يېڭى تارتقان سەككىز سۈرىتىم
(ساتىرا
(تۇرادىن ئابدۇرېھىم)
مۇقەددىمە
دوستۇم زارلاپ ماڭا بىر كۈنى:
زامان ھازىر تەتۈر بوپ كەتتى.
بالىلىرىمىزمۇ ۋاپاسىزلىشىپ،
تاپقىنىمىزنى قويماي يەپ كەتتى.
« ئىش بولسۇن چوڭ ۋە ياكى كىچىك،
پۈتمەس ئىشىڭ چوقۇم پارىسىز.
ئەر-خوتۇندا مېھرى-ۋاپا كەم،
ياشار بىللە ئامال-چارىسىز».
مەنمۇ دىدىم :«دوستۇم زارلىما،
تەتۈر ئەمەس ئەسلى بۇ زامان.
ئىشەنمىسەڭ مەن تارتتىم سۈرەت،
كۆرۈپ باققىن ياخشىمۇ يامان».
بىرىنچى سۈرەت:
كىمكى يېقىن تۇرسا باشلىققا،
شۇنىڭ ئىشى ئوڭكەن،ئاسانكەن.
بىلىمى بار تالادا قېلىپ،
پۇلى بارنىڭ گېپى يوغانكەن.
ھۆرمەت قىلساڭ قورقۇنچاق دىسەك،
يول قويغاننى دەيمىز يۇمشاقباش.
سۈكۈت قىلساڭ باسىمىز پەسكە،
مەقسەت ھوقۇق ئۈچۈنلا ياشاش.
ئىككىنچى سۈرەت:
ئۇلۇغلىنار ئۇستاز ئېغىزدا،
سىنتەبىرنىڭ ئونىنچى كۈنى.
تۈگەر ئۇلۇغلۇق شۇ بىر كۈندىلا،
روھى ئىنژېنىر دىگىنى قېنى.
مىنىپ يۈرەر كونا ۋەلىسپىت،
دوكتور،ئالىم،ئاسپرانت تۇرۇپ.
ھاجەتكىمۇ تەييار ماشىنا،
مىليونېرلار ساۋاتسىز تۇرۇپ
ئۈچىنچى سۈرەت:
سوراپ باقساڭ ستودېنىتلاردىن،
نەچچە ئۇيغۇر دوكتورى بار دەپ.
توغرا جاۋاپنى بىرەر قانچىسى،
يالغان ئەمەس بۇ راس بولغان گەپ.
بىلىدىغانلار بىزدە قانچىلىك،
ھوشۇر ئىسلام،ئىمىن تۇرسۇننى.
لېكىن يادلاپ بېرىمىز سۇدەك،
شاھرۇھخاننى،مايكېل جېكسۇننى.
تۆتىنچى سۈرەت:
قىز-ئاياللار ئېسىپتۇ پىچاق،
يىگىتلەرنىڭ بوينىدا زەنجىر.
ئۇزۇن چاچنى تالىشىپ قىزدىن،
يىگىتلەرگە بۇ نىمە تەقدىر،
يىگىت كىيگەن شىمنىڭ تارلىقى
كۆينەكلىرى ئۇنىڭدىن بەتەر.
قىز يۈرىدۇ ئەرچە ياسىنىپ.
بۇ بىز ئۈچۈن خەتەردۇر خەتەر.
بەشىنچى سۈرەت:
لەڭپۇڭ،سېرىق ئاشنىڭ بازىرى،
ئەرلەر بىلەن قىزىيدۇ ھازىر.
تۇخۇم،كاۋاپ،شورپا دىگەننى،
ئاياللارلا يەيدىكەن ياپىر.
بولىۋەرسە شۇنداق تەتۈرلۈك،
خورازلارمۇ تۇغارمۇ تۇخۇم.
ئانام قايسى،دادام قايسى دەپ،
بالىلارمۇ ئىزدەيدۇ چوقۇم.
ئالتىنچى سۈرەت:
بىكار يېتىپ گېپى چوڭ ئەرنىڭ،
پۇل تېپىشقا قىلمايدۇ چارە.
ئۆيى.ئېرى،بالىلىرى ئۈچۈن،
پالاقشىيدۇ خوتۇن بىچارە.
چەكسە ئىشىك كەچقۇرۇن بىرسى،
‹قوپ ئىشىكنى ئاچ›دەيدۇ ئېرى.
ئۆزى يېتىپ خەخنىڭ قوينىدا،
خوتۇنىنى ئىتتىرەر نېرى.
يەتتىنچى سۈرەت:
بالام دەپلا ياشاپ بىر ئۆمۈر،
باقمىغانتى بىزدىن زارلىنىپ.
ئاتا-ئانا تۇرسا تەۋەرۈك،
ئەمدى شۇلار قالدى خارلىنىپ.
نوھ كېمىسى كەلسە ئەگەردە،
تاشلاپ ئانىنى يۈگۈرەر ئۆزى.
ئىنساپ دىيانەت قالدى يىراقتا،
پۇلدىن باشقىنى تونۇماس كۆزى.
سەككىزىنچى سۈرەت:
ئادەم ئاتىنىڭ ئەۋلادى بىز،
سۇ،ھاۋا،تۇپراق،ئوتتىن يارالغان،
بۇلغاپ بولدۇق ھەممە نىمىنى،
نەپسىمىز بىزنىڭ يوغان، بەك يوغ
تەڭشىلىپ بولغىچە ئېكىلوگىيە،
قۇم باسارمۇ قۇيرۇقىمىزنى.
بىزنى ئۆستۈرگەن ئانا زىمىن بۇ،
ئاسراپ قويايلى تۇپرىقىمىزنى.
ئاخىرقى سۆز:
تەتۈر ئىشلار جىق ئىكەن ئەسلى،
يېزىۋەرسەم پۈتەركەن داستان.
تۈزەتسە كىم تەتۈر ئىشىنى،
دۇنيادا ئۇ ئەڭ ياخشى ئىنسان،
زامان تۇرسا ئەجەپ ئوڭ،ياخشى،
تەتۈر ئىشلار تۈگىمەس نىچۈن.
بۇ تەتۈرلۈك تۈگەپ بولغىچە،
بولار ئىشلار ئاستىن ۋە ئۈستۈن.
ئىمان،ئىنساپ،ئەخلاقلىق بولۇش،
ئاتىلاردىن بىزگە نەسىھەت.
ئىجىل-ئىناق ئۆتەيلى مەڭگۈ،
مېھرىمىزدىن يارىتىپ جەننەت.
2013-يىلى 1-نويابىر. ئۈرۈمچى
بۇ يازمىنى ئاخىرىدا Misranim2 تەھرىرلىگەن. ۋاقتى 2014-12-8 07:40 PM
يوللىغان ۋاقتى 2014-12-8 06:56:24 PM
.gif)
.gif)
.gif)