مۇسۇلمان بولغۇچى بىلىشكەتىگىشلىك50سۇئال

asma507

	1.س.رەببىڭ كىم؟ ج: مېنىڭ رەببىم مېنى ياراتقان ۋە مەڭگۈ تىرىك تۇرىدىغان زات ئاللاھۇ تائالادۇر.ئۇ مېنى ۋە بارلىق مەخلۇقاتلىرىنى ئۆز پەزلىدىن رىزىقلاندۇرۇپ تۇرىدۇ. 2.س: دىنىڭ نېمە؟ ج: دىنىم ئىسلام،ئىسلام دېمەكلىك ئاللاھ ۋە ئۇنىڭ پەيغەمبىرىگە مۇھەببەت،ئۈمىد ۋە قورقۇش ئىچىدە بويسۇنۇش،قۇلچىلىق قىلىش دېمەكلىكتۇر. 3.س: ئاللاھنى قانداق تونۇيسەن؟ ج: ئاللاھنى زېمىندىكى بىشارەتلىرىدىن،كېچە بىلەن كۈندۈزدىن،قۇياش ۋە بىلەن ئايدىن،ئاسمان بىلەن زېمىندىن،ۋە ئۇنىڭ ئارىسىدىكى بارلىق مەخلۇقاتلىرىدىن تونۇيمەن. 4.س: ئاللاھ قەيەردە؟ ج: ئاللاھ ئەرشىدە،تەختى ئۈستىدە مەخلۇقاتلىرىدىن ئايرىلىپ تۇرىدۇ. 5.س: ئاللاھ (زېمىندا)بىز بىلەن بىللىمۇ؟ ج: ئاللاھ ئەرشىدە،لېكىن بەندىلىرىنىڭ قىلمىشىنى كۆرۈش،بىلىش ۋە ئاڭلاپ تۇرۇشتا ۋە باشقا سۈپەتلەردە بىز بىلەن بىللە.ئاللاھ قۇرئان كەرىمدە مۇنداق دەيدۇ: اللە ئېيتتى: سىلەر قورقماڭلار،مەن ھەقىقەتەن سىلەر بىلەن بىللە(ئۇنىڭ سىلەرگە بەرگەن جاۋابىنى )ئاڭلاپ تۇرىمەن.(ئۇنىڭ سىلەرگە قىلىدىغانلىرىنى) كۆرۈپ تۇرىمەن.(سۈرە تاھا46-ئايەت) 6-س. كىملەر اللە نىڭ دوستلىرى؟ ج:تەقۋا ھەم توغرا يولدا بولغان،ئاللاھتىن قورقۇش بىلەن ئۈزىنى ھەر تۈرلۈك گۇناھلاردىن تارتىدىغان ۋە ھەر تۈرلۈك ياخشى ئەمەللەرگە ئالدىرايدىغان،قۇربان ۋە سۈننەتكە چىڭ ئېسىلغان كىشىلەر ئاللاھنىڭ دوستلىرىدۇر. 7-س: ئاللاھقا قانداق ئېتىقاد قىلىسەن؟ ج:پۈتۈن ئىبادەتلىرىمنى پەقەت اللە غىلا تەئەللۇق قىلىمەن،ئاللاھقا بولغان ئىتىقادىمدا ھېچكىمنى ئۇنىڭغا شېرىك قىلمايمەن. 8-س:اللە نېمە ئۈچۈن پەيغەمبەرلەرنى ئەۋەتتى؟ ج:اللە ئىنسانلارنى پەقەت بىر اللە غىلا ئىبادەت قىلىشقا چاقىرسۇن،ئاللاھقا بولغان ئىتىقادىدا باشقا ھېچكىمنى ئاللاھقا شېرىك قىلمىسۇن،ئاللاھتىن باشقا ھېچكىمدىن نەرسە تىلىمىسۇن،دەپ پەيغەمبەرلەرنى ئەۋەتتى. 9-س: ئىسلامنىڭ مەنىسى نېمە؟ ج: ئىسلامنىڭ مەنىسى ئاللاھنىڭ تەۋھىدىگە ئىتائەت قىلىشتۇر. 10-س: ئىسلامنىڭ ئاساسلىرى نېمە؟ ج: ئىسلام بەش چوڭ ئاساس ئۈستىگە قۇرۇلغان،ئۇلار: 1.شاھادەت ئېيتىش (بىر ئاللاھتىن باشقا ئىلاھ يوق،مۇھەممەد سەللەللاھۇ ئەلەيھى ۋەسەللەم ئاللاھنىڭ ئەلچىسى،دەپ گۇۋاھلىق بېرىش) 2.ناماز ئوقۇش. 3.رامىزان روزىسىنى تۇتۇش ; 4.زاكات بېرىش . 5.