تاغدا ئويناپ كەلگەن خىيالىم
باقتىم كۆكنى سۆيگەن چوقىغا،
ھەممە نەرسە ئوغۇز رەڭگىدە.
ئاسمىنىمدىن ئىزدەيمەن قانات،
كاۋاپتەكلا ئىسسىق بىر ئۈندە.
ئۇسسۇز كىيىك ئۆتمەكتە بەلدىن،
( مەنزىلىدە زۇمرەت بۇلاقلار...)
ئارمانلاردا كۆيەر چاراسلاپ،
چاكاندىلار،سۆك-سۆك ، شىۋاقلار...
قىزىل يۇلغۇن سۆزلەيدۇ چۆچەك،
دىلدا ياندى تاتلىق ئارمانلار.
جۇدالىقتىن يۈرەك زارلايدۇ،
بەخت ئىزدەپ ئاقىدۇ قانلار.
تاغدا ئويناپ كەلگەن خىيالىم،
قوش ھەيدەيدۇ تەكلىماكاندا.
يۇلغۇنلارنى قۇچاقلاپ يىغلار،
توغراقلاردىن قىسسە ئاڭلىسا.
ھويلامدىكى قاپاق تېرەككە،
قاراقۇچقاچ ئۇۋا ياسىغان.
مىڭ ئەسەرلىك قېرى توغراقتىن،
چۆچەك ئاڭلاپ يىغلار باياۋان.
سىرلىرىمنى ئاڭلاپ قىيانىڭ،
سۈكۈتلىرى جىرت-جىرت قانىغان.
ئاق بوز ئاتقا مىنمەس ئەركەكلەر،
قارچىغىلار پەرۋازسىز قالغان.
(ئاۋازىنى ئاڭلاپ تاغلارنىڭ،)
قورام تاشتا كۆكلىدى مېھرىم.
قۇملۇقلارنىڭ گۈلدەك كۈلدۈرۈپ،
چۆلگە قاراپ ئاقماقتا تارىم.
تەكلىماكان سۆزلەيدۇ چۆچەك،
كۆيەر خىيال قىرغاقلىرىمدا.
كولدۇرمىسىز قالغان كارۋانلار،
يۈرەر غەمدە ، ئېغىر ئازاپتا.
يەر تالاشقان ئەرنىڭ دەردى تاغ،
(قوش ھەيدەيدۇ قوللىرى داردا.)
بار جاسارەت ، مىڭ تالاي ھېكمەت،
چۈمۈلىلەر ئورتاقلىقىدا...
پاتمۇچۇقلار كۆيگەن ئىزلاردا،
كەسلەنچۈكلەر چوغقا ئايلانغان.
قىزىق قۇمنى مەھكەم قۇچاقلاپ،
چۇش كۆرىدۇ ئۇيقۇسىز يىلان.
ئاي ، قۇياشقا دەردىنى سۆزلەپ،
ئۆكسۈپ-ئۆكسۈپ يىغلايدۇ بۇلبۇل.
لەۋلىرى قان گۈللەر توزۇيدۇ،
ئاھلىرىدا كۆيىدۇ سۇمبۇل.
***
كۆك تېكەنلەر كۆيىدۇ گۈر-گۈر،
كۆك قومۇشنىڭ كۆيمىگى قىيىن.
يۈردىم دەردتە ئۈمىد قۇچاقلاپ،
كۈلەرمەن دەپ بىردەمدىن كېيىن.
سەن قەلبىمگە مېھىرلىك ئاپتاپ
لەۋلىرىڭدە كۆيدۈم لاۋۇلداپ،
يۈرىكىمگە تامىدۇ قۇياش!
ئۆركەشلەيدۇ قېنىمدا دەريا،
سەن قەلبىمنى پەرلىگەن ئوتقاش!...
ئاي مەڭزىدە يارىلانغان چوغ،
ئىتەكلىرىڭ يۇلتۇزغا تولغان.
يۈرىكىمگە تامىسەن تىم-تىم،
شادلىقىمغا ئورتاق سەن ھامان.
سەن قەلبىمدە ۋىسال گۈلخانى،
سەن قەلبىمگە مېھىرلىك ئاپتاپ.
