ئىچەرمەن خانىم-قىزلارغا

326ayixa

	ئىچەرمەن خانىم-قىزلارغا ئىككى كەلىمە ئەسقەرجان ئەنۋەر ئەلسۆيەر خانىم–قىزلىرىمىزىنىڭ ھاراق–تاماكىغا، كەيىپ–ساپاغا بېرىلىشى خەلقىمىزنىڭ مىللىي مەدەنىيىتىگە، ئەخلاق ۋە ئۆرپ–ئادىتىگە مۇخالىپ ئىش بولۇپ، ئۇلارنىڭ بۇ خىل قىلمىشى قايسى دەۋر ياكى ماكاندا بولسۇن خەلقىمىزنىڭ نەپرىتىگە ئۇچرىماي قالمايدۇ.      بىر دوستۇم بار ئىدى. ئۇ توي قىلغىلى تۆت ئايمۇ بولمىغانىدى. نەچچە كۈن ئىلگىرى ئۇنىڭ بىلەن ئۇچرىشىپ قېلىپ ئازغىنە سۆھبەتتە بولۇپ قالدىم. ئۇ سۆھبەت ئارىلىقىدا ئائىلىسىدە توختىلىپ:     ـــ ئايالىم ئىككىمىز بىر مەزگىل مۇھەببەتلەشكەندىن كېيىن، بەش ئاي بۇرۇن توي قىلغانىدۇق. ئۆي تۇتقان دەسلەپكى مەزگىلىدە ئايالىم بىلەن خېلى ياخشى ئۆتتۈم. ئارىدىن ئۈچ ئاي ئۆتۈپ يۇرتتىن ئاتا-ئانام كەلدى. ئاتا-ئانام ئۆيۈمگە كېلىپ ئۈچىنچى كۈنى چۈشتە ئايالىم ئىدارىسىدە تۇرۇپ ماڭا تېلېفون قىلدى. ئۇ تېلېفوندا ماڭا: ‹‹بۈگۈن دوستلىرىم بىلەن چايغا بارماقچىدىم، ئۆيگە كەچرەك قايتىپ كېلىشىم مۇمكىن، ئەنسىرىمەي ئولتۇرۇپ تۇراسىز›› دېدى. مەن ئۇنىڭ گېپىگە ماقۇل بولدۇم. كەچ بولۇپ، سائەت 9:00 دىن ئاشقان بولسىمۇ ئايالىم كەلمەيۋاتاتتى. مەن ئۇنىڭغا تېلېفون قىلدىم، بىراق تېلېفونى ئېتىك ئىدى. شۇنداق قىلىپ ئۇنى ئۆيدە ئاتا-ئانام بىلەن بىرلىكتە ساقلاپ ئولتۇردۇق. شىنجاڭ ۋاقتى كەچ سائەت 1:00 بولغاندا ئىشىك چېكىلدى. ئاتا-ئانام ۋە مەن ئايالىمنىڭ كەلگىنىنى جەزىملەشتۈردۇق ـ دە، ئىشىكنى ئاچتىم. ئىشىك ئېچىلىشىغا كۆرۈنگەن مەنزىرىگە ئىشەنمەيلا قالدىم. چۈنكى ئايالىم غەرق مەست ھالدا ئىشىك ئالدىدا سالپىيىپ تۇراتتى. مەن ھەيرانلىق ۋە خىجىللىق ئىلىكىدە ئۇنىڭدىن ‹‹نېمانچە مەست بولۇپ كەتتىڭ، خوتۇن كىشى تۇرۇپ ھاراق ئىچىشكە نومۇس قىلمىدىڭمۇ؟›› دەپ سورىدىم. ئۇ چاغدا ئايالىمنىڭ مەستلىكتىن گەپ قىلغۇدەك ھالى قالمىغانىدى. ئۇ سۆزۈمگە ئېرەن قىلمىغان ھالدا، دەلدەڭشىگىنىچە ھۇجرىسىغا كىرىپ، ئىشىكىنى تاقىۋالدى. شۇ چاغدا ئاتا-ئانامنىڭ ئالدىدا نومۇستىن ئۆلگۈدەك بولدۇم. ئايالىمنىڭ غەرق مەست ھالدا ئۆيگە كېچىدە كەلگىنىنى كۆرگەن ئاتا-ئانام ماڭا: ‹‹سەن بۇ قىزنى بىزگە ‹ئاتا-ئانىسىنىڭ كۆپ پۇلى، ئۆزىنىڭ ياخشى خىزمىتى ۋە ئۆيى بار. ئۇنىڭ بىلەن توي قىلسام بەختىم ئېچىلىدۇ، كۈنۈم باي-باياشادلىق ئىچىدە خاتىرجەم ئۆتىدۇ، ئۆي ۋە پۇلدىن غەم قىلمايمەن› دەپ تونۇشتۇرۇۋاتاتتىڭ. ئەپسۇس بۇ ‹مەلىكەڭ›دە پۇل بولغىنى بىلەن ئەخلاق ۋە ھايا يوقكەن، ئۆي بولغىنى بىلەن ئادىمىي ساپا يوقكەن. سېنى پايتىمىسىچىلىكمۇ كۆرمەيدىكەن. ھاراق ئىچىپ، ئۆيگە كېچىدە كېلىشنى نومۇس بىلمەيدىكەن. ئايال كىشى تۇرۇپ ئۆيۈڭگە مەست بولۇپ كېچىدە كىرسە، كېيىنچە ئۇنىڭدىن تۇغۇلغان بالىلار قانداق تەربىيەگە ئىگە بولار؟ قېنى ئۇنىڭدىكى خەلقىمىز ئاياللىرىدا بولۇشقا تېگىشلىك شەرمىي ھايا. ئوغلۇم، ئەمدى بۇ ‹خانزادەڭ›نى كۆزىمىزدىن يوقات، بىز ساڭا يۇرتىمىزنىڭ يېزىسىدىن ئۆزى نامرات بولسىمۇ، قەلبى باي، شەرمىي ھايا، ئەخلاق ۋە ۋاپانى قىممەتلىك ئەڭگۈشتەر قاتارىدا سانايدىغان، سېنى تاغ قاتارىدا كۆرۈپ، خىزمىتىڭدە بولالايدىغان، كەلگۈسىدىكى پەرزەنتىڭ ئۈچۈن ئانىلىق سالاھىيىتىنى ھازىرلىغان قىزدىن بىرنى ئېلىپ بېرەيلى›› دېدى. مەن ئۇلارنىڭ سۆزىنى ئاڭلاپ ئىچ-ئىچىمدىن ئۆرتىنىپ كەتتىم، ھەتتا شۇ چاغدا ئايالىمنى ئۆلتۈرۈۋېتىش خىيالىغىمۇ كەلگەنىدىم. چۈنكى ئۇ مېنىڭ ئەرلىك غۇرۇرۇمنى ئاتا-ئانامنىڭ ئالدىدا يەر بىلەن يەكسان قىلغانىدى. ئەنە شۇ چاغدىلا ئەجدادلىرىمىزنىڭ ‹‹توشقاننى قومۇش ئۆلتۈرەر، ئادەمنى نومۇس››، دېگەن بىباھا ھېكمىتىنىڭ چوڭقۇر تېگىگە يەتتىم. ئەتىسى ئايالىم مەستلىكتىن يېشىلىپ ئورنىدىن تۇردى. مەن ئۇنىڭدىن: ‹‹تۈنۈگۈن ئاخشام نەلەردە يۈرۈپ شۇنچىۋالا مەست بولۇپ كەتتىڭ؟›› دەپ سورىسام. ئۇ ئۆزىنىڭ سورۇندىكى ‹‹كۆڭۈل زورى››غا ئامال قىلالمىغانلىقىنى پەردازلاپ بىر نېمىلەرنى چۈشەندۈرگەن بولدى. مەن ئۇنىڭغا «‹دوستۇڭ قاغا بولسا، يېيىشىڭ پوق› دېگەن شۇ. ئاتا-ئانامنىڭ ئالدىدا يۈزۈمنى بەك تۆكتۈڭ. مەن ئەر كىشى تۇرۇپ ھاراق ئىچمىگەن يەردە، سەن ئۆيگە مەست بولۇپ كىرسەڭ، بۇ سېنىڭ ئاياللىق سۈپىتىڭگە، كەلگۈسىدىكى ئانىلىق خىسلىتىڭگە مۇناسىپمۇ؟ ئادەم ئىرادىلىك بولسا، بوينىغا قىلىچ تەڭلەنسىمۇ، نومۇس ۋە ۋىجدانىغا خىلاپ ئىشلارنى ھەرگىز قىلمايدۇ. بۇ بىرىنچى قېتىملىقى بولغانلىقى ئۈچۈن مەن سېنى ئەپۇ قىلاي، بىراق بۇنداق ئىش قايتا تەكرارلانسا سېنى ھەرگىز كەچۈرەلمەيمەن›› دېدىم.     گەرچە ئۇ ئىش ئۆتۈپ كەتكەن بولسىمۇ خوتۇنۇمنىڭ ئاشۇ كۈنى كېچىدىكى نومۇسسىز قىلمىشى كۆز ئالدىمغا كېلىۋېلىپ، مېنى ۋىجدان سورىقى ئىچىدە ئازابلىدى. قەلبىمدىكى ھەقىقەت سوتى ماڭا: ‹‹ئىچەرمەن ئايالىڭغا كۆڭۈل قەسىرىڭدە لايىق جازا بەرگىن›› دەپ توختىماستىن خىتاب قىلدى. ئاداش، ھازىرقى قىسمەن خانىم–قىزلىرىمىز ئەجدادلىرىمىز قەدىمدىن داۋاملاشتۇرۇپ كەلگەن ئەنئەنىدىن بىلىپ-بىلمەي چەتنەپ قېلىۋاتىدۇ. بۇنىڭدا بىز ئەرلەرنىڭمۇ مەسئۇلىيىتىمىز بار. بىراق، خانىم-قىزلىرىمىزمۇ مۇشۇ ھەقتە ئوبدانراق ئويلىنىپ كۆرسە بولاتتى. سېنى بۇ ھەقتە قەلەم تەۋرىتىپ باقسۇنمىكىن دەپ ئويلاپ قالدىم، ــ دېدى دوستۇم.     دوستۇم بىلەن خوشلىشىپ ئۆيگە قايتىپ كەلگەندىن كېيىن قەلەمنى قولۇمغا ئالدىم، ئۇشبۇ دەملەردە خىيال ئېكرانىمدىن خەلقىمىز تارىخىدا ئۆتكەن نۇزۇگۇم، ئاماننىساخان، رىزۋانگۈل، سەنەم، لەيلى، شېرىن، تۇمارىس قاتارلىق شەرمىي ھايا ۋە پاكلىقىنى ھاياتىدىن ئۈستۈن بىلىپ، ھەقىقەتنىڭ ۋە ھەقنىڭ پەرۋانىسى بولۇپ ياشىغان خانىم ـ قىزلارمۇ، مانا بۈگۈنكى كۈندە ئۆز قۇلىقىم بىلەن ئاڭلىغان ۋە كۆرۈۋاتقان، بىر دەملىك خۇش كەيىپ ياكى ئورۇن-مەرتىۋە، يۈز ئابرويى ئۈچۈن ئىچەرمەنلىك، چېكەرمەنلىك كوچىسىغا كىرىپ قېلىپ ئۆزىنىڭ مىللەتنىڭ ئانىسىلىق ئورنىنى يوقىتىپ قويىۋاتقان خانىم–قىزلارمۇ بىر–بىرلەپ ئۆتۈشكە باشلىدى.       دېىسىمۇ، قىسىمەن ئەرلەردىكى ئەرلىك مەسئۇلىيەتنى ئادا قىلالمىغاندىن سىرىت، ئاياللىق سۈپىتىنى ئېلىشقا ئىنتىلىش، يەنە قىسمەن خانىم – قىزلاردىكى ئۆزىنىڭ ئانىدىن ئىبارەت ‹‹ئۇلۇغ››لۇقتىن ۋاز كېچىپ ئەرەنچە سۈپەتكە ئىنتىلىش قىلمىشلىرى جەمئىيىتىمىزدىكى كىشىلەر ئارىسىدا باش كۆتۈرۈپ قېلىۋاتىدۇ. ئىلگىرى بىرەر ئايال كىشىنىڭ قىزىل ھاراق ئىچكىنىنى ئاڭلىساق ‹‹ئايال كىشىمۇ ھاراق ئىچكەن بارمۇ؟››، دەپ ياقىلىرىمىزنى چىشلىشىپ، شۇ ئايالغا بولغان نەپرەتلىك بايانلىرىمىزنى، نارازىلىق كەيپىياتىمىزنى ئىپادىلەيتتۇق، مانا ھازىر ‹‹پالانى سورۇندا، پۇكۇنى ئايال ئاق ھاراقنى كۆپ ئىچىۋېتىپ مەست بولۇپ قېلىپتۇ. پالانچى ئايال ھاراق ئىچىشتە ئەرلەرنى بېسىپ چۈشىدىكەن›› دېگەندەك گەپلەرنى ئاڭلىساق، ئانچە پەرۋا قىلماستىن، ئۇنىڭدىن كۆپ كۆتۈرەلەيدىغان خانىم – قىزلارنى ئۆز كۆزىمىز بىلەن كۆرگەنلىكىمىز ھەققىدە بەس–مۇنازىرە قىلىشىدىغان بولدۇق. دېمەككى، ھازىر خانىم ـ قىزلارنىڭ ھاراق ئىچىش، تاماكا چېكىش مەسىلىسى تىلغا ئالغۇچىلىكى يوق ئادەتتىكى ئىشقا ئايلىنىپ قالدى. قىسمەن خانىم-قىزلىرىمىز ئارىسىدا ھايا ئورنىغا ھاياسىزلىق، ئەخلاق ئورنىغا ئەخلاقسىزلىق، چىنلىق ئورنىغا ساختىلىق ئەۋج ئېلىشقا باشلىدى. بولۇپمۇ خانىم –قىزلارنىڭ ئەركىنلىك شۇئارى، مۇستەقىللىق كۆزقارىشى ئاستىدىكى كېچە– كېچىلەپ ئۆيگە كىرمەسلىكى، خالىغان يىگىت ياكى ئەر بىلەن بىمالال ھالدا كۆڭلى تارتقان يەرلەردە سورۇن تۈزۈشى، ئائىلىدىكى مۇھەببەتنىڭ يىلتىزىنى قومۇرۇپ تاشلاپ، بويتاقلار قوشۇنىنى زورايتتى. سۆزۈم بۇ يەرگە كەلگەندە يازغۇچى ئەخمەتجان ئىسمايىلنىڭ ‹‹ساق تەندە، ساغلام ئەقىل›› ناملىق كىتابىدىكى تۆۋەندىكى قۇرلارنى ماقالەمگە قىستۇرۇشنى لايىق تاپتىم. يازغۇچى بۇ كىتابىدا ‹‹بىر قىسىم سورۇنلاردا، قىسمەن ئاياللار ئىچىشنى رەت قىلسا، ئايال ساقىي رەنجىيدىكەن. رېستۇرانلاردىكى توي–تۆكۈن ۋە ئولتۇرۇشلاردا ھاراق ئىچىدىغان ئەرلەر %90 ~ 80 بولسا، خانىم– قىزلار % 40~30 ئىكەن. ئاشكارا ئىچىشتىن خىجىل بولىدىغانلار، ئائىلىسىدە، ئىش ئورنىدا ۋە ئاشكارە سورۇنلاردا ھاراق ئىچىدۇ ياكى تاماكا چېكىدۇ، دەپ قىياس قىلغىلى بولمايدىغان ئايرىم خانىم-قىزلار مەخسۇس ۋە خالىي سورۇنلاردا بولۇشىچە ئىچىپ–چېكىپ، تەڭشەلمىگۈچە توختىمايدىكەن. بولۇپمۇ شەخسەن سورۇن، ئايرىم خانا، دوستلار ئولتۇرۇشى قاتارلىقلاردا ئىختىيارىيلىق كەڭتاشا بولىدىكەن. نۆۋەتتە رېستۇران، باغچا، ئايرىم خانىلاردا مۇڭداشقاچ تاماكا چېكىدىغان، ھاراق ئىچىدىغان خانىم–قىزلار كۆرۈنەرلىك كۆپەيىۋاتىدۇ. قىزىل ھاراق مەست قىلمايدىكەن دەپ ئاق ھاراق ئىچىدىغان خانىم–قىزلار كۆپىيىپ قاپتۇدەك. ئەمەلىيەتتە، ھاراق ئىچكەن ئىكەن، ئۇنىڭ قىزىلى بىلەن