گــــۇگــــۇم ســــەيلىســــى

suzuk-ay

	گــــۇگــــۇم ســــەيلىســــى مۇكاپاتلىق ئەسەرگە قاتناشتۇرىمەن ئاپتۇرى:سۈزۈك ئاي قان رەڭگىدە يىلىنجاپ تۇرغان قىزىل قۇياش مەغرىپتىكى يۇرتىغا ئاستا _ ئاستا چۆكمەكتە ...گۇگۇم كۆك سامانى ئۆز ئىسكەنجىسىگە ئېلىپ زىمىننى كۈلرەڭ پەردىسىگە يۇشۇرماقتا... قىزىل قۇياشنىڭ  ئالتۇن نۇرلىرىدىن  رەڭ ئالغان مەغرۇر شەپەق ئۇپۇقتا لەرزان شۇڭغۇپ ، سىيدام دۇنيانى رەڭدار بەرگىللىرى بىلەن بېزىمەكتە... كەچكۈزنىڭ   غېرىپلىقىغا  يېڭى ھۆسۈن، يېڭى ھاياجان   قوشۇۋاتقان بۇ گۈزەل مەنزىرىلەر ئالقىنىدا يۈرىكىم  خۇشلىقتىن چاراسلاپ كۆيمەكتە. بۇ زىمىن ، بۇ تۇپراق ئەسلىنىدىلا مۇشۇنداق گۈزەل ئىدى ھە؟...ئاھ ، قەدىرلىك زىمىن ئەلمىساقتىن تارتىپ تا بۈگۈنگىچە، مۇشۇ مەنزىرلەر بىلەن ئۆز مەۋجۇدلىقىڭنى ساقلاپ ، يەنە جۇلا قىلىپ تۇرۇپسەن. مەن پەخىرلىك ھېسلىرىمنى چىڭ قۇچاقلاپ  گۇگۇمدىكى جىمجىت ، ئارام بەخىش سەيلەمنى داۋام قىلماقتىمەن. كۆز يەتكۈسسىز ئۇپۇق،كۆز يەتكۈسسىز كەڭ دۇنيانى ئۆز ۋۇجۇدىغا ئالماقتا...غۇۋا بىر چۈشكۈن روھ ئالدىمغا كېلىپ مەن پەخىرلىنىۋاتقان بۇ زىمىنغا قاراپ ئېغىر بىرنى ئۇھ تارتتى-دە ، بېشىنى چايقاپ ،ياش لىغىرلاپ قالغان كۆزلىرىنى چىڭڭىدە يۇمۇۋالدى.ئۇنىڭ كۆزلىرىدىن ياش ئەمەس ، ئىككى تامچە نۇر تۇپراققا سىرغىپ چۈشتى.  نۇر تامغان ھەر بىر جايدىن ئەتتىرگۈللەر ئۈنۈپ چىقىپ پورەكلەپ ئېچىلىشقا باشلىدى. ئەتتىرگۈللەرنىڭ  قىزىل لەۋلىرىدە ئۈمىد، ئارمان يۇلتۇزلىرى نۇرلىنىپ تۇراتتى. ئۇ تۇيۇقسىز پىسسىڭدە بىرنى كۈلۈپ ئاپئاق چىشلىرىنى يالىڭاچلاپ قۇياشقا قاراپ يول ئالدى. بۇ ھالدىن ھەيران بولدۇم .ئىچىمدە بىرسى : _ ھەي ، ئۇنىڭ كىملىكنى، بۇ ئاجايىپ مەنزىرىنى سوراپ باق ، دەپ قۇترىماقتا ئىدى. مەن ئېسىمنى يىغىپ ئۇنىڭدىن سورىدىم: _ سىز كىم بولىسىز؟ بايىقى ئىشلار مېنى گاڭگىرتىپ قويدى، بۇ كۈرۈنىشلەر كەينىدىكى سىرلارنى بەكمۇ بىلگۈم بار.   ئۇ مۇلايىم ، مېھر ئۇرغۇپ تۇرىدىغان مېھىرلىك كۆزلىرىنى ماڭا تىكتى. ئۇنىڭ روھىدىن مەن ئەزەلدىن كۆرۈپ باقمىغان سۈزۈكلۈك ، پاكلىق يالتىرايتى.ئۇ ھەسرەتتىن سالپىيىپ قالغان تۇرقىنى ئوڭلىۋېلىپ سۆزىنى باشلىدى. _مەن مېھرى _  مۇھەببەت بولىمەن. مەن خۇنۇكلەشتىم...