ئەنگىلىيە ‹‹ كۈندىلىك پوچتا گېزىتى ›› نىڭ 23- ئىيۇندىكى خەۋىرىگە قارىغاندا ، ئامېرىكىدىكى نۇرغۇن تەتقىقات ئورگانلىرى ئاگاھلاندۇرۇش تارقىتىپ ، بىر خىل زەھەرلىك ‹‹ چوڭ تۇمشۇق چۈمۈلە ›› نىڭ ئامېرىكىغا ھۇجۇم قىلغانلىقىنى ئۇقتۇرغان . بۇ خىل چۈمۈلىنىڭ چوڭ تاڭلىيى ئېيىق تۇتۇش قىسمىقىغا ئوخشايدىغان بولۇپ ، 180 گىرادۇس ئېچىلىدىكەن . ئۇنىڭ يېتىلگەندىن كېيىن بەدىنىنىڭ ئۇزۇنلۇقى تەخمىنەن 9.5 مىللىمېتىر كېلىدىكەن .

ئامېرىكىنىڭ شىمالىي كارولىنا ئىشتات ئۇنىۋېرسىتېتى ، مىسسىسىپى ھاشارات مۇزىيې ، كالىفورنىيە ئۇنىۋېرسىتېتىنىڭ داۋس تارماق مەكتىپى ۋە ئارچبولد جانلىقلار پونكىتى قاتارلىق ئورگانلارنىڭ بىرلەشمە تەتقىقاتىدا كۆرسىتىلىشىچە ، بۇ خىل چوڭ چىشلىق چۈمۈلە پۈتۈن ئامېرىكىغا قاراپ كېڭىيىۋېتىپتۇ .

شىمالىي كارولىنا ئىشتات ئۇنىۋېرسىتېتىنىڭ تەتقىقاتچىسى سورگېر مۇنداق دېدى : ئەمەلىيەتتە ، چۈمۈلىلەرنىڭ كېڭىيىشى ناھايىتى قىزىقارلىق ، چۈنكى ھېچكىم ئۇلارنىڭ پۈتۈن كۈچى بىلەن كېڭىيىدىغانلىقىغا دىققەت قىلمايدۇ . بىزنىڭ بۇ چۈمۈلىلەر توغرىسىدا يەنى ئۇلارنىڭ ھۇجۇم قىلىپ كىرگەندىن كېيىن يەرلىكتىكى چۈمۈلىلەر بىلەن ئۆز ئارا بىرلىشىپ ھەرىكەت قىلىشى قاتارلىقلار توغرىسىدا بىلىدىغانلىرىمىز ناھايىتى ئاز .

سورگېر خىزمەتداشلىرى بىلەن جەنۇبىي ئامېرىكىدىن كەلگەن ھۇجۇم قىلىش ئىقتىدارى بىر قەدەر كۈچلۈك بۇ خىل چۈمۈلىنىڭ قانداق كېڭىيىدىغانلىقىغا ناھايىتى قىزىقتى . جەنۇبىي ئامېرىكىدا 1956-يىلى تۇنجى قېتىم بۇ خىل چۈمۈلە خاتىرىلەنگەن . لېكىن تەتقىقاتچىلار بۇ خىل چۈمۈلىنىڭ مېكسىكىغىچە كېڭەيگەنلىكىنى ، ئەڭ يىراق بولغاندا فىلورىدا ئىشتاتىنىڭ Pensacola غىچە يېتىپ بارغانلىقىنى بايقىغان .