ئېقىنىڭ پەرقى يوق بولۇپ، پەقەت ۋاقىت ۋە سۈرئەت مەسىلىسىلا مەۋجۇت. تېببىي ئىلىم نۇقتىسىدىن ئېلىپ ئېيىتقاندا، ھەرقانداق ھاراق مېڭە ھۈجەيرىلىرىنىڭ يېگىلەپ مېڭىشىنى، قاننى قويۇقلاشتۇرۇپ ئارتۇقچە سەمرىتىۋېتىشنى، جىگەر زەخمىلىنىشنى ۋە جىنسىي ئىقتىدار تۆۋەنلەپ كېتىشنى كەلتۈرۈپ چىقىرىدۇ. مۇشۇ جەھەتلەردىن ئاجىزلاشقان ئادەملەرنىڭ روھىي ۋە ئەقلىي قابىلىيىتىمۇ چاغلىق بولىدۇ›› دەپ يازىدۇ.       شۇنداق، بەزى ئەرلەر بەلكىم خانىم–قىزلارنىڭ ئۇچۇق-يورۇق، ئۆزى بىلەن سورۇندا تەڭ ئولتۇرۇپ، تەڭ ئىچىشىپ بېرەلەيدىغان بولۇشىنى ئارزۇ قىلىشى ياكى شەيتانىي مەقسىتىگە يېتىش ئۈچۈن ئالدىدىكى خانىم–قىزلارنىڭ تارتىنماي، قىزىل ھاراقنى، بولسا ئاق ھاراقنى ئىچىپ مەسىت بولۇپ قېلىشىنى ئارزۇ قىلىشى مۇمكىن. لېكىن شۇنداق خانىم-قىزلارنى ئارزۇ قىلىۋاتقان ئادەم خوتۇنىنىڭ، قىزىنىڭ، سىڭلىسىنىڭ شۇنداق بولۇپ قېلىشىنى ئارزۇ قىلمايدىغىنى ئېنىق. ئۇنىڭ ئۈستىگە، ئەرلەر خانىم–قىزلارغا زورلاپ ئىچۈرگەن ھاراقنىڭ تەركىبىگە نېمىلەرنىڭ ئارلاشتۇرۇلغانلىقىنى پەرەز قىلىش قىيىن، مۇبادا خانىم–قىزلار شۇ خىل ھاراقنى ئىچىپ قالسا، ئۇنىڭ يامان ئاقىۋىتىنى مۆلچەرلەش قىيىن بولىدۇ. بۇنداق ئەھۋال ئاستىدا خانىم–قىزلار يەنىلا زىيانكەشلىككە ئۇچرىغۇچى بولۇپ قالىدۇ.     شۇنىسى ئېنىقكى، ئانىلىرى خارابلاشقان خەلقىنىڭ كەلگۈسى ھالاكەتتىنلا ئىبارەت. ئاخىرىدا، قۇلاق قىزىغۇچە، يۈرەك چىلاشقۇچە ئىچىپ، ھەممىنى ئۇنتۇپ كەيىپنىڭ پەيزىنى سۈرۈۋاتقان قىسمەن كەلگۈسىنىڭ ئانىلىرى بولمىش خانىم– قىزلىرىمىزغا دەيدىغىنىم، ھاراق ئىچش ياكى ئىچمەسلىك ئۆزىڭىزنىڭ ئەركىنلىكى، ھاراق ئىچىشىڭىزنى قانۇن سوتى سوتلىيالمايدۇ، بىراق ئەخلاق سوتى ۋە ۋىجدان سوتى ھامىنى شۇ قىلمىشىڭىزنىڭ سورىقىنى قىلىدۇ. ئادىمىيلىكىڭىزنىڭ لىباسى، ئىنسانلىقىڭىزنىڭ زىننىتى ۋە قىممىتى ــــ شەرم-ھايارىڭىز ئارقىلىق ئۆز مەنىسىنى تاپىدۇ. نەپسىڭىزنى باشقۇرالمىسىڭىز، ھامىنى نەپسىڭىز تەرىپىدىن باشقۇرۇلىسىز. ئېسىڭىزدە بولسۇنكى، ئىچەرمەنلىكىڭىزىنىڭ ئاقىۋىتى ـــ خار– زەبۇنلۇق ۋە پۇشايماندىنلا ئىبارەت، خالاس. مەنبە ؛تۇرمۇش مۇنبىرى