سۇسلاشتىم...گويا مۇشۇ گۇگۇمدەك.مەن ئىنسانىيەت يۈرىكىدىن ئۆچۈش ئالدىدىكى بىر روھ...مەن ئەشۇ قۇياشتەك مەنزىلگاھىمغا بارىمەن. لېكىن مەن ئۈمىدۋار... مەن ھامان بر كۈنى دۇنياغا قايتىپ كەلگەندە ئۆز قىممىتىمنى تاپىمەن. گۇگۇمدا پاتقان قۇياش سۈبھىنى قارشى ئېلىش ئۈچۈن مەشرىققە ئىنتىلىدۇ.مەنمۇ قەدىرلىنىدىغان كۈنۈمنىڭ قايتا تۇغۇلدىغانلىقىغا ئىشەنچ بىلەن بۇ يەردىن كېتىمەن. _ سىز نېمە ئۈچۈن كەتمەكچى؟ ئۇ ئېغىر تىنىقلاردىن كېيىن : _ مېنى ئاللاھ ئۆز پاكلىقىدىكى ئەڭ پاك ، چىن بۈيۈك ھېسيات بىلەن دۇنياغا ئاپىرىدە قىلدى. مېنى ئادەم ۋە ھەۋۋانىڭ بارلىق ئەۋلادلىرىغا ، بارلىق پەرىشتە ،يەريۈزىدىكى گىياھلار ، ئورمانلار ، ھەر بىر تال قۇم دانىچىسى ، دېڭىزلارنىڭ يۈرىكىگە چاچتى.شۇنىڭ بىلەن دۇنياغا يارالمىشىم بىلەنلا بۈگۈنكىدەك تەرەققىيات ۋە يۈكسىلىشلەر بارلىققا كەلدى.ئىنسانلارغا بېرىلگەن نېمەتلەرنىڭ كاتتىلىقىدىن مەن قىممىتىمنى تاپتىم. ئىنسانلار مېنى تىللاردا داستان قىلىپ كۈيلىدى، مەدھىيلىدى.تىلاردا داستان بولۇپ يادلىنىپ كېلىۋاتقان ئاشىق-مەشۇقلار ، پىداكار ئانىلار، قەھرىمانلار مېنى قەدىرلىگەنلىكى ئۈچۈن تارىخ ئۇلارغا قىممەتلىك بەتلىرىدىن ئورۇن راسلىدى. بىراق...بىراق... تولىمۇ ئەپسۇس مال -دۇنياغا بېرىلىش ، ئەيىش -ئىشرەتنىڭ كۆپىيىشى ئادەملەرنىڭ مۇلايىم قەلبىنى قەبىھلىكە ئۆزگەرتتى.قارا... ئۇ قوينىدىن بىر پارچە ئەينەكنى چىقىرىپ ماڭا كۆرسەتتى.ئەينەكتە ئادەمنى تاڭ قالدۇرىدىغان كۆرۈنۈش يۈرىكىمنى ئامبۇردەك سىقماقتا ئىدى. ئازغىنە نەپ ئۈچۈن ئۇرۇش -جېدەل گۈللەنمەكتە...باشقىلارنىڭ بەختى قۇربان بولماقتا...ئاتا بالىدىن ،بالا ئاتا-ئانىدىن كەچمەك بولۇپ ، كۆز ياشلار ئازاپ دېڭىزىغا قوشۇلماقتا...ئۇرۇق- تۇققانلارنىڭ ئارىسىدىكى مېھىر سۇسلاپ ئۆز گۆشلىرى ئۆزلىرىنىڭ مېيىدا قورۇلماقتا... "تاھىر -زۆھرە"،"لەيلى-مەجنۇن"دەك ئاشىق مەشۇقلىرىمىزنىڭ پاك نامى رېستۇران، ساتراشخانلارنىڭ ۋىۋىسكىسىغا ئايلانماقتا... قىزلىرىمىزنىڭ ئىپپەت-نۇمۇسىنىڭ بەلگىسى سۈپىتىدىكى ياغلىق رومانلار تومپايلىقنىڭ ، مەتولىقنىڭ ئىپادىسى بولۇپ شامال قولىدا قەدىمىي يۇرتقا ئۇچۇپ كەتمەكتە... ئادەملەر ھاراق-تاماكىنىڭ قولىغا ئايلىنىپ ، شەيتاننىڭ بوينىغا گىرە سېلىپ ، چىرمىشىپ تۇرۇپ تانسىغا چۈشمەكتە.