ئۇيغۇر يىگىتلەر!!! شېئىر

ئۇيغۇر يىگىتلەر



ئاتىلارنىڭ داۋامى ئۇز پالۋان يىگىتلەر،
ئانىلارنىڭ يۈرەك پارى غەمخان يىگىتلەر.
ئەل ۋەتەننىڭ ئۈمۈت كۆزى، مەردان يىگىتلەر،
جەسۇرانە، زەپەردەست ئۇيغۇر يىگىتلەر .



چاقناپ تۇرغان جۈپ كۆزلىرى، قارا قاشلىرى،
ئۇدۇن ئالغان ئەجدادىنىڭ ئېسىل نەسلىنى.
كېلىشكەن شۇ قەددى قامەت، بوي بەست ئىگىسى،
سالاپەتلىك، تۇرقى مەغرۇر ئۇيغۇر يىگىتلەر.



دولىسىغا كەتمەن ئېلىپ ماڭسا ئېتىزغا،
"ئەركەك" كەلدى دەر ئىكەن يەر تاپان ئاستىدا.
مەمنۇن بۇلۇپ قارىشاركەن ئەل ھەم ئۇنىڭغا،
ئىشتا پىشقان، ئەمگەك سۆيەر ئۇيغۇر يىگىتلەر.



ئورۇن ئالار ئوتتۇز ئوغۇل بولۇپ قاتاردىن،
دۇتتار تەمبۇر قۇتۇلالماس قېچىپ قولىدىن.
غۇلاچ كېرىپ ساما تارتىپ، توۋلار مۇقامدىن،
خۇش ئاۋازلىق بۇلبۇل سۈپەت ئۇيغۇر يىگىتلەر.



مەغرۇر تۇرار ئوغلاقچى بوپ ئاتنىڭ ئۈستىدە،
گاھى تۇرار چېلىشلاردا رەقىپ ئۈستىدە.
دەس تۇرىدۇ كۆكرەك كېرىپ ھەقنىڭ ئۈستىدە،
مەرد مەردانە، جاسارەتلىك ئۇيغۇر يىگىتلەر.



توپ تېپىدۇ ھەيۋە بىلەن گاھى چىملاردا،
ئاتقان توپى چۈشمەي قالماس ھەرگىز گارلاردا.
تونۇمايمەن كىمكەن ئۇلار جوردان ھەم كاكا،
ماڭا ئەزىز، ماڭا چولپان ئۇيغۇر يىگىتلەر.



بەزىلىرى جەڭگاھ كېزەر كەمپۈتەر بىلەن،
بەزىلىرى كۆرەش قىلار گاھ قەلەم بىلەن.
بەزىلىرى تەمىنلەر ھەم شاھ تائام بىلەن،
قوللىرى گۈل، جىسمى قابىل ئۇيغۇر يىگىتلەر،



ماھىر يەنە سودا-سېتىق، تىجارەتلەرگە،
ئىجتىمائىي مۇناسىۋەت، ئالاقىلەرگە.
كارى يوق بوپ يۈرەلمەيدۇ ئاجىز مىسكىنگە،
مېھرى ئىللىق، ساخاۋەتچى ئۇيغۇر يىگىتلەر.



زەپەر قۇچار ئىلىم پەننىڭ يۇقىرى كۆكىدە،
شان يارىتار سىرلار يېشىپ ھەقنىڭ ئىلمىدە.
مىللىتىم ھەم خەلقىم دەپ ياشار كۆڭلىدە،
ئىجدىھاتلىق، ئەلنى سۆيگەن ئۇيغۇر يىگىتلەر.



دىگەنلىرىم ئەمىلىيەت يوقتۇر يالغىنى،
ماختاشلىرىم ئارتۇق ئەمەس، كامدۇر قالغىنى.
تەرىپلىرى يېپىپ كېتەر ئىللەتلىرىنى،
ياخشى خىسلەت،ئىسىل خۇلق ئۇيغۇر يىگىتلەر.



"ئوغلان" بولۇڭ، ئەل دۇئاسى ئېلىپ كۆكلىگەن،
"ئوغۇل" بولۇڭ، ئاتا -ئانا چېھرى كۈلدۈرگەن.
"يىگىت" بولۇڭ، لېۋەن بەرنا، جانانلار سۆيگەن،
كۆز تەگمىسۇن ئەزىزلىرىم ئۇيغۇر يىگىتلەر .



مەنبە: داڭدار مۇنبىرى -چەشمەزۇلال