ana

	خۇدادىن قوقمامدىكىنە ئاشۇنداق خۇتۇن-قىزلار؟! بەك ياخشى يوللاپسىز ، رەھمەت .

KORURMANN

	ھاراق ئىچش ياكى ئىچمەسلىك ئۆزىڭىزنىڭ ئەركىنلىكى، ھاراق ئىچىشىڭىزنى قانۇن سوتى سوتلىيالمايدۇ، بىراق ئەخلاق سوتى ۋە ۋىجدان سوتى ھامىنى شۇ قىلمىشىڭىزنىڭ سورىقىنى قىلىدۇ. ئادىمىيلىكىڭىزنىڭ لىباسى، ئىنسانلىقىڭىزنىڭ زىننىتى ۋە قىممىتى ــــ شەرم-ھايارىڭىز ئارقىلىق ئۆز مەنىسىنى تاپىدۇ. نەپسىڭىزنى باشقۇرالمىسىڭىز، ھامىنى نەپسىڭىز تەرىپىدىن باشقۇرۇلىسىز. ئېسىڭىزدە بولسۇنكى، ئىچەرمەنلىكىڭىزىنىڭ ئاقىۋىتى ـــ خار– زەبۇنلۇق ۋە پۇشايماندىنلا ئىبارەت، خالاس. بۇ سۆز بەك ئورۇنلۇق ئېيتىلىپتۇ!!!!

qurbanjan

	ئۇزۇن يىللىق  تورغا چىقىش  تارىخمغا  ئاساسلانغاندا مۇنۇ تىما يا  تىللاش بىلەن ياكى جىدەل بىلەن ئاخىرلىشىدۇ ، نەچچەيلەن مۇناپىق نەچچەيلەن مىللەتچى بولۇپ يىتىشىپ  چىقىدۇ ماڭا  دەرىس ئۆتىمەن دەپ ئاۋارە بولۇشمىسىلا , سىلىدىن جىقىراق ئوقۇغانمەن  ماۋۇ  مۇنبەردە

xomtak

guli203

	مەن ئوغۇل دوستۇمدىن دەل مۇشۇ سەۋەپلىك ئايرىلىپ كەتكەن ،ئۇ ماڭا ئىچسىڭىزمۇ  چەكسىڭىزمۇ ئىختىيارىڭىز ،مەن باشقىلارنى باشقۇرۇشنى خالىمايمەن دىگەن ئىدى،مەن ئۇنىڭغا مەن سىزنىڭ قىز دوستىڭىز  مىنى باشقۇرسىڭىز بولىدىغۇ دىسەم ،ئۇ ھەر كىم كۆڭلى خالىغاننى قىلىش كىرەك دىگەن ئىدى ،بەلكىم مەن ئۇنى ئىچىش چېكىشتىن چەكلىگىنىم ئۈچۈن شۇنداق دىگەن بولسا كىرەك ،ياكى مىنكوخەن بولغاچقا ئىدىيىسى شۇنداقمۇ بىلمىدىم ،شۇ گەپتىن كىيىنلا ئۇنىڭ بىلەن ئايرىلىپ كەتتىم ،شۇ گىپىدىن شۇنداق بىر ئەرنى ياخشى كۆرۈپ قالغىنىمغا ئۆكۈنۈپ كەتتتىم ، بەلكىم ئەتراپىمىزدىكى بەزى ئىچەرمەن چىكەرمەن خانىملىرىمىزنى مۇشۇنداق ئەرلەر ئۆگەتكەن بولىشى مۇمكىن ، ئۇلۇغ ئاللاھ ھەر بەندىسىگە ھىدايەت بەرگەي

kariguja

	ھاراق....ھاراق.......ھەي ھاراق.ئەركەكلېرىمىزنى  كاردىن چىقىرىپ بولۇپ ،مىللەتنىڭ .بالىلېرىمىزنىڭ ئانىلېرىنى كاردىن چىقىرىپ سەن زادى نىمە قىلماقچىدىغانسەن،،ھەي ھاراق سېنى ئىشەكمۇ ئىچمەيدىكەنتۇققۇ ئەسلى ................................

uzkui

	رەھمەت سىزگە

tilk

	خۇدادىن قوقمامدىكىنە ئاشۇنداق خۇتۇن-قىزلار ?

شىرئەلى

	ana يوللىغان ۋاقتى  2013-4-23 10:54 AM خۇدادىن قوقمامدىكىنە ئاشۇنداق خۇتۇن-قىزلار؟! بەك ياخش ... ئاتا - ئانىسىدىن ، يولدىشىدىن قورقمىغان كىشى - خۇدادىن قورقامدۇ ...؟