جۇڭگو ئاخبارات تورى 29-ماي تېلېگراممىسى: «مەركەز ئاگېنتلىقى»نىڭ 29-ماي خەۋەر قىلىشىچە، ھىندىستاندا تومۇز ئىسسىق سەۋەبىدىن بىر ھەپتىدىن كۆپرەك ۋاقىتتا 1700گە يېقىن ئادەم قازا قىلغان، دوختۇرخانىلار بىمارلار بىلەن لىق تولغان، دوختۇرلار ئىسمېنا قوشۇپ ئىشلەپ، ھېرىپ ھالىدىن كەتكەن.
ھىندىستاندا ھەر يىلى يازدا تومۇز ئىسسىق تۈپەيلى نەچچە يۈز ئادەم قازا قىلىدۇ، قازا قىلغانلارنىڭ كۆپىنچىسى نامرات ئامما، بىراق، ھۆكۈمەت تەرەپ 28-ماي ئېلان قىلغان سانلىق مەلۇماتقا قارىغاندا، بۇ يىل تومۇز ئىسسىقتا قازا قىلغانلارنىڭ سانى 1677گە چىقىپ، 1995-يىلدىن بۇيانقى ئەڭ يۇقىرى رېكورت بولۇپ قالغان.
جەنۇبتىكى ئاندرا ئۆلكىسىدە تېمپېراتۇرا 47 سېلىتسىيە گىرادۇسقا يېتىپ، ئاپەت ئەھۋالى ئەڭ ئېغىر جايغا ئايلانغان، بۇ ئۆلكىدە 18-مايدىن بۇيان جەمئىي 1334 ئادەم قازا قىلغان بولۇپ، بۇ سان بۇلتۇرقىدىن بىر ھەسسىدىن كۆپرەك ئاشقان. دوختۇرلارمۇ ئىشلىگەندىن بۇيان بۇنچىۋالا كۆپ ئاغرىقنى كۆرۈپ باقمىغانلىقىنى ئېيتقان.