مەن ئىنتايىن ئۈمۈدۋارمەن

kar0923

	مەن ئىنتايىن ئۈمۈدۋار مەن       مىسرانىم مۇنبىرىدىكى بارلىق دىنداش ، قەلىبداش ، سىرداش قېرىنداشلىرىم ! ھەممىڭلارغا اللەنىڭ سالامىنى يوللايمەن : ئەسسالامۇئەلەيكۇم ۋەرەھمۇتۇللاھى ۋەبەرەكاتىھۇ !      مىسرانىم مۇنبىرىگە ئەزا بولغىلى ئۆزۈمگە نىسبەتەن ئېيتقاندا خېلى ئۇزۇن بولدى . مۇنبەردىكى سەرخىل تېمىلار مېنى تولىمۇ جەلب قىلىدۇ . ھەركۈنى خۇددى مەكتەپتە مەسئول ئوقۇتقۇچۇم يوقلىما ئېلىپ بارغىنىدەك مىسرانىم ئەپەندىنىڭ يوقلىمىسىدىن چۈشۈپ قالماي دېگەندەك كۈندە بىر قېتىم كىرمىسەم كۆڭلۈمنىڭ ئارامى بولمايدۇ . خۇددى تېمىلار قېچىپ كېتىدىغاندەك ھېس قىلىپ كېتىمەن . مۇنبەر سەرخىل تېمىلىرى بىلەن نەچچە مىڭلىغان قېرىنداشلىرىمىزنى سېغىندۇرۇپ ئېلىپ كىرمەكتە . مەن بۇ مۇنبەرگە كىرگەندىن كېيىن دىن ، مىللەت ، ئانا تىل ، ئۆرپ _ ئادەت ، مۇھەببەت ...... نۇرغۇنلىغان تەرەپلەردىن مەلۇم دەرىجىدە تەپەككۇرغا ، كۆزقاراشقا جۈملىدىن ئەقىلگە ئىگە بولدۇم .      شۇنداق بىر تېمىلار باركى ، ئۆزىمىزنى ئۆزىمىز تىللاپ يوق قىلىۋەتمەيمىز ، يوق قىلىشقا ئازراقلا قالىمىز ؛ شۇنداق بىر تېمىلار باركى ، ئۆرپ _ ئادەت دەپ ئۇلۇغ دىنىمىز بىلەن زىدىيەتلەشتۈرۈپ قويىمىز ؛ شۇنداق يەنە بىر تىمىلار باركى ، ئاياللارنى تىللاپ ئۆلتۈرۋېتىمىز ، بەزىدە ئەرلەرنى ؛ مۇھەببەت تېمىلىرى باركى ، كىشىنىڭ يۈرەكلىرىنى تىترەتكۈدەك ، تېما ئىچىدىكى پىرسۇناژلارنى تەستەك بىلەن سالغۇدەك .... ؛ شېئىرلارمۇ باركى ، كىشىنى مۇڭغا سالغۇدەك .....     مېنىڭ بۇ تېمىنى يېزىشىمدىكى ئاساسىي نۇقتا ____ بىزنىڭ بۈگۈنىمىزدىكى نۇرغۇنلىغان ئىشلار كۆپلىگەن كىشىلەرنىڭ نارازىلىقىنى قوزغاپ كەلمەكتە . شۇ ۋەجدىن مۇنبەردە قايناپ كېتىمىز ، تىللاپ كېتىمىز . بەزى تېمىلاردىكى ۋەقەلىكلەردىن  ئۆز قېرىندشلىرىمنىڭ مەن بىلمەيدىغان ئەمەلي تۇرمۇش كارتىنىلىرىنى كۆرىمەن . بەزى ئۆز ئۆزىمىزنى نابۇت قىلىۋاتقان ئىشلاردىن ، ئۆز _ ئۆزىمىزنى ئۇرىۋاتقان ، ئۆلتۈرۋاتقان ئەھۋاللاردىن ، قىز _ ئاياللىرىمىزنىڭ يالىڭاچلىنىپ كوچىغا چىقىپ كېتىۋاتقانلىقلىرىدىن ، يوشۇرۇن قاتىللىق قىلىۋاتقان ئەيدىزنىڭ قېرىنداشلىرىم ئىچىدە پىت تارىغاندەك تارقىلىپ كېتىۋاتانلىقىدىن ، ياشانغان دادىلىرىمىزنىڭ قوللىرىدىن تېخىچە تاماكا چۈشمەي كوچا _ كويلاردا توپ _ توپ بۇلۇپ قارت ئويناشلىرىدىن ، ئانىلىرىمىزنىڭ ئاق چاچلىرىنى چىقىرىپ ياغلىقنى بېشىغا ئەمەس چاپاننىڭ سىرتىدىن مۆرىسىگە ئارتىپ مېڭىشلىرىدىن ، ياشلىرىمىزنىڭ ئويۇنچۇقخانىلاردىن چىقماسلىقىدىن ، قىز ئوقۇغۇچىلىرىمىزنىڭ سومكىلىرىدىن كىتاپ ئەمەس گىرىم _ بۇيۇم ، كىيىم _ كېچەك چىقىشىدىن ، ( دەپ كەلسەم مەن بىلىدىغان ، بىلمەيدىغان ئىشلار تولىمۇ كۆپكەن . ) ... مانا بۇلاردىن بىز ھەقىقەتەن تۈگىشىپتۇق ، ھالاك بولغۇدەكمىز دەپ ئويلاپ قالاتتىم . ئەمما يېشىمنىڭ كۈنسېرى ئېشىپ بېرىشىغا ئەگىشىپ يۇقارقى ئويلىرىمنىڭ پۈتۈنلەي خاتالىقىنى ھېس قىلدىم . بۇ ئەھۋاللار دەل '' دۇنيادا مۇكەممەل ئىنسان بولمايدۇ '' دېگەندەك ئىش ئىكەن . خۇددى ئېنتىرنت تورى، ئۈندىدار... دېگەندەكلەرنىڭ  ھەم ياخشى تەرىپى ھەم يامان تەرىپى بولغىنىدەك .      مەن ئاستا _ ئاستا چۈشىنىۋاتىمەن . يۈرىكى اللە دەپ سۇقۇدىغان ، ئاچا _ سىڭىللىرىنى ھەق يولىدا ماڭغۇزالايدىغان ، پەرزەنتلىرىگە ھەر جەھەتتىن ئىلىم بېرەلەيدىغان ، دىننى ، مىللىتىنى جان _ دىل بىلەن قوغدىيالايدىغان يۈرەكلەرنىڭ ئاز ئەمەسلىكىنى ۋاقتى كەلگەندە دۈشمەنگە ئارقىسىنى قىلىپ قاچمايدىغان بەلكى مەيدىسىنى تىك تۇتۇپ  ئالغا ئىنتىلەلەيدىغان ، بارلىق كىشىلەر تاتلىق ئۇيقۇغا كېتىدىغان ئۇزۇن كېچىلەردە يۈزىنى قىبلىگە قىلىپ اللەتىن ئۆز قېرىنداشلىرىنىڭ تىنچ _ ئامانلىقىنى تىلەيدىغان ، اللەدىن ئىنساپ _ ھىدايەت ، ئىمان _ ئېتىقاد، سەۋر، خاتىرجەملىك ... ئاتا قىلىشنى تىلەيدىغان ، بارلىق قېرىنداشلىرى ئۈچۈن اللەتىن ئۈتۈنۈپ جۈپ قولىنى ئېگىز كۈتۈرۈپ ياش تۈكۈدىغان قېرىنداشلىرىمنىڭ كۆپلىكىنى ھېس قىلىپ يەتتىم . مانا بۇنىڭدىن ئىلگىركى كەم ئەقلىم تولۇقلىنىۋاتقاندەك ، قەلبىم يەنە ئازراق نۇرلىنىۋاتقاندەك سېزىۋاتىمەن .      مەن ئىنتايىن ئۈمۈدۋارمەن . چۈنكى مېنىڭ شۇنداق غەيرەت _ شىجائەتلىك ، سەۋر _ تاقەتلىك ، يۈرەكلىك ، پاك قەلبكە ئىگە قېرىنداشلىرىم بار .      مەن ھەقىقەتەن ئۈمۈدۋارمەن . ئۇلۇغ اللەھىمنىڭ ھامان بىر كۈنى بىزگە خاتىرجەملىك ئاتا قىلىدىغانلىقىغا شەك _ شۈبھىسىز ئىشىنىمەن .      قېرىنداشلار ! بىز بۈگۈنىمىزدىن ھەرگىزمۇ ئۈمۈدسىزلەنمەيلى ، سەۋر قىلايلى ، ھەمدۇ ئېيتايلى ، چىن قەلبىمىز بىلەن تىلەيلى ! اللە خالىغان بىر كۈنى ب ئۆزىمىزگە خاس بولغان ياشاش مۇھىتىغا ئېرىشتۈرىدۇ ، ئىنشااللە .       ئۈمۈدۋار بولايلى . ئۈمۈدۋار بۇلۇش بىزنى مۇۋەپپەقىيەتكە باشلايدۇ .  بىر نىيەت بىر مەقسەتتە سوقۇدىغان يۈرەك اللە خالىسا ھەرگىزمۇ ئازىيىپ يوقاپ كەتمەيدۇ ، ئىنشااللە .       مەن ئىنتايىن ئۈمۈدۋارمەن .                                                  مەنبە :ھېس قىلغانلىرىم

