ئاپىڭىز تۈگەپ كەتكەندىن كېيىن...

Janbar

	شىنجاڭ مەدەنىيىتى ژۇرنىلىنىڭ 2009- يىللىق 5- سانىنى ئوقۇپ بۇ قۇرلارغا كەلگەن ئىختىيارسىز كۆزلىرىم گۈللەر يۈزىگە قوندى. خىياللار چىرمىدى. شۇ سەۋەپتىن بۇ ئەسەرنى دوستلار بىلەن ئورتاق بەھىرلەنسەمچۇ دېگەن مەقسەتتە مۇنبەرگە يوللىدىم. دوستلارنىڭ ياقتۇرىدىغانلىقىغا ئىشىنىمەن! ئاپىڭىز تۈگەپ كەتكەندىن كېيىن... مۇھەممەت ھۈسەن 1 شۇنداق بولىدۇ. شۇ كۈنى، تىنىقسىز ياتقان ئاشۇ نۇرانە چىرايغا قايتا - قايتا تاشلىنىسىز، ئۆپكىڭىز ئۆرۈلىدۇ. بىر بۇلۇڭدا يېشى بىر يەرگە بېرىپ قالغان ئاتىڭىز ئۈنسىز بوزلايدۇ. يۈرىكىڭىزگە تۇز سېپىلىدۇ. ئاچا - سىڭىللىرىڭىز ياقا يىرتىپ، ئەس - ھوشىنى يوقىتىدۇ. ئەر يېتىپ تېمىم ياش تۆكمىگەن ئاكا - ئىنىلىرىڭىز ئۆزىنى ھەر يانغا ئۇرۇپ نالە قىلىشىدۇ. ئۇرۇغ - تۇغقان، يېقىن - يورۇقلار سىز ئۈچۈن پەرۋانە بولۇشىدۇ. پەتىچىلەرنىڭ تەسەللىيلىرىمۇ قۇلىقىڭىزغا كىرمەيدۇ... دەل شۇ كۈنى، سىز ئادەتتە ئانچە ئېرەن قىلىپ كەتمەيدىغان «جامائەت» دەپ ئاتىلىدىغان بىر توپ كىشى كۆزىڭىزگە تولىمۇ ئىسسق كۆرۈنۈپ كېتىدۇ. 2 شۇنداق بولىدۇ. خېلى كۈنگىچە ئاپىڭىزنىڭ ئۆز يۈرەك پارىلىرىنى تاشلاپ، كەلمەسكە كېتىدىغانلىقىغا ئىشەنمەي يۈرىسىز. قارا بېسىۋاتقاندەك، ئويغانسىڭىزلا ئاپىڭىز تىرىكتەك ھېس قىلىسىز... نەگىلا بېقىڭ شۇ سىيما كۆز ئالدىڭىزدا زاھىر بولىدۇ. بىراق، تۇتالمايسىز، پۇرىيالمايسىز... شۇنداقتىمۇ تىنىمسىز ئىزدەيسىز. ئاشخانا ئۆيدىن، باغدىن، كوچىلاردىن، قوشنىلاردىن... ئاتىڭىزدىن، قېرىنداشلىرىڭىزدىن سورايسىز. ئۇلار سىزنى قۇچاقلاپ ئېسەدەيدۇ. سىلەر بىر بېسىپ – ئىككى بېسىپ ئاپىڭىزنىڭ تۇپراق بېشىغا كېپقالىسىلەر... 3 شۇنداق بولىدۇ. كۈنلەر، ئايلار شۇ تەرزدە ئۆتىدۇ... بىر يەرلەردىن قايتىپ كېلىسىز. ھەر قېتىمقىدەك دەرۋازا ئالدىدا سىزنى ساقلاپ تۇرىدىغان شۇ ئىللىق چىراينىڭ يوقلۇقىنى بايقايسىز. تېنىڭىز تىترەپ، يۈرىكىڭىزگە يىغا ئولىشىدۇ. سەيناغا كىرىسىز، ئاتىڭىز يالغۇز، ھەممە ئۆيگە بىر – بىرلەپ باش تىقىپ چىقىسىز... بىر كۈنلەردە ئاتىڭىزنىڭ قېشىدا يوچۇن بىر ئايالنىڭ پەيدا بوپقالغانلىقىنى كۆرىسىز. دەماللىققا نېمىدەپ ئاتاشنى بىلمەي قىينىلىسىز. ئۇ ئايال پەقەت كۆزىڭىزگە سىغمايدۇ. ئاپىڭىز تۇتقان نەرسىلەرنى تۇتسا، ئىشلەتكەن نەرسىلەرنى ئىشلەتسە غۇژژىدە ئاچچىقىڭىز كېلىدۇ. ئۇ ئايالغا دوق قىلىسىز، بەزىدە ئۇ ئاتىڭىز بىلەن ئۇنى – بۇنى دېيىشىپ قالىسىز. ئۇرۇق – تۇغقان، قولۇم – قوشنىلار سىزگە نەسىھەت قىلىشىدۇ... بارا – بارا سىز ئۇ ئايالنىڭمۇ بۇ ئۆيدە ئاچا – سىڭىللىرىڭىز، كېلىن – كۈيئوغۇللارنىڭ ئالدىدا چوغقا دەسسىگەندەك كۈن ئۆتكۈزۈۋاتقانلىقىنى ھېس قىلىسىز... 4 شۇنداق بولىدۇ. كوچا – كويلاردا بوي – بەستى ئاپىڭىزغا ئوخشاپ كېتىدىغان بىرەر ئايالنى ئۇچرىتىپ قالسىڭىز، يۈرىكىڭىز «جىغ» قىلىپ قالىدۇ. «ئاپا» دەپ ۋارقىرىۋېتىشكە تاسلا قالىسىز. ئارقىسىدىن خېلى بىر يەرگىچە ئەگىشىسىز. بىرەر ئايالنىڭ ئاۋازى، يول مېڭىشلىرى، يۈزىدىكى بىرەر تال مېڭى، ھەتتا ياغلىق چېگىشلىرى ئاپىڭىزنىڭكى بىلەن ئوخشىشىپ قالىدۇ. ئۇزاق سەپسالىسىز... قولۇم – قوشنىىلرىڭىز، ئاپىڭىزنىڭ دوستلىرى سىزنى كۆرگەندە بىر يېرىڭىزنى ئاپىڭىزغا ئوخشىتىپ كۆز يېشى قىلىشىدۇ. پىشانىڭىزگە سۆيىشىدۇ. 5 شۇنداق بولىدۇ. كۈنلەر ئۆتكەنسېرى ئاتىڭىز بىلەن دېيىشەلەيدىغان گېپىڭىزنىڭ نەچچە مىنۇتتىن ئاشمايدىغانلىقىنى ھېس قىلىسىز. قېرىنداشلىرىڭىزمۇ تۇرمۇش ھەلەكچىلىكىدە پەيدا بوپقالغاندەك بىلىنىدۇ. كۆڭلىڭىزدىكى گەپلىرىڭىزنى، دەردلىرىڭىزنى بىرەرسىگە دېيەلمەي ئېسىلىسىز. ئاپىڭىز بار كۈنلەرنى، دېيىشكەن گەپلەرنى، قىلغان شوخلۇقلىرىڭىزنى ئەسلەيسىز، سېغىنىسىز، كىرپىكلىرىڭىز نەملىشىدۇ... شۇنداق بولىدۇ. شۇ كۈندىن كېيىن دىلدىن چىقىرىپ بىر كۈلگەنلىكىڭىزنى ئەسلىيەلمەيسىز. شۇنچە كۆپ ئادەم، شۇنچە يالغۇزلۇق ھېس قىلىسىز. شۇنداق بولىدۇ. شۇ كۈندىن كېيىن ئاتىلارنىڭ «ئاپا كەتتى، ھەممە كەتتى» دېگەن سۆزىنى تولا زىكىر قىلىدىغان بوپقالغانلىقىڭىزنى سەزمەيلا قالىسىز. 2008- يىل ئىيۇن، شەھىرى ئۈرۈمچى ئاپتۇرى: شىنجاڭ يېزا ئىگىلىك ئۇنىۋېرىستېتى ئاگرانومىيە ئىنىستىتۇتىدا زىرائەت ئېكولوگىيىسى بويىچە 2006- يىللىق ماگىستىر ئاسپىرانت

