AppleInsider تور بېكىتىنىڭ خەۋىرىگە قارىغاندا، ئالما شىركىتى دۈشەنبە كۈنى مەلۇم بىر مەبلەغ سالغۇچىلارغا ئائىت تور بېكەتتە بايانات ئېلان قىلىپ، 26-يانۋار ئالما شىركىتىنىڭ 2016-يىلى 1-پەسلدىكى مالىيە دوكلاتىنى ئېلان قىلىدىغانلىقىنى جاكارلىغان. بۇ بىر پەسىللىك مالىيە دوكلاتى ئىنتايىن مۇھىم بولۇپ، ئۇنىڭدا ئالما شىركىتىنىڭ ئەڭ يېڭى يانفونى iPhone 6s نىڭ سېتىلىش مىقدارىغا ئائىت سانلىق مەلۇماتلار ئاشكارىلىنىدىكەن.

     مەبلەغ سالغۇچىلار iPhone 6s ۋە iPhone 6s Plus نىڭ سېتىلىش مىقدارى جەھەتتىكى ئىپادىسىنى بىلىشكە بەكلا ئالدىراۋاتقان بولۇپ، ئۇلار بۇ يېڭى ئەۋلاد ئايفوننىڭ iPhone 6 ۋە iPhone 6 Plus قاتارلىقلار قولغا كەلتۈرگەن غايەت زور مۇۋەپپەقىيەتكە ۋارسلىق قىلالماسلىقىدىن ئەنسرەيدىكەن. ئالما شىركىتىنىڭ 2014-يىلىنىڭ ئەڭ ئاخىرقى بىر پەسلىدىكى ئىپادىسى ئىنتايىن ياخشى بولۇپ، بۇ بىر پەسىلدە 74.5 مىليون دانە ئايفون سېتىپ چىقىرىشتەك شانلىق نەتىجىنى قولغا كەلتۈرگەن، تىجارەت كىرىمى 74.6 مىليارد دوللارغا، ياراتقان ساپ پايدىسى 18.0 مىليارد دوللارغا يەتكەن.

    ئالما شىركىتى ئالدىنقى بىر پەسىللىك مالىيە دوكلات يىغىنىدا ئىپادە بىلدۈرۈپ، 2016-يىلى 1-پەسىلدە تىجارەت كىرىمىنىڭ 75.5-77.5 مىليارد دوللارغا يېتىدىغانلىقى، ساپ پايدىنىڭ %39-%40 گىچە بولىدىغانلىقىنى ئوتتۇرىغا قويغان. ھالبۇكى، ئانالىزچىلار ئالما شىركىتىنىڭ iPhone 6 ياراتقان يۇقىرى رېكوردنى ساقلاپ قالالايدىغانلىقىغا ئانچە ئىشەنمىگەن، نۇرغۇنلىغان ئانالىزچىلار بىردەك ھالدا iPhone 6s نىڭ سېتىلىش مىقدارىغا بولغان مۆلچەرىنى تۆۋەنلەتكەن.