رۇبائىيلار (11)
********
ئانا تىل-ئاناڭنىڭ تىلى ھەم ئۆزى،
ئانا تىل بىلمەسنىڭ كۆرمەيدۇ كۆزى.
مىسالى:ئانىسى تۇرسا ئالدىدا -
تونۇماس،قىزارماس ئەمانىڭ يۈزى.
********
ياقىدۇ ھەممىگە پۇل ھەم مەنپەئەت،
ئۆتەلمەس كۆپلەر بۇ سىناقتىن پەقەت.
غەرەزسىز ياخشىلىق ئىزدىمە ياتتىن،
قىلغايمۇ بىراۋلار ئاتاڭدەك شەپقەت!
********
ھايانىڭ يىلتىزى –ئاناڭ ئىززىتى،
ۋاپانىڭ يىلتىزى-ئاتاڭ خىزمىتى.
ھايادىن قىز كۆكلەر، ۋاپادىن يىگىت،
شۇ بىلەن ئۈستۈندۇر ئىنسان قىممىتى!
********
تۈگىمەس جاھاندا پەسكەش ئوغرىلار،
ئوغرىغا ھەر دىلدا ئۆچمەن تۇغۇلار.
ۋەلېكىن، بىراۋنىڭ ئىلمىنى ئالغان-
سۆيۈملۈك «ئوغرى»نى دەيمىز توغرىلار!
********
تۇز تەمى تەڭشەلگەن-ئېسىل يىمەكلىك،
ماختايمىز تىل تامشىپ، يەيمىز يۈرەكلىك.
قارىغىن ،تۇزسىز ئاش ياتار ئەۋرەزدە،
ئادەمگە ۋىجدان تۇز- دائىم كېرەكلىك.
********
ئىز بولغاچ ئادەملەر مېڭىشنى بىلگەن،
ماڭغۇچى بولسلا ئۆچمەس ئىز دېگەن.
قارىغىن تاشلاندۇق شۇ چىغىر يولغا،
ئازلىغاچ ماڭغۇچى، قۇم-بوران كۆمگەن!
********
نادانلىق- روھىڭنىڭ ئەجەل خەنجىرى،
تېنىڭنى كىشەنلەر ئۇنىڭ زەنجىرى.
چىرمالسا زەئىپ تەن، قىلماس مەنپەئەت-
مىڭ يۇتۇم ئىچسەڭمۇ، ئابى كەۋسىرى.
********
قەدىرسىز بىلىنەر يېنىدا بارى،
سېغىنار يىراقتا بولسا كىم يارى.
مىسالى: ئاق قۇشقاچ تۆت پەسىل ھەمراھ
باھاردا كاككۇكقا بولىمىز زارى.
********
كۈن پاتسا يوقايدۇ غايەت زور سايە،
بەك«كاتتا» ئىشلارنى قىلما ھىمايە.
ياشىغىن، چۈمۈلە روھىنى يار قىپ،
زەررىچە بولسىمۇ تۆھپە- كۇپايە!
********
تالاشما تۆر ،جايىڭ بولسىمۇ پەگا.
بىراۋغا ئەگەشمە بولمىساڭ ئەما .
مۈستەقىل ياشاشنى ئۈگەن ھاياتتا،
ئىنسانلىق پەزىلەت ھەممىدىن ئەلا!
********
مەنبە: ئىجادىيىتىم.
بۇ يازمىنى ئاخىرىدا nazaratqi تەھرىرلىگەن. ۋاقتى 2013-11-5 02:25 PM