شىنخۇا ئاگېنتلىقى خەۋىرى: 77 يىل ئىلگىرى، 300 مىڭ نەنجىڭ شەھەر ئاھالىسى ۋە قۇرالنى تاشلىغان جۇڭگو ئارمىيىسى قىرغىنچىلىققا ئۇچرىدى، 20 مىڭدىن ئارتۇق ئايال ئاياق ئاستى قىلىندى، 3 دەن 1 قىسىم شەھەردىكى ئىمارەتلەر ۋەيران قىلىندى، جۇڭگوغا تاجاۋۇز قىلىپ كىرگەن ياپون ئارمىيىسى نەنجىڭ شەھرىدە چېكىدىن ئاشقان جىنايەت ئۆتكۈزدى. ھازىرغا قەدەر، ياپونىيەدىكى ئاز ساندىكى ئوڭ قانات كۈچلەر تاجاۋۇزچىلىق تارىخىنى ئىنكار قىلىپ، ئۇرۇشنى پەدەزلىمەكتە. ئالاقىدار مۇتەخەسسلەر مۇنداق دەپ كۆرسەتتى: نەنجىڭ چوڭ قىرغىنچىلىقى تارىخى ھەققىدىكى سوتنىڭ ھۆكۈمى، تارىخىي ماتىرياللار ۋە ئىسپاتلار تولۇق، پولاتتەك ئىسپات ئالدىدا تارىخىنى بۇرمىلاشقا ھەرگىز بولمايدۇ.

نەنجىڭ چوڭ قىرغىنچىلىقى ھەققىدىكى ئەڭ دەسلەپكى ئىسپات ياپونىيە ئارمىيىسىنىڭ ئۆزىدىن تېپىلغان، بۇنىڭ ئىچىدە كىشىنى ئەڭ چۆچىتىدىغىنى ياپونىيە ئارمىيىسى ئوفىتسىرلىرىنىڭ جۇڭگولۇقلارنى ئۆلتۈرىۋاتقانلىقى تەسۋىرلەنگەن 16 پارچە رەسىم. بۈگۈنكى كۈندە بۇ رەسىملەر جۇڭگوغا تاجاۋۇز قىلىپ كىرگەن ياپون ئارمىيىسىنىڭ نەنجىڭ چوڭ قىرغىنچىلىقىدا قازا قىلغان قېرىنداشلار خاتىرە سارىيىنىڭ كۆرگەزمە زالىدا ساقلانماقتا، ياپونىيە ئارمىيىسى ئەينى يىللىرى جەسەتنى كۆيدۈرۈش ئۈچۈن ئىشلەتكەن بېنزىن تۇڭى، جون ماگى ئىشلەتكەن فوتو ئاپپارات ۋە سۈرەت لېنتىسى، جۇڭگوغا تاجاۋۇز قىلىپ كىرگەن ياپون ئارمىيىسىنىڭ پىشقەدەم ئەسكەرلىرىنىڭ خاتىرىسى، نەنجىڭ چوڭ قىرغىنچىلىقىدا قازا قىلغانلارنىڭ تەۋەررۈكلىرى قاتارلىق 3000 پارچىدىن ئارتۇق نەرسە كېرەكلەر ھەر بىر خاتىرە سارىيىنى ئىكىسكۇرسىيە قىلغۇچىغا جۇڭگوغا تاجاۋۇز قىلىپ كىرگەن ياپون ئارمىيىسىنىڭ زوراۋانلىق قىلمىشىنى شىكايەت قىلىدۇ.