«ئېلىپبە» ئىزدەش ئېلانى(باھالاشقا قاتناشتۇرۇلىدىغان ئەسەر)

«ئېلىپبە» ئىزدەش ئېلانى

مەقسۇت ئەمىن ئەركيار

(نورۇزلۇق مۇكاپاتلىق ئەسەرلەرنى باھالاشقا قاتناشتۇرۇلىدىغان ئەسەر)

تۆت دەپتەر،بىر قەلەم چېگىلگەن چاغدا،
قولياغلىق ئىچىگە بولمىغاچ بوغچا.
شۇ دەملەر يۈرىكىم سوققانتى خوشال،
مۇئەللىم قولۇمدىن يېتىلەپ ماڭسا.

دەرۋازا تۈۋىدە ئۇزىتىپ ئاتام،
نە خىيال سۈرگەندۇ كەينىمدىن قاراپ.
«تىرىشقىن جان بالام، ئۈمىدىمىزشۇ!»
دېگەنتى ئاپاممۇ يېنىش-يېنىشلاپ.

«ئېلىپبە» - مەن تۇنجى رەت كۆرگەن كىتاب،
ئېلىپبە- چاقىرىق،ئېلىپبە- خىتاب.
ئېلىپبە تارقاتقان كۈنىدىن باشلاپ،
ماڭغانتىم تەلپۈنۈپ بىر نۇرغا قاراپ.

يادلايتتىم،سۆزلەيتتىم ئېلىپبەرىمنى،
داق يەرگە جىجايتتىم ئېلىپبەرىمنى.
تاملارغا،دەرەخكە،كۆرگەنلا يەرگە
بەھۇزۇر يازاتتىم ئېلىپبەرىمنى.

«غۇنچەم»نى يادلىسام شۇنچە زوق بىلەن،
ئاغزىمغا قارىغان ئاكا-ئاچىلار.
«سادىرمەنۇ سادىرمەن،...»،«بىر،ئىككى،ئۈچ،...»
ئېلىپبە يادلاپ ئوينايتتۇق بالىلار.

يىراقلاپ كەتسىمۇ گۈزەل بالىلىق،
ئېلىپبەرىم ئۇنتۇلماس سىما ئىدى.
ھەقىقەت يولىنى ماڭا تۇنۇتقان،
ئېلىپبەرىم مەڭگۈلۈك تېما ئىدى!

مانا ھازىر ئۆيدە كىتابلىرىم لىق،
ئېسىل جاھازلارلىرىم،ئالغۇلىرىم لىق.
تۆت-بەش خىل تىلدىن دەرس بېرىمەن،
زامانىۋىمەن ئۆزەمچە كۆپ قىرلىق.