ئىلمىي مۆجىزىلەرنىڭ شەنىگە داغ تەككۈزىدىغان ئويدۇرمىلار

yanhin918

	ئامېرىكىدىكى ئىككى بىنانىڭ يىمىرىلىشى قۇرئان كەرىمدە تىلغا ئېلىنغانمۇ؟    ئامېرىكىدا يۈز بەرگەن ئون بىرىنچى سېنتەبىر ۋەقەسىدىن كېيىن، ئامېرىكىدىكى خەلقئارالىق سودا مەركىزىنىڭ يىمىرىلىش تارىخىغا قۇرئان كەرىمدە ئىشارەت بارلىقى ۋە بۇ ۋەقەنىڭ بەزى جەريانلىرى قۇرئان كەرىمدە تىلغا ئېلىنغانلىقى ھەققىدە سۆز - چۆچەكلەر تارقىلىشقا باشلىدى.     ئاللاھ تائالا قۇرئان كەرىمدە مۇنداق دەيدۇ:    {(دىننىڭ) بىناسىنى ئاللاھنىڭ تەقۋادارلىقى ۋە رازىلىقى ئاساسىغا قۇرغان ئادەم ياخشىمۇ ياكى ئۇنى يىقىلاي دەپ قالغان يارنىڭ گىرۋىكىگە قۇرۇپ، ئۆزىمۇ ئۇنىڭ بىلەن بىللە دوزاخ ئوتىغا ئۆرۈلۈپ چۈشكەن ئادەم ياخشىمۇ؟ ئاللاھ زالىم قەۋمنى ھىدايەت قىلمايدۇ}. تەۋبە سۈرىسى 109 – ئايەت.    بۇ ئايەت قۇرئان كەرىمنىڭ 11- پارا، 9- سۈرىسىدە كەلگەن بولۇپ، بەزىلەر: بۇ ئايەت كەرىم قۇرئان كەرىمنىڭ 11- سېنتەبىر ۋەقەسى توغرىلىق سۆزلىگەنلىكىنىڭ دەلىلىدۇر، ئىككى بىنا جايلاشقان كوچا ئىسمى "جۇرۇف ھار" بولۇپ، بۇ ئىسىم ھەم بۇ ئايەتتە تىلغا ئېلىنغان، سۈرە تەۋبىنىڭ ئەۋۋىلىدىن بۇ ئايەتكىچە بولغان كەلىمەلەرنىڭ سانى 2001 بولۇپ، بۇ رەقەم ۋەقە يۈز بەرگەن  2001- يىلغا ئىشارەتتۇر، دېگەن.    قېرىنداشلار! بۇ رەقەملەردە توغرا بىلەن خاتا ئارىلاشتۇرۋېتىلگەن، بۇ ئايەتنىڭ قۇرئان كەرىمنىڭ 11- پارا، 9- سۈرىسىدە كەلگەنلىكى توغرا. لېكىن بۇ رىۋايەتتىكى قالغان مەلۇماتلار خاتا مەلۇماتلاردۇر. ئۇلار بۇ يالغان رىۋايەتنىڭ قانائەتلەندۈرۈش كۈچىنى ئاشۇرۇش ئۈچۈن بۇ رەقەملەردە توغرا بىلەن خاتانى ئارىلاشتۇرۇپ تارقاتقان. تەقۋاسىزلىق بىلەن مەسجىدى زەرەر بىنا قىلغان بىر تۈركۈم مۇناپىقلار ھەققىدە سۆزلىگەن ۋە دۇنيادا ئەمەللىرىنى تەقۋاسىزلىق بىلەن قىلغان ھەر قانداق بىر ئىنساننىڭ قىيامەت كۈنى ئەمەللىرى بىلەن قوشۇلۇپ دوزاخ ئوتىغا ئۆرۈلۈپ چۈشىدىغانلىقىغا ئىشارەت قىلغان بۇ ئايەت كەرىمنىڭ يەر يۈزىدە بۇنىڭغا ئوخشىغان مىڭلارچە بىنالار تېپىلىدىغان بىر بىنانىڭ يىمىرىلىشى بىلەن نېمە مۇناسىۋىتى بولسۇن؟    