vincent

	تەسىرلىككەن  ،مەن نىمە يېزىشىمنى بىلەلمەي قالدىم....

gulkalam

	تەسىرلىككەن  ،مەن نىمە يېزىشىمنى بىلەلمەي قالدىم.... قېرىندىشىم ئىنكاسىڭىز بىلەن باش سۈرىتىڭىز نىمىدىگەنمۇ ماس كەلگەن

nurjahan0997

	ئاياللار زېمىننىڭ قۇياشى ئەرلەرنىڭ ئۆيگە كىرىپ تۇنجى قىلغان گېپى ئاپاڭ قېنى بولسا بالىلارنىڭ ئۆيگە كىرىپ تۇنجى قىلغان گېپى ئاپام قېنى دېيىش بولىىدۇ

.tuz.

	مۇشۇ تېما تەكرار -تەكرار يوللاندى . يەنى تەكرار - تەكرار يوللانغۇسى .... يىپ - يىڭى تېما ئەۋەتكىلى ئون نەچچە سائەتلەر بولدى چىقمدى ، تەكرار تېما ئەۋەتمىسەم خەپ ...

turpani004

	بەك تەسىرلىككەن.   ھەي ئاپىمىزنىڭ قەدرىگە ئۆلگەندە يېتىدىكەنمىز...

