ئۈندىدارنى تىللىمايلى

nirvana1216

	ئۈندىدار يۇمتالى تۇرمۇشىمىزغا سىڭىپ كىرگەندىن بۇيان، ئۇ ھەرخىل ناملار بىلەن ئاتىلىپ، قېرىنداشلىرىمىز تەرىپىدىن چەتكە قېقىلىپ، تىللاپ، قارغاپ تۇرۇپ، «سۆيۈپ» ئىشلىتىدىغان، ھەتتاكى ئۇيقۇ ۋە تاماقتىن كېچىپ تۇرۇپ قولىمىزدىن تېلېفوننى چۈشۈرمەيدىغان ھالغا يېتىشىمىزدىكى ئاساسلىق باش جىنايەتچى بولۇپ قالدى. شۇنىڭ بىلەن چوڭلار پەرزەنتلىرىنىڭ بارغانچە تېلېفونغا دۈم چۈشىدىغان قىلىقىدىن بىزار بولۇپ ئاغرىنىشقا باشلىدى، ئاياللار ئەرلىرىنىڭ، ئەرلەر ئاياللىرىنىڭ يولدىن چىقىشىنى مۇشۇ ئۈندىداردىن كۆرۈپ، ئۈندىدارنى «قارغىغۇچى» لار سېپىگە ئاتلاندى. ئىشقىلىپ ھەممىلا ئادەم ئۈندىداردىن ئايرىلالماس بولۇپ قالغانچە ئۇنى شۇنچە تىللايدىغان بولۇپ كەتتى، ھەتتاكى ئۇنىڭغا «ئۈندەللال» دىگەندەك چىرايلىق ئىسىملارنىمۇ قويۇپ ئۈلگۈردى. ئۇنداقتا، ئۈندىدار راستلا بىزنىڭ تۇرمۇشىمىزنى شۇنچە قالايمىقان قىلىپ كەتتىمۇ؟ بەلكىم شۇنداقتۇر، ۋەياكى بۇ بىر قىسىم كىشىلەرنىڭ ئۆزىنىڭ گۇناھسىزلىقىنى ئىسپاتلاش، ئۇۋالچىلىققا ئۇچرىغان بىچارە كۆرسىتىشتىكى «قۇربانلىق» ىدۇر. ھەممىلا ئىشنىڭ ئىككى تەرەپمىلىككە ئىگە بولغىنىدەك، ھازىرقى پەن-تېخنىكا تەرەققىياتىنىڭ مەھسۇلى بولغان ئۈندىدار، چ چ قاتارلىقلارنىڭ ھەممىسى ياخشى تەرىپىمۇ، يامان تەرىپىمۇ بار، ئاساسلىق مەسىلە كىشىلەرنىڭ شۇنى قانداق ئىشلىتىشىدە. مەلۇم بىر شىركەت بىر مەھسۇلاتنى تەتقىق قىلىپ بازارغا سالغانىكەن، چوقۇم ئۇنى زور كۈچ بىلەن تەشۋىق قىلىدۇ، يېڭى ئىقتىدارلارنى قوشۇپ، مۇكەممەللەشتۈرىدۇ. ئۈندىدار ئىشلەتكۈچى بۇنداق تەشۋىقات ۋە يېڭى ئىقتىدارلارنىڭ ئىزىقتۇرىشىغا ئۇچراپ كەتكەنىكەن، ئۇنى مەلۇم بىرەيلەننىڭ خاتالىقى دېيىشكە بولمايدۇ. بۇ خۇددى بىر قىسىم قىمارۋازلارنىڭ «قىمارنىڭ مەرى بەك ئىسسىق، شۇڭا قىمار ئويناۋاتىمەن» دەپ باھانە كۆرسەتكەنلىكىدەكلا بىر ئىش. ئەگەر ئۈندىدار شۇنداق يامان بولسا ئۇنى تېلېفونىڭىزغا قاچىلىمىسىڭىز بولىدۇ، ئەگەر قاچىلىماي پەقەت چىدىمىسىڭىز، ئادەتتىكى ئۈندىدار قاچىلىغىلى بولمايدىغان يانفون ئىشلەتسىڭىز بولىدۇ. ئۈندىدارغا يات جىنسلىقلارنى ئىزدەپ تېپىپ قوشمىسىڭىزمۇ بولىدۇ، تونۇمايدىغان يات جىنسلىقلار سىزنى قوشسا ئەلۋەتتە رەت قىلىش ھوقۇقىڭىز بار. ئۈندىدارنىڭ رەسىم يوللاش ئىقتىدارىدىن پايدىلىنىپ ئۆزىڭىزنىڭ ھەرخىل سۈرەتلىرىڭىزنى دوستلار چەمبىرىكىگە يوللىمىسىڭىز بولىدۇ ياكى بەك يوللىغىڭىز كېلىپ كەتسە كۆزىڭىزگە گۈزەل كۆرۈنگەن سۈرەتلەرنى يوللاپ قويسىڭىز بولىدۇ. باشقىلار يوللىغان بولسا كۆرمەي ئۆتۈپ كەتسىڭىز بولىدۇ. ئۈندىدارغا بەك بېرىلىپ كەتكەندە، ئۆزىڭىزنى ئۆزىڭىز ئاتا-ئانىڭىز بىلەن ھال-مۇڭ بولۇشقا، بالىلىرىڭىزغا ھەمراھ بولۇشقا، ۋاقتىدا ئارام ئېلىشقا، ۋاقتىدا تاماق يېيىشكە، خىزمىتىڭىزنى ۋاقتىدا تۈگىتىشكە..... ئەسكەرتسىڭىز بولىدۇ. يىغىپ ئېيتقاندا، ئادەم ئۆزىنى ئۆزى كونترول قىلىشنى بىلىشى كېرەك، قىلغان بارلىق گۇناھلىرىنى «شەيتان» غا ئارتىشقا كۆنگەن خۇي بىلەن، زامانىۋى «گۇناھ» لىرىنى زامانىۋى شەيتان ئۈندىدار» ئارتىپ، ئۆزىنى گۇناھسىز كۆرسىتىش بەكلا ئەخمىقانىلىق. ئەگەر بۇنداق ئۇسۇللار بىلەن ئۆزىنى ئاقلاشقا بولسا، مەنچە دۇنيادا گۇناھكار ئادەم بولمىغان بولاتتى.          يىغىپ ئېيتقاندا، ئادەم بىر ئىشنىڭ خاتالىقىنى بىلگەندە خاتالىقىنى تۈزىتەلمىگەن ئەھۋالدا، خاتا قەدىمىنى توختىتىشمۇ بىر خىل ئاقىلانىلىك. تۈزىتەلىسە ئەلۋەتتە خاتالىقىنى تۈزىتىپ، تۆۋە قىلىپ بۇنداق خاتالىقنى قايتا سادىر قىلماسلىققا تىرىشىشى كېرەك.

