فەرۇخ پەرھات ئامېرىكا دۆلەتلىك پەن-تېخنىكا مۇسابىقىسىدە ئالتۇن مېدال ئالدى
ئامېرىكا قوشما شتاتلىرىنىڭ ۋىرگىنىيە شتاتى فەيىرفاكس شەھەرلىك تولۇق ئوتتۇرا مەكتەپنىڭ 11-يىللىق سىنىپ ئوقۇغۇچىسى، ئۇيغۇر پەرزەنتى فەرۇخ پەرھات پۈتۈن ئامېرىكا بويىچە ئۆتكۈزۈلگەن باشلانغۇچ، ئوتتۇرا ۋە تولۇق ئوتتۇرا مەكتەپ ئوقۇغۇچىلىرىنىڭ پەن-تېخنىكا مۇسابىقىسىدە ئالتۇن مېدالغا ئېرىشىپ چېمپىيون بولدى.
فەرۇخ بۇ يىل تولۇق ئوتتۇرا مەكتەپنىڭ 11-يىللىقىنى پۈتتۈرۈش ئالدىدا تۇرماقتا ئىدى.
پەن-تېخنىكا يېڭىلىقلىرىغا ئالاھىدە قىزىقىدىغان 17 ياشلىق فەرۇخ بۇ يىل 2-ئايدا پۈتۈن ۋىرگىنىيە شتاتى بويىچە ئۆتكۈزۈلگەن مەكتەپ ئوقۇغۇچىلىرىنىڭ پەن-تېخنىكا مۇسابىقىسىگە قاتنىشىپ، ئۆزى ياسىغان كىچىك ئايروپىلاننى ئۇچۇرۇش بويىچە ئالتۇن مېدال ئالغان ھەمدە پۈتۈن ئامېرىكا بويىچە ئۆتكۈزۈلىدىغان مۇسابىقىگە قاتنىشىشقا تاللانغان.
فەرۇخنىڭ ئوقۇتقۇچىسى ۋە مەشقاۋۇلى كاتېرىنا ۋىليامسنىڭ فارۇخنى مەملىكەتلىك مۇسابىقىسىگە تەشەببۇس قىلىپ يازغان خېتىدە ئۇنىڭ تالانتىغا يۇقىرى باھا بەرگەن.
ئۇ خېتىدە ئۇنىڭ ۋىرگىنىيە شتاتىنىڭ مەملىكەتلىك مۇسابىقىسىگە قاتنىشىش گۇرۇپپىسى تەركىبىدە ئۆزى ياسىغان ماشىنا ئادەمنىڭ قولىنىڭ ھەرىكىتى بويىچە ماھارەت كۆرسىتىدىغانلىقىنى بىلدۈرگەن.
فەرۇخنىڭ دادىسى پەرھات ئەپەندىنىڭ ئۇچۇر بېرىشىچە، فەرۇخ 21- ماي كۈنى ۋىسكونسىن ئۇنىۋېرسىتېتىدا ئۆتكۈزۈلگەن مەزكۇر مۇسابىقىدە “س” گۇرۇپپىسى بويىچە، ئۆزى ياسىغان ماشىنا ئادەمنىڭ قولىنىڭ خىزمىتىنى كۆرسەتكەن بولۇپ، ئۈچ مىنۇت ئىچىدە ماشىنا قولنىڭ كۆپ تۈرلۈك خىزمىتىنى ئورۇنداپ، باشقىلار ياسىغان ماشىنا قوللارنىڭ ھەرىكىتىدىن بۇرۇن مەشغۇلاتىنى تاماملاپ، ئالتۇن مېدالغا ئېرىشكەن. فەرۇخنىڭ ياسىغان ماشىنا ئادەم قولىنىڭ خىزمىتى ئەڭ تېز ۋە ئەڭ ئۈنۈملۈك ھېسابلانغان.
فەرۇخ ئۆز نەتىجىلىرى بىلەن بۇ يىل 6-ئايدا ئامېرىكا ھاۋا قاتناش ۋە ئالەم بوشلۇقى تېخنىكىسىنى باشقۇرۇش ئىدارىسىنىڭ لاڭلېي تەتقىقات ئىنستىتۇتىدا پراكتىكا قىلىش ۋە ئۆگىنىشكە قاتنىشىدىغان 100 قابىلىيەتلىك بالىلار قاتارىغا كىرگۈزۈلگەن.
ئېلان قىلىنغان ۋاقتى: 25 May 2011
ئاپتۇر: ئۇيغۇر ئاكادېمىيىسى
مەنبەhttp://uyghuracademy.com/?p=16901

يارايدۇ

  بىزنىڭ ئەقىللىق ئىكەنلىگىمىزنى ئىسپاتلاۋاتقانلارغا ئاپىرىن!!!!!ئاتاڭغا رەھمەت!!!

بىلىم قايدا بولسا بۇيۇكلۇك بولۇر،بىلىم كىمدە بولسا ئۇلۇغلۇق بولۇر....................خاس ھاجىپ.

پۇرسەت بولمىسا سۇلتان سۇتۇق بۇغراخاننىڭ نەيزىسى بولسىمۇ تونۇرغا كوسەي قىلىدىغان  چىنتۇمۇر باتۇرنىڭ مىسران قىلىچى بولسىمۇ چامغۇر ئاخلاشقا ئىشلىتىدىغان گەپكەن،مانا ماۋۇ قىرىندىشىمىزغا ئامىركىدا ئوقوشقا نىسىپ بوپتىكەن پۇتۇن ئامىركا بويىچە بىرنجى بولۇپ ئالتۇن مىدال ئېلىپ ئوقۇۋىتىپتۇ،ئاتاڭغا رەھمەت ئارسلانىم

ئەقىللىق ئۇقار ئول، بىلىملىك بىلۇر،
بىلملىك، ئەقىللىق تىلەككە يېتۇر.
           ----   يۈسۈپ خاس ھاجىپ

يا................پانا
بۇراس خەۋەرمۇ ياكى راس خەۋەرمۇ.  ئىشەنمەيلا قالدىمغۇ.