تۇيۇقلار(5)

nazaratqi

	تۇيۇقلار(5) ئىزدەپ يۈرۈپ مۆكۈنگەننى تاپمىسا، يا ئويلىنىپ بىر تېپىشماق تاپمىسا، نادانغا نە مەنا بەرسۇن ھاياتلىق، ياشاپ ئۇزاق،ھەق يولىنى تاپمىسا؟ تەلمۈرۈپ ئۆتسەڭ قاچاڭدا ئاش قېنى؟ ئەجىرسىز-تەرسىز باداڭدا ئاش قېنى؟ بىۋاقىت ئۆلمەي دېسەڭ ئاچلىق بىلەن، تەر ئۇرۇق، قىردىن-داۋاندىن ئاش قېنى! قارا زۇلمەتنىڭ قۇياشنى تۇققىنى، بىز ئۈچۈن يېڭى ھاياتنى تۇققىنى. ھەركۈنۈڭ تولسۇن مەناغا،بول داۋام- ھەق ئادالەتنىڭ قېرىنداش-تۇققىنى! يانغىنىدەك گويا گۈلخان ئوت ئېلىپ، قىينىسا يارنىڭ پىراقى-ئوت ئېلىپ، كۆڭلىنى ئۇتقىن، جانانىڭ بۇيرۇسا: "كەل قېنى ئاۋۇ ئېتىزدىن ئوت ئېلىپ!" يەتكۈسى مەنزىلگە پەيتنى تۇتقىنى، پەيت دىمەك تۇتقا، شۇڭا چىڭ تۇت تۇتقىنى، ئۆمرىنى كىم زايە قىلىپتۇر ،ئاقىۋەت- پايدىسىز ئاھ دەپ  پىشانە تۇتقىنى! چېقىمچىنىڭ ھەريان يۈگرەپ-چاپقىنى، ئۆز پۇتىغا ئۆزى پالتا چاپقىنى. تۈزەلمەيدۇ ئۇنىڭ خۇيى ئۆلگىچە، ئۇچرىغانلا يەردە ئۇرۇپ چاپ قېنى! گۈل جاناننىڭ ساڭا قۇچاق ئاچقىنى- ئوخشىغاي ئېتىك قۇلۇپنى ئاچقىنى. چىن بەخت پەيزىگە چۆمسەڭ،ھەر دەقىق ئۇنتۇلار ھەتتا قورساقنىڭ ئاچقىنى. سەۋرى قىپ ئاقىلغا بىردەم ساقلىدىڭ، ماھىيەت كۆڭلۈڭدە ۋىجدان ساقلىدىڭ. ئاقىلۇ-دانا بىلەن ئۈلپەت بولۇپ- ئەشۇ مەجرۇھ دىل- تېنىڭنى ساقلىدىڭ! ئەي دېھقان مېھنەتكە قۇچاق ئاچمىساڭ، تەر بىلەن كۈلپەتكە ئىشىك ئاچمىساڭ، نەدە سەن كۈتكەن بەخت ھەم مولچىلىق، ئەشۇ بوز دالا،قاقاسنى ئاچمىساڭ! مەنبە: ئىجادىيىتىم.

hayat

	ئۇيغۇر شېئىرىيىنىڭ شەكىللىرىنى ئۆتىۋىتىپ «تۇيۇق»قا كەلگەندە مىسال تاپالماي يۈرگەن ئىدىم. مانا بۇ مۇ ھەل بولدى. تېما ئىگىسى ئەجرىڭىز ئۈچۈن رەھمەت. سىزدىن سورىمايلا دەرىسىمدە ئىشلىتىدىغان بولدۇم.

narkas

	بەزى مىسرالاردىكى  شەكىلداش سۆزلەرنى ئىشلىتىشتە يەنىمۇ دىققەت قىلسىڭىز بولارمىكىن دەيمەن ، سەمىمى تەكلىبىم ، ئەيىپكە بۇيرىمىغايسىز .

uyol

	تېما ئىگىسى سۆز بايلىقىڭىز ناھايىتى مولكەن

Mr.Neshter

	ياخشى چىقىپتۇ .. يەنە ئازراق تىرىشسىڭىز تېخىمۇ ياخشى چىققۇدەك ...

Gvlbargi0999

	بۇ تۇيۇقلار ياخشى چىقىپتۇ.

mahatjan

	ئۆرنەك قىلغىدەك يېزىپسىز،رەھمەت سىزگە.

nazaratqi

	narkas يوللىغان ۋاقتى  2013-8-31 10:29 PM بەزى مىسرالاردىكى  شەكىلداش سۆزلەرنى ئىشلىتىشتە يەنىم ... سەمىمى تەكلىپىڭىزدىن سۆيۈندۈم. مەن مۇشۇنداق ئىنكاسلارغا مۇھتاج...

0999uyghurkizi

	مەتتوختى تاغا ، مەن چولپانلاردا كۆرسەتكەندەك ئىش يەنە تەكرارلىنىپ قاپتۇ . ئاساسى جەھەتتىن تۇيۇق ئەمەسكەن . چۈنكى شەكىلداش سۆز دەپ ئىشلەتكەنلىرىڭىز شەكىلداش بولماي قاپتۇ .

nazaratqi

	0999uyghurkizi يوللىغان ۋاقتى  2013-9-2 05:03 PM مەتتوختى تاغا ، مەن چولپانلاردا كۆرسەتكەندەك ئىش يەنە  ... ئاساسى جەھەتتىن تۇيۇق ئەمەسكەن... مەسىلەن:.... 2-3 تۇيۇقتىكى نۇقساننى دەپ  8-9تۇيۇقنىڭ ھەممىنى ئىنكار قىلسىڭىز بولماس؟.... .......... قېنى، ئۆرنەك كۆرسەتكەيسىز؟