شىنجاڭ ئۇيغۇر ئاپتونوم رايونلۇق پارتكوم دائىمىي كومىتېتى(كېڭەيتىلگەن) يىغىنىدا يولغا قويۇش پىكرى ماقۇللاندى   

ئاپتونوم رايونىمىزدا ئىشقا ئورۇنلاشقانلار يوق ئائىلىلەرنى ئېنىقلاش مۇددەتتىن بىر ئاي ئىلگىرى يولغا قويۇلىدۇ

   چېڭ لىشىن، جاڭ شىنيۈ خەۋىرى : شىنجاڭ ئۇيغۇر ئاپتونوم رايونلۇق پارتكوم 30 – ئىيۇن دائىمىي كومىتېت يىغىنى (كېڭەيتىلگەن) ئېچىپ، ‹‹ ئاپتونوم رايوننىڭ ئائىلىسىدە ئىشقا ئورۇنلاشقانلار يوقلارنىڭ ئىشقا ئورۇنلىشىشىنى ئىلگىرى سۈرۈش پىكرى ›› نى ماقۇللىدى. ئاپتونوم رايوندىكى بارلىق شەھەر (بازار) لاردىكى ئىشقا ئورۇنلاشقانلار يوق ئائىلىلەردىن ئاز دېگەندە بىر كىشىنىڭ بۇ يىل 31 – ئىيۇلدىن ئىلگىرى ئىشقا ئورۇنلىشىشىغا كاپالەتلىك قىلىنىدۇ، 1 – ئاۋغۇستتىن باشلاپ يېڭىدىن پەيدا بولغان ئىشقا ئورۇنلاشقانلار يوق ئائىلىدىكىلەر 24 سائەت ئىچىدە شەرتسىز ئىشقا ئورۇنلاشتۇرۇلىدۇ.    شىنجاڭ ئۇيغۇر ئاپتونوم رايونلۇق پارتكومنىڭ شۇجىسى جاڭ چۈنشيەن يىغىنغا رىياسەتچىلىك قىلدى.    ئاپتونوم رايونلۇق ئادەم كۈچى بايلىقى ۋە ئىجتىمائىي كاپالەت نازارىتىنىڭ مەسئۇلى ‹‹ ئاپتونوم رايوننىڭ ئائىلىسىدە ئىشقا ئورۇنلاشقانلار يوقلارنى ئىشقا ئورۇنلاشتۇرۇشنى يولغا قويۇش پىكرى (قاراپ چىقىشقا يوللانغان نۇسخا) ›› توغرىسىدا دوكلات ۋە ئىزاھات بەردى. 20 – ماي ئېچىلغان ج ك پ ئاپتونوم رايونلۇق 7 – نۆۋەتلىك كومىتېتىنىڭ 9 – قېتىملىق(ئومۇمىي) كېڭەيتىلگەن يىغىنىدا ئائىلىسىدە ئىشقا ئورۇنلاشقانلار يوقلارنى ئىشقا ئورۇنلاشتۇرۇش مەسىلىسىنى ئۈچ ئاي ئىچىدە ھەل قىلىش ئوتتۇرىغا قويۇلدى. ئاپتونوم رايونلۇق پارتكومنىڭ تەلىپىگە ئاساسەن، ئاپتونوم رايونلۇق خەلق ھۆكۈمىتى ۋە ئالاقىدار تارماقلار دەرھال ھەرىكەتكە كەلدى، مەسئۇل رەھبەرلەر ئالاقىدار تارماقلارنى چاقىرىپ دەرھال مەخسۇس مۇھاكىمە قىلىپ، ۋەزىپىلەرنى ئايرىپ يولغا قويۇش لايىھەسىنى ئوتتۇرىغا قويدى ھەم ئۇقتۇرۇش چىقىرىپ ئائىلىلەرگە كىرىپ ئەھۋال ئىگىلەش خىزمىتىنى ئىشلىدى. ئاپتونوم رايونلۇق ھۆكۈمەت، سىياسىي كېڭەش رەھبەرلىرى قوشۇن باشلاپ شىمالىي شىنجاڭدىكى قىسمەن ۋىلايەت، ئوبلاست، شەھەرلەرگە بېرىپ، ئالاقىدار ئەھۋاللار ۋە ئىشلەنگەن خىزمەتلەرنى تەكشۈردى. ئاپتونوم رايونلۇق ھۆكۈمەتنىڭ ئالاقىدار تارماقلىرى جەنۇبىي