ئېرىڭىز ئەتراپىدىكى ئايال

سىز ئېرىڭىزنى بارلىق ئاياللاردىن بولۇپمۇ ئۇنىڭ ئىشلىرىغا يەردەمدە بولۇۋاتقان ئايال كاتىبى ۋە ھەمكارلاشقۇچىلىرىدىن ئايرىۋېتەلمەيسىز . چۈنكى ، سىز بۇ ئاياللار بىلەن بىر سەپتە ، بولۇپمۇ ئومۇمنىڭ ئىشلىرىدا تېخىمۇ شۇنداق .
كۆپىنچە ئاياللار ئېرىنىڭ كاتىپى ياكى ئېرى بىلەن خىزمەتداش چىرايلىق ئاياللاردىن كۈنلەيدۇ . بۇ ئورۇنسىز كۈنلەش داۋاملىشىۋەرسە ، ئېرىڭىز بۇ گۇمانخورلۇق دەستىدىن باشقا ئاياللارغا ئېغىپ كېتىشىمۇ مۈمكىن .شۇڭا ، ئېرىڭىز ئەتراپىدا ئىشلەۋاتقان ئاياللارغا دوستانە مۇناسىۋەتتە بولۇڭ . ئەقىللىق ئايال ئېرىنىڭ ئەتراپىدىكى ئاياللارغا توغرا مۇئامىلىدە بولىدۇ .
قارىسىغىلا گۇمانلانماڭ

ئېرىم ناھايىتى قاملاشقان ، ئېرىمنىڭ خىزمەت ئورنى ياخشى ، خىزمەتتىمۇ كۆزگە كۆرۈنگەن دەپ قارىسىڭىزمۇ ، لېكىن ئۇنىڭ بىلەن ئۇچرىشىپ تۇرىدىغان ئاياللارنىڭ ھەممىسىلا ئېرىڭىزنى قوغلىشىشى ناتايىن . ئېرىڭىزنىڭ ئەتراپىدا خىزمەت قىلىۋاتقان ئاياللار گەرچە ئېرىڭىزنىڭ قابىلىيىتىگە قايىل بولسىمۇ ، ئۇنىڭغا كۆڭلى چۈشۈپ قېلىشى يوق گەپ . ناۋادا شۇنداق بولغان تەقدىردىمۇ ، ئېرىڭىزنىڭ ئۇلارنى نەزىرىگە ئېلىپ كېتىشى ناتايىن . سىلەر دېگەن مەڭگۈلۈك ئەر - ئىوتۇن بولغاندىكىن ، ئەڭ ياخشىسى ئېرىڭىزگە ئىشەنگىنىڭىز تۈزۈك . بىزدە بىر گەپ بارغۇ ؟ "گۇمان ئىماننى قاچۇرۇپتۇ" دەيدىغان ؟ مانا مۇشۇنى ئېسىڭىزدە چىڭ تۇتۇڭ .
بولۇپمۇ خىزمەتتە بىرەر مەسىلە كۆرۈلۈپ قېلىپ ، ئېرىڭىز ئىسمىنە قوشۇپ ئىشلىگەندە ئامال بار ئېرىڭىزگە كۆيۈنۈپ مۇئامىلە قىلىڭ . ھەرگىزمۇ ئورۇنسىز گۇمانلىنىپ " يېنىڭىزدا قايسى ئايال بار ؟ كىملەر بىلەن بىرگە ئىشلەۋاتىسىز ؟ قايسى ئايال بىلەن تاماق يىدىڭىز؟ " دېگەندەك سۇئاللارنى سوراۋېرىپ ، ئېرىڭىزنى تېرىكتۈرۈپ قويماڭ . بۇ خىلدىكى ئىش داۋاملىشىۋەرسە ، ئېرىڭىزدە ئاسانلا ئۆزىگە كۆيۈنىدىغان ، ئەتراپىدىكى ئاياللاردىن بىرەرسىگە ئېغىپ كېتىدىغان يا بولمىسا سىرتتىكى ئاياللارغا كۆڭۈل بېرىدىغان ئەھۋال كېلىپ چىقىشى مۈمكىن . ئېرىڭىز ئەتراپىدا خىزمەت قىلىدىغان ئاياللار قانچە كۆپ بولسا ، سىز شۇنچە خوش بولسىڭىز بولىدۇ . چۈنكى ، ئۇ ئاياللار ئېرىڭىزگە ۋاقتىدا ئۆيگە قايتىشىنى ئەسكەرتىپ تۇرىدۇ .

كۈندەشلىك قىلماسلىق
ئادەتتە جەمىيەتتە خىزمەت قىلىدىغان خانىم - قىزلار چىرايلىق ياسىنىپ يۈرىدۇ ، بۇ ، خىزمەتنىڭ ئېھتىياجى بولۇپلا قالماي ، ئەدەب - ئەخلاقنىڭمۇ ئېھتىياجى . سىزنىڭمۇ شۇنداق چىرايلىق ياسىنىپ يۈرگۈڭىز بولسا ياسىنىپ يۈرگۈنىڭىز تۈزۈك . كىم بىلمەيدۇ ؟ ئەرلەرنىڭ چىرايلىق ئاياللارغا ئامراقلىقىنى ؟ ھەتتا سىز بىلەن بىللە كېتىۋېتىپمۇ يېنىڭلاردىن چىرايلىق قىز - ئاياللار ئۆتۈپ كېتىۋاتسا ، ئېرىڭىزنىڭ ئۇ چىرايلىق قىز - ئاياللارغا ئەيمەنمەستىن بوينىنى سوزۇپ قاراپ كېتىشلىرىنى ؟ گۈزەل شەيئىلەر ھامان كىشىدىكى ھارغىنلىقنى يوقۇتىدۇ . بۇخۇددى سىزنىڭمۇ ئەتراپىڭىزدىكى قاملاشقان ياكى تالانتى بار ، كەسپتە نەتىجە قازانغان ئەرلەرگە قاراپ قالغانغا ئوخشاشلا بىر ئىش .
ھازىرقى ئاياللارنىڭ تەڭدىن تولىسى خىزمەت قىلىدۇ . خىزمەت ھامىنى خىزمەت بويىچە بولىدۇ . ئېرىڭىزنىڭ ئەتراپىدىكى ئاياللاردىن ئېرىڭىزنى ئورۇنسىز كۈنلەپمۇ كەتمەڭ . بۇ سىز ئۈچۈن پايدا ئېلىپ كەلمەيدۇ .
باشقىلارنى خالىغانچە ئىشقا بۇيرىماسلىق كېرەك