لەۋلىرىڭدە كۆيدۈم گۈرۈلدەپ،
باغرىمدا ئوت كۆيگەن چاراسلاپ.
يۈرىكىمدە پىشتى ياز پەسلى،
گۈزەللىكنى كۈيلەيمىز بىللە.
شۇنچە چەكسىز سەھەر باياۋان،
بەكمۇ كەپسىز مەي بولدى سەندە.
يۈرىكىمنى كۆيدۈرگەن نازىڭ،
ئاي مەڭزىڭدە ئايلانغان چوغقا.
ياز پەسلىگە ئوخشايسەن بەكمۇ،
زىمىستاندا يېقىلغان ئوتقا.
ئاشىقلار زارىغا تار كېلەر ئالەم
1
بىر گۈزەل ھىجراندا كۆرىنەر ھەممە،
گۈللەرنىڭ دەردىنى تىڭشايدۇ كىممۇ؟
ئاشىقلار زارىغا تار كەلدى ئالەم،
دۇنيانىڭ سىرتىغا ئاقار دەردىمۇ...!
بۇلبۇللار دەردىدىن گۈللەر توزۇيدۇ،
غۇنچىلار دەردىنى سۆزلەر نەپرەتتە.
گۈللەرنىڭ بەرگىدىن ئاقىدۇ قېنىم،
بىر ئۇلۇغ سېغىنىش يىغلار يۈرەكتە.
2
بىر جىلغا ئىچىدە يۈردىم تەمتىرەپ،
بۇ جېنىم ھىجراندا ئېچىلدى گۈلدەك.
ئازابتا كۆكلىدى يۈرىكىم كۈلۈپ،
توزىدى شادلىقىم توزغاقتەك ،كۈلدەك.
پىراقلار دەشتىدە يۈردىم خىيالچان،
ھەر باسقان ئىزىمدىن چېچەكلىدى غەم.
قەلبىنى چىرمىغان پىراق تورلىرى،
ئاشىقلار زارىغا تار كەلدى ئالەم.
3
تەنھالىق قىلىچلاپ ھارماس قەلبىمنى،
مەن ماڭغان يوللارنىڭ داۋانى ئېگىز.
غېرىبلىق چۇقانى ھەربىر ئىزىمدا،
شاماللار لىۋىدە قۇرىغان دېڭىز.
ئاينۇرى يالىڭاچ گۈللەر بەرگىدە،
يۇلتۇزلار كۆز قىسار چېچەكلەر ئارا.
يولۋاستەك ھۆركىرەر بارچە جىمجىتلىق،
سېغىنىش ئۆزىنى ئاتتى كوچىغا.
***
مىڭ بىر كۈن ياشىدىم مىڭ بىر كېچىدە،
گۈللەرنىڭ بەرگىدەك توزىدى كۈلكەم.
يولۇمدا مۈدۈرۈش سالىدۇ قىقاس،
ئاشىقلار زارىغا تار كەلدى ئالەم.
شاماللار يىقىلىپ چۈشتى دەرەختىن
يىغا يوق ، كۈلكە يوق ھايات نەقىلسۇن،
سېغىندىم تاغلارنى ، چىلان تورۇقنى.
نۇرلۇق يول بىخ سۈرگەن تاڭلار جىلۋىدار،
يىتىلەپ كەلمەكتە چوغدەك ئۇزلۇقنى.
ھاياتلىق يولۇمنىڭ تارچۇقلىرى كۆپ،
سەھەرنىڭ لىۋىدە كۈلمەكتە قۇياش.
دەريادەك دولقۇنلاپ باغرىمدا ھەسرەت،
توزىدى خىيالىم توزغاققا ئوخشاش.
توۋلىدىم چاڭقىغان چۆللەرگە قاراپ،
ئاھىمدىن تىترىدى ياداڭغۇ تاغلار.
شاماللار يىقىلىپ چۈشتى دەرەختىن،
يوللىرىم تىكەنلىك ، داۋانلىرى بار.
مۇھتاجلىق سۆيمەكتە قۇچاقلاپ مېنى،
ۋاقىتتەك ئالدىراش يۈرىمەن ھەردەم.
قەدىمىم ھالسىراپ چۆلدە قالدۇردى،
باغرىمدا پۈرەكلەپ ئېچىلدى ئەلەم.