سەن ئۆزۈڭ
تۇنۇشمايتىم سەن بىلەن ، ئىزلەپ كەلگەن سەن ئۆزۈڭ ،
دوستلۇق ئۈچۈن ئەڭ ئاۋال قول ئۇزارتقان سەن ئۆزۈڭ .
«سېنىڭ ئۈچۈن جېنىمنى پىدا قىلاي مەن » دېدىڭ ،
ئىككى ياتنىڭ رېشتىنى باغلىغانمۇ سەن ئۆزۈڭ .
ئۇزاق ئۆتمەي باشلاندى ، نەدىن كەلگەن ھەسرىتىڭ ،
ياردەم سوراپ مېنىڭدىن يالۋۇرغانمۇ سەن ئۆزۈڭ .
ھاجىتىڭدىن چىققاندا كۆزلىرىڭنى پارقىرتىپ ،
« ئۇنۇتمايمەن دوستۇم» دەپ ياش تۆككەنمۇ سەن ئۆزۈڭ .
«ئۆتۈۋېلىپ كۆۋرۈك»تىن «قۇيرۇقىڭدا نەزىر» قىپ ،
بۈگۈن ماڭا چەكچىيىپ مۇش تۈككەنمۇ سەن ئۆزۈڭ .
كىمدىن يۇققان ئەلپاز بۇ ؟ ھەيران قالدىم سېنىڭدىن ،
رەقىپلەرنىڭ ئالدىدا پەسلەشكەنمۇ سەن ئۆزۈڭ .
بۈگۈن مانا ھالىڭ بوش ، يەنە كەپسەن ئالدىمغا ،
ياردەم كېرەك بۇپ يەنە سەتلەشكەنمۇ سەن ئۆزۈڭ .
قىلالمامسەن ئۆز ئىشىڭ ،باشقىلارغا تايانماي ،
ماڭار يۇلۇڭ تاپالماي دۆتلەشكەنمۇ سەن ئۆزۈڭ .
پەقەت ھاجەت ئۈچۈنلا ئىشلىتەمسەن دوستلۇقنى ،
غۇرۇرۇڭنى يوقىتىپ «لەت»لەشكەنمۇ سەن ئۆزۈڭ .
بوپتۇ سېنى كەچۈرەي ، يولۇڭنى مەن كۆرسىتەي ،
ۋىجدان بىلەن قەدەم ئال كەلگۈسىڭگە سەن ئۆزۈڭ .
مەنبە :ئىجادىيەت
 |
