‹‹ تىلىسەڭ تاپارسەن، سەۋەب قىلساڭ سېۋەتتە سۇ توختايدۇ ›› دېگەن ئاتىلار سۆزى ھەقىقەتەنمۇ بىكارغا ئېيتىلمىغان. ئەينى چاغدىكى كېسەللىك ئەھۋالىنىڭ ئېغىرلىقىدىن ساۋاقداش – قاياشلىرى، ئاتا – ئانا ، ئۇرۇق – تۇغقانلىرى ، ھەتتا مەسئۇل  دوختۇرلىرىمۇ سەللىمازا ساقىيىپ كېتىشىگە ئىشەنچ قىلالمىغان ئىلھامجان ئەلى ، مانا بۈگۈن كەڭ تورداشلارنىڭ ئەزگۈ تىلەكلىرى ،
 چىن قەلبىدىن چىقىرىپ قىلغان قېرىنداشلارچە ياردەملىرىنىڭ بەركاتىدا كېسەللىك ئەھۋالى ئىلگىرىكىگە قارىغاندا زور دەرىجىدە ياخشىلاندى. ئۆلۈپ كېتىشى، ئۆلمىگەندىمۇ ئۆسۈملۈك ئادەمگە ئايلىنىپ قېلىشى مۇمكىن، دەپ قارالغان

ئىلھامجان مانا شۇ تاپتا ئاتا – ئانىسىنىڭ گەپ سۆزلىرىنى ئۇققىدەك، ئەتراپتىكى كىشىلەرنىڭ چىراي – ئىپادىسىنى سەزگۈدەك ۋە باشقىلارنىڭ چاقىرىشى ، گەپ – سۆزلىرىگە مۇناسىپ ئىنكاس قايتۇرالىغىدەك ھالەتكە كەلدى. دېمەك، ‹‹ ساخاۋەتلىك دىللارغا قىلىنغان ئىلