قەدىردان ئۇستازلار،بايرىمىڭلارغا مۇبارەك!

Aytugh

	ئۇستازىم نەسىر سائادەت ساتتار ئايتۇغ   ئىنسان مەنىۋىيىتىنى بىلىم ئەشكارلىرى بىلەن بېزىگۈچى مېھنەتكەش ئۇقۇتقۇچى-ئۇستازلارنى كۈيلەپ تالاي مىسرالار پۈتۈلسىمۇ ئۇلارنىڭ ئەجرىنى يورۇتۇپ بېرىشكە ئازلىق قىلىدۇ. ئۇستاز شۇنداق ئىنسانكى تالاي قاراڭغۇ دىللارغا شام كەبى يورۇقلۇق ئاتا قىلىپ ئۆزى ئاستا-ئاستا خوراپ تۈگەيدۇ.   ئۇستاز شۇنداق ئىنسانكى، تالاي چاڭقاق قەلىبلەرنى بىلىم زەم-زەملىرىدە سۇغۇرۇش ئۈچۈن يۈرەك قېنىنى بىر تېمىم، بىر تېمىمدىن تېمىتىدۇ.   ئۇستاز شۇنداق ئىنسانكى، ئۆزىگە زارىقىپ بېقىۋاتقان تالاي ئاپتاپپەرەسلەرنى مىھر ئىنىرگىيىسى بىلەن جۇلالاندۇرۇپ ئۇلار بەس-بەستە ئېچىلىشقا باشلىغاندا ئۈن-تىنسىز تاغ كەينىگە مۆكۈنىدۇ. ئۇستاز شۇنداق ئىنسانكى، گىياھ ئۈنمىگەن قاقاسلارغا ئۈمىد ئۇرۇقلىرىنى چېچىپ، مىننەتسىز پەرۋىشى بەدىلىگە ئېرىشكەن كىچىككىنە يېشىللىقتىنمۇ كۈزدە ھوسۇل ئالغان دېھقاندەك چىن يۈرىكىدىن سۆيۈنىدۇ. تارتقان مۇشەققەتلىرىگە رازى بولىدۇ. بۇنىڭ بەدىلىگە ھېچنىمە تەلەپ قىلماستىن يەنە بىر پارچە قاقاسلىققا قاراپ چوڭقۇر ئۇھسىنغىنىچە يېڭىچە ئۈمىتلەر بىلەن يەنە بىر باھارغا ئۇرۇق چاچىدۇ.   ئۇستاز شۇنداق ئىنسانكى، سەبى دىللارغا بىلىم بېرىش يولىدا بور كەبى خوراۋاتقىنىنى بىلىپ تۇرسىمۇ ئۆزىنى دوسكىغا تېخىمۇ چىڭ سۈركەيدۇ. بور توزانلىرى نەپەس يوللىرىنى پۈتۈنلەي توسۇپ قويۇۋاتقىنىنى سىزىپ تۇرسىمۇ يۈرەك قېتىدىن مايسىلىرىغا بەرگەنلىرىنىڭ يىتەرلىك بولماي قېلىشىدىن ۋايىم يەيدۇ. دۇنيادا ئوقۇتقۇچى-ئۇستازلاردەك، ئۈن-تىنسىز ئەجرى بىلەن گۈل-گىياھلارغا پەرۋىش قىلغۇچى ،قۇرۇپ چاك-چاك يېرىلغان بىنەملەرگە ئۈمىت بىلەن ئۇرۇق سالغۇچى، ئۇچۇم بۇلۇش ئالدىدا تۇرغان بالىلىرىغا قانات تىلىگۈچى، ئوقۇغۇچى-شاگىرتلىرىنىڭ كىچىككىنە ئۇتۇقلىرىدىن چىن دىلىدىن سۆيۈنۈپ، بارچە ئۇقۇبەتلىرىنى ئۇنتۇغۇچى بارمۇ جاھاندا؟!!   قەدىردان، مىھرىبان...ئۇقۇتقۇچى-ئۇستازلار. توغراق يېشىدا ياشاڭلار! ئۇستازلار بارلىق ئوقۇتقۇچى-ئۇستازلارغا بېغىشلايمەن مىھرىڭلاردىن مىھىر ئەمگەچ يۈرەكلەر، ھەر پەسىلدە گۈل-غۇنچىلار ئېچىلۇر. ئەجرىڭلاردىن ھەر بىر دىلغا بېزەكلەر، نۇر-زىيادەك تەپتى بىرلە چېچىلۇر. سىلەر بولغاچ دۇنيا گۈزەل ئۇستازلار، گۈزەل شۇنداق ھەر بىر ئارزۇ-تىلەكلەر. سىلەر بولغاچ ياڭراق غەزەل ئۇستازلار، ھەربىر دىلغا چاچار نەققاش-بېزەكلەر. ئاپتاپپەرەس قۇياش تامان باققاندەك، ھەر بىر مايسا مىھرىڭلارغا باقىدۇ. پۈتمەس بۇلاق يىللار بويى ئاققاندەك، پاك ئەجرىڭلار ھەربىر دىلغا ئاقىدۇ. ئىسمىڭلارنى تىلغا ئالسا ھەر ئىنسان، سۈيۈنمەستىن تۇرالىسۇن قانداقمۇ. ئەجرىڭلاردىن باھار تېپىپ زىمىستان، ياشىرىدۇ قۇرۇق يانتاق- قامغاقمۇ. قەلەم ئاجىز كۈيلىمەككە سىلەرنى، ئەجرىڭلارغا مىڭچە داستان ئاز كىلۇر. تازىم قىلسا سىلەر ئۈچۈن ئېتىز-قىر، كەڭ كائىنات يەرۇ-ئاسمان ئاز كىلۇر. توغراق كەبى ياشاڭلار ئەي باغۋەنلەر، ھەر ئۇرۇقنىڭ ھوسۇلىنى كۆرۈڭلار. زور ئۈمىتتە ئۇرۇق سالغان ئېتىزغا، دېھقان كەبى ئالتۇن كۈزدە كۈلۈڭلار. تۇرپان گېزىتى2012-يىلى 9-ئاينىڭ 10-كۈنى