بىلىش لازىمكى، سۈرە تەۋبىنىڭ ئەۋۋىلىدىن بۇ ئايەتكىچە بولغان كەلىمەلەرنىڭ سانى ئۇلار ئېيتقاندەك، 2001 ئەمەس، شۇنىڭدەك ئامېرىكىدا "جۇرۇف ھار" دەپ كوچىمۇ يوق. شۇڭا قېرىنداشلىرىمىزنى ئىسلام دۈشمەنلىرىنىڭ پايدىسىغا خىزمەت قىلىدىغان بۇنداق ئويدۇرمىلارنى تارقىتىپ يۈرۈشتىن ئاگاھلاندۇرىشىمىز زۆرۈردۇر. بۇ چۈشنى تارقاتمىغان ئادەم ئۈچ كۈندىن كېيىن ئۆلىدۇ    دوكتۇر ئابدۇ دائىم كۇھەيل مۇنداق دەيدۇ: مەن مەلۇم بىر مەسچىتنىڭ ئالدىدا تەشۋىقات ۋاراقچىلىرى تارقىتىلىۋاتقانلىقىنى كۆرۈپ، مەنمۇ بىر ۋاراقچىنى ئالدىم. ئۇنىڭدا، ئەھمەد ئىسىملىك بىر شەيخنىڭ پەيغەمبەر ئەلەيھىسسالامنى چۈشىدە كۆرگەنلىكى، پەيغەمبەر ئەلەيھىسسالامنىڭ ئۇنىڭغا، بۇ ھەپتە ۋاپات بولغان نۇرغۇن كىشىلەرنىڭ دوزاخقا مەھكۇم بولغانلىقىنى، شۇڭا خەلقلەرنىڭ دەرھال ئاللاھ تائالا تەۋبە قىلىشى لازىملىقىنى خەۋەر قىلغانلىقى يېزىلغانكەن. ۋاراقچىنىڭ ئاخىرىغا، بۇ ۋاراقچىنى تارقاتقان كىشىنىڭ جەننەتكە كىرىدىغانلىقى، بۇ ۋاراقچىنى كۆرۈپ تۇرۇپ تارقاتمىغان ياكى مەسخىرە قىلىپ يىرتىۋەتكەن كىشىنىڭ ئۈچ كۈندىن كېيىن ئۆلىدىغانلىقى ئەسكەرتىلگەن.    سۇبھاناللاھ! ئۆلىدىغان، جەننەتكە كىرىدىغان، دوزاخقا كىرىدىغان كىشىلەرنى شەيخ ئەھمەد بەلگىلەيدىغان بولسا بىزنىڭ قۇرئان كەرىم ۋە ھەدىس شەرىپكە نېمە ھاجىتىمىز بولسۇن! بەزى مۆمىنلەرنىڭ بۇنىڭغا ئوخشاش يالغان سۆز - چۆچەكلەرگە ئىشىنىشى ئۇلارنىڭ ئەقىدىسىنىڭ ئاجىزلىقىنىڭ ئالامىتىدۇر. مۆمىن دېگەن ئەقىدىدە، ئىلىم - مەرىپەتتە، مەدەنىيەتتە كۈچلۈك بولىشى لازىم. بۇ ئىللەتنى داۋالاشنىڭ ئەڭ ئەۋزەل يولى ئىلمىي مۆجىزىگە ئالاقىدار ئىلمىي تەتقىقات ماقالىلىرىنى كۆپرەك ئوقۇش ۋە ئۇنى تارقىتىشقا ھەسسە قوشۇشتۇر. قەبرە ئازابىدا ئۈچ سائەتتىن كېيىن كۆمۈرگە ئايلىنىپ كەتكەن يىگىت    كاپىر ھالىتىدە ئۆلۈپ كەتكەن بىر ئىنساننىڭ كۆمۈرگە ئايلىنىپ كەتكەنلىكىدە قانداق بىر ئىبرەت بارلىقىنى بىلمىدىم! بۇنىڭغا ئوخشىغان ئىشلارنىڭ يۈز بېرىشى دىنسىزلارنى ئىسلام دىنىنىڭ راست ۋە توغرىلىقىغا قانائەتلەندۈرەلەمدۇ؟ ھەر قانداق بىر كارامەت ۋە ھەر قانداق بىر مۆجىزىنىڭ غايىسى بولىدۇ. چۈنكى ئاللاھ تائالا بىزنى ھەرگىز بىكارغا ياراتمىدى. بۇنىڭغا ئوخشىغان خەۋەرلەر بەزىلەرنىڭ قولىدا ئويۇنچۇققا ئايلىنىپ قالغان كارامەتلەر ھەققىدىكى قىسسەلەرگە ئوخشاپ كېتىدۇ!    ھەر شەيئىگە قادىر ئاللاھ بەندىلىرىگە خالىغان كارامەتلەرنى بېرىشكە قادىردۇر، ئەلۋەتتە! لېكىن ھەر قانداق بىر ئىشنىڭ غايە - نىشانىسى بولىدۇ. بەزىلەر مۇبالىغىلەشتۈرۈپ ئۇلۇغلارنىڭ ھەر خىل كارامەت قىسسىلرىنى توقۇپ تارقاتتى. ئۇلارنىڭ دېيىشىچە، بەزى ئۇلۇغلار ھەر كۈنى ياكى ھەر جۈمە كەپتەرگە ئۆزگىرىپ، چاقماق تېزلىكىدە ھەرەمگە بېرىپ ناماز ئوقۇپ قايتىپ كېلەرمىش، يەنە بەزى ئۇلۇغلار تەبىئەت قانۇنىيەتلىرىنى يىرتىپ تاشلاپ، قەدىمى ھۆل بولماستىن سۇ ئۈستىدە مېڭىشقا قادىرمىش. يەنە بەزىلەر ئاللاھ تائالانىڭ ئۆزى ھەققىدە ھېكايە قىلىپ ئېيتقان: {ئاللاھ كۆزلەرنىڭ خىيانىتىنى ۋە دىللاردىكى يوشۇرۇن نەرسىلەرنى بىلىپ تۇرىدۇ} دېگىنىدەك، كىشىلەرنىڭ دىللىرىدىكىنى بىلەرمىش.    ئاللاھ تائالا ھېچقانداق ھۆججەت چۈشۈرمىگەن، ھېچقانداق غايە ياكى پايدىسى بولمىغان بۇنىڭغا ئوخشىغان نۇرغۇن خۇراپات قىسسىلىرى جەمئىيەتتە كەڭ تارقىلىپ يۈرمەكتە.    پەيغەمبەر ئەلەيھىسسالام بولغان زات غەيىبنى بىلمەيدىغانلىقىنى تەكىتلىگەن يەردە، ئادەتتىكى بىر ئىنسان قانداقمۇ غەيىبلەرنى بىلەلىسۇن؟    قېرىنداشلارغا ئېيتىمەنكى، قالاقلىمىز يېتەر، ئەمدى ئىمان، ئەقىدىمىزنى قۇرئان كەرىم، ھەدىس شەرىپ ئاساسى ئۈستىگە بىنا قىلىش ۋاقتى يېتىپ كەلدى!    توغرا يولنى تونۇپ، ھەقىقەتكە قايتىش مۆمىنگە بېرىلگەن ئەڭ ئۇلۇغ كارامەتتۇر. مايكېل جېكسۇن ۋە ئۇنىڭغا ئوخشىغان مەشھۇرلارنىڭ مۇسۇلمان بولۇشى    سۇبھاناللاھ! مەشھۇر بولغان ياكى باي بىر ئادەم مۇسۇلمان بولسا بەزىلەر تەكبىر ۋە تەھلىل ئېتىپ كېتىدىكەن.    كۈنىگە مىڭلاپ مۇسۇلمان بولىۋاتقان نامراتلارچۇ؟ ئۇلارنىڭ مۇسۇلمان بولغانلىقىغا تەكبىر ئېيتمامدۇق؟! نېمىشقا ئۇلارنى ھېچكىم تىلغا ئالمايدۇ! قېرىنداشلار! پەيغەمبەر ئەلەيھىسسالامنىڭ جەننەت ئەھلىنىڭ كۆپىنچىسىنىڭ نامراتلار ، دوزاخ ئەھلىنىڭ كۆپىنچىسىنىڭ مەشھۇرلاردىن، بايلاردىن ئىكەنلىكىنى خەۋەر قىلغانلىقىنى بىلەمسىلەر؟    