ياشايمەن دۇنيادا سېنى دەپ ، ئانا ،
سېنىڭدىن ئايرىلسام قانداق قىلارمەن ؟
يۈرىمەن بىر سېنىڭ غېمىڭدە مانا ،
سېنىڭدىن ئايرىلسام قانداق قىلارمەن ؟
ئانامنىڭ دېگەنتىم تاپقان پۇلۇمنى ،
ئانامنىڭ دېگەنتىم كىيگەن تونۇمنى .
ئانامنىڭ دېگەنتنم تۇتقان يولۇمنى ،
سېنىڭدىن ئايرىلسام قانداق قىلارمەن ؟
كەتكىلى بولسىدى ئۆلۈمنى تاشلاپ ،
كېتەتتىم يىراققا سېنى ھاپاشلاپ .
ئامال نە ؟ يۈرىمەن كۆزۇمنى ياشلاپ ،
سېنىڭدىن ئايرىلسام قانداق قىلارمەن ؟
كېتىدۇ بېشىمنى سىلىغان قولۇڭ ،
كېتىدۇ جىمىگە چىدىغان قولۇڭ .
ئەمدى يوق ماغزاپقا چىلىغان قولۇڭ ،
سېنىڭدىن ئايرىلسام قانداق قىلارمەن ؟
بېشىمدا ساقلايمەن ئەسكى مەسەڭنى ،
ئالتۇن ، دەپ ئاسىرايمەن ياماق كەشەڭنى .
قويۇپ كەت تەۋەرۇك ئاشۇ ھاساڭنى .
سېنىڭدىن ئايرىلسام قانداق قىلارمەن ؟
يىپ _ يىڭنەڭ قەيەردە ؟ ئېيتىپ قوي ، ئانا ،
ئاخىرقى چايغا ئوت يىقىپ قوي ، ئانا .
مەندە يوق سېنىڭدىن ئۆزگە ئوي ، ئانا ،
سېنىڭدىن ئايرىلسام قانداق قىلارمەن ؟
مەنبە : ياخشىلارغا ناخشىلا تولا < مۇھەممەتجان راشىدىن >