Aytugh

	ماياك (ھېكايە) سائادەت ساتتار ئايتۇغ مەكتەپ قوينىغا قەدەم ئالغىنىمدىن باشلاپ ئەدەبىيات دەرسىگە ئالاھىدە قىزىقىپ قالدىم ھەم باشلانغۇچ مەكتەپنىڭ 5 _ يىللىقىغا چىققاندا ئانچە _ مۇنچە شېئىر _ قوشاق يېزىپمۇ يۈردۈم. بۇ جەرياندا ئەدەبىيات ئوقۇتقۇچىمىز ئوسمان مۇئەللىم ماڭا كۆپ ئەجىر سىڭدۈردى. يېڭى ئەسەر يازساملا بىرىنچى بولۇپ ئوسمان مۇئەللىمگە كۆرسىتىشكە ئالدىرايتتىم. باشلانغۇچنىڭ 6-يىللىقىدا ئوقۇۋاتقان مەزگىللىرىم ئىدى. ئوسمان مۇئەللىم مەن يازغان بىر پارچە شېئىرنى ساۋاقداشلارنىڭ بالىلار بايرىمىلىق خور قىلىپ ئېيتىشى ئۈچۈن يېتەكچىلىك قىلدى ۋە مېنىڭ بايرام كۈنى بايراق چىقىرىپ بولغاندىن كېيىن ئۆزۈم يازغان: مەكتەپ ئىللىق جاي شۇنچە، ئۇندا خۇشال يايرايمىز. مىليونلىغان گۈل-غۇنچە، ئىلىم ئېلىپ قانمايمىز. ئۇستازىمىز ئەجرىدە، قانات كېرىپ ئۇچقايمىز. پەن-مەرىپەت بابىدا، شان-شەرەپلەر قۇچقايمىز. دېگەن شېئىرنى دېكلىماتسىيە قىلىشىمنى ئېيتتى. مەنمۇ خۇشال ھالدا كۈندە ساۋاقداشلىرىم بىلەن خور ئېيتىپ، بايراق چىقىرىش ۋە شېئىر دېكلاماتسىيە قىلىشنى مەشق قىلدىم. تۆت كۆزىمىز بىلەن كۈتكەن 1-ئىيۇن بالىلار بايرىمى يېتىپ كەلدى. مەھەللىمىزگە يېقىن بولغان تۆت يېزاباشلانغۇچ مەكتىپىدىكى  بارلىق ئوقۇتقۇچى-ئوقۇغۇچىلار بىزنىڭ مەكتەپكە يىغىلغاچقا مەكتەپ قوروسىلا ئەمەس، چوڭ يولنىڭ ئىككى قاسنىقىمۇ ئاۋات بازارغا ئايلىنىپ كەتكەن ئىدى.بايراملىق نومۇرلارنى كۆرۈشكە كەلگەن ئاتا-ئانىلارمۇ مەيدانغا پاتماي قالغان ئىدى. نومۇر كۆرۈشكە كەلگەنلەرنىڭ ئارىسىدا ئاتا-ئانام ۋە ئاكاممۇ بار ئىدى. ئاپام نومۇر ئارىلىقىدىكى دەم ئېلىشتا ئوسمان مۇئەللىمگە مىنىڭ كېچىدىن كاناي ياللۇغۇم قوزغىلىپ قىززىپ قالغىنىمنى ئېيتقان ئىدى. ئوسمان مۇئەللىم ئەندىشە بىلەن بېشىمنى سىلاپ تۇرۇپ: -گېلىڭىز ھازىرمۇ ئاغرىۋاتامدۇ؟ بولمىسا بايراقنى چىقىرىپلا شېئىرنى دېكلاماتسىيە قىلماڭ، __ دىدى. شۇنچە ۋاقىتتىن بېرى قىلغان مەشىقلىرىمنىڭ نەتىجىسىز بولۇپ قېلىشىنى، مۇئەللىمنىڭ چېھرىدە‹‹يالىتتىدە››پەيدە بولۇپ ئۆچكەن ئەپسۇسلۇق ئىپادىسىنى كۆرۈشنى خالىماي ۋە ئاتا-ئانامغا‹‹بايراق چىقىرىپ شېئىر دېكلاماتسىيە قىلىدىغان بولدۇم، چوقۇم بېرىپ كۆرۈڭلار››دەپ ماختىنىپ كەلگىنىم ئۈچۈن بۇ پۇرسەتتىن ۋاز كەچكۈم كەلمىدى. مۇئەللىمگە: -خاتىرجەم بولۇڭ مۇئەللىم، مەندە چاتاق يوق، چوقۇم ياخشى قىلالايمەن، __ دەپ جاۋاپ بەردىم. باشقا مەكتەپتىن كەلگەنلەر بايرامغا ئاتالغان نومۇرلىرىنى كۆرسىتىشكە باشلىدى. بىر چاغدا بىزگە نۆۋەت كەلدى. ساۋاقداشلىرىم ئوپچە خورنى ئورۇنداپ يېرىملاشقاندا مەن بايراق خادىسى يېنىغا كەلدىم. شۇ دەقىقىدە پۇت _ قوللىرىم تىترەپ جىددىيلەشكىلى تۇردۇم. كەينىدىن شېئىر دېكلاماتسىيە قىلىشنى ئويلاشقىمۇ جۈرئەت قىلالمىدىم. ئۆز-ئۆزۈمگە‹‹چوقۇم غەيرەت قىلىشىم كېرەك، مۇئەللىمنى، ئاتا-ئانامنى ئۈمىدسىزلەندۈرسەم بولمايدۇ››دېدىمدە، بايراقنى زېھنىمنى يىغىپ چىقىرىشقا باشلىدىم.   بىر چاغدا پەستىن ئوسمان مۇئەللىمنىڭ «- بولدى، قايتىپ چۈشۈڭ» دەپ قىلغان ئىشارىسىنى كۆردۈم. ئۇ مېنى جىددىيلەشكىنىدىن شېئىرنى ئۇنتۇپ قالدى دەپ ئويلاپ قالغان ئىدى. كۆز ئالدىمغا ئوسمان مۇئەللىمنىڭ ئەندىشە ۋە ئىلتىجا بىلەن ماڭا تەلمۈرۈپ قاراپ تۇرغان مىھرىبان ھالىتى كەلدى _ دە، قايتىدىن ماغدۇرۇمغا كەلگەندەك بولۇپ يۇقىرى ئاۋازدا شېئىر دېكلاماتسىيە قىلىشقا باشلىدىم... دېكلىماتسىيەنى ئۆزۈم ئويلىغاندىنمۇ ياخشى قىلغان بولسام كېرەك، پەستىن گۈلدۈرۈس ئالقىش ياڭرىدى. مەن ئاستا ئورنۇمغا يېنىپ چۈشتۈم. -يارايسىز قىزىم، بەك ياخشى بولدى، شېئىرنىمۇ بەك ياخشى دېكلاماتسىيە قىلدىڭىز. قاراڭ ئەتراپتىكىلەر تېخىچە چاۋاك چېلىشىۋاتىدۇ، _ ئوسمان مۇئەللىم ھاياجانلانغان بولسا كېرەك شۇنداق دېگەندە كۆزىدىن ئىختىيارسىز ياش قويۇلۇشقا باشلىدى. مانا ئارىدىن ئاز كەم ئوتتۇز يىل ئۆتكەن بولسىمۇ بۇ ئىش تۈنۈگۈنكىدەكلا ئېسىمدە. نۇرغۇن ئۇستازلارنىڭ مېھرى ۋە يېتەكلىشىگە نائىل بولغان بولساممۇ، قەلبىمگە ئەدەبىياتنىڭ ئۇچقۇنىنى تۇتاشتۇرغان ئاشۇ قەدىردان ئۇستازىم ھامان قەلبىمنىڭ ھۆرمەت تۆرىدە. ھەر قېتىم جاپا - مۇشەققەتكە، سىناقلارغا دۈچ كەلگىنىمدە ياكى تۇرمۇشنىڭ تۈرلۈك بېسىملىرى يەلكەمنى باسقىنىدا، قەلبىمنى ئۈمىدسىزلىكنىڭ تۇمانلىرى قاپلىغاندا، قەدىرلىك ئۇستازىم ئوسمان مۇئەللىمنىڭ ئاشۇ كىچىككىنە غەلىبەم ئۈچۈن ياشقا تولغان كۆزلىرى ئېسىمگە كېلىدۇ ھەم ئۇنىڭ ماڭا بەرگەن تەلىملىرى ماياكقا ئوخشاش قەلبىمنى يورىتىدۇ _ دە،  غەشلىكلەرنى ئۇنتۇپ ئالەمچە غەيرەتكە تولىمەن. تۇرپان گېزىتى9-ئاينىڭ6-كۈنى

tarim-darya

	سائادەت ساتتار ئايتۇغنىڭ، ئۇقۇتقۇچلار بايرمىغا ئاتاپ يازغان بۇ شئېرلىرى ،ياخشى يېزىلىپتۇ . ئاپىرىن .

ئەرتۇرا

	     بىباھا گۆھەردەك خىسلىتىڭ  ئۇستاز ( ئوقۇتقۇچىلار بايرىمىغا سوغاتلىق) بىباھا گۆھەردەك خىسلىتىڭ ئۇستاز، يوق شۇڭا تۆھپەڭگە مىننىتىڭ ئۇستاز. ھەممە دەر ئوقۇتۇش جاپالىق خىزمەت، لېكىن ساڭا راھەت قىسمىتىڭ ئۇستاز. راست ئىكەن ئالتۇننى زەرگە بىلىشى، ئالىمغا بىلىنەر قىممىتىڭ ئۇستاز. چەكتىن ئاشسا خىزمىتىڭ ھار ئالمىدىڭ، جاپالىق خىزمەتتە قات-قېتىڭ ئۇستاز. چۈنكى ئوقۇتۇشتىن باشقا ئىشىڭ كۆپ، ئىش بىلەن تولىدۇ كۆپ قېپىڭ ئۇستاز. ئوقۇتۇش ئۈنۈمسىز يالماپ باشقا ئىش، چېلىنماس ھەسرەتلىك شۇ دېپىڭ ئۇستاز. يەنىلا پاك سۆزلەپ پاك ياشاپ كەلدىڭ، پاك ياشاش بوپ كەلدى خىزمىتىڭ ئۇستاز. «ئاق» قايسى؟«قارا»ھەم بىلمەيتى ئەۋلاد، ئەۋلادقا بىلدۈرگەن ھىممىتىڭ ئۇستاز. ئەۋلادى مىللەتنىڭ تەقدىرى يورۇق، بولغاچقا ئەۋلادقا «نۇر» گىپىڭ ئۇستاز. قەدرىڭنى بىلگەنلەر گۈللەندى شۇڭا، بىلمىگەن خارلاندى قۇت تېپىڭ ئۇستاز. ئەل ۋەتەن ئۈمۈدى پەقەت سىنىڭدە، شاتلانسۇن ئارمانىڭ پاك سېپىڭ ئۇستاز. 2013-9-10            مۇئەللىم ئورنى پەس. 1 «ساراڭ» دەر سۆزلىسەم  مەن ساراڭ ئەمەس، سۆزلىدىم ئوقۇتۇش بولغاچقا بىر خەس. ئانا تىل يەكلىنىپ باستى يەنە  نەس، ئۇستازنى نەس باسسا ئەل خاراپ پەۋەس. مۇئەللىم ئورنى پەس، ئەلنىڭ بەختى تەس. 2 باشلىقلار تۇرىدۇ خۇددى داھىدەك، كۆرمەيدۇ پۇخرانى كەشى لايىدەك. يالۋىرىپ  چاپىمىز ئىشقا يايىدەك، بىز ماتا ئۇلاردۇر ئەتلەس شايىدەك. مۇئەللىم ئورنى پەس ئەلنىڭ بەختى تەس. 3 شۇ تۈزۈم سەۋەپلىك باردۇر داۋامسىز، سۆھبەتتە يىغمىساق بىزلەر  يارامسىز. تەنقىدلەر بىزنىلا كىرىپ سالامسىز، قورقۇتۇپ تىللايدۇ «سىلەر بولامسىز!»، مۇئەللىم ئورنى پەس ئەلنىڭ  بەختى تەس. 4 دىن چەكلەشتىن ئەخلاق ئۆزلىشىپ ئالا،   كۆپەيمەكتە مەكتەپتە داۋامسىز بالا . شۇڭلاشقا بىلىملەر ئۆزلىشىپ چالا ، رىزاسىز بۇرچىمىز ئايلىنار دالا. مۇئەللىم ئورنى پەس ئەلنىڭ بەختى تەس. 5 ئوقۇغۇچى قىرىقتىن كۆپ سىنىپتا ، كۈنلۈك بىردىن تاپشۇرۇق بار قېلىپتا. ئامال يوق بۇنىڭغا بىزدەك غېرىپتا. چارچايمىز تۈزۈمنى ساناپ ئېيىپتا ، مۇئەللىم ئورنى پەس ئەلنىڭ بەختى تەس. 6 بالىنى ئازىلاپ ئۇستازنى خارلاپ، ماڭغان مائارىپ تۈگىشىدۇ زارلاپ. ھەم ياراملىق ئەۋلات چىقمايدۇ پارلاپ ، قارايلى تارىخقا ئىبرەتلىك چارلاپ، مۇئەللىم ئورنى پەس، ئەلنىڭ بەختى تەس. (7 ئىلىمگە خىيانەت، ئەلگە قىيامەت ، بىراق بىزدە كۆپتۇر بۇنداق قىياپەت. بولسىمۇ ئۇستازغا ياخشى سىياسەت. لىكىن بىزدە يوقتۇر ئۇنداق دىيانەت.، مۇئەللىم ئورنى پەس، ئەلنىڭ بەختى تەس. 8 باشقىلار ئۇستازنى   ئۇلۇغ بىلىدۇ ، شۇڭا  ئۇلار باي  بەخىتلىك كىلىدۇ، بىزدە غاجاپ تىللاپ ئەخمەق قىلىدۇ، ھالىمىز شۇڭلاشقا يۈرەك تىلىدۇ. مۇئەللىم ئورنى پەس، ئەلنىڭ  بەختى تەس. 9 ئۇ ئايدىن بۇئايغا مائاش يەتمەيدۇ، مال باھا ئۆسۈشتىن نېرى كەتمەيدۇ، توي تۆكۈن مائاشنى تازا  ئەپلەيدۇ. شۇڭلاشقا نامراتلىق بىزنى خەپلەيدۇ، مۇئەللىم ئورنى پەس ، ئەلنىڭ  بەختى تەس. 10 ھەربىر  خەت پىلاندا بولمىساق زىرەك، ئايلىنىپ قالارمىز كىرەكسىز تىزەك. شۇڭا بەك ئىشلەيمىز خىزمەتنى دىمەك. ئىشلەشتە يوق بىزگە بىرەرمۇ تىرەك، مۇئەللىم ئورنى پەس ، ئەلنىڭ بەختى تەس. 11 ھاجەت راۋا بولماي تۇرىدۇ سەپ-سەپ، باشقىغا بىزلەردىن تەگمىگەچكە نەپ، قاچاركەن ھەممىسى«نەپ تەگمىدى» دەپ، شۇڭلاشقا غەم باسار بولۇپ بىر سەلەپ، مۇئەللىم ئورنى پەس ، ئەلنىڭ بەختى تەس. 12 ئوقۇتۇشنى دىمەس  «جاپالىق ئەمگەك»، بار تېخى «ھەممىدىن ئاسان »دەپ كەتمەك. يوقتۇر ھەقىقەتنى  ئىزدىمەك يەتمەك، شۇڭا بارساختىلىق يوقنى بار ئەتمەك، مۇئەللىم ئورنى پەس، ئەلنىڭ  بەختى تەس. 13 چېقىمچى چاقىدۇ باشلىققا داتلاپ، غەيۋەتخور غاجايدۇ قارىنى چاپلاپ، دۈشمىنىڭ يۈرۈيدۇ ئەتراپنى قاپلاپ، ياراتماي دوستلۇرۇڭ كىتىدۇ ياتلاپ. مۇئەللىم ئورنى پەس، ئەلنىڭ بەختى تەس. 14 تىلىمىز ئىدى بەك ئۇلۇغ ھىكمەتتە، " ئەڭ گۈزەل تىل يېزىقكەن " دەپ زىننەتتە. خەلقارادا يۈرەر  ئەنە  ئىززەتتە بىراق بىزدە  سانالدى بەك ئىللەتتە، مۇئەللىم ئورنى پەس، ئەلنىڭ بەختى تەس. 15 قوشتىل ، شۇ «قوشتىل»دەك ئادىل ئاقمايدۇ، تەلەپ پىكىر  ھەق گەپ  پەقەت ياقمايدۇ، ھەرىمۇ بىر-بىرنى بىزدەك چاقمايدۇ، ئۇستازىغا  بىزدەك  كۆزدە باقمايدۇ. مۇئەللىم ئورنى پەس، ئەلنىڭ بەختى تەس. 16 جاپالىق ئىشلىسەڭ ئەجرىڭ چىقار كەم، ھەقىقەت بولمىغاچ خۇلاسىدە  ھەم ، ئەقىللىق بولساڭمۇ ئىشلەتسەڭمۇ پەم، ئازاپلار ھەممىسى يوقتۇر تاتلىق تەم، مۇئەللىم ئورنى پەس، ئەلنىڭ بەختى تەس. 17 مائارىپتا خورىتىش بولغاچ  بەك  تولا، مۇئەللىم ئىشى كۆپ تەگمەيدۇ چولا ، ئىشلار كۆپ  ھەم ئېغىر، يېغىردۇر دولا. جاپا بولسا ئىنسانغا شۇنچىلىك بولا، مۇئەللىم ئورنى پەس، ئەلنىڭ بەختى تەس. 18 ئوقۇتۇشتىن مۇھىم ئۇقتۇرۇش دائىم ، بۇيرۇقنى ئاڭلىشىڭ كىرەك بەك لازىم. ئوقۇتۇش بىر چەتتە قالار يەپ ۋايىم ، (قاچانمۇ كىلەر؟) دەپ مىنىڭ باھارىم. مۇئەللىم ئورنى پەس ئەلنىڭ بەختى تەس. 19 ئەمىليەتتىن  ئىزدىمەي ھەقىقەتنى ، يەكلەيدۇ دائىملا ھەق پەزىلەتنى. مۇئەللىم تاپالماس ھەق ھەرىكەتنى. قىينىلىپ ئىزدەيدۇ پاك تەبىئەتنى. مۇئەللىم ئورنى پەس ئەلنىڭ بەختى تەس. 20 مۇشەققەت دەستىدىن ئاقارغان بۇ چاچ، بولغاچقا خىزمەتلەر ئەگرى گادىرماچ. بەختىمىز ھەردائىم تۇرسىمۇ قاچ-قاچ، ئۈمۈدۋار بىز لىكىن ھەقىقەت بولغاچ، مۇئەللىم ئورنى پەس ئەلنىڭ  بەختى تەس. 2013-8    مەنبە :ئۆز قەلىمىم.

Submarine

	ئۇستازلار سىلەر كەلگۈسى ئەۋلادلارنى تەربىيەلەشتەك مۇقەددەس ۋەزىپىنى ئۈستۈڭلارغا ئېلىپ يۈرگۈچى كىشىلەر ، بايرىمىڭلارغا مۇبارەك بولسۇن ! مائارىپ بىر مىللەتنىڭ ___ تەغدىرىنى بەلگىلەيدىغان مۇھىم كەسىپلەرنىڭ بىرى .

سىم@سىم

	ئۇقۇتقۇچىلار بايرىمىڭلارغا مۇبارەك بولسۇن ، رەسىم يوللىيالمىدىم ئەپسۇس

kakkuk11

	ئەسسالامۇ ئەلەيكۇم مۇنبەردىكى بارلىق ئۇستازلار ئاللاھنىڭ سالىمى سىلەرگە بولسۇن ! ھەممىڭلارنىڭ بايرىمىڭلارغا مۇبارەك . مول-ھۇسۇللۇق باغۋەن بولغايسىزلەر...........

qamgur

	سىڭلىمىز ئايتۇغ ۋە ئىنىمىز ئەرتۇرانىڭ بايرىمىمىزنى تەبرىكلىگەنلىكىگە ۋە ئوقۇتقۇچى ئۇستازلارنىڭ روھىيىتىنى ، ئەۋلات تەربىيەلەش جەريانىدا تارتىۋاتقان جاپا مۇشەقەتلىرىنى ئەكس ئەتتۇرۈش يولىدا كۆرسەتكەن تىرىشچانلىقلىرىغا مۇنبەردىكى شۇنداقلا تور دۇنياسىدىكى بارلىق ئوقۇتقۇچىلار نامىدىن كۆپتىن - كۆپ تەشەككۈر ئېيتىمەن ئاللاھ تائالا قەلمىڭلارغا تېخىمۇ كۈچ قۇۋەت ئىجادىيىتىڭلارغا بەرىكەت ئاتا قىلغاي

qamgur

	بايرىمىمىزنى تەبرىكلىگەن تۇرداشلارغا كۆپتىن كۆپ تەشەككۇر. ئاللاھ تائالا تېنىڭلارغا سالامەتلىك تۇرمۇشۇڭلارغا بەخىت سائادەت ئاتا قىلغاي