ھۆكۈمران: مارشال ئىنىم، سەپىرىڭىزنى داۋاملاشتۇرۇڭ!

hokumran

	سەن بىراۋنىڭ ئىزىدىن ئۈنگەن گۈلنىڭ پۇرىقىدىن ھوزۇرلىنىۋاتقان چېغىڭدا، ئاشۇ گۈلگىلا مەپتۇن بولۇپ قالماي، شۇ گۈلنى ئۈندۈرگۈچىگە كىچىككىنە تەبەسسۇمىڭنى ئاتا قىلىشنى ئۇنۇتما!                                                    (خاتىرەمدىن)    تۇرمۇش سەۋىيىمىزنىڭ ئۆزلۈكسىز ئۆسۈشىگە ئەگىشىپ ساياھەت قىلىش تۇرمۇشىمىزغا سېڭىپ كىرىشكە باشلىدى. ئەپسۇس نۇرغۇنلىرىمىز ساياھەتنىڭ مەنىسىنى پەقەت كۆڭۈل ئېچىش ۋە مېڭىمىزنى ئارام ئالدۇرۇش دەپلا چۈشەنگەچكە، ساياھېتىمىز پەقەت ئۆزىمىزنىڭ ماددى ۋە مەنىۋى ئېھتىياجىمىزنى قاندۇرۇش بىلەنلا چەكلىنىپ قالدى. سورىغانلارغا ئۆزىمىز كۆرگەن يەردىكى كۆڭۈل ئېچىش سورۇنلىرىنىڭ ئىسىللىكى، مەنزىرسىنىڭ گۈزەللىكى ھەققىدىلا گەپ ئاچالىدۇقيۇ باشقىلارغا مەنىۋى جەھەتتىن مەنپەئەت بېرەلىگۈدەك بىر نەرسە دەپ بېرەلمىدۇق. بۇنىڭدىن ئۆزىنى زىيالىي، يازغۇچى، ئەدىپ دەپ ئاتىغان نۇرغۇن كىشىلىرىمىزمۇ مۇستەسنا بولالمىدى.    مىسرانىم مۇنبىرى ئەزاسى مارشالنىڭ مۇكاپاتلىق ئەسەر سەھىپىسىگە يوللىغان <<تۇنىياز ئوسمان بىلەن سۆھبەت>>، <<مائارىپچى ئېزىز ئەيسا كۆكتۇغ بىلەن سۆھبەت>>، <<كۆسەن قەدىمىي شەھرىگە زىيارەت>>، <<يەتتە قىزلىرىم ھەققىدە ئويلىغانلىرىم>>........... قاتارلىق بىر يۈرۈش زىيارەت خاتىرىلىرىنى كۆرگەندىن كېيىن ئىنىمىز مارشالدىن پەخىرلىنىش تۇيغۇسى بىلەن بىللە تىل بىلەن تەسۋىرلەش قىيىن بولغان بىرخىل خىجىللىق تۇيغۇسى ۋۇجۇدۇمنى چولغىۋالدى.    يېزىدا ئۆسۈپ يېتىلگەن، ھېچقانداق بىر ئالىي مەكتەپ تەربىيىسى كۆرمىگەن، بىر دېھقان ياشنىڭ خېلى كۆپ ئىقتىسادى چىقىم ۋە ۋاقتىنى سەرپ قىلىپ قىلغان ساياھىتىدە ئويۇن-كۈلكىنى چەتتە قويۇپ ئەھمىيەتلىك زىيارەتلەر بىلەن شوغۇللانغانلىقى ئاشۇ يازمىنى كۆرگەنلىكى كىشىنى ئويلاندۇرماي قالمايدۇ. ئۆزىگە ناتۇنۇش شەھەردە ئەزەلدىن كۆرۈشۈپ باقمىغان، نامىنى پەقەت گېزىت-ژورنال، توردىنلا ئاڭلىغان، ئىجادىيەت سېپىدە كۆزگە كۆرۈنگەن بىرقىسىم شەخسىلەرنى دادىللىق بىلەن ئىزدەپ زىيارەت قىلىشى، تارىخ، ئەدەبىيات، مائارىپ، قانۇن، مەدەنىيەت قاتارلىق كۆپ ساھەدىن ئەتراپلىق زىيارەت ئورۇنلاشتۇرۇپ، ئەل سۈيەر ئوغلانلىرىمىزنىڭ، پىشقەدەملىرىمىزنىڭ، مەدەنىيەت ۋارىسلىرىنىڭ يۈرەك سۆزلىرىنى بىزگە يەتكۈزۈشى ئۇنىڭ مىجەزىدە تارتىنچاقلىق خارەكتىرىگە قىلچىمۇ ماس كەلمىگەن يوشۇرۇن جاسارەت ۋە دادىللىقنىڭ بارلىقىنى بىزگە كۆرسىتىپ بەردى. شۇنداقلا بىزنىڭ ساياھەت ھەققىدىكى يۈزەكى قاراشلىرىمىزغا دادىللىق بىلەن جەڭ ئېلان قىلدى. بۇ بىز ئۇنىڭدىن ئۈگىنىشكە تېگىشلىك بولغان بىر روھ.    مېنىڭ دىققىتىمنى ئالاھىدە تارتقىنى يازغۇچىلار مۇنبىرىدىكى ئىككى ياشنىڭ مارشالنىڭ زىيارەت خاتىرىسى تېمىسىغا يازغان ئىنكاس مۇنازىرىسى بولدى. ئابدۇمىجىت مۇھەممەد ئىسىملىك تورداش مۇنداق يازىدۇ:    سالام مارشال. مەزكۇر تېمىنى قايتا قايتا ئوقۇپ چىقتىم. زىيارىتىڭىز ناھايتى ياخشى بوپتۇ. گەرچە تېما سەل چىچىلىپ كەتكەن. سۇرىغان سۇئالىڭىز ئەدەبىياتتىن چەتنەپ، تارىخ، فۇلىكلۇر ۋە ئۇيغۇر مەدەنىيتىنىڭ ھەممە يەرلىرىگە تۇتىشىپ ئۈلگۈرگەن بولسىمۇ، بۇ ئۇلۇغ ئۇستازدىن ئىلىشقا تىگىشلىك جاۋابلارنى خىلى تولۇق ئاپسىز. ئەمىلىيەتتە بۇ بايانلارنىڭ پايدىسى بىزگە كۆپ تېگىدۇ. ئەمدى مىنى ئويغا سالغان نەرسە قەشقەر ئىنىستېتۇت بالىلىرى بىمەنە پاراڭلارنى قىلىپ يۈرگەن مىنۇتلاردا سىز ئاتايىن كورلىدىن بېرىپ بىر ئۇلۇغ ئىشلارنى قىپسىز. جاسارىتىڭىزگە ، ئەقلىڭىزگە ئاپرىن. بۇ ئەسلىدە تىخىمۇ سىستىمىلىق، كۈچەپ قىلىدىغان ئىش ئىدى.    ئابدۇمىجىتنىڭ ئىنكاسىغا بۈركۈت ئىسىملىك تورداش مۇنداق جاۋاب قىلىدۇ: ئابدۇمىجىت ئاكا، سىز راسىتنلا بەك خىيالغا ئاساسەن ھۆكۈم چىقىرىدىغان بولۇپ كەتتىڭىزمۇ -قانداق؟ سىزنىڭ ئويىڭىز توغرا، بەلكىم بىز بۇنداق ئىشلارنى قىلالمىغاندىمىز، لېكىن قىلغۇمىزمۇ يوق ئەمەس...ئەمما شۇ بىر ھەقىقەت ئېنىقكى، بىزنىڭ سىز ئويلىغاندەك بىمەنە پاراڭلارنى قىلىپ، تىرىكتاپلارچە ياشاۋاتقىنىمىز يوق. ئۇنىڭ ئۈستىگە  بىزنىڭمۇ ئۆزىمىزنىڭ ئويلىغانلىرىمىز ۋە تۇتقان يولىمىز بار. گەرچە مەن «قەشقەر پېداگوگىكا ئىنىستىتۇتى »دىكى بارلىق بالىلارغا ۋەكىللىك قىلالمىساممۇ، مۇشۇ يەردە ياشاۋاتقانلىقىم سەۋەبلىك بۇ پىكىرىڭىزگە ئېتىراز بىلدۈرىمەن.        ئابدۇمىجىت مۇھەممەدنىڭ بۈركۈتكە يازغان قايتۇرما جاۋابى: بۈركۈت، ئىھتىراز بىلدۈرۈشكە ھەقلىقسىز! ئەمىلىيەتتە سىلەردىن ناھايتى تىز ئىلگىرلەۋاتقان بالىلارمۇ بار. بۇنىڭغا ئەلۋەتتە چىن پۈتىمەن. دېمەكچى قەشقەردىكى ياشلار داۋاملىق باشلامچى بولۇپ ماڭسا دېگەن ئارزۇيۇم بار. مانا ، ئالدىنقى يىلى 10-ئاينىڭ 1-كۈنى ئەخمەتجان خۇما ئاكا مىنى ئاۋال يۈسۈپ خاس ھاجىپ مەقبەرىسىگە ئاندىن شۇنداق بىر ئېسىل ئەدەبىيات سورۇنىغا باشلاپ بارغان ئىدى. ئاندىن كېيىن قەشقەرنى ئايلانغاچ ئۇزاق پاراڭلاشقان ئىدۇق. شۇ سۆھبەتنىڭ لەززېتى تىخى روھىمدىن كەتكىنى يوق. بولسا ئەخمەتجان خۇما ئاكىنى بىر زىيارەت قىلىش كىرەك ئىدى. سىزنىڭچە بۇنى كىم قىلىدۇ؟... كىرىمجان مۇئەللىمنى كىم زىيارەت قىلىدۇ؟ گۇلنار خانىمنى كىم زىيارەت قىلىدۇ؟ ئابلاجان، ئەمەت دەرۋىش ۋە باشقا مۇنەۋەر ئەدەبىيات ئۇستازلىرىنى، بۇ يەردە ئىسىمى ئاتالمىغان لىكىن ئۇيغۇر ئەدەبىيات نەزەرىيسىنى تۇنجى بولۇپ تۈزگەن تۆھپىكار ئۇستازلارنى كىم زىيارەت قىلىپ، ئۇلارنىڭ يۈرەك سۆزىنى بىزگە كىم يەتكۈزىدۇ. بۇنىڭغىمۇ ئاقسۇ، خوتەن ۋە ياكى غۇلجىدىن ئوت يۈرەك ياشلارنى تەكلىپ قىلامدۇق؟ ياكى ئويلىغان ئويىڭىزدىن، تۇتقان يولىڭىزدىن ئازراق بوشلۇق ئاجرىتىپ بىر ئەمگەك قىلىپ قويامسىز؟...    يۇقارقى مۇنازىرىدىكى پىكىرلەر بولۇپمۇ ئابدۇمىجىت مۇھەممەد ئەپەندىنىڭ << بۇ يەردە ئىسىمى ئاتالمىغان لىكىن ئۇيغۇر ئەدەبىيات نەزەرىيسىنى تۇنجى بولۇپ تۈزگەن تۆھپىكار ئۇستازلارنى كىم زىيارەت قىلىپ، ئۇلارنىڭ يۈرەك سۆزىنى بىزگە كىم يەتكۈزىدۇ. بۇنىڭغىمۇ ئاقسۇ، خوتەن ۋە ياكى غۇلجىدىن ئوت يۈرەك ياشلارنى تەكلىپ قىلامدۇق؟ ياكى ئويلىغان ئويىڭىزدىن، تۇتقان يولىڭىزدىن ئازراق بوشلۇق ئاجرىتىپ بىر ئەمگەك قىلىپ قويامسىز؟...>> دېگەن سۆزلىرى ئۆزىدە مەسئۇليەتچانلىق تۇيغۇسى بار ھەر ئىنساننى چوڭقۇر ئويغا سالسا، ئاشۇ زىيارەت خاتىرىلىرىنىڭ مۇئەللىپى بولغان مارشال ئىنىمىزغا بولغان قايىللىقىمىزنى ھەسسىلەپ ئاشۇرىدۇ.        مارشال ئىنىمىز <<ئاقسۇ سەپىرى: بوزقىر بىلەن ئۇچرىشىش>>، <<يازغۇچى ھاجى مىرزا زاھىد كېرىمى بىلەن سۆھبەت>> شۇنداقلا مىسرانىم مۇكاپاتلىق ئەسەر سەھىپىسىگە يوللىغان <<تۇنىياز ئوسمان بىلەن سۆھبەت>>، <<كۆسەن قەدىمىي شەھرىگە زىيارەت>>، <<كۇلالچى ئۆيىدە>>....... قاتارلىق بىر قاتار زىيارەت خاتىرىلىرى ئارقىلىق ساياھەتنىڭ ھەقىقىي مەنىسىنى بىزگە بىلدۈرۈپ بەردى. ئۇنىڭ زىيارەت خاتىرىلىرىدىكى تارىخ، سىياسەت، قانۇن، مەدەنىيەت، مائارىپ قاتارلىق ھەر ساھەگە چېتىلىدىغان مەزمۇنلار ئوقۇرمەنلەرنىڭ دۇنيانى بىلىش، ئۆزىنى چۈشىنىش، ۋە تەپەككۇرىدىكى نۇرغۇن ئاجىزلىقلارنى كۆرسىتىپ بېرىشتە مۇھىم رول ئوينىدى دەپ ئويلايمەن.    دۇنيانىڭ ھەر قايسى جايلىرىدىن ئېنتېرنىت تورىغا چىقىۋاتقان ھەر بىرىمىزنىڭ يۇرتىدا ئەدەبىياتىمىز، مائارىپىمىز، مەدەنىيىتىمىز ئۈچۈن بىر ئۆمۈر يۈرەك قېنىنى سەرپ قىلغان نۇرغۇن ئوت يۈرەك ئوغلانلىرىمىز، خارابلىشىپ كىشىلەرنىڭ ئېسىدىن چىقىپ كېتەي دەپ قالغان نۇرغۇن مەدەنىيەت ئىزنالىرىمىز، يوقىلىش گىردابىغا بېرىپ قالغان كۇلالچىلىق، قەغەزچىلىككە ئوخشاش ئەنئەنىۋى، مىللى قول ھۈنەرۋەنچىلىك سەنئىتىمىزنى داۋاملاشتۇرۇۋاتقان كىشىلىرىمىز بار، ئۇلارنى خەلققە تونۇشتۇرۇش، مەدەنىيەت ئۈزۈكچىلىكىنىڭ ئالدىنى ئېلىش مارشال ئىنىمىزغا ئوخشاش بىر كىشىنىڭ مەسئۇليىتىگە ئايلىنىپ قالماستىن بەلكى ھەر بىرىمىزنىڭ دائىملىق ئىشىغا ئايلانسىكەن دېگەن ئۈمىدتىمەن.   بۇ قېتىمقى مۇكاپاتلىق ئەسەرلەرنى باھالاش گۇرۇپپىسىنىڭ ساياھەتنىڭ ھەقىقىي مەنىسىنى، ئىنسانىي مەسئۇليەتنىڭ نېمىلىكىنى، مائارىپىمىزنىڭ ھازىرقى يۈزلىنىشى، يوقىلىش گىردابىغا بېرىپ قالغان مەدەنىيەت ئىزنالىرىمىزنى باشقىلارغا بىلدۈرۈش ئۈچۈن كۆپ ئەجىر سىڭدۈرگەن ئىنىمىز مارشالنىڭ ئەسىرىنى مۇكاپاتلىنىش ئوبىكتى قاتارىغا كىرگۈزۈش توغرىسىدا سەمىمىي تەكلىپ بېرىمەن.(ئەسكەرتىش: بۇ پەقەت شەخسى كۆز قارىشىم، باشقىلارغا ۋەكىللىك قىلالمايدۇ).    ئاخىرىدا مارشال ئىنىمىزغا شۇنى ئېيتقۇم بار: سىز ساياھەت ئارقىلىق بىزگە نۇرغۇن ھەقىقەتلەرنى بىلدۈردىڭىز، سىزگە كۆپ رەخمەت. سىزنىڭ تېخىمۇ كۆپ سەپەرلەرگە چىقىپ، خەلقىمىزگە ئەھمىيەتلىك يازمىلارنى سونۇشىڭىزغا چىن-دىلىمدىن تىلەكداشمەن. ئىنىم، سەپىرىڭىزنى داۋاملاشتۇرۇڭ!!!!

XERHAN

	ۋاقىت بولسا ، پۇل بولسا ...سەيلى ساياھەت قىلىش ، ئۇيان - بۇياننى كۆرۈش ياخشى ئىش . بۇ ئارقىلىق ساياھەت قىلىش مەقسىدىگە يىتىپلا قالماي يەنە ، شۇ جاينىڭ ئىجىتىمائى ئەمەلىي ، تۇرمۇش ئۇسلۇبى ۋە مەدەنىيتىنى چۈشىنىش پۇرسىتىگە ئىگە بولغىلى بولىدۇ . ھۆكۈمران ئاكىغا سالاملار يار بولغاي ~!!!

YAZR

	ھەسەل ھەرىسىمۇ جاپا تارتىپ  شىرنا  يىغىپ ھەسىلىنى ئىنسانغا تەقدىم ئەتكەنگە ئوخشاش مارشالمۇ  سەپەر جەۋھەرلىرىنى تورداشلارغا  سونۇپ كىلىۋاتىدۇ ، ھارمىغاي!

lawa0998

	مارشال قېرىندىشىمىزنىڭ ئەھمىيەتلىك سەپىرى ۋە ئۇنىڭ تۈرۈتكىسىدە  رىئاللىقتا پەيدا قىلغان ئەكىس سادانى ، كەسكىن پىكىرلىك مەسئۇلىيەتچان قېرىندىشىمىز ھۆكۈمران -ئاددى ئەمما ئەينەن ئۇسۇلدا ئىپادە قىلىشقا ئۈلگۈرۈپتۇ.... مارشال ۋە ھۆكۈمراننىڭ بۇ خاسىيەتلىك تەشەبۇسلىرىغا نائىل بولىشىم-مېنى ئەمىلى ئەمگەكلەر ھەققىدە قايتا ئويغا سالدى..... مىننەتسىز ئەجرىڭلارغا تەشەككۈر-!!!

uzum-tal

	ھۆكۈمران ئەپەندىمنىڭ بۇ تىمىسى بىلەن سەيياھتەك ،يۇرىتمۇ-يۈرىت ، شەھەرمۇ -شەھەر كىزىپ ئۆزىمىزنىڭ شەخسى تۇرمۇش ئېشلىرىمىز بىلەن  ئۆزىمزىدىن نەچچە ياش كىچىك بولغان مارشالنىڭ قىلغان ئىشىدىن، ئوندىن بىرنى قىلالماي ، بۈگۈنلىكتە ھۆكۈمران ئەپەندىمنىڭ بۇ تىما ئارقىلىق  سەگىتىشى بىلەن ، مانا بىزنىڭمۇ يۈزىمىز قىزىرىپ ئولتۇرۇپتىمىز .    دىمىسىمۇ مۇنبىرىمىزنىڭ باشقۇرغۇچىىسى مارشال نەچچە ۋاقىتىن بىرى مىسرانىمدىكى 100 نەچچە مىڭ ئەزا ۋە سىرىتتىن مىھمان سۈپىتىدە زىيارەت قىلىۋاتقان سانسىز ئوقۇرمەنلەرگە ئۆزىنىڭ قان-تەر بەدىلىگە كەلگەن تارىخى ئەسسەر، ھىكايە ، تەرجىمە ئەسسەر ۋە شېئىر ...قاتارلىق ئېسل ئىجادىيەتلىرىدىن ئىبارەت مەنىۋىي ئوزۇقلارنىڭ بىرىپ كىلىۋاتقان پەردە ئارقىسىدىكى ھۆرمەتكە لايىق قەلەم ساھىپلىرىنى زىيارەت قىلىش ئارقىلىق ، بىزلەرگە تارىخ ،مەدىنىيەت، تۇرمۇش ...قاتارلىق ئېزدىمائىي رىئالىقتا بىزلەرگە چىتىلدىغان ھەر بىر ساھەنىڭ كارتىنلىرىنى بىزلەرگە تەقدىم قىلىش بىلەن بىرگە بۇ نەرسىلەرنىڭ پىشقىلاپ ئىشلىنىشكە ۋە مەتبۇئات يۈزىدە ئىز قىلىشقا كۆپ ئەجىر ۋە مىھنەتلەرنى سىڭدۇرگەن قەلەم ئېگىللىرىنىڭ  تۇرمۇشىنى بىزلەرگە يىقىنلاشتۇرۇش ئارقىلىق تەقدىم قىلغۇچى بىلەن تەقدىم ئالغۇچى ئوتتۇرسىدا گۈزەل بىر رىشتىنى باغلىدى ۋە بۇ ئارقىلىق بىزمۇ بۇ قەلەم ساھىپلىرىنى  پەردە ئارقسىىدىن پەردە ئالىدا كۆرۈشكە نائىل بولدۇق .    ئاددىيسى مەن قەشقەرگە تۇقانلارنىڭ كىسلىنى يوقلاش ئۈچۈن  نەچچە قىتىم بىرىپتىمەن ، لىكىن بىكار ۋاقىت چىقمىدى ئەمەس چىقتى . مۇشۇ ۋاقىتلاردا قەشقەرنىڭ باشقا يەرلىرىغۇ تۇرۇپ تۇرسۇن ، مىللىتىمزىنىڭ ئىسلام بىناكارلىق قۇرلىشى بولغان ھىتكاھ جامىئەنىڭ ئىچىگە بىر قىتىممۇ كىرىپ باقماپتىمەن . ئاقسۇ ،كورلا ، غۇلجا ....قاتارلىق رايۇنلارغىمۇ  بىرىپمۇ ، شۇ يەرگە جايلاشقان ئۇيغۇرلارنىڭ قەدىمىي ئەھمىيەتلىك تارىخى يالداما ھىساپلانغان بىرمۇ ئورۇنلارغىمۇ  بىرىپ باقماپتىمەن . بىپەرۋامىمىكن دىسەم ،ھىچ بىر ئۆزۈمدە بۇنىڭغا زىت بىر ئىش يوق . ئويۇن تاماششا بىلەن زىيارەت قىلىشقا خۇش ياقمامدىكىن دىسەم ھىچ بىر ئىچىڭ ياكى  چىكڭدە يوق .    ئىنىقىنى دىگەندە ، ھۆكۈمران ئەپەندىمنىڭ بۇ تىمىسى بىلەن  بىزمۇ بىر خىللا نۇمۇس ھىس قىلىپ يۈزلىرىمىز ئوت بولۇپ يىنىۋاتىدۇ  .

aa0998

	مارشال ئەپەندىم بىزنىڭ ئارمىزدكى نۇرغۇنلىغان ياخشى ئەدىپلەرنى زىيارەت قىلىپ كېلىۋاتىدۇ ۋە بىزىگە تونۇشتۇرۇپ كېلىۋاتىدۇ مىسرانىم تور ئەخلى بۇنىڭدىن ناھايىتى خۇشال ئۆتكەندە قەشقەرىگە كەلدىگەدە ئەپسۇس ئۇچرىشالماي قاپتىمەن مارشال ئەپەندىمنىڭ بۇنىڭدىن كېيىنكى ئىجادىيەتلىرنى ئوقۇشقا تەشنا بىز

Eltekin

	قازانغا يولۇقساڭ قارىسى، يامانغا يولۇقساڭ يالىسى .  دېگەن گەپنى ئوخشاتسام ، مارشالنى تونۇيدىغان، بىر يۇرتتا ياشاۋاتقانلار مارشالغا يولۇقۇڭلار! سىلەرگە يۇقسۇن! بىز شۇنچە يىراق تۇرۇپمۇ خېلى يۇقتى «قارىسى»!    سالامەت بولۇڭ مارشال بۇرادەر، ھۆكۈمراننىڭ ئېيتىقىنىدەك ساياھەتنى شۇنداق قىلالىغانلار كۆپرەك قىلىپ داۋاملاشتۇرسۇن! ئۆتكەنكى بىر ئىنكاسىمدا ئېيتقاندەك، چۈشىمىزدەك ئېسىمىزدە قالمىسۇن ساياھىتىمىز. ئاخىرىدا ھۆكۈمراننىڭ ئۆز كىشىلىرىمىزنى ئىتراپ قىلىشتا، كۆتۈرۈشتە بىر ھەسسە ئەجىر قىلغىنى ئۈچۈن كۆپ تەشەككۈر ئېيتىمەن! سالامەت بولۇڭ!

Janbar

	مارشال دوستۇمنىڭ ئىشلىرىغا ئۇتۇق ،ئىجادىيەت سەپەرلىرىگە ھوسۇللار يار بولغاي . سەپەرلىرى كۆڭۈللۈك،مەنىلىك ،مانا مۇشۇنداق ئۈلگىلىك بولغاي . ھۆكۈمدانغىمۇ چىن قەلبىمدىن ئوتلۇق سالاملارنى يوللايمەن

naildin

	بۇ تېمىلارنى ئوقۇپ  مارشال  ئاكىمىزغا بولغان ھۆرمىتىم ھەسسىلەپ ئاشتى !   ئاللا خالىسا ياخشى ئوقۇپ،  خىزمەتلەرنى  ئوبدان  قىلىپ  پۇرسەت بولغاندا   ئەشۇنداق  ئاز بولسىمۇ  ساز بولغان  ياخشى خاتىرىلىرىمنى يېزىپ سىلەرگە  سۇنىمەن !   ھەم  مىسرانىمدىكى قەلىمى ئۆتكۈر  ئاكا  ھەدىلەرنىڭ ،تاغا - تۇغقانلارنىڭ  بولسا    ئەھمىيەتلىك ساياھەت  تەسىراتلىرى ،  مول-مەزمۇنلۇق ئىجادىيەتلىرىدىن بىز    تەڭ  بەھرىمان  بولۇشىنى  ئۈمىد قىلىمەن!

iltebir

	مەنمۇ ئۆزەمنى ئېلىپ ئېيتسام ،بۇ ساياھەت خاتىرلىرىدىن نۇرغۇن نەرسىلەرنى بىلىۋالدىم.مارشال قېرىندىشىمنىڭ قەلەم كۈچىنىڭ ھەقىقەتەن يۇقىرلىقىنى ھىس قىلدىم.  ئالى مەكتەپنىڭ تىل ئەدەبىيات كەسپىدە  ئوقۇپمۇ ،جايلاپ بىر نەرسە يازالمايدىغانلار ئاز ئەمەس.