مېھرىبان ئانىلار، ساخاۋەتچى ئاتىلارغا قۇتلۇق كۈن بولىدۇ

a.j.tuprak

	قەشقەردە مېھرىبان ئانىلار، ساخاۋەتچى ئاتىلارغا قۇتلۇق كۈن بولىدۇ    بۇنىڭدىن 10 يىل مۇقەددەم قەشقەر شەھىرىدە ھاجى ئاتىكە مىرئەخمەت باشچىلىقىدىكى 36 نەپەر پېشقەدەم مېھرىبان ئانا ئۆزلىكىدىن تەشكىللىنىپ، ساخاۋەتلىك ئىشلارنىڭ بىر يېڭى سەھىپىسىنى ئاچقانىدى. مانا شۇنىڭدىن بۇيان، بۇ شاپائەت پەرۋىشكارلىرى سەمىمىيەتنى بايراق، مېھرىبانلىق، كۆيۈنۈشنى قانات قىلىپ، سانسىز قەلىب ئاسمىنىدا يۇرۇق يۇلتۇزلاردەك چاقنىدى: ئۇلار ئۈزلۈكسىز ئىزدىنىپ، ھايات شاملىرىنىڭ نۇرىنى تېخىمۇ جۇلالىتىپ، سېخىي، كەڭ ئالقان كىشىلەرنى ئەتراپىغا توپلىدى ھەمدە غەمكىن، ئىلاجىسىز قالغان كىشىلەرنى يۆلەپ، ئۇلارنى ھاياتقا ئۈمىد بىلەن قارايدىغان رىغبەتكە ئىگە قىلدى. ئۇلارنىڭ ئەڭ سۈيۈملۈك ئىشى ۋە تۆھپىسى شۇكى، 1 مىليۇن 81 مىڭ 480 يۈەن يىغىش قىلىپ، قىيىنچىلىقتا قالغان 427 نەپەر ئالىي مەكتەپ ئوقۇغۇچىسىنى مەكتەپ پۈتكۈزۈش، خىزمەتكە ئورۇنلىشىش پۇرسىتىگە ئىگە قىلدى، يەنە نۇرغۇن قىيىنچىلىقى بار، ئاجىز، مېيىپ، يېتىم- يېسىر، كېسەلچان كىشىگە ھەم مېھىر بەردى، ھەم ماددى جەھەتتىن ياردەم قىلىپ، قىيىنچىلىقنىڭ دىشچارچىلىقىدىن قۇتۇلدۇردى.    بۇيىل 4- ئايدا ئاپتونۇم رايون بويىچە مېھرىبان ئانىلارنى توردا باھالاش پائالىيىتى باشلانغاندا، قەشقەر مېھرىبان ئانىلار، ساخاۋەتچى ئاتىلار جەمئىيىتىنىڭ باشلىقى ھاجى ئاتىكە مىرئەخمەت ئاۋامنىڭ بېلەت تاشلاشتىكى يۇقىرى رېكورتى بىلەن «مۇنەۋۋەر ئانا» بولۇپ باھالاندى. بۇ شەرەپ قەشقەرنى شادلىققا تولدۇردى، پەخىرلىنىش تۇيغۇسىغا ئىگە قىلدى. قەشقەردىكى مۇناسىۋەتلىك تارماقلار بۇ ئىشقا ئەستايىدىل قاراپ، ئۇنى قەشقەر خەلقىنىڭ ئۇتۇقى سۈپىتىدە تەبرىكلەش، ئۇتۇقلارنى جارى قىلدۇرۇپ، كەلگۈسى ئۈچۈن يەنىمۇ يۇرۇق يول ئېچىش مەقسىتىدە، قەشقەر مېھرىبان ئانىلار، ساخاۋەتچى ئاتىلار جەمئىيىتى قۇرۇلغانلىقىنىڭ 10 يىللىقىنى خاتىرىلەش پائالىيىتى ئۆتكۈزۈشنى پىلانلىدى ھەمدە تەييارلىقلارنى پۇختا ئىشلىدى.     6-ئايىنىڭ 14- كۈنى قەشقەر شەھىرىدە ئۆتكۈزۈلۈش پىلان قىلىنغان بۇ پائالىيەتكە ئاپتونوم رايونىمىزنىڭ ھەر قايسى جايلىرىدىكى مېھرىبان ئانىلار، ساخاۋەتچى ئاتىلارنىڭ ۋەكىللىرى قاتنىشىدۇ. ئۈچ كۈن ئېلىپ بېرىلىدىغان پائالىيەت داۋامىدا   مېھرىبان ئانىلار، ساخاۋەتچى ئاتىلار كۆپ خىل پائالىيەتلەر ئارقىلىق جەمئىيەتكە مېھرىبانلىق ئۇرىقىنى يەنىمۇ كەڭ چاچىدۇ.

taltograk

	ھەقىقەتەن قۇتلۇقلاشقا تىگىشلىك ئىش بوپتۇ . مىھرىبان ئانىلار ، ساخاۋەتچى ئاتىلار جەمىيىتىنىڭ ئىشلىرىنىڭ تېخىمۇ روناق تېپىشىنى تىلەيمەن . بۇ جەمىيەتنىڭ قولايلىق ئالاقىلىشىش ئۇسۇلىنى بىلىدىغان دوسلارنىڭ تەۋسىيە قىلىشىنى سورايمەن .

fathullah

	ئېنىق ئورنى قەيەردىكەن؟

kutluk74

	مۇبارەك بولسۇن،ساخاۋەتچىلەرنىڭ تېخىمۇ كۆپىيىشىنى تىلەيمەن.

uyol

	مۇبارەك بولسۇن

SADAKAT0998

	مۇبارەك بولسۇن