ئامېرىكا: ئەسەد ئۆز تاۋۇتىغا مىخ قاقماقتا دىدى [ئادىرسىنى كۇچۇرۇش]

ئامېرىكا: ئەسەد ئۆز تاۋۇتىغا مىخ قاقماقتا

ت ر ت ئاۋازى  خەۋىرى: ئامېرىكا قوشما ئىشتاتلىرى، ئەسەد ھاكىمىيىتىنىڭ ھەلەبتە ئېلىپ بارغان ئەڭ يېڭى ھۇجۇملىرىغا ‹ئۆز تاۋۇتىغا مىخ قېقىش› دەپ باھا بەردى.
ئامېرىكا قوشما ئىشتاتلىرى مۇداپىئە مىنىستىرى لىئون پانېتتا، ئوتتۇرا شەرق زىيارىتىنى باشلاشتىن ئىلگىرى سۈرىيە توغرۇلۇق ھەيران قالارلىق باياناتلارنى بەردى.
پانېتتا، «ھەلەبتە ئۆز خەلقىگە قارشى تىراگېدىيەلىك ھۇجۇم قىلىشلارنى داۋاملاشتۇرغان ئەھۋالدا، بۇ ئەسەدنىڭ ئۆز تاۋۇتىغا مىخ قېقىشى بولۇپ قالىدۇ» دېدى.
ھۇجۇملارنىڭ، ئەسەد تۈزۈمىنىڭ قانۇنلۇق سالاھىيىتىنىڭ قالمىغانلىقىنى نامايەن قىلىپ بەرگەنلىكىنىمۇ ئەسكەرتكەن پانېتتا، يۈز بېرىۋاتقان ئەھۋاللارنىڭ ئەسەد تۈزۈمىنىڭ نىھايىتىنىڭ كەلگەنلىكىنى ئوتتۇرىغا قويغانلىقىنى قەيت قىلدى.
سۈرىيەدە بولسا، توقۇنۇشلار ھەلەب شەھىرىگە مەركەزلەشمەكتە.
ھۆكۈمەت قىسىملىرى، ھاۋا ئارمىيىسىنىڭ ياردىمى ئارقىسىدا سالاھۇددىن رايونىنى قايتۇرۇۋالغانلىقلىرىنى ئىلگىرى سۈردى. ئۆكتىچىلەر بولسا، بۇ خەۋەرنى ئىنكار قىلدى.
شەھەرنىڭ كۆپلىگەن رايونىنىڭ ئۆكتىچىلەرنىڭ قولىدا ئىكەنلىكى، يوللارغا تەكشۈرۈش ئورۇنلىرىنى تەسىس قىلغانلىقى بىلدۈرۈلمەكتە.
توقۇنۇشلار سەۋەبىدىن ھەلەبتىن 200 مىڭ ئادەمنىڭ قاچقانلىقى، دۇكانلارنىڭ تاقاقلىق ئىكەنلىكى، پەقەت بىرلا شىركەتنىڭ نان سېتىۋاتقانلىقى ھەققىدە خەۋەرلەر كەلمەكتە.
دەمەشىقتە بولسا، ئەسەد تۈزۈمى زەپەر قۇچقانلىقىنى ئېلان قىلدى. سۈرىيە تاشقى ئىشلار مىنىستىرى ۋەلىد ئەلمۇئەللىم، ئىران زىيارىتى جەريانىدا بايانات بېرىپ، ئۆكتىچىلەرنىڭ دەمەشىقنى قولغا كىرگۈزۈش تىرىشچانلىقلىرىنىڭ بىتچىت قىلىنغانلىقىنى ئېيتتى.
سۈرىيە ئومۇمىي ئىنقىلاب كېڭىشى، پايتەختتە ئاياللارنى ئۆز ئىچىگە ئالغان 52 كىشىنىڭ ئۆلتۈرۈلگەنلىكىنى ئۇقتۇردى ۋە بۇ ئەھۋالغا قەتلىئام، دەپ باھا بەردى.
دەمەشىقتە دۇكانلارنىڭ چۈشتىن كېيىن سائەت 3 كىچە ئوچۇق ئىكەنلىكىنى، قاراڭغۇ چۈشكەندىن كېيىن خەلقنىڭ كوچىلارغا چىقىشتىن قورقىۋاتقانلىقى بىلدۈرۈلمەكتە.

 30.07.2012 07:27:07 UTC