سۈمەييە

	ئەجەپ مىنىڭ ھازىرقى ھىسياتىمغا نىمدا ئوخشىغان تىما ماۋۇ شۇنداق بولدى كۈن ئۆتتى ئاي ئۆتتى مانا ھەش پەش دىگۈچە يىل بولدى ، ئانامنىڭ يوقلىقى ئەمدى چىنىشقا باشلىدى ، شۇنداق بولدى دادامنىڭ يىنىدا يات بىر ئايال ، بەزىدە بىز قىسىلدۇق ، بەزىدە دادام ، بەلكىم ئۇمۇ قىسىلغاندۇ ،كۈنلەر شۇ تەرىقىدە ئۆتىۋاتىدۇ ، ئانام بالامنىڭ كىچىكى دەپ قولۇمنى قاپارتماي بوينۇمنى قىسماي شۇنداق ئەركە قىز ئىدىم ، ئانامغا بىرەر ۋاخ تاماق ئىتىپ بىرەي دىسەم ئەمدى يوق ، بىردەم قانغۇدەك مۇڭدىشۋالاي دىسەم ئەمدى يوق ، بىرەر قۇر يىڭى كىيىم ئىلىپ بىرەي دىسەم ئەمدى يوق ، باغرىغا ئۆزۈمنى ئىتىپ قانغۇدەك يىغلىۋالاي دىسەم ئەمدى يوق . راھەتكە ئىرىشتۈرەي چىچىڭغا ئاق كىرىپتۇ ئانا دەپ يۈزلىرىنى سىلاپ مەڭزىگە سۆيەي دىسەم ئەمدى يوق شۇنداق بولدى ئاكا ئاچىلىرىم تۇرمۇش ھەلەكچىلىكىدە ، بەلكىم ئۇلارنىڭمۇ كۆڭلى يىرىمدۇ ، لىكىن نارىسىدە قالغان ئۇكام ئىككىمىزدەك بوپ كەتمىگەندۇ ، ھىچ بولمىغاندا ئۇلارنىڭ ئۆيلىرى بالىلىرى بار ، لىكىن بىزنىڭ ھىچ نەرسىمىز قالمىغاندەك نەقەدەر يالغۇزلۇق ھىس قىلىپ ئىسەدەپ يىغلاپ كىتىمىز . بەزىدە ئويلاپ قالدىم ئاتا-ئانىسىدىن دۇئا ئالمىغان ئادەم يىتىم قالىدىكەن دەپ ،لىكىن ئاللانى ئۆزۈمگە ھەمرا قىلىپ ئۆز-ئۆزۈمگە تەسەللى بەردىم . قىرىنداشلىرىم چىدىماق ھەقىقەتەن تەسكەن ، ئاتا-ئاناڭلار بار ۋاقتىدا قەدرىنى ئوبدان قىلىۋىلىڭلار . قىرىنداشلىرىم ئانىسىز كۈن كۈن ئەمەسكەن ، ئۈلۈشكۈنكى ئانام تۈگەپ كەتكەن بىر يىل بولغان كۈندە يىرىلىپ كەتمىدىم ، ئۆلۈپ كەتمىدىم ، ئۆزۈمنىڭ نەقەدەر بىجارە بوپ قالغانلىقىمنى ھىس قىلدىم . ،،،،،،،،،،،،،،،،،،،،،،،،،،،،،،،،،،،،،،،،،،،،،،

Janbar

	.tuz. يوللىغان ۋاقتى  2013-11-11 06:59 PM مۇشۇ تېما تەكرار -تەكرار يوللاندى . يەنى تەكرار - تەكرار ... كەچۈرۈڭ ئەپەندى، مەن بۇرۇن يوللانغىنىنى بىلمەيدىكەنمەن! بۇ ئەسەرنىمۇ ئۆزۈم كىتابتىن بىر ھەرىپتىن-بىر ھەرىپتىن ئۇرۇپ چىققان ئىدىم. ھېچقانداق مۇنبەردىن كۆچۈرمىگەن ئىدىم. ئەپسۇس بۇ تىمىنى يوللىغىنىم قاتتىق خاتالىق بولۇپ قالغان چېغىۋا. باشقۇرغۇچى دوستلار بۇ تىمىنى ئۆچۈرۈۋەتسەڭلار!  بەك ئاۋارە قىلىۋېتىدىغان بولدۇم.

sirdax998

	بەك ياخشى يېزىلغان  ئەسەركەن. رەھمەت سىز گە جاپا چەكتىڭىز

泽普boy

	Janbar يوللىغان ۋاقتى  2013-11-11 09:26 PM كەچۈرۈڭ ئەپەندى، مەن بۇرۇن يوللانغىنىنى بىلمەيدىكەن ... ماندا ئىسىل تىمىلار قايتا –قايتا يوللانسىمۇ ئەرزىيدۇ جۇما   بۇ يا مەزمۇنى پىچەك تىما بولمىسا