قادىر بولالىسا ئۆمرىدە بىر قېتىم ھەج قىلىش . 11.س:ئىمان نېمە؟ ج:ئىمان قەلبىدىن تەستىق قىلىش،ئېغىزى بىلەن ئىقرار قىلىش ۋە جىسمى بىلەن ئەمەل قىلىشتىن ئىبارەتتۇر. 12.س:ئىمانغا تەسىر كۆرسىتىدىغان ئامىللار بارمۇ؟ ج:بەزى سۆزلەر ۋە ئەمەللەر ئىماننى كۈچەيتىدۇ.بەزى سۆزلەر ۋە ئەمەللەر ئىماننى ئاجىزلىتىدۇ.13 .س:كۈچەيتىدۇ ۋە ئاجىزلىتىدۇ دېگىنىڭ نېمە گەپ؟ ج:ئىمان ئاللاھقا ئىتائەت قىلىش بىلەن،ياخشى سۆز،ياخشى ئەمەللەر بىلەن كۈچىيىدۇ.يامان ئەمەللەر ۋە گۇناھلار ئىماننى ئاجىزلىتىدۇ. 14.س:ئىماننىڭ ئاساسلىرى قايسىلار؟ ج:ئىماننىڭ ئاساسلىرى ئالتە،ئۇ تۆۋەندىكىلەردىن ئبارەتتۇر: 1.ئاللاھقا ئىمان كەلتۈرۈش. 2.پەرىشتىلەرگە ئىمان كەلتۈرۈش 3-پەيغەمبەرلەرگە ئىمان كەلتۈرۈش 4-كىتابلارغا ئىمان كەلتۈرۈش , 5-ئاخىرەت كۈنىگە ئىمان كەلتۈرۈش 6-قازا ۋە قەدەرنىڭ ياخشىلىقىمۇ،يامانلىقىمۇ ئاللاھتىن دەپ ئىمان كەلتۈرۈش 15-س:ئاللاھقا ئىمان كەلتۈرۈش قانداق بولىدۇ؟ ج:ئاللاھقا ئىمان كەلتۈرۈش بولسا ئاللاھنى يىگانە ياراتقۇچى،رىزىق بەرگۈچى،شۇنداقلا كائىناتتىكى ھەممە نەرسىنى ئىدارە قىلىپ تۇرغۇچى دەپ تەستىق قىلىشىڭدۇر.ھەممە ئاللاھقا موھتاجدۇر،ئاللاھ ھېچنېمىگە موھتاج ئەمەستۇر.ئۇ ئىبادەتكە لايىق بىردىنبىر زاتتۇر.ئاللاھنىڭ ئەڭ ياخشى ئىسىملىرى ۋە ناھايىتى گۈزەل سۈپەتلىرى بار. 16-س:پەرىشتىلەر كىملەر؟ ج:پەرىشتىلەر نۇردىن يارىتىلغان مەخلۇقاتلاردۇر.ئۇلار بۇيرۇلغان ھەرقانداق ئىشلىرىدا ئاللاھقا ئىتائەت قىلىپ تۇرىدۇ،ھېچ ئىشتا ئاللاھنىڭ بۇيرۇقىدىن سىرتقا چىقمايدۇ. 17-س:كىتابلارغا ۋە پەيغەمبەرلەرگە ئىمان كەلتۈرۈش دېگەن سۆزنىڭ مەنىسى نېمە؟ ج:ئاللاھ مۇسا،ئىيسا،نۇھ،ۋە ئىبراھىمغا ئەلەيھىسسالامغا ئوخشاش پەيغەمبەرلەرنى ئەۋەتتى،شۇنداقلا زەبۇر،تەۋرات،ئىنجىلدەك ساماۋى كىتابلارنى چۈشۈردى.ئۇلار ئىنسانلارنى پەقەت ھېچ شېرىكى بولمىغان ئاللاھقا يالغۇز ئىبادەت قىلىشقا چاقىردى.ئاللاھ مۇھەممەد نى پەيغەمبەرلەرنىڭ تۈگەنچى قىلدى ۋە قۇرئاننى ئۆزىدىن بۇرۇنقى كىتابلارغا تەستىق قىلغۇچى ۋە بۇرۇنقى كىتابلارنى ئەمەلدىن قالدۇرغۇچى قىلدى.شۇڭا ئىبادەت قۇرئانى كەرىمدە كۆرسىتىلگەندەك بولۇشى ۋە مۇھەممەد نىڭ سۈننىتىدە كۆرسىتىلگەندەك بولۇشى كېرەك. 18-س:قىيامەت كۈنىگە ئىمان كەلتۈرۈش قانداق بولىدۇ؟ ج:ئاللاھ ھەربىر مەخلۇقاتنىڭ بۇ ئالەمدە مەۋجۇت بولۇپ تۇرۇش ۋاقتىنى بەلگىلىدى.