ranjimayman

	مەن پەقەت كۆنەلمىدىم بۇ ئۈندىدارغا....چاي..توي ..ئادىمىگەرچىلىك ئىشلىرىنى ئۇقتۇرىدىغانغا قولايلىق بولدى شۇ...خالاس.

sewdaye1

	ۋاي ۋۇي، بۇنى ئاقلاپ ئالاھىدە ماقالە ئىلان قىلغۇچە بىز ئۆزىمىزنى تىللىمايلى دەپ بىر ماقالە يازغان بولسىڭىزچۇ، ھازىر بەزى ئادەملەر بىزدىگەن مۇشۇنداق خەق دەپ ئۆز ئۆزىنى تىللاپ كىتىۋاتىدۇ. بۇنداق ئەھۋال جاي جايلاردا ئومومىيۈزلۈك بار ئىكەن. نەدىكى بىر بىزنىڭ تىل يېزىقىمىزغا دۈشمەنگە مۇئامىلە قىلغاندەك مۇئامىلە قىلىدىغان شىركەتنىڭ دىتاللىرىنى ئاقلاپ كەتكۈچە

uyol

	مەنچە ئۇندىدار ئۇنداق يامان ئەمەس......ھەممىمىز ئۈزۈمىزنى كونتىرول قىلساق بولىدۇ

iltebir

	ئۈندىدارنىڭ بىر ياخشى تەرىپى بولسا ،بىزنىڭ بەزى تاپالمايدىغان ياخشى ئەسەرلىرىمىزمۇ  تېپىلىپ ئۈندىداردا ئېلان قىلىندى.ئىشقىلىپ ئۇيغۇرچە سەرخىل يازمىلار ئۈندىدار ئارقىلىق تېخىمۇ كەڭرى تارقالدى.مەن مۇشۇ تەرىپىدىن ئۈنۈملۈك  پايدىلىنىپ كېلىۋاتىمەن.

pixwa

	ئۈندىدارنىڭ پايدىسىدىن زىينى كۆپ بولىۋاتىدۇ، ئۇنىڭ زىيانلىق تەرەپلىرىنى ئەلۋەتتە تىللاش كىرەك، تىڭشۈن شىركىتىنىڭ ئەسلى مەقسىتىمۇ ئۇنىڭغا تىخىمۇ كۆپ ئادەمنى رام قىلىپ يانچۇقىنى تومپايتىش، ئۇنىڭ ھەربىر ئىشلەتكۈچىنىڭ قانچىلىك ۋاقتىنى ئىسىراپ قىلىۋاتقانلىقىنى ھېساپلىغاندىلا بۇنىڭ زىينىنى چۈشەنمەك تەس ئەمەس. ئادەم ئەلۋەتتە نەرسىنى باشقۇرىدۇ، لىكىن قىنى كىم مەن شەيتاننىڭ ئازدۇرۇشىغا ئالدانمايمەن دەپ ھۆددە قىلالايدۇ؟ شەيتان يوق بولغان بولسىدى، بەلكىم ئېزىشمۇ ئازلىغان بولاتتى.

sargarda

	ئاغزىمغا  چىش   چىققاندىن   بىرى   مۇشۇ  نەرسىنى  ئىشلىتىپ  باقماپتىمەن . بىرەرسىڭلار  ماڭا    چۈشەندۈرۈپ  قويۇڭلار  .   قانداق  ئىشلىتىدۇ ؟ كومپېيوتېردىمۇ  ئىشلەتكىلى   بولامدۇ  ؟  تېلفۇنغا   قانداق  قاچلايدۇ ؟

ana-yurtum

turpani004

	مەنغۇ ئىشلىتىپ پايدىسىدىن زىيىننى كۆپ كۆرۈپ كېتىپ تاشلاپ قويغىلى ئۇزاق بولدى...

turpani004

	sargarda يوللىغان ۋاقتى  2013-10-30 10:48 PM ئاغزىمغا  چىش   چىققاندىن   بىرى   مۇشۇ  نەرسىنى  ئىشلىتى ... ئەڭ ياخشىسى ئۆگەنمەيلا قويۇڭ.   يەنىلا مۇنبەر ياخشى