kar0923

	باشتا سۆكۈپ كەينىدىن يەنە تۇقىۋالدىم . ھېسسىياتىمنى سۆكمەي تۇرۇپ توقۇشنى داۋام قىلىشقا كىچىكلىك قىلدىممۇ بىلمىدىم . شۇڭا ھەرقايسىڭلارنىڭ توغرا چۈشىنىشىڭلارنى سورايمەن .

zakinur

	ئاللاتائالا ئۇلۇغ قۇرئانىكىرىم سۇرە يۇسۇپ  87-ئايەتدە،‹بېرىڭلار يۇسۇپنى ۋە ئۇنىڭ ئۇكىسىنى ئىزدەڭلار، ئاللانىڭ رەھمىتىدىن نا ئۇمىد بولماڭلار، شوھبىسىزكى، پەقەت كاپىر قەۋملا ئاللانىڭ رەھمىتىدىن ئۇمىتسىزلىنىدۇ› دىدى.  بىز قاچانىكى مۇشۇ چۇشەنچىدىن چەتنەپ دۇنيادىكى بىزگە مۇناسىۋەتلىك ھەرقانداغ بىر تىمىدا  ئۇمىدسىزلىك پاتقىقىغا پاتىدىكەنمىز،  ئوخشاشلا ئوزىمىزنى كاپىرلەر بىلەن بىر سەپتە كورسەك بولىدۇ .

delawur

	ئۇمۇتنى ئۇزمىگىن  سۇبھى تاڭدىن! ئوتكۇرئەپاندىنىڭ بىر كۇپىت شىئىرى ئسىمگە كلدى !

jalipkar!

	بىزھالاك بولمايمىز ، ئەكسىچە بارغانسېرى مۇكەممەللىشىپ مېڭىۋاتىمىز ! ئۈمۈدۋارلىق ھەممىمىزگە يار بولسۇن !

zulqinay

	ئۈمىدسىزلىك قايغۇدىن يامان.

blueleaf

	شۇنداق  ئۈمىدنى يوقاتساق بولمايدۇ .......

太阳

	ئۆلمىگەن جاندا ئۈمۈت بار

مىژگان

	سىزگە ئوخشاش مەنمۇ ھەم شۇنداق ئۈمىدۋار!

jalipkar!

	گۆركان يوللىغان ۋاقتى  2013-3-10 01:50 AM ما گەپكە قوش كاللاك ناۋات،،،،،،،، قويغان مۇنبەر ئىسم ... نېمە گەپ بۇ ، چۈشىنەلمىدىم !