ئامېرىكىلىق مەشھۇر ناخشىچى مايىل جېكسۇننىڭ بىر قېتىم ئۆزىنىڭ ئىسلامغا ھۆرمەت قىلىدىغانلىقىنى بىلدۈرگەنلىكى راست، ئەمما ئۇ مۇسۇلمان بولغانلىقىنى جاكارلىمىغان. مۆمىن كىشى ئاللاھ تائالانىڭ پەزلى، مەرھىمىتىدىن، باي بولسۇن ياكى نامرات بولسۇن ھەر قانداق بىر كىشىنىڭ ھىدايەت تېپىپ مۇسۇلمان بولغانلىقىدىن خوشال بولۇشى لازىم.    ئاللاھ تائالا مۇنداق دەيدۇ: {ئېيتقىنكى، «ئۇلار ئاللاھنىڭ پەزلى ۋە رەھمىتىدىن خۇشال بولسۇن، بۇ ئۇلارنىڭ يىغقان (دۇنيا - ماللىرىدىن) ياخشىدۇر»}. يۇنۇس سۈرىسى 58 – ئايەت. قەلب دولقۇنىنىڭ ئاللاھ دېگەن ئىسىمنى شەكىللەندۈرگەنلىكى    بۇ ھەم يەنە بىر سەپسەتە بولۇپ، ئىسلامنى مەسخىرە قىلغۇچىلارنىڭ ئۇسلۇبلىرىدىن خەۋەرسىز بەزى قېرىنداشلار بۇنى تارقىتىشقا ھەسسە قوشماقتا. تور بەتلىرىدە ئىلمىي مۆجىزىلەرنىڭ شەنىگە داغ تەگكۈزىدىغان نۇرغۇن "ئويدۇرما مۆجىزىلەر" كەڭ تارقالماقتا. بەزىدە، قەلبنىڭ سۇقۇش دولقۇنىنى ئاۋاز تەكشۈرۈش ئاپپاراتىغا سېلىپ تەكشۈرگەندە, ئاللاھ دېگەن ئىسىم شەكىللەنگەنلىكى ھەققىدە سۆز - چۆچەك تارقالسا، بەزىدە، بىر قىزنىڭ قولىقىغا، بىر ئوغۇلنىڭ بىلەك ۋە پاچاقلىرىغا ئاللاھ دېگەن خەت يېزىلغان ھالەتتە تۇغۇلغانلىقى، قوزىچاق، موزاي قاتارلىقلارنىڭ تېرىسىگە ئاللاھ دەپ يېزىلغان ھالەتتە تۇغۇلغانلىقى، بۇلۇت ياكى ئاي يۈزىدە ئاللاھ دېگەن مەنزىرە پايدا بولغانلىقى ھەققىدە مەلۇماتلار تارقالماقتا.    بۇلارنىڭ ھەممىسى توغرا بولسۇن ياكى خاتا بولسۇن مۆمىن - مۇسۇلمان بۇلاردىن بىھاجەتتۇر. چۈنكى ئاللاھ تائالانىڭ قۇدرىتى بۇنىڭدىن نەچچە ھەسسە چوڭدۇر، ئاللاھ تائالا ئۆز ئىسمىنى ھەر قانداق شەيئىنىڭ ئۈستىگە ئىزھار قىلىشقا قادىردۇر. لېكىن ئاللاھ تائالا ئەتراپىمىزدىكى ھەر قانداق بىر شەيئىدە ياراتقۇچىنىڭ بىرلىكىگە، ئۇلۇغلۇقىغا شاھىت بولىدىغان پۇختا نىزاملارنى ئورۇنلاشتۇردى. ھەقىقىي سۈرەت    بەزىلەر قىلغىلى ئىش بولمىغانلىقىتىن كومپيوتېر ئالدىدا ئويناپ ئولتۇرۇپ، ئاينىڭ سۈرىتىنى ئىككىگە بۆلۈپ، گويا تەبىئىي سۈرەتتەك بىر سۈرەتنى ياساپ, مانا بۇ "مۆجىزە" دەپ پۈتۈن تور بەتلىرىدە تارقاتماقتا. ھەقىقەتتە، ئالىملار ئاينىڭ ئۈستىگە چىققاندا ئۇنىڭدىكى يېرىقلارنى كۆرۈپ ھەيران قالغان ۋە  ئۇنى سۈرەتكە ئېلىپ دۇنياغا تارقاتقان. دېمەك، تور بەتلىرىدە يالغان سۈرەت بىلەن راست سۈرەت ئوخشاش تارقالماقتا.    