شەيتاننىڭ دوزاخ ئۈچۈن تەييارلىغان ئالدام خالتىسىغا ئۆزلىرىنى ئىختىيارى سالماقتا... بالىلار كىچىكلىكتىن تارتىپ قىزىل كۆزلۈكنى ئۆگىنىپ ، پۇل بەرمىسە ھېچ ئىش قىلمايدىغان ھەتتا تاماق يىسىمۇ پۇل ئالىدىغان كىچىك بالايى-ئاپەتلەر مەيدانغا كەلمەكتە...ئاھ، بۇ نەقەدەر قورقۇنۇچلۇق ...مانا بۇ كەلگۈسىدىكى چوڭ ئاپەتنىڭ يىلتىزى ئەمەسمۇ؟ قىز-چوكانلاردىكى شەرمى -ھايا بارغانسېرى سۇسلىشىپ، ئىپپەتنىڭ قىزىل بەرگىللىرى خالىغان جايلاردا توزىماقتا...ئاياللار دوختۇرىنىڭ قولىدىكى يىڭنە -يىپى بىلەن ھەممە ھەل بولۇپ ئايال بىردەمدىلا "قىز" غا ئايلانماقتا... ئەشۇ مۇقەددەس ، قىمەتلىك روھ پاسكىنلىشىقا قاراپ يۈزلەنمەكتە... يۈرەكلەر ئەيدىس ۋىرۇسىغا ۋاكسىنا تاپالماي تەمتىرەپ يۈرمەكتە... كۆزلىرىدىن شەھۋەت يېغىپ تۇرىدىغان ئەرلەر دۇنياسى ئاغزىدا ، قەلىمىدىلا " پاك ياشا، قىزلىرىم ...'دەپ چاقىرىق قىلىماقتا، لېكىن ھالاكەتلىك يولدىكى  بىرەر قىزنى توغرا يولغا باشلىماي، رەڭلىك ئولتۇرۇشنىڭ سەردارىغا ئايلىنىپ ، ئاچكۆز نەپسىلىرىگە قۇل...قۇل  بولماقتا... ھاياسىزلىق ، مېھىرسىزلىك ،ئاق تۈتۈن ، مەس -ئەلەس دۇنياسىدا بارغانسېرى چۈشكۈنلىشۋاتقان ئادەملەرنىڭ خىرە كۆزلىرىدىن روھسىزلىق ياغماقتا... زىمىن يىتىملەر نالىسىدىن ئاچچىق تولغانماقتا...ئاي نىدا ئېچىنىشلىق  قىلىۋاتىدۇ، ئانىلار يىغلاۋاتىدۇ، قۇشلار يىغلاۋاتىدۇ...گۈللەر ھەسرەت چەكمەكتە...ئاتىلار يۈرىكىدە لىققىدە نەپرەت...ۋىجدان ئاھ ئۇرۇپ ئۆز يۈرىكىگە خەنجەر ئۇرماقتا... ۋاپاسىزلىق ، يالغانچىلىق، ئالدامچىلىق ، ئاچكۆزلۈك ، رەھىمسىزلىك ، دىيانەتسىزلىك، سەمىمىيەتسىزلىك، غەيۋەت -شىكايەت، پىتنە -پاسات ، ھەسەتخورلۇق كۆڭۈلەرگە ئورناپ دۇنيانى قارا باسماقتا... ھالاكەت گىرۋىگىدە تۇرۇپمۇ ھېچنىمىنى پەرق ئېتەلمەيۋاتقانلار ئەبجەش مۇزىكىغا جۆر بولۇپ ھاياسىزلارچە سەكرەشمەكتە، سەت چىقىراشماقتا... رەڭلىك چىراق نۇرى ئاستىدىكى ئەلەڭ -سەلەڭلەر شەيتاننىڭ ئۆزلىرىنى ئۇسسۇلغا سالغىنىدىن تېخى بىخەۋەر...