جاھان ئاگېنتلىقى 5—مارت خەۋىرى؛ لەگلەك تورى تەرجىمىسى: ئىراننىڭ رەسمى ئاخبارات ئاگېنتلىقى «IRNA» يەمەندە تەخمىنەن 2 يىل بۇرۇن تۇتقۇن قىلىنغان ئىرانلىق دىپلومات خادىمىنى قۇيۇپ بېرىلگەنلىكىنى بىلدۈردى. يەمەندە بىخەتەرلىك تارماقلىرى ھەم بۇ ۋەقەنىڭ راستلىقىنى دەلىللىدى.
ئىرانلىق دىپلومات خادىمى نۇر ئەھمەد نىكباھت 2013-يىلى يەمەندە تۇتقۇن قىلىندى. ئىران دۆلەتلىك ئاخبارات ئاگېنتلىقى ، تۇتقۇن قىلىنغان دىپلوماتنىڭ ئىرانغا قايتۇرۇلۇپ كېلىنگەنلىكىنى بىلدۈردى. ئىرانلىق دىپلومات خادىمىنىڭ تۇتقۇن قىلىنىشىنى ھازىرغا قەدەر ھېچبىر تەشكىلات ئۈستىگە ئالمىدى.
يەمەندە يەكشەنبە كۈنى ئۈچ يىل بۇرۇن تۇتقۇن قىلىنغان سەئۇدى ئەرەبىستانلىق كونسۇل خادىمى ھەم قۇيۇپ بېرىلگەن ئىدى. يەمەننىڭ ئەدەن رايۇنىدا ۋەزىپە ئۆتەۋاتقان سەئۇدى ئەرەبىستانلىق دىپلومات خادىمى، يەمەن ئەل قائىدە تەشكىلاتى تەرىپىدىن تۇتقۇن قىلىنغان ئىدى. سەئۇدى ئەرەبىستان ئاخبارات ئاگېنتلىقى ، تۇتقۇن قىلىنغان خادىمنىڭ سەئۇدى ئاخبارات ئىدارىسىنىڭ زور تىرىشچانلىقى نەتىجىسىدە قۇيۇپ بېرىلگەنلىكىنى ئېيتقان ئىدى.
ئۇزۇن ۋاقىتتىن بېرى سىياسىي كىرزىسقا دۇچار بولغان يەمەندە ھۆكۈمەت ۋە پرېزىدېنت ھادىنىڭ يانۋار ئېيىدا ئىستىپانامە سۇنۇشىدىن كېيىن ، ئەنسارۇللاھ ھەرىكىتى دەپ تۇنۇلغان ئىراننىڭ قوللىشىدىكى شىئە ھۇسىيلەر، 6-فېۋرالدا پارلامېنتنى بىكار قىلدى، ھۇسىيلەرنىڭ سىياسەتكە قۇراللىق مۇداخىلە قىلىشى يەمەندە سىياسىي تەرەپلەرنىڭ نەزىرىدە ھەربىي ئۆزگىرىش دەپ بىلىندى.
يۇقارقى ئۆزگىرىشلەردىن كېيىن سەئۇدى ئەرەبىستان، تۈركىيە، مىسىر، ئەرەب بىرلەشمە خەلىپىلىكى، ئامېرىكا، فرانسىيە، ئەنگىلىيە قاتارلىق نۇرغۇن دۆلەتلەر يەمەن پايتەختى سەنئادىكى ئەلچىخانا پائالىيەتلىرىنى توختاتتى.