ئېرىڭىز باش دېرىكتور بولغان تەقدىردىمۇ ، ئۇلارنىڭ قول ئاستىدىكى ئايال خادىملارنى خالىغانچە ئىشقا بۇيرىماڭ . بۇنداق قىلسىڭىز نوپۇزىڭىز ئۆسۈش ئۇياقتا تۇرسۇن ، ئەكسىچە ئېرىڭىزنى گېپى ئۆتمەس قىلىپ قويىسىز . چۈنكى ، ئۇلار سىز ئۈچۈن ئەمەس ، بەلكى ئېرىڭىز ئۈچۈن خىزمەت قىلغۇچىلاردۇر .
شۇڭا ، ئېرىڭىزنىڭ قول ئاستىدىكى ئاياللار ئالدىدا كېرىلىپ كەتمەڭ ، ئۇلار ئېرىڭىزنىڭ قېشىدا ئىشلەشنى خالىمىسا ئۇلارنى ھەرگىز تۇتۇپ قالالميسىز . قولىدىن ئىش كېلىدىغان بىرەر ئايال خادىمدىن ئايرىلىپ قالسا ، ئېرىڭىزنىڭ ئىشلىرىغا زىيان يېتىدۇ . ئەمىلىيەتتە ، بۇ ئۇلارنىڭ سىزنىڭ بويۇنتۇرۇقىڭىزدىن ئۆزلىرىنى قاچۇرغىنى . يەنە بىر گەپ ، سىز ئېرىڭىزنىڭ ئىشخانىسىغا تېلىفۇن بەرگەندە تېلفۇننى ئېرىڭىزنىڭ بىرەر ئايال خىزمەتدىشى ئېلىپ قالسا ، ئامال بار سىلىق ، چىرايلىق ، ئەدەبلىك سۆز بىلەن ئېرىڭىزنى چاقىرىپ قويۇشنى ئۆتۈنۈڭ . ھەرگىزمۇ بۇيرۇق ھالىتىدە گەپ قىلماڭ .

ئامال بار ئېرىڭىزنىڭ ئايال كاتىپى ۋە ئايال خىزمەتداشلىرى بىلەن ئىناق ئۆتۈڭ

ئادەتتە ئايال كاتىپ ئېرىڭىزنىڭ خىزمىتىگە ماسلىشىپ ، خىزمەت ئۈنۈمىنى يۇقۇرى كۆتۈرۈش ئۈچۈن تىرىشىدۇ . ئايال خىزمەتچىمۇ شۇنداق . ھەممىسى خىزمەت ئۈچۈن شۇنداق ھەمكارلاشماي ئامال يوق . ئېرىڭىز ئەتراپىدىكى ئاياللارغا توغرا مۇئامىلە قىلىش ئۈچۈن سىزنىڭ مۇئامىلىڭىز تولىمۇ مۇھىم رول ئوينايدۇ . ئەكسىچە ، سىز مۇئامىلىدە قوپال بولۇپ ، ئۇلارغا يامان كۆزدە قاراپ ، ھە دېسىلا ئورۇنسىز كۈنلەپ~~ ئۆزىڭىز ياسانماي ، تاشقى قىياپىتىڭىزگە ئەھمىيەت بەرمەي يۈرسىڭىز ~ ئىشنىڭ ئوخشىغىنى شۇ ! ئېرىڭىزنىڭ ئالدىدىلا ئەمەس ، ئېرىڭىزنىڭ ئايال خىزمەتداشلىرى ئالدىدىمۇ ئىناۋىتىڭىز بولمايدۇ . شۇڭا ، ئۆزىڭىز ياسىنىشقا ، كىيىم كىيىشكە ماھىرراق بولۇڭ . گەپ - سۆز ، مۇئامىلىدىمۇ ، خىزمەتتىمۇ نەتىجە قازانغان ، ساپالىق ئايال بولۇشمۇ شۇ ، ئەلۋەتتە !
ئېرىڭىز بىلەن خىزمەتتە داۋاملىق يېقىن ئۆتىدىغان ئاياللار بىلەن يېقىن ئۆتسىڭىز ، ئېرىڭىز ھەققىدىكى ئەھۋاللاردىمۇ ۋاقتى - ۋاقتىدا خەۋەردار بولۇپ تۇرالايسىز . شۇڭا ، ئېرىڭىزنىڭ ئەتراپىدا خىزمەت قىلىۋاتقان ئاياللارغا دۈشمەنلىك نەزەرى بىلەن قارىماي ، دوستانە مۇناسىۋەتتە قاراشنى ئۆگۈنۈۋېلىڭ . سىز بىر ئەقىللىق ئايال ، بۇنى چوقۇم قىلىپ كېتەلەيسىز !

مەنبە : "ياخشى ئاياللارنىڭ 36 ئادىتى" دىن ئېلىندى