ئانا تىلىم -- ئانام ئەمچىكى

bahwanbiz

	ئانا تىلىم - ئانام ئەمچىكى 1 يەرنى چاناپ شېئىري تىلدا ، كېپەنلىدىم سامساقلىرىمنى . ۋىدالىشىش لېرىكىسىدا ، بوغۇزىمغا تىلىدىم يامغۇر ، قۇمغا چىلاپ قوشاقلىرىمنى . . رامزان توۋلاپ ئەسىر ئالماشتى ، زەنجىرلىدىم قوشنىلىرىمنى ، چىغىر يولدا بولدۇم پادىچى ، كالىلارنىڭ مۆمىن ئاۋازى ، تاللىماقتا قىممەتلىرىمنى . 2 خەرىتەمگە يازسام ئىسمىمنى ، قىزىل قەلەم قەي قىلدى مېنى. ئەجداتلىرىم بولسا  قاپىيە ، يۇچۈن ئوۋچى نەي قىلدى مېنى. ئىمزاسى يوق ھۆججەتلىرىم كۆپ، پەيلىرىمنى قادايمەن ئايغا . ئاجىز سوقسا قەۋمىم تومۇرى ، ئاچچىقىم بار نامراتقا بايغا . يات كۆزلەردىن ساقلىنىش ئۈچۈن ، ئىمزا قوياي داڭگاللىرىمغا . ئەڭ ئەپۇچان بولۇپ تۆت قۇلاق، قان بېرىمەن  جاڭگاللىرىمغا . پايپىقىنى مايلاپ توغراقنىڭ ، چىقرىمەن تارىم كىرىنى . ئاپتاسۇنۇپ ئېزىلىپ ياتقان ، كىرۇراندەك قېرى موماينىڭ ، ئېچىپ باقايمىكىن سىرىنى ؟ 3 چوقىلىدى سۆيگۈ توخۇسى، زەنجىرسىمان تىلكىمىزنى ، تىنىقلاردىن قالغان ھەسىرەت ، يۇمشاتماقتا كىملىكىمىزنى . چاڭقاق لەۋلەر بولدى سايىۋەن  ، چۈشەكىگەن سامساق بېشىغا . يات ياغاچلار  بولۇپ مىليۇنىر، ماركىسىنى ئاستى بېشىغا . تىرىلمەكتە ساختا مامىكاپ ، ھەرپلەرنى كىيىپ بېشىغا . يات نەپەستە كۈلمەكتە سانلار، توپا چېچىپ ئەۋلاد ئېشىغا ! قازان بېشى بولماقتا جېلە ، غۇنچەملەرنىڭ مىشچانلىقىدىن . سادقەتنى ئېيتماقتا تارلار ، ئىخ ، سەمىيمىي مۇقام تىلىدىن ! 4 بىر تىزىقتا تۇغۇلغان ئىدۇق ، كۆزلىرىمىز ، لەۋلىرىمىز تەڭ ، پۇت -قولىمىز ئىدى تۈز سىزىق. كېسىكلەردە تەڭشىلىمىز تەڭ! چىشىمىزدا سۆيگۈ چاقاتتۇق . ئىنجىقلىغان سەھەر قوينىدا . ساناپ باقاي يىلنىڭ لېۋىنى مىڭ ئۆيلەرنى تىزىپ ھويلىغا . ئەللەيلىنىپ كۈننىڭ كۆكسىدە ، مەرۋايتتەك پادا باقاتتۇق . تۇتالمايتتى قېرى ئۆمۈچۈك ، قومۇچاقتەك ئەركىن ئاقاتتۇق . تىكەن ئىدى تاپانلىرىمىز ، سانجىلاتتۇق شامال كۆزىگە. مىڭ بىر كېچە قىلىپ تونۇرنى ، ئەگىشەتتۇق ئاينىڭ سۆزىگە. كېپىنەكلەر قىلاتتى چاخچاق، قى چۇ قىلسا قەغىشلىرىمىز . ئۈمۈدلەرنى ئېلىپ ئاسمانغا، كۆك ياراتتى ۋاللەيلىرىمىز . 5 ئۆمىلىگەن سامساق بالىسى، لەقەم قويار يەرنىڭ لېۋىگە ، ئانا تىلدا چۇرۇقلاش ئۈچۈن ، كىرىۋالار قەۋىم تېنىگە . پارچىلانغان دوقمۇش تېرىسى ، غەيۋەتلەردىن كېتەر قارىداپ. بىر ناتونۇش زىمىن قوينىدا مەۋھۇم قەۋىم تۇرار سايىداپ. چۆچەك يازار ئاشىق سامساقلار ، چىن تۆمۈرنىڭ ئېتىپ كۆزىنى . ئىگىلمەكتە مىسىران قىلىچ ، ئۇۋۇتماقتا ئەركىن سۆزىنى. ئانا تىلىم _ ئانام ئەمچىكى ، يالماۋۇزغا بولماقتا  غىلاپ ، كۆل بويىدا قالار ساۋاتسىز مەختۇمسۇلا چېچىنى ئويناپ. ئا. مۇھەممەت باغۋەن شېئىرى

kakkuk11

	ئەسسالامۇ ئەلەيكۇم باغۋەن ئاكا ئاللاھنىڭ سالىمى سىزگە بولسۇن يەنە بىر نادىر تېمىڭىزنى ئوقۇغىنىمدىن خۇرسەنمەن... قەلمىڭىز ھارمىغاي ،بەركەتلىك بولۇڭ...

talpak

	ئەمچىكى دىسە ئەجەپ سەت تۇردىكەن ، سەل سىلغيتىپ كۆكسى ياكى مەيدىسى دىسىمۇ بوپتىكەن ئەسلى ، لىكىن شىئىر ياخشى چىقىپتۇ .

umutwar0998

	ئاللاھ قولىڭىزغا دەرت بەرمىسۇن..... ھەقىقەتەن نادىر تىما بوپتۇ ،،،  تىمىڭىزنى تولۇق ئوقۇپ چىقتىم.. بىر رومان  ئوقۇغاندەك  تۇيغۇغا كەلدىم .... بەك ئىسىل .....

AYGUZAL007

	ھارمىغايسىز   ....بىزگە  دائىم  مۇشۇنداق   كاتتا  شېئىرلارنى   يوللاپ   تۇرۇڭ  .. ھە

umutwar0998

	ئوقۇغانسىرى  بەك  چۇققۇر مەنە چىقىدىكەن  ..... توۋا ...توۋا راسلا  ھەيرانمەن .....بەك  ئۆتكۈر

mahatjan

	ئانا تىلىم- ئانامنىڭ ئوغۇز سۈتى،تەپەككۇرۇمنىڭ ئەقلى كۈچ-قۇدرىتى،تەسەۋۋۇرۇمنىڭ كۆكتە پەرۋاز قىلىدىغان ئەركىن قۇشى.

otmakani

otmakani

forever1

	ئاناتىل-ئۆز كۆزىڭىزگە ئوخشايدۇ. باشقا تىللار-تېلىسكوپ،مىكروسكوپ،ئالاھىدە ئىقتىدارلىق ئاپراتلارغا ئوخشايدۇ.بۇلار ھەر قانچە ئىقتىدارلىق ۋە گۈزەل بوپ كەتسۇن،ئۆز كۆزىڭىز ساق بولمىسا يەنىلا بىكار !