ياشلارغا نەسىھەت
مۇتەللىپ ياقۇپ
غۇم ساقلىماي بىراۋغا ئاداۋەتنى يۇيۇپ تۇر،
تاماق ئەتسەڭ قوشناڭغا بىرەر قاچا سۇنۇپ تۇر.
ساۋاپ دەيدۇ كونىلار مىسكىنلەرنى يۆلىسە،
يوقلاپ بېرىپ ئۇلارنىڭ ھال-كۈنىنى ئۇقۇپ تۇر.
بىلسەڭ كىتاپ ئەزەلدىن خار قىلمىغان ئىنساننى،
ئۈنچە ئىزدەپ ئۇنىڭدىن،زېرىكمەستىن ئوقۇپ تۇر.
ئەدەپ-ئەخلاق،دىيانەت مەڭگۇ دورا بىزلەرگە،
خۇرۇچ ياساپ ئۇلاردىن ھاۋانچىدا سوقۇپ تۇر.
يالغۇزسىراپ قالمىسۇن ئاتا-ئاناڭ ئۆيىدە،
پات-پات بېرىپ ئۇلارنىڭ يانلىرىدا قونۇپ تۇر.
قېرىنداشلار ئەسقاتار كۈن چۈشكەندە بېشىڭغا،
سالام بېرىپ تۇققانغا،ياتلاشماستىن يۇقۇپ تۇر.
ئەل خىزمىتى ئەزەلدىن ئەر خىزمىتى ئاتالغان،
ئەل يولىغا شۇڭا سەن پاياندازلار توقۇپ تۇر.
مۇتەللىپ ياقۇپ(مەنبە:ئۆزۈم)