شىنجاڭدىكى ئىككى ۋىلايەت، بىر ئوبلاستقا تەكشۈرۈشكە خادىم ئەۋەتتى، ئاپتونوم رايونىمىزدىكى ئىشقا ئورۇنلاشقانلار يوق ئائىلىلەرنىڭ ئەھۋالىنى قايتا تەكشۈردى. بىر ئاي ۋاقىت ئىچىدىلا ئەھۋالنى ئاساسىي جەھەتتىن ئىگىلەپ، ئاپتونوم رايونىمىزدىكى ئىشقا ئورۇنلاشقانلار يوق ئائىلىلەرنىڭ جەمئىي 15 مىڭ 658 ئىكەنلىكىدىن خەۋەر تاپتى.      يىغىندا 31 – ئىيۇلدىن بۇرۇن 15 مىڭ 658 ئىشقا ئورۇنلاشقانلار يوق ئائىلىدىن ئاز دېگەندىمۇ بىر كىشىنى ئىشقا ئورۇنلاشتۇرۇشقا كاپالەتلىك قىلىش، 1 – ئاۋغۇستتىن باشلاپ، يېڭىدىن پەيدا بولغان ئائىلىسىدە ئىشقا ئورۇنلاشقانلار يوقلارنى 24 سائەت ئىچىدە شەرتسىز ئىشقا ئورۇنلاشتۇرۇشنى قارار قىلدى . ج ك پ ئاپتونوم رايونلۇق 7 – نۆۋەتلىك كومىتېتىنىڭ 9 – (ئومۇمىي) كېڭەيتىلگەنيىغىنىدا ئائىلىسىدە ئىشقا ئورۇنلاشقانلار يوقلارنى ئىشقا ئورۇنلاشتۇرۇش مەسىلىسىنى ئۈچ ئاي ئىچىدە ھەل قىلىش نىشانىغا يېتىپ، مۇددەتتىن بىر ئاي بۇرۇن ئىشقا ئاشۇرۇش ئوتتۇرىغا قويۇلدى.    جاڭ چۈنشيەن مۇنۇلارنى تەلەپ قىلدى: جايلار ۋە تارماقلاردىكى ھەر دەرىجىلىك كادىرلار خەلققە بولغان چوڭقۇر مېھىر – مۇھەببەت بىلەن ئاممىنى 1 – ئورۇنغا قويۇش، خەلق تۇرمۇشىنى ئالدىن ئويلىشىشتا چىڭ تۇرۇپ، خىزمەت ئىستىلىنى ئۆزگەرتىپ، خىزمەت ئۈنۈمىنى ئۆستۈرۈپ، ماسلىشىپ ۋە ھەمكارلىشىپ، خىزمەتنى پۇختا ئىشلەپ، ‹‹ شىنجاڭ ئۈنۈمى ›› نى ھەقىقىي گەۋدىلەندۈرۈشى كېرەك. تەشۋىقات سالمىقىنى ئاشۇرۇپ، ئائىلىسىدە ئىشقا ئورۇنلاشقانلار يوقلارنىڭ قاراشنى ئۆزگەرتىپ، تاللاپ يۈرمەي، تەستە قولغا كەلگەن ئىش ئورنىنى قەدىرلەپ، خىزمەتنى تىرىشىپ ئىشلەپ، ئائىلىسىنىڭ تۇرمۇش شارائىتىنى ئۆزگەرتىشىگە تۈرتكە بولۇش كېرەك.    ئاپتونوم رايون رەھبەرلىرىدىن نۇر بەكرى، ئەركىن ئىمىرباقى، ئەسقەت كېرىمباي ۋە ئاپتونوم رايونلۇق پارتكوم دائىمىي كومىتېتىنىڭ ئەزالىرى، ئاپتونوم رايونلۇق ھۆكۈمەتنىڭ مۇناسىۋەتلىك مۇئاۋىن رەئىسلىرى، پارتگۇرۇپپا ئەزالىرى، ئاپتونوم رايونلۇق پارتكوم، ھۆكۈمەتنىڭ مۇناسىۋەتلىك مۇئاۋىن باش كاتىپلىرى يىغىنغا قاتناشتى.                                                                                                                                               

ئەسلى مەنبە: شىنجاڭ گىزىتى