شەيتان بىر چەتتە تۇرۇپ تاماششا كۆرگەچ لەشكەرلىرى بىلەن غەلبىسىنى تەبرىكلەشمەكتە، غەلبە قەدەھلىرىنى كۆتۈرمەكتە... تارتمىدىكى ھارام پۇللار ، خوشامەتچىلەرنىڭ يالغان -ياۋىداقلىرى، ساختا تەبەسسۇم قېتىپ قالغان نۇرسىز يۈزلەر، ئارقا ئىشىكتىن كىرۋاتقان ئۈزۈلمەس خەزىنىلەر ... سورۇننىڭ كۆپلىكىدىن بودىلىپ كەتكەن باشلىق ئەپەندىم قۇچىقىدىكى تۇمۇچۇق ، ئۇ ئەركىلەۋاتىدۇ...ئۇلار ئادىمىيلىكنى ئۇنتۇپ ،مۇھەببەتكە خىيانەت قىلماقتا. پۇل بىلەنلا يارىماسلار ياراملىقلارغا ، بىلىملىكلەر بىلىمسىزلەرگە ئايلىنىپ مەسۈم يۈرەكلەرگە لىققىدە ياش تولماقتا... مۇھەببەتنىڭ يۈرىكىدىن تۆكۈلگەن ئازاپ زىمىنغا ساقىپ چۈشۈپ ئارمانلىق يوللارنى گۈلگە ئەمەس ئازغانغا تولدۇرماقتا... ئاھ ،مۇھەببەت ئاللاھنىڭ ئىنسانلارغا ئاتا قىلغان ئىنايىتى... ئۇ خارلىنىۋاتىدۇ ، ياق! ئىنسانىيەت خارلىنىۋاتىدۇ... يۈرىكىم بۇ كۆرۈنىشتىن  ئۆزىنى توختىۋالالماي  يىغلاپ كەتتى .يۈرىكىمدىن ياش ئەمەس ،ئازاپتىن ئاپىرىدە بولغان قىپقىزىل قان-زەرداپ دەريا كەبى ئاقماقتا...مۇھەببەت ئەينىكىنى قوينىغا سالدى-دە : _ مانا بۇ مېنىڭ كېتىش سەۋەبىم. ئۇ ماڭا قاراپ سوغۇق بىرنى كۈلۈپ قويدى.ئۇنىڭ بىلەن تەڭ ھەسرەتمۇ ماڭا قاراپ كۈلمەكتە ئىدى. مۇھەببەت كەتتى.ئاۋالقى سۇلغۇنلىقى گۇگۇم سەيلىسىدە مەن بىلەن بىللە قالغانىدى. ئۇ پېتىۋاتقان قۇياشقا قاراپ  يول ئالدى... ئۇنىڭ ئىشەنچ يېغىپ تۇرغان نۇرلۇق كۆزلىرىدىن ، چۈشكۈلۈك يوقالغان روھىدىن قۇياشقا ئوخشاش يېڭى سۈبھىنى كۈتۈۋېلىش ئۈچۈن كېتىۋاتقانلىقىنى بىلگەندەك بولدۇم. مۇھەببەت ئۈمىدۋار، چۈنكى ئۇ ئۈمىدسىزلەنسە دۇنيا ئۈمىدسىزلىنىدۇ ، ئۇ ئۈمىدسىزلەنسە ھەممە ئۈمىدسىزلىنىدۇ ، ھەممە يوقىلىدۇ.ئۇنىڭ ھەر بىر باسقان قەدىمىدىن ئۈمىد بىلەن يولغا چىق! دېگەن ئىزلار تۇپراق يۈرىكىگە ئىز سالماقتا...ئۇ كەتتى ھامان بىر كۈنى يەنە قايتىپ كېلىدۇ. قۇياش يەنە ئىشىكىنى قۇلۇپلاپ، نۇرلىرىنى يىغۋالدى ئۆيىگە. كېچە يەنە خۇيلىرىنى چىقىرىپ، ئەتراپلارنى ئورىۋالدى كۈيىگە. غېرىپ تۈن مېنى قارا قوينىغا ئالماقتا. خىيال كېمىسى مېڭەمدە ئۈزۈپ مېنى ئەركىن دۇنياسىدا لەيلەتمەكتە... ھېلىقى چېچەك پەسلى پەسلىنى سېغىندىم . ئۇ نەقەدەر گۈزەل ئىدى-ھە!؟... ئاپئاق چېچەك . ئاپئاق چېچەك دۇنياسىدا ياشاۋاتقان ئاقكۆڭۈل يۈرەكلەر... سەمىميلىك ، گۈزەللىك بۇ يەردە مېھىر-مۇھەببەت بىلەن چىڭ قۇچاقلاشماقتا.