ئالمىدەك يۈرەكتە ئالەمچە سۆيگۈ
(ئوسمانجان ساۋۇت)

قەدەھكە قەدەھتەك شاراپ سىغىدۇ،
ئېرىقتا ئاقالماس دەريا كەبى سۇ.
قىل سىغماس ھەقىقەت بولۇپ ئەزەلدىن،
كىشىلەر قەلبىگە ئۇرنىغان سۆزبۇ.

ۋە لېكىن ۋەتىنىم سەن باشقا دۇنيا،
مېھرىڭدىن تاشقىمۇ بەردىڭ سەن مېھىر.
مەن سېنىڭ پەرۋانەڭ ئورناتتىڭ ئۆزۈڭ،
ئالمىدەك يۈرەكتە ئالەمچە سۆيگۈ.

تۈگىمەس ناخشا
(تىيىپجان ئېلىيوف)

ھەركۈن ئاخشىمى ناخشا ئېيتىمەن،
ئاشۇ كوچاڭدىن ئەگىپ كېتەلمەي.
بىر پەللىنى كۆزلەپ ماڭىمەن،
ئاۋارىمەن تېخى يېتەلمەي.

بۈگۈن ئاخشاممۇ ئۆتكەنتىم يەنە،
شاد ناخشام بىلەن دەرىزەڭ چېكىپ.
قاياقتىندۇر ئىشىك غىچىرلاپ،
كايىپ كەتتى بىر بوۋاي چىقىپ.

ۋارقىرايسەن، جارقىرايسەن ھەركۈنى شۇنداق،
ساراڭمۇسەن ئۇخلىمايدىغان.
ياكى ئادەمگە ئۇيقۇ بەرمەيسەن،
قانداق ناخشا بۇ تۈگىمەيدىغان.

كايىما بوۋاي سەنمۇ بىر چاغدا ،
ياش ئېدىڭغۇ ئۇخلىمايدىغان.
سەنمۇ ئېيتىپ تۈگىتەلمىگەن،
شۇنداق ناخشا بۇ تۈگىمەيدىغان.


مەنبە:كۈندىلىك خاتىرەمگە يېزىۋالغان شېئىرلار