە ...

سەفەر

	ياخشى تېما يوللاپسىز  .يوللاپسىز  .....................

yigana521

	ھەقىقەتەن ياخشى تېمىكەن ، قولىڭزغا دەت بەرمسۇن قېرىندىشىم ،     ......رەخمەت سىزگە....

yagax

	بۇنداق ئىسىل پەزلەتلىك كىشلەر رىيال تۇرمۇشتا ئۇچىراپ يۇردۇ.

BILMHUMAR

	ئەھميەتلك،تمدېن،برنې،يوللاپسز،

ھۆكما

	توغرا دەيسىز. بۇ دۇنيادىكى بايلىق، مەڭسەپ ئۇ دۇنيادا ئىشلىمەيدۇ. ئىشلەيدىغىنى ئاللاھنىڭ بۇيرىغان بەرز ئەمەللىرىنى تولۇق ئىجرا قىلىپ، چەكلىگەن نەيھېي ھاراملاردىن يېراق بولۇپ، ياخشى ئلىشلارنى كۆپ قىلىپ ياخشى ئەمەللەر بىلەن ئاللاھنىڭ ئالدىغا بارساق ھەر ئىككى دۇنيالىقىمىزنى خەيرىلىك ئېلىپ باغان بولىمىز.    تېما ئىگىسىگە رەھمەت!

milodia

	راس دەيسىز.ئۇلۇغ ئاللاھ ياخشى كۈنلەرنى نىسىپ قىلغاي.