مېھىردىن تامغان ھەر بىر تامچە نۇردىن پورەك -پورەك قىزىل  گۈللەر ئېچىلماقتا .بۇ _ چېچەك دۇنياسى، بۇ _ نۇر دۇنياسى ، بۇ _ پاك دۇنيا... چېچەك بەرگىللىرىدە يالتىراق ئۈمىدلار شەبنەم كەبى جۇلا قىلماقتا... چېچەك ياپرىقىنى چىشلىۋالغان ھەسەل ھەرىسى، كېپىنەكلەر شوخلىقتىن  لەرزان ئۇسۇلغا چۈشمەكتە... بۇ يەردە غېرىپلىق يوق، ۋاپاسىزلىق ، ۋىجدانسىزلىق ، ئادالەتسىزلىق ، مېھىرسىزلىك يات ئۇقۇم. چېچەك ھىدلىرىدىن ئىمان ، ئىتقاد ، غۇرۇرنىڭ جاننى مەستخۇش قىلغۇچى پۇراقلىرى دىماقلارغا چېچەك دۇنياسىنىڭ ئوتلۇق سىماسىنى مەۋج ئۇرماقتا... چېچەكتىكى غۇژمىكىدىكى ئىناقلىق مانا بۇ چېچەك دۇنياسىدىكى ئۇلۇغۋار روھ...ئاھ ،چېچەك دۇنياسى ، مۇھەببەتلىك دۇنيا... ئاسمان كۆپكۆك سىياھ بىلەن بويالغان . قۇياش ئۈمىدلىرىنى  زىمىنغا مەردلەرچە چاچماقتا .زىمىن كىرپىكلىرىنىڭ ھەر بىر تېلىدا ئۈمىد ، يەنە شۇ ئۈمىد چېچەك بەرگىللىرىدىن ساقىپ چۈشمەكتە... قۇشلار ئۈمىد ناخشىللىرنى پۈتۈن كائىناتقا ياڭراتماقتا...ئاھ ، شېرىن ھېسلارنىڭ مۇجەسسىمىسى ، گۈزەللىكنىڭ  مۇجەسسىمىسى پۈتۈلگەن چېچەكلىك پەسىل . ئۇ ئىنسانىيەت قەلبىدىكى پاك دۇنيانىڭ مۇھەببەتلىك زىمىندىكى ئۆچمەس كارتىنا ... خىيالىمدىن ئويغاندىم. ھېلىقى قارا  كېچە يەنە غېرىپ كۈيىنى تەڭكەش قىلىپ ، مەن بىلەن ئەسرارلاشماقتا. ئاينىڭ سۇلغۇن چېھرىدە ھېلىقى قارا داغ ، ياق ! ئۇ يۈرىكىمگە چۈشكەن قار داغ ... ھەي ، چېچەك پەسلى ، ئۈمىد ھارارىتىدە يۇيۇنۇپ غېرىپلىقىمغا تەسەللىي بولغان چېچەك پەسلى ... زۇلمەتتىن قۇتۇلۇپ چىقىشىمغا مەدەت ، ئۈمىد ئاتا قىلغان رەڭدار چېچەك پەسلى... ئاھ ، مېھىرلىك چېچەك قايدىسەن؟ ھەي، چېچەك مېنى  ھىجران پەسلىگە مۇپتىلا قىلىپ، يۈرىكىمنى يەنە مۇجۇمسەن؟ھىجران ئالۋۇندا رىيازەت چېكىۋاتىمەن. يۈرىكىم يىغلايدۇ...گۈزەللىكنىڭ سېغىنىدۇ... سېنىڭ مېھىرلىك ئالەمدىن ئالۋاستىنىڭ ئاغۇنلىرىدا ئېزىپ مۇھەببەت بىلەن تەڭ كەتكىنىڭ مېنى دەشىت - باياۋاندا خار -زار قىلماقتا... ئاھلىرىم بىلەن ھىجران مۇڭداشقان شۇ چاغ، تامدىغۇ خىرە كۆزىمدىن ياش ئەمەستۇر قان. چېچەك ۋەسلىدە ھەر كۈنى چېچەك چۈشەيمەن، قارچۇغىمدا چېچەك ھۆسنى قېتىپ قالغان. چېچەك ۋەسلىدە ھىجران دەشىتىنى كېزىۋاتىمەن.