ھەربىر مەخلۇقات بۇ دۇنيادىكى ياشاش ۋاقتىنى تۈگەتكەندىن كېيىن ئۆلۈمنىڭ تەمىنى تېتىيدۇ.ئاندىن ئاللاھ ئۇنىڭ بۇ ئالەمدە ئۆتكۈزگەن ھەربىر ئىشلىرى ئۈچۈن ھېساب ئالىدۇ.قىيامەت كۈنى ھېساب كۈنىدۇر.ھەربىر كىشىنىڭ بۇ دۇنيادىكى ئەمەللىرىگە قارىتا ناھايىتى ئادىللىق بىلەن مۇكاپاتلىنىدۇ ياكى جازالىنىدۇ. 19-س:قازا ۋا قەدەرگە ئىمان كەلتۈرۈشنىڭ مەنىسى نېمە؟ ج:كىشىگە كەلگەن ھەرقانداق ئىشنىڭ--مەيلى ياخشى بولسۇن،ياكى يامان بولسۇن،ھەممىسى ئاللاھ تەرەپتىن ئىكەنلىكىگە ئىمان كەلتۈرۈشتۇر.ئاللاھ ھەر نەرسىنى مۇناسىپ ئورۇندا ياراتتى. 20-س:بىر ئاللاھتىن باشقا ئىلاھ يوقدەپ تەستىق قىلىش دېگەن نېمە؟ ج:بۇنىڭ مەنىسى،يالغۇز ئاللاھتىن باشقا ھېچقانداق ئىلاھ دەپ قارىلىدىغان بىرىنىڭ يوقلىقىغا ئىشىنىش، بارلىق تاغۇتلارغا قارشى تۇرۇش ۋە ئاللاھنىڭ يىگانە ئىلاھ ئىكەنلىكىگە تەستىق قىلىش. 21-س:مۇھەممەد ئاللاھنىڭ ئەلچىسىدەپ ئىمان كەلتۈرۈشنىڭ مەنىسى نېمە؟ ج:بۇنىڭ مەنىسى ئۇنىڭ بۇيرۇقلىرىغا ئاۋاز قوشۇش،توسۇقلىرىدىن چەكلىنىش،شۇنداقلا يەتكۈزگەن بارلىق خەۋەرلىرىگە ئىشىنىشتىن ئىبارەتتۇر. 22-س:شاھادەت ئېيتىشنىڭ شەرتلىرى قايسىلار؟ ج:شاھادەت ئېيتىشنىڭ تۆۋەندىكىدەك يەتتە شەرتى بار: 1.جاھىلىيەتنى يوق قىلىدىغان ئىلىم؛ 2.گۇماننى يوق قىلىدىغان تەستىق؛ 3.شېرىكنى يوق قىلىدىغان ئىخلاس؛ 4.نىفاقنى يوق قىلىدىغان ئىشەنچ؛ 5.ئاللاھنىڭ دىنىنى خۇنۇكلىكتىن ساقلايدىغان مۇھەببەت ۋە ئۈزىنى ئاتاش؛ 6.قارشىلىقنىيوق قىلىدىغان ئىتائەت؛ 7.ئىنكارنى يوق قىلىدىغان بويسۇنۇش ۋە قوبۇل قىلىش. 23-س:ئاللاھنى ئەڭ خوش قىلىدىغان ئىش نېمە؟ ج:ئاللاھ ئەڭ خوشال بولىدىغان ئىش تەۋھىدتۇر. 24-س:تەۋھىد نېمە؟ ج:تەۋھىد ئاللاھنى ئىبادەت ۋە ئىتائەتكە لايىق بىردىنبىر،ھەقىقىي ئىلاھ دەپ ئېتىراپ قىلىش،ئاللاھ قۇرئاندا ئۆزى كۆرسەتكەن ۋە ئاللاھنىڭ رەسۇلى بىزگە خەۋەر قىلغان سۈپەتلىرىگە تەستىق قىلىشتۇر. 25-س:تەۋھىد قايسى تەرەپلەرنى ئۆز ئىچىگە ئالىدۇ؟ ج:تەۋھىد ئۈچ تەرەپنى ئۆز ئىچىگە ئالىدۇ،ئۇلار: 1.تەۋھىد رۇبۇبىيە 2.تەۋھىد ئۇلۇھىييە 3.تەۋھىد ئەل ئەسما ۋەس-سىفات 26-س:تەۋھىد رۇبۇبىيە دېگەن نېمە؟ ج: بۇ ئاللاھ ئۆز قۇدرىتىدە يىگانىدۇر، دەپ ئېتىراپ قىلىشتۇر.مەسىلەن،ۋۇجۇدقا كەلتۈرۈش،رىزىق بېرىش،ھاياتلىق ۋە ئۆلۈمنى بېرىش پەقەت ئاللاھقىلا خاستۇر. 27-س:تەۋھىد ئۇلۇھىييە دېگەن نېمە؟ ج:بۇ ئىبادەت پەقەت ئاللاھقا خاس، دەپ ئېتىراپ قىلىشتۇر.مەسىلەن ناماز،روزا،زاكات ۋە شۇنىڭغا ئوخشىغان ئىبادەتلەر باشقا مەقسەتلەر ئۈچۈن ئەمەس پەقەت ئاللاھ رىزاسى ئۈچۈن بولۇشى لازىم. 28-س:تەۋھىدىل ئەسما ۋەس سىفات دېگەن نېمە؟ ج:بۇ قۇرئان ۋە سۈننەتتە كۆرسىتىلگەن ئاللاھنىڭ ئىسىم-سۈپەتلىرىنى ئاللاھنىڭ ئۇلۇغلىقىغا خاس رەۋىشتە تونۇش،ئېتىراپ قىلىش،ۋە بۇ سۈپەتلەردە ئاللاھنىڭ يىگانە دەپ تونۇشتىن ئىبارەتتۇر. 29-س:ئىبادەتنى قانداق بايان قىلىسەن؟ ج: مەيلى يوشۇرۇن ياكى ئاشكارا بولسۇن،ئاللاھنى رازى قىلىدىغان ۋە ئاللاھ ياخشى كۆرىدىغان ئەمەللەرنىڭ ھەممىسى ئىبادەت تۈرىگە كىرىدۇ. 30-س:ئىبادەتنىڭ شەرتلىرى نېمە؟ ئىبادەتنىڭ ئىككى شەرتى بار 1.ئاللاھقا ئىخلاس قىلىش 2.ئاللاھنىڭ رەسۇلى گە ئىتائەت قىلىش،رەسۇلۇللاھنىڭ سۈننىتىگە ئەمەل قىلىش 31-س:ئىبادەتنىڭ بەزى شەكىللىرىنى سۆزلەپ باققىن. ج:ئىبادەتنىڭ شەكىللىرىدىن،ناماز،زاكات،روزا،ھەج،ئاللاھتىن قورقۇش،رەھمىتىنى ئۈمىد قىلىش،ياردىمىنى تىلەش....قاتارلىقلار بار. 32-س:ئاللاھ ئەڭ قاتتىق چەكلىگەن ئىش نېمە؟ ج:ئاللاھ ئەڭ قاتتىق چەكلىگەن ئىش شېرىكتۇر. 33-س:شېرىك دېگەن نېمە؟ ج:شېرىك قۇدرەت ۋە سۈپەتتە ئاللاھقا ئوخشىغان يەن بىر بار دەپ ئىشىنىش ياكى گۇمان قىلىشتۇر. 34-شېرىكنىڭ قانداق تۈرلىرى بار؟ ج:شېرىك ئۈچ تۈرگە بۆلۈنىدۇ: 1.شېركۇل ئەكبەر(چوڭ شېرىك) 2.شېركۇل ئەسغەر(كىچىك شېرىك) 3.شېرىك خافى 35-س:شىركۇل ئەكبەر دېگەن نېمە؟ ج:شىركۇل ئەكبەر ئاللاھتىن باشقا ئىلاھ(تاغۇت)قا ئىبادەت قىلىش،ئېتىقاد قىلىشنى كۆرسىتىدۇ.ئاللاھ شېرىك بىلەن ئۆلگەن كىشىنى مەغفىرەت قىلمايدۇ،ئۇنىڭ ياخشى ئەمەللىرىنىمۇ قوبۇل قىلمايدۇ،ئۇ كىشى مۇسۇلمان دەپمۇ تونۇلمايدۇ. 36-س:شىركۇل ئەكبەرنىڭ قانداق شەكىللىرى بار؟ ج:شىركۇل ئەكبەرنىڭ تۆت خىل شەكلى بار: 1.دۇئادىكى شېرىك. ئاللاھتىن باشقىدىن نەرسە تىلەپ دۇئا قىلىش؛ 2.نىيەتتىكى شېرىك.نىيەت ۋە مەقسەتنىڭ ئاللاھتىن باشقا ئىلاھ (تاغۇت)ئۈچۈن بولۇشى؛ 3.ئىتائەتتىكى شېرىك.ئاللاھتىن بۇيرۇقىغا قارشى تاغۇتقا ئىتائەت قىلىش؛ 4.ياخشى كۆرۈشتىكى شېرىك.ئاللاھقا بولغان مۇھەببەتتە باشقىلارنى ئوخشاش ئورۇنغا قويۇش. , 37-س:شىركۇل ئەسغەر دېگەن نېمە؟ ج:شىركۇل ئەسغەر رىيانى كۆرسىتىدۇ.يەنى،بىر كىشىنىڭ ئەمەللىرىنى ئاللاھ رىزاسىدىن كۆپرەك باشقىلارنىڭ ماختىشى ۋە مەدھىيىلىشى ئۈچۈن قىلىشىنى كۆرسىتىدۇ.بۇ شېرىكنىڭ بىر تۈرىدۇر،ھارامدۇر،لېكىن كىشىنى ئىسلام دائىرىسىدىن چىقىرىۋەتمەيدۇ. 38-س:شىركۇل خافى دېگەن نېمە؟ ج:شىركۇل خافى ئاللاھنىڭ نىئمەتلىرىگە ۋە ئورۇنلاشتۇرۇشىغا رازى بولماسلىقتۇر. 39-س:شىركۇل خافىنىڭ دەلىل نېمە؟ ج:بۇ خىل شېرىكنىڭ دەلىلى رەسۇلۇللاھ نىڭ سۆزىدۇر:بۇ ئۈممەتنىڭ ئىچىدە شىركۇل خافى خۇددى قاراڭغۇ كېچىدە قارا تاش ئۈستىدە تۇرغان قارا چۈمۈلىدەك چوڭقۇر يوشۇرۇنغاندۇر.(مۇسنەدۇ ئەھمەد) 40-س:كۇفرىنىڭ قانداق شەكىللىرى بار؟ ج:كۇفرىنىڭ ئىككى خىل شەكلى بار: 1.چوڭ كۇفرى.بۇ كىشىنى ئىسلامدىن چىقىرىۋېتىدۇ. كىچىك كۇفرى.بۇ خىل كۇفرى كىشىنى ئىسلام دائىرىسىدىن چىقىرىۋەتمەيدۇ.لېكىن قاتتىق گۇناھكار قىلىدۇ. 41-س:چوڭ كۇفرىنىڭ قانداق شەكىللىرى بار؟ ج:چوڭ كۇفرىنىڭ تۆۋەندىكىدەك بەش خىل شەكلى بار. 1.ئىنكار قىلىش 2.ھەقتىن چوڭچىلىق بىلەن باش تارتىش. 3.شەك قىلىش 4.سەل قاراش 5.نىفاق. 42-س:نىفاقنىڭ دائىرىسىنى بايان قىلىڭ. ج:نىفاق ئىككى تەرەپنى ئۆز ئىچىگە ئالىدۇ: 1.ئەقىدىدىكى نىفاق. 2.ئەمەللەردىكى نىفاق. 43-س:ئەقىدىدىكى نىفاق قانداق بولىدۇ؟ ج:ئەقىدىدىكى نىفاقنىڭ ئالتە خىل شەكلى بار. 4: 1.رەسۇلۇللاھ نى ئىنكار قىلىش؛ 2.رەسۇلۇللاھ ئارقىلىق ئەۋەتىلگەن نەرسىلەرنى ئىنكار قىلىش؛ 3.رەسۇلۇللاھ نى يامان كۆرۈش؛ 4.رەسۇلۇللاھ ئارقىلىق ئەۋەتىلگەن نەرسىلەرنى يامان كۆرۈش؛ 5.ئىسلامنىڭ مەسخىرە قىلىنىشىغا رازى بولۇش؛ 6.ئىسلامنىڭ چەكلىمىلىرىدىن نارازى بولۇش. 44-س:ئەمەلدىكى نىفاق قانداق بولىدۇ؟ ج:ئەمەلدىكى نىفاقنىڭ بەش خىل شەكلى بار: 1.سۆزلىسە يالغان سۆزلەش؛ 2.ۋەدە قىلسا خىلاپلىق قىلىش؛ 3.ئامانەت قويۇلسا خىيانەت قىلىش؛ ? 4.خاپىلىشىپ قېلىنسا،ئەدەبسىز مۇئامىلىدە بولۇش؛ 5.كېلىشىمگە رىئايە قىلماسلىق. 45.شېرىك بىلەن قىلىنغان ياخشى ئەمەللەر ئاللاھ تەرىپىدىن مەقبۇل كۆرۈلەمدۇ؟ ج:ياق!شېرىك ئارىلاشقان ھەرقانداق ئەمەل مەقبۇل ئەمەستۇر. ئاللاھ مۇنداق دەيدۇ:...ئەگەر ئۇلار(پەيغەمبەر)شېرىك كەلتۈرسە ئىدى،ئۇلارنىڭ قىلغان ياخشى ئەمەللىرى،ئەلۋەتتە،بىكار بولۇپ كېتەتتى. (سۈرە ئەنئام88-ئايەت) ئاللاھ ئۆزىگە بىرەر نەرسىنىڭ شېرىك كەلتۈرۈلىشىنى (يەنى شېرىكلىك گۇناھىنى) ئەلۋەتتە مەغفىرەت قىلمايدۇ.بۇنىڭدىن باشقىنى (ئاللاھ ئۆزى خالىغان ئادەمگە مەغفىرەت قىلىدۇ.... (سۈرە نىسا116-ئايەت) 46-س:قايسى ئىشلارنىڭ ئىسلامدا ئورنى يوق؟ ج:تۆۋەندىكى 10 خىل ئىشنىڭ ئىسلامدا ئورنى يوق: 1.ئاللاھقا شېرىك كەلتۈرۈش؛ 2.ئاللاھقا شېرىك كەلتۈرۈشنىڭ دىنسىزلىق بولىدىغانلىقىنى ئىنكار قىلىش،ياكى ئۆزلىرىنىڭ باتىل كۆز قارىشى ۋە بۇزۇق ئېتىقادىنى توغرا دەپ ئويلاش؛ 3.ئاللاھ بىلەن ئۆزى ئوتتۇرىسىدا بىرەر ئىنساننى ۋەسىلە قىلىش،ئۇنىڭغا دۇئا قىلىش،ئىشىنىش ۋە ئۆزىگە پايدا يەتكۈزۈشىنى ئۈمىد قىلىش؛ 4.باشقىلار كۆرسەتكەن يولنى رەسۇلۇللاھ كۆرسەتكەن يولدىنمۇ ياخشى دەپ قاراش؛ 5.رەسۇلۇللاھ بىلەن ئەۋەتىلگەن نەرسىلەرنى يامان كۆرۈش؛ 6.رەسۇلۇللاھ نىڭ ئېلىپ كەلگەن دىننى ئىنكار قىلىش ياكى دىندىكى مۇكاپات ياكى جازالارنى مەسخىرە قىلىش؛ 7.سېھىر قىلىش؛ 8.مۇسۇلمانلارنىڭ زىيىنىغا مۇشرىكلارغا ياردەم قىلىش؛ 9.بەزى كىشىلەرنى .خۇددى خىزىر ئەلەيھسىسالام مۇسا ئەلەيھىسسالامنىڭ شەرىئىتىگە رىئايە قىلماسلىققا رۇخسەت قىلىنغىنىغا ئوخشاش، شەرىئەتكە رىئايە قىلماسلىققا رۇخسەت قىلىنغان دەپ قاراش؛ 10.ئۆگەنمەسلىك ياكى ئەمەل قىلماسلىق بىلەن ئاللاھنىڭ دىنىدىن يىراقلىشىش. 47-س: ھەربىر مۇسۇلمان بىلىشكە تېگىشلىك ئەڭ ئاساسلىق ئۈچ خىل بىلىم قايسى؟ ج:1.رەببىڭنى بىلىشىڭ(ياراتقۇچى،رىزىق بەرگۈچى،قوغداپ تۇرغۇچى، شۇنداقلا زېمىننىڭ ھەربىر ئىشى ئۆز ئالقىنىدا بولغان زاتنى بىلىش) 2' 2.دىنىڭنى بىلىشىڭ. 3.پەيغەمبەر نى بىلىشىڭ. 48-س:تاغۇت دېگەن نېمە؟ ج:ئاللاھتىنمۇ بەكرەك ئېتىقاد قىلىنغان،ئىتائەت قىلىنغان ۋە ئەگىشىلگەن نەرسىلەرنىڭ ھەممىسى تاغۇتتۇر. 49-س:تاغۇت نەچچە؟ئۇنىڭ باشلامچىلىرىچۇ؟ ج:تاغۇت كۆپ،لېكىن ئۇنىڭ باشلامچىلىرى بەش. 50-س:تاغۇتنىڭ باشلامچىلىرى كىملەر؟ ج:1.شەيتان.ئاللاھ ئۇنىڭغا لەنەت قىلسۇن. 2.ئۆزىنىڭ رازى بولۇشى بىلەن باشقىلار تەرىپىدىن ئېتىقاد قىلىنغان كىشى؛ 3.باشقىلارنى ئاللاھتىن غەيرىيگە ئېتىقاد قىلىشقا چاقىرغان كىشى؛ 4.غەيبتىن خەۋەر بېرىمەن،دېگەن كىشى؛ 5.ئاللاھنىڭ شەرىئىتىگە يات بولغان نەرسىلەر بىلەن ھۆكۈم قىلغۇچى ھۆكۈمران. ئاللاھنىڭ ياردىمى بىلەن ئىسلام ئەقىدىسىگە دائىر 50 سوئال-جاۋابنى يېزىپ بولدۇم.خاتالاشقان يېرىم بولسا ئاللاھتىن مەغفىرەت تىلەيمەن.ھەربىر قېرىندىشىمىزنىڭ بۇ سوئاللارنى قەلب دەپتىرىگە پۈتۈۋېلىشىنى،ئەقىدىسىنى خاتالىقتىن ساقلىشىنى ئۈمىد قىلىمەن. مەنبە؛ < زۆرۈر ئەقىدىلەر> ناملىق كىتاپ.

America

	تېمىڭىزنى كۆرۈپ كۆڭلۈم باشقىچە يۇرۇپ قالدى.ئۆزەمدە ئىماننىڭ ئاجىزلىشىپ كىتىۋاتقانلىقىنى ھېس قىلغان ئىدىم.بۇ سۇئال-جاۋاب شەكىلدىكى ماقالنى كۆرۈپ باشقىچە بىر خىل ھىسىياتنىڭ ئىلكىگە كىرىپ قالدىم. ئەمدى ماڭا ھازىرغا قەدەر چۈشنىكسىز بولغان ،باشقلاردىن سوراي دىسەم مۇۋاپىق ئادەم تاپالماي قەلبىمدە ساقلىنىپ قالغان بىرنەچچە سۇئال بار ئىدى.مۇنبىرمىزدىكى دىنىي بىلىمي ئەتىراپلىق كىشىلەرنىڭ چۈشىنچە بىرىشىنى سورايمەن.ئاللاھ ئۆزىنىڭ رەھمىتىنى يەتكۈزسۇن. 1.ئىسلام دىنىدا ئۆزىنىڭ ئاللاھ تەرىپىدىن يارىتىلغان ئىكەنلىكىنى بىلىدىغان،خۇدانى تۇنۇيدىغان بىر مۇسۇلمان بىلىپ تۇرۇپ ۋە بىلمەي تۇرۇپ قىلغان ھاراق ئىچىش،زىنا قىلىش ،ئوغىرلىق قىلىش قاتارلىق ئىشلىرى تۈپەيلى ئىسلام دىنىدىن چىقىپ  كەتكەن بۇلامدۇ؟ئىسلام دىنىغا كىرگەن كىشىنىڭ دىندىن چىقىپ كەتكىنىڭ نىشان-بەلگىسى قايسىلار؟ 2.ئىسلام دىنىدا ئەگەر بىركىشنىڭ ھاراق ئىچكەن بولسا 40كۈنگىچە نامىزى قۇبۇل بولمايدىغانلىق ھەققىدە ئېنىق ھەدىسلەر بار.ئۇنداقتا ھاراق ئىچكۈچى 40كۈنگىچە ناماز ئۇقىماي ئاندىن ئۇقۇشى كېرەكمۇ ياكى مەسلىكى يېشىلگەندىن كېيىن داۋاملىق ئوقۇمدۇ؟مۇشۇ توغۇرۇلۇق ئېنىق بىر چۈشىنچىگە ئىگە بۇلۇپ قالغان بولسام. 3.ھازىرقى جەميىتىمىزدە دىننىڭ نۇرغۇن چەكلىمىلكلەرگە دۇچ كىلىشى مۇقەرەر ھادىسە بۇلۇپ قالدى.ئۇنداقتا ھازىرقىدەك دىننىي قانۇن ئىجىرا قىلىنىش ئىمكانىيىتى بولمىغان شارائىتتا ،بەندە قانداق قىلسا ئاندىن شۇ گۇناھلىرىغا كاپارەت تاپالايدۇ؟ ھاراق ئىچكەن كىشىنىڭ 40كۈنلۈك نامىزى قۇبۇل بولمايدىكەن.ئۇنداقتا بىر قېتىم زىنا قىلغۇچىنىڭچۇ؟زىنا قىلغۇچى ئۇ دۇنيادا قانداق جازالارغا مۇپتىلا بۇلىدۇ؟بۇنىڭ جازا مۇدىتى قانچىلىك داۋاملىشىدۇ؟ كۆزىنى ھارام يەرەلەرگە قاراشقا ئىشلەتكەن كىشىچۇ؟بۇنىڭ جازاسى نىمە؟دائىم تورخانىلاردا سېرىق فىلىم كۈرۈۋاتقان باللارنى ئۇچىرتىپ قالىمەن.شۇڭا بۇ سۇئال كاللامغا كىلىپ قالدى. 4.دىن يۇلىدىكى كىشى گۇناھ سادىر قىلىپ بۇلۇپ ،ئۆزىنىڭ گۇناھكار بولغىنىنى بىلگەندىن كىيىن تەۋبە قىلسا تەۋبىسى قۇبۇل كۆرىلەمدۇ؟تەۋبە ئارقىلىقمۇ يۇيۇلمايدىغان گۇناھلار بارمۇ؟بار بولسا ئۇلار قايسىلار؟ يەنە بىرمۇنچە سوئاللىرىم بار ئىدى.قالغىنىنى كىيىن سورارمەن.تورداشلارنىڭ بىلگەن بىلىمىنى ماڭا يەتكۈزىشىنى چىن دىلىمدىن ئۈمۈد قىلىمەن.ئاللاھ ھەممىزنىڭ توغىرا يولنى تېپىپ مېڭىشىمىزىغا ئۆزى ياردەم قىلسۇن.

muhlisa55

	ئاللاھ رەھمەت قىلسۇن................

rozaji2008

	بەك ياخشى سۇئاللارنى سۇراپسىز قېرىندىشىم،سەھىھ ھەدىسلەر توپلىمىنى كورۇپ باققانمىتىڭىز ياكى بىلىپ تۇرۇپ تورداشلارنىڭ قانداق قارىشىغا قاراپ باقماقچىمۇ سىز ؟؟

rozaji2008

	ئىسلام دىنى باشقا دىنلاردىن پەرىقلىق يېرى بولسا ،ئىسلام دىنىنىڭ مۇقەددەس كىتاۋى  قۇرئان كەرىم (ئاللاھنىڭ سۆزى) تاھازىرغىچە ئۆزگەرگىنى يوق(ھەم ئۆزگەرمەيدۇ)،مۇناپىقلىق گۇناھىدىن نېرى بۇلۇش،يامان ئىش قىلماسلىق ،ھارام نەرسىلەرنى يېمەسلىك ئىماننىڭ جۈملىسىدىندۇر. مۇسۇلمان ساۋاپلىق ئىشلارنى قىلسا،ئىمان كۈچىيدىغانلىقى ،يامان ئىشلارنى قىلسا،ئىمان ئاجىزلشدۇ،ئەگەر بىر ئادەم ئىماننىڭ مەزمۇنىنى تۇلۇق بىلمىسە،مۇسۇلمان ھېساپلانمايدۇ،شۇڭا ئىمان مۇسۇلمانلار ھازىرلاشقا تېگىشلىك ئاساسي شەرت؛

kokatirgol

	ئاللاھ رەھمەت قىلغاي.   تەشەككۈر سىزگە

America

	rozaji2008 يوللىغان ۋاقتى  2013-6-15 10:14 PM بەك ياخشى سۇئاللارنى سۇراپسىز قېرىندىشىم،سەھىھ ھەدىس ... ياق مەن بىلگەن بولسام ھەرگىز سورىمايتىم.مەن ئاللاھ خالىسا ئسلام دىنىغا پۈتۈن كىرسەم،بىر ئاللاھنىڭ رەھمىتىگە ،ياخشى كۆرىشىگە ئىرىشكەن مۇسۇلمان بولسام دىگەن ئۈمۈتتىمەن.مەن ھازىر ئۆزەمنى بىر چۈشىنىپ بېقىش،ۋە بىلىپ تۇرۇپ ياكى بىلمەي تۇرۇپ ئۆتكۈزگەن گۇناھمنى رەبىبىمدىن مەغپىرەت تىلىسەم دەيمەن. بۇنداق رەببىگە باش قويماي ،ھايۋان قىلمايدىغان قىلىقنى قىلىپ ياشاشتىن بەكلا بىزار بولدۇم.

mostafa

	اللە ئەجرىڭىزنى بەرسۇن، اللە ئىلمىڭىزنى تېخىمۇ زىيادە قىلسۇن قېرىندىشىم

nazakat888

	تېمىڭىزغا ھەم ئەجرىڭىزگە كوپتىن-كۆپ تەشەككۈر،اللا ئىشلىرىڭىزنى ئاسان قىلغاي.

mirzat3

	America يوللىغان ۋاقتى  2013-6-15 09:30 PM تېمىڭىزنى كۆرۈپ كۆڭلۈم باشقىچە يۇرۇپ قالدى.ئۆزەمدە ئى ... مېنىڭچە ئىمان ئېتقاتنىڭ كۆڭۈلدە بولۇشى ئەڭ موھىم