ئوغلۇمنىڭ دادىسىغا ...
0
ئوغلۇمنىڭ دادىسى ، ياخشى تۇرۇۋاتامسەن دېمىسەممۇ ياخشى تۇرۇۋاتقانلىقىڭنى بىلىمەن ، چۇنكى سەن بۇ دۇنيادىكى ئەڭ ياخشى كۆرىدىغىنىم ، پەخرىم ، بىردىنبىر كۆڭۈل شادلىقىم بولغان ئوغلۇمدىن ئايرىۋېتىپ ،مېنى قىيناش ئارقىلىق كۆڭلۈڭنى خوش قىلىۋاتىسەن ، ئۆزەڭنىڭ قالتىس ئەركەك ئىكەنلىكىڭنى ماڭا ۋە باشقىلارغا كۆرسىتىپ قويۇۋاتىسەن ،بەلكىم بۇ قۇرلارنى ئوقۇۋاتقان ئوقۇرمەنلەر نېمە دېگىنى بۇ ،گەپنى ئۇزارتماي يولدىشىمغا دېسىلا بولمىدىمۇ دەۋاتقان بولۇشى مۇمكىن ، خاتىرجەم بول ، ھەممىنى ئوقۇپ بولغاندا سېنى نېمىشقا يولدىشىم دېگۈم كەلمىگەنلىكىنى بىلىدۇ.
موشۇ كۈنلەردە ھەممە ئادەم خوشال -خورام ھېيت ئۆتكۈزىۋاتىدۇ. مەن بولسام كۆرۈنۈشتە چاندۇرماي سېنى ،ئوغلۇمنى سورىغانلارغا قېينانامنىڭكىگە كەتتى ، دادام يالغۇز بولغاچقا مەن بارمىدىم ، دېگىنىم بىلەن كۆڭلۈمدە بىر ھەپتە ئاۋال قىلغان ھاقارەتلىرىڭدىن پەيدا بولغان يارىلارنىڭ ئازابىغا چىدىيالماي ھەم ئوغلۇم بىلەن بىللە ھېيىت ئۆتكۈزەلمىگەنلىكىمدىن ، تەقدىرنىڭ شۇ قەدەر رەھىمسىزلىكىدىن تۆت يىلدىن بۇيانقى ئازابلىق تۇرمۇشۇمدىن زارلىنىپ ئولتۇرۇپتىمەن .
ھەركۈنى يالغۇز قالغان ۋاقىتلىرىمدا سائەتلەپ خىيال سۈرۈپ كېتىمەن ، مەن نېمىشقا بۇنداق شور پېشانە يارالغاندىمەن ، موشۇ ئۆينى ئۆي قىلىپ كېتەي ، بالامنى يېتىم قىلماي دەپ شۇنچە تىرىشىپتىمەن ، ئېرىشكىنىم پۈتۇنلەي ئارزۇيۇمنىڭ ئەكسىچە ، تۆت يىل بوپتۇ،سېنىڭ تۇگىمەس سوئال-سوراقلىرىڭ ، تىل-ھاقارىتىڭ ، ئورۇنسىز گۇمانخورلۇقۇڭ،يولسىز جېدەللىرىڭ ئارىسىدا ياشاۋاتقىلى ، بەك چارچاپ كەتتىم ،ئەمدى بەرداشلىق بەرگۈچىلىكىم قالمىدى . ئاجرىشىپ كېتەيلى ، بالىنى يېتىم قىلمايمەن دېگىنىم بىلەن ئاشۇنداق ئائىلە مۇھىتىنىڭ بالا ئۈچۈن قانچىلىك پايدىسى بولماقچىدى ؟ سېنىڭ تەسىرلىك كەچۈرۈم سوراشلىرىڭ، چىرايلىق ۋەدىلىرىڭ ، ئادەمنىڭ ئىچى سېيرىلغۇدەك يالۋۇرۇشلىرىڭغا ئېرىپ قېلىپ سوتقا بەرگەن ئەرزىمنى قايتۇرىۋالغىلى تېخى ئۈچ ئايمۇ بولمىدى ، مەن تېخى سېنى مېنى ئەمدى چۈشىنىپتۇ ، ئەمدى تۇرمۇشىمىز تىنچ بولىدۇ دەپ ئويلاپتىمەن ، ئۇنداق ئويلاشقا تېخى بالدۇركەن، سەن مېنى مەڭگۈ چۈشەنمىگىدەكسەن ، بولمىسا ماڭا بۇنچىۋالا ئازار بەرمىگەن بولاتتىڭ .