يالغۇزلۇق ھىجران ئوتىدا كۈيۋاتقان يۈرىكىمنى غاجىلاپ ، تېنىم غۇژۇلداپ ، روھىم جان قەپىسىدىن سۇغۇرۇلدىغاندەك قىيلىنىۋاتىمەن.ئۆلۈم پەرىشتىسى روھىم گۈلزارلىقىدا ماڭا سايىدەك ئەگەشمەكتە... سىرىتتا مەيىن شامال غۇۋا ئاي نۇرىغا جۆر بولۇپ يىنىككىنە يەلپۈنۋاتقان يېشىل چىمەنلەرنىڭ يۇمران يۈزلىرىنى سۆيمەكتە.يېشىل ئوتلارنى شوخ تەبەسسۇمى يېشىل نۇر بىلەن قوشۇلۇپ يۇلۇمنى بىردىنلا يۇرۇتۇۋەتتى.ئۇلار ماڭا پىچىرلىماقتا.<< قەددىڭنى تىك تۇتۇپ ئالدىڭغا قارا! چېچەك ۋەسلىدە ئېچىرقاپ كەتكەن روھىڭنى تاپ. بەخت ئالىمنىڭ نۇرانە پەرىشتىللىرى ساڭا يېقىنلاشماقتا، ئۇلار سېنى قوغدايدۇ. ئۈمىدۋار بول! يول تېخى ئالدىڭدا... >>  ئاھ ، قاراڭغۇ يۈرىكىم بىردىنلا جانلىنىپ يۇرۇپ كەتتى...ئازاپتىن پۈكلەنگەن قامىتىمنى قايتا تىكلىۋالدىم. سەرسانلىق روھىمدىن خوشلاشقان شۇ دەم، بىخ سۈردى يۈرەكتە ئۈمىد ئۇچقۇنى. پاكلىققا يول ئالغان ئۈمىدلىك چېچەك، تەبەسسۇم گۈلىنىڭ تەنھا تۇتقۇنى. كۈلكە قىزى يىراقتىن گۈل توشقان سەۋىتىنى كۆتۈرۈپ ماڭا تەبەسسۇم قىلىپ كەلمەكتە. سېرىق مەڭزىمگە  قىزىللىق ، سۇلغۇن چېھرىمگە نۇر يۆگەشمەكتە... گۈزەل جىلۋىنى سېغىنىپ يىغلىغان يۈرەك، ھىجران بىلەن سۇلغۇنۇپ تاڭنى ئاتقۇزار. قارا كېچىدە يادلانغان گۈزەل ئەسلىمە، چوغدىن رەڭ ئالغان روھقا ئىنتىزار. تۈن ئاستا - ئاستا سۈزۈلۈپ ، ئالتۇن قۇياش كۈمۈشرەڭ مانان باسقان كەڭ ئۇپۇقنى  يېرىپ يېڭى بىر سۈبھى بىلەن يۈز كۆرۈشمەكتە... تاڭ ئاتتى. سېخىي قۇياشتىن يەنە مۇھەببەت يېغۋاتىدۇ. ئۇ مۇھەببەت بۇلاقلىرىنى نۇر قىلىپ ، چاڭقاق زىمىنغا چېچىۋاتىدۇ. تاڭ شەپىقى قۇياش لىۋىنى سۆيگىنىدە ، يۈرىكىم ئۈمىدتىن زەم-زەم ئوتلايدۇ. توغرا ، مەن ئۈمىدۋار ... ئەتە تېخىمۇ گۈزەل ، ھامان بىر كۈنى دۇنيا قايتا گۈزەللىكىنى تېپىپ ، مۇھەببەتلىك دىللار ھاياجان مىنۇتلىرىغا تولىدۇ. تاڭ قوينىدا  دادامنىڭ سادالىرى قۇلاقلىرىمغا شامالدەك شىۋىرلىماقتا  : _ قىزىم ، ھىجاپ دېگەن نېمە؟ _......... تۇرۇپ قالدىم . ئۇنىڭ سۇئالىغا جاۋاپ بېرەي دەپ ئاغزمنى ئۈمۈلىتەي دېيىشىمگە... سادا يەنە   كۆكتىن ياڭرىدى : _ ھىجاپ ، پۈتۈن بەدەنى رەخت بىلەن ئوراڭ دېگەنلىكلا  ئەمەس، بەلكى قەلبىڭدىكى ناپاك ھېسلارنى چۆرۈپ تاشلاپ  ئادىميلىكىك بىلەن دۇنياغا مۇھەببەت ئاتا قىلىپ پاك ياشا ، شەرمى- ھايالىق ، ئپپەتلىك بول دېگەنلىكتۇر. قىزىم ، ئىپپەت ھىجابىڭنى مەڭگۈ ئۇنتۇپ قالما!!! ئۇ يۈرىكىڭدە... ئەقلىمنى  جورۇپ  قايتا ئويغىنىپ ئەتراپقا نەزەر تاشلاۋاتىمەن. دادامنىڭ ئەينى يىللىرى قىلغان مۇنۇ نەسھەتلىرى ھېلىمۇ كۆكتە ياڭرىماقتا ئىدى. شەپەق لىۋىدىكى ئۈمىدلىك يوللار، ئەنە قۇياشتا ئۈزمەكتە مەغرۇر. ئېتىنى چاپتۇرۇپ زەپەر قۇچىدۇ، تۈندىن ئايرىلىپ روھلانغان ئۇيغۇر. يۈرەكتە دولقىللىغان مېھىر بىلەن تەڭ، تاغلاردا ياڭرايدۇ ئەكىس سادالار. مېھىردىن ئاتەشتەك يانماقتا ئىشەنچ، سۈكۈتكە چۆمۈلگەن تىمتاس خىيالار. ۋەتەننىڭ باغرى كەڭ. ئۇ مېھىرلىك باغرىنى ئۆز پەرزەنتىدىن مەڭگۈ ئايىمايدىغان مېھىرىبان ئانا. مەن ئۈمىدۋار...كىشلەرنىڭ قەلبىدە مۇھەبەت تېخى ئۇنتۇلغىنى يوق.بىز مۇھەبەتكە مۇھتاج... مۇھەبەت قايتىپ كەل! ئازاپلىرىمىز ئاقار يۇلتۇزدەك سەن بىلەن ئۆچكۈسى... ئارمانلىق يۈرەكلەر ساڭا تەشنا ، ساڭا ئىنتىزار.سەن بىلەن خۇنۇكلەشكەن روھىمىز قۇۋۋەت تېپىپ پەزىلەت بېغى قايتا گۈللەنگۈسى.قايتىپ كەل ! بارچە يۈرەكلەر ساڭا تەشنا... ئانا باغرىنى يېرىپ ئەمدىلا تۇغۇلغان مەسۇم بوۋاقنىڭ كۆز يېشىدا سەن ...تاغ- ئورمانلار، گۈل -چىمەنلەر، قۇم - ئېدىرلار سېنىڭ مەۋجۇدلىقىڭنىڭ شاھىدى ئەمەسمۇ؟ ئىشىنىمەنكى، سەن مۇقەددەلىكىڭ ، ئۇلۇغۋارلىقىڭ بىلەن مەڭگۈ قەدىرلىنىسەن ، چۈنىكى بۇ مۇھەببەتلىك دۇنيا . بىز ھالاكەتلىك تەقدىردىن سەن بىلەن قۇتۇلىمىز... جەنەتنىڭ ئالتۇن ئاچقۇچى سېنىڭ قولۇڭدا ، بىزنى كۆيۈمسىزلىكتەك نار ئازابىدىن قۇتۇلدۇرغىن. ئۈمىدۋار كۆزلىرىم سېنى ئەبەدىي كۈتىدۇ، ساڭا تەلپۈنىدۇ.قايتىپ كەل، سېنى يۈرىكىمنىڭ يىلتىزلىرىغا مەھكەم باغلاپ ،ئۇنىڭدىن ئۈمىد ئۇرۇقلىرىنى تېرىپ ۋىسال قوينىدا قايتا ئېچىلغان قىزىل گۈلگە ئايلىنىمەن.يەنە تەبىئيلىكىڭ سىڭگەن چېچەك پەسىلىگە قايتىمەن... كۆز ئالدىمدا مۇھەببەتنىڭ تۈنۈگۈنكى گۇگۇم سەيلىسىدە تامغان ئىككى تامچە نۇرىدىن ئېچىلغان قىزىل گۈللەر ھېلىمۇ تاڭدىكى قۇياشنىڭ ئىللىق ھارارىتىدىن تۆكۈلگەن سۈزۈك نۇردا رەڭلىنىپ تۇراتتى. قۇياشنى سۆيمەكتە ئۈمىد پورىكى، قەلەمدىن تىتىرگەن ئارمانلىق قۇرلار. كۈلىدۇ ئەتىنىڭ مەردانە قىزى، يۆگىشىپ پاكلىققا ئۈزۈلمەس يوللار. پورەكلەپ ئېچىلار كەلگۈسى ئۈچۈن، ئىشچانلىق بابىدىن نۇر ئۈزگەن قوللار. تاڭلارنىڭ كۆزىدە ئۈمىد ئۇچقۇنى، يۇلتۇزدەك جىمىرلاپ چاقنايدۇ گويا. ياشلارنىڭ ھاسىلى مېھىرلىك ئۇرۇق، ئۈنمەكتە زىمىندا بولۇپ تۇتىيا. سۈكۈتنىڭ جاملىرى ۋىسالغا توشۇپ، كۈلكىلەر ۋىلىقلار يۈرەك قېتىدا. ئۆلۈمنىڭ ھېكمىتى ، شەرىپى نېمە؟ ياشاشقۇ ئىنساندەك ھاياتنى سۆيۈش. قاغجىرغان دىللارغا بەرسەك مۇھەببەت ، ئاھ، نېسىپ بولغۇسى باھاردەك كۈلۈش. ئاينىڭمۇ يىغىسى قالىدۇ توختاپ، يۈرەكتە بولسىلا ئۈمىدلىك كۈتۈش. قۇياش ئالقىنىڭنى كەڭ بىر ئاچقىنا، نۇرلانسۇن پاك ھايات ئالقانلىرىڭدا. غېرىبان يۈرەكلەر ئېمىپ ھارارەت، شەيتانغا تاش ئېتىپ چۆمسۇن پاكلىققا. مۇھەببەت سىرغىتقان جەسۇر قەدەمنى، پۈركىگىن ئۈمىدلىك مەردانە يولغا. 2010- يىل     (ئاۋغۇست) مەنبە: قەلىمىم. ئەسكەرتىش : مەزكۇر ئەسەرنىڭ ئىشلىتىش ھۇقۇقى مىسرانىم مۇنبىرىگە تەۋە. كۆچۈرۈشكە ياكى يۆتكەپ ئىشلىتىشكە قەتئىي بولمايدۇ! ئەسەر ھۇقۇقىمغا دىقەت قىلغايسىز... [/color

تارىم

	ئۇشبۇ ئەسىرىڭىزنىڭ مىسرانىم تورى مۇكاپاتلىق ئەسەرلەر پائالىيىتىدە مۇكاپاتقا ئېرىشكىنىنى قىزغىن تەبرىكلەيمەن [s:166]  [s:173]

manxuman

	ئۇشبۇ ئەسىرىڭىزنىڭ مىسرانىم تورى مۇكاپاتلىق ئەسەرلەر پائالىيىتىدە مۇكاپاتقا ئېرىشكىنىنى قىزغىن تەبرىكلەيمەن   . [s:160]  [s:160]  [s:160]

dsfn

	ياخشى يىزىپسىز؟ موكاپاتقا ئىرىشىڭىزنى ئۈمۇت قىلىمەن ؟ سىزگە قۇربان ھىيىتلىق سالام يوللايمەن!!!!!!!!!!!

bahader520

	ئۇشبۇ ئەسىرىڭىزنىڭ مىسرانىم تورى مۇكاپاتلىق ئەسەرلەر پائالىيىتىدە مۇكاپاتقا ئېرىشكىنىنى قىزغىن تەبرىكلەيمەن   .

MAXAL1380

	ياخشى يىزىپسىز؟ موكاپاتقا ئىرىشىڭىزنى ئۈمۇت قىلىمەن ؟ سىزگە قۇربان ھىيىتلىق سالام يوللايمەن!!!!!!!!!!!

axek13999649893

	لىرىكا يىزىشقا   تازا  ئپىىڭز باكەن تىخمۇ تىرىشڭ