بەزى تور بەتلىرىدە سۈننى ھامراھ ئارقىلىق تارتىلغان بىر سۈرەت تارقىتىلغان بولۇپ، بۇ سۈرەتتە ئوكيان دولقۇنلىرىنىڭ ناھايىتى چىرايلىق شەكىلدە ئاللاھ دېگەن ئىسىمنى شەكىللەندۈرگەن مەنزىرىنى كۆرىمىز. ئەمەلىيەتتە بۇ ھەقىقى راست سۈرەتتۇر. لېكىن مەن مۆمىن بولۇش سۈپىتىم بىلەن بۇ سۈرەتنى كۆرۈپ ھەقىقەتەن ھاياجانلاندىم لېكىن مەن بۇ سۈرەتنى "مۆجىزە" دەپ ئېتىبارغا ئالماستىن بەلكى تەبىئەت شەكىللىرىدىن بىر شەكىل دەپ ئېتىبارغا ئالىمەن. ھەقىقەتەن سۇلار ھەم ئاللاھ تائالا تەسبىھ ئېيتىدۇ. ئاللاھ تائالا مۇنداق دەيدۇ: {يەتتە ئاسمان - زېمىن ۋە ئۇلاردىكى مەخلۇقاتلار ئاللاھقا تەسبىھ ئېيتىدۇ، يەنى ئاللاھنى پاك دەپ بىلىدۇ، (كائىناتتىكى) قانداقلىكى نەرسە بولمىسۇن، ئاللاھنى پاك دەپ مەدھىيىلەيدۇ (يەنى ئاللاھنىڭ ئۇلۇغلۇقىنى سۆزلەيدۇ)، لېكىن سىلەر (تېلىڭلار ئوخشاش بولمىغانلىقى ئۈچۈن) ئۇلارنىڭ مەدھىيسىنى سەزمەيسىلەر، ئاللاھ ھەقىقەتەن (بەندىلىرىگە) ھەلىمدۇر (يەنى ئاسىيلىق قىلغانلارنى جازالاشقا ئالدىراپ كەتمەيدۇ)، (تەۋبە قىلغۇچىلارنى) مەغپىرەت قىلغۇچىدۇر}. ئىسرا سۈرىسى 44- ئايەت.    ئويدۇرما سۈرەتلەر بىلەن راست سۈرەتلەر ئارىلىشىپ كەتكەنلىكتىن ئۇلارنى پەرق ئېتىش قىيىندۇر. شۇڭا بىز تەكرار تەكىتلەيمىزكى، مەنبەسى ئېنىق بولمىغان ھەر قانداق بىر مەلۇماتنى تارقىتىشتىن ئەۋۋەل ئۇنىڭ توغرا - خاتالىقىنى ئېنىقىلىشىمىز لازىم.    قۇرئان كەرىم ۋە ھەدىس شەرىپ مۆجىزىلىرىنىڭ دائىرىسى ناھايىتى كەڭدۇر، شۇڭا بەزى ئويدۇرما مۆجىزىلەرنىڭ تارقىلىشى سەۋەپلىك قۇرئان كەرىم ۋە ھەدىس شەرىپلەردىكى ئىلمىي مۆجىزىلەرنى رەت قىلىشىمىز توغرا بولمايدۇ, مۆجىزىلەرگە ئالاقىدار ھەر قانداق بىر مەلۇماتقا ئىگە بولغان ۋاقتىمىزدا، ئۇنىڭ قۇرئان كەرىم ۋە ھەدىس شەرىپ مۆجىزىلىرىدىنمۇ ياكى ئىسلام دۈشمەنلىرى تۇقۇپ تارقاتقان ئويدۇرمىلاردىنمۇ، ئۇنى ئېنىقىلىشىمىز لازىم.    ئەرەبچىدىن تەرجىمە قىلغۇچى: ئوبۇلقاسىم ئەھمىدى.    مەنبە: لىۋاندا چىقىدىغان "ئەلئىجاز" ژۇرنىلىنىڭ ھىجرىيە 1434- يىلى نەشىرى، يىگىرمە بەشىنچى سانى. مەنبە--------------مەرىفەت بىلىملىرى

muhabbatsiman

	ئېسىل تېما!بەزىبىر ھاياجانلىنىشچان تورداشلار ياخشى كۆرۈڭلار.

umut47

	ئىشقىلىپ ھىسياتقا بىرىلسە ياخشى ئاقىۋەت يوق ....................

5uyghur

	ھەقىقەتەن كۆرۇشكە تىگشلىك تىمكەن

kokboraa

	ئاللا ئەجرىڭىزنى بەرسۇن، ئادەم مۆجىزە ئىزدەيمەن دىسە ،ئۆزىنىڭ بەدىنىگە قاراپ ئويلانسىلا بۇ شۇ كىشى ئۈچۈن يىتەرلىك .

AZAL0996AA

	ئىشقىلىپ بەزى گۇيلار شۇنداق دۆت ئىكەن كەلسە كەلمەس خەۋەرلەرنى تارقىتىپ ،تېخى تارقىمىسا ئىشلىرى روناق تاپمايدۇ دەپ قۇيىشى بار.مۇشۇنداق بىر ماقالە يېزىلىشى كېرەكتى زادى....

pishwa

	ئاللا رەھمەت قىلسۇن قېرېندىشىم...

bayhenim

	ھەممە ئادەم مۇشۇنداق تەھلىل قىلالىغان بولسا نىمە دىگەن ياخشى بۇلاتتى،ئاللا رەھمەت قىلسۇن قولىڭىزغا دەت كەلمىسۇن

uyol

	ئاللاھ رەھمەت قىلسۇن ھەقىقەتەن ياخشى تېما يوللاپسىز قېرىندىشىم!

زەنجىر

	بۇنىمۇ  دەججالنىڭ  پىتنىسىدىن  ئايرىپ  قاراشقا  بولمامدىكىن  دەيمە .،.