ئالدىنقى قېتىم سوتقا چىققاندا ئاجرىشىپ تۈگەشكەنمۇ بولاتتۇق ، شۇ بالىنى قاتتىق تالىشىپ قالدۇق ، سەن ھەتتا سىرتلاردا مەن دېگەن بالىنىڭ دادىسى ، ئۇنىڭ بالىنى تالىشىدىغان ھەققى يوق ، بالىنى مېنىڭ ئالغىنىم ئالغان ...دېگەن گەپلەرنى ، ماڭا بولسا ، سەن باقساڭ ئوغلۇم خوتۇن مىجەز بولۇپ قالىدۇ ...ئۆگەي ئاتىنىڭ ئالدىدا خار قىلىپ قويىسەن ، مەن بۇنىڭغا يول قويالمايمەن ...دېگەندەك گەپلەرنى قىلدىڭ ، باشقا گەپقۇ مەيلى ، بالىنى تالىشىدىغان ھەققىڭ يوق دېگەن گەپ ئاغزىڭدىن قانداق چىقتى ؟ مەن سېزىك تارتىپ ، تاماق يېيەلمەي ھۆ بولۇپ يۈرگەنلەردە ، سەن قوسىقىمدىكى بالا ئۈچۈن سىڭىشلىك بىر چىنە ئاش قىلىپ بېرەلىگەنمىدىڭ ؟ قوسىقىم يوغىناپ ئېگىلگۈسىز بولۇپ قالغان كۈنلەردە ، ئوغلۇم قىينىلىپ قالمىسۇن ، تاماقنى مەن ئېتەي ، سەن ئارام ئالغىن ،دېيەلىگەنمىدىڭ ؟ ئوپىراتسىيە كارۋېتىدا ناركوز تەسىر قىلماي ، ئاغرىق دەستىدىن توختىماي زارلىنىپ قىينالغان ۋاقتىمدا سەن ئىشىك ئالدىدا تاقەت قىلىپ ساقلاپ تۇرالىغانمىدىڭ ؟ سېستىرا «ئوغۇل ، سۆيۈنچە ...» دەپ ئوغلۇڭنى يۈگۈرگەنچە ئېلىپ چىققىنىدا سەن تۇنجى بولۇپ قولۇڭغا ئالغانمىدىڭ ؟ كۆكسۈمنىڭ تۈگمىسى چوڭ بولغاچ ھەم ئىككى كۈندىلا كېسىلىپ يارا بولۇپ قالغاچقا ،مەن ئاغرىققا چىدىماي، بالا ئاچلىققا چىدىماي تەڭلا ياش تۆككەن چاغلاردا ، ئاغرىق دەستىدىن يەرنى تىپىپ تۇرۇپ ، كۆزۈمدە لىق يېشىم بىلەن بالىنى ئېمىتكەن چاغلىرىمدا سەن نىمە قىلىپ بېرەلىگەن ؟ تۇيۇقسىز يۆتىلىپ تاشلاش سەۋەبىدىن ئوپىراتسىيە قىلغان جايدىكى ئىككى تىكىش ئېچىلىپ قېلىپ بىر ئايغىچە ئاغرىق ئازابىدىن قىينىلىپ تۇرۇپمۇ بالا «ئە..» قىلماق بىلەن تەڭ ئورنۇمدىن چاچراپ تۇرغان ۋاقىتلىرىمدا سەن نىمە چۈشلەرنى كۆرۈۋاتقان ئىدىڭ؟ ئاپامنىڭ سالامەتلىكىنىڭ ناچار ئىكەنلىكىنى بىلىپ تۇرۇپمۇ بىرەر قېتىم بالىنىڭ تەرەت لاتىلىرىنى يۇيۇپ باقتىڭمۇ؟ كىيىم -كېچەكلىرىنى يۇيۇپ باقتىڭمۇ ؟ موشۇ كەمگىچە بىرەر قېتىم بالىنىڭ تىرناقلىرىنى ئېلىپ ، چاچلىرىنى ئالدۇرۇپ باقتىڭمۇ ؟ بىرەر قېتىم ئۆزلۈكىڭدىن بالىنىڭ بەدەنلىرىنى يۇيۇپ باقتىڭمۇ ؟ قانچە قېتىملاپ بالىنىڭ قىزىتمىسى ئۆرلەپ قالغان چاغلاردا ئۆزەم يالغۇز دوختۇرخانىغا ئاپىرىپ ، گايىدا باشقىلارنىڭ ياردىمى بىلەن ،گايىدا بىر قولۇمدا ئوكۇل بوتۇلكىسىنى ، بىر قولۇمدا بالىنى كۆتىرىپ تەرەت قىلدۇرىمەن دەپ ، ئوكۇل يىڭنىسى مىدىرلاپ كېتىپ ، بالىنىڭ قولى ئىششىپ كېتىپ ، قايتا-قايتا ئوكۇل يىڭنىىسى سانچىغاندا ،شۇ يىڭنە يۈرىكىمگە سانچىلغاندەك بولۇپ بالىدىن بۇرۇن مەن چىدىماي يىغلاپ كەتكەن چاغلىرىمدا سەن نەدە ئىدىڭ ؟ ئەجىبا بالىنىڭ شۇنچە جاپاسىنى تارتىپ ، موشۇنچىلىك چوڭ قىلىپ ئەمدى ھەققىم يوق بولۇپ قالدىمۇ؟ ئۆگەينىڭ ئالدىدا خار قىلىپ قويىسەن ، دېگەن گېپىڭدىن ئۆرگىلەي ، بۇ گەپچە سەن ئوغلۇڭغا ئۆز ئانىسىدىنمۇ بەك كۆيۈنىدىغان ئۆگەي ئانا تەييارلاپ قويغان ئوخشىمامسەن ؟ ...دېسەم گەپلىرىم ھەرگىز تۈگىمەيدۇ ، ماڭىمۇ قىلدىڭ ، ئۆزەڭگىمۇ قىلدىڭ ، ئەمدى بالىغا قىلماقچى بولۇۋاتىسەن ، ئۇنداق قىلما ، مېنى قىينىغىنىڭ ئەمەس ، بالىنى قىينىغىنىڭ ئۇ ، بالىدا نېمە گۇناھ ، بىلىمەن ، سەنمۇ ئوغلۇڭنى قالتىس ياخشى كۆرىسەن ، بىراق ياخشى كۆرۈش ئايرىم گەپ ، مېھرى- مۇھەببەتنى يەتكۈزۈش ئايرىم گەپ ، سەن ھازىرچە بۇنى قىلالمايسەن ، ھېچبولمىسا مەنچىلىك قىلالمايسەن ، شۇڭا بالىنى ماڭا بەرگىن، ئۇنىمۇ ،مېنىمۇ قىينىما !ئۆمرۇڭدە بىر قېتىم كەڭ قورساق بولۇپ، ئاياللارغا يول قويۇپ باققىن ، بۇنىڭلىق بىلەن ئەر دېگەن نامىڭ ھەرگىزئۆزگىرىپ كەتمەيدۇ.
مەنبە: قەلىمىم
[ بۇ يازماkarguli311تەرپىدىن2008-12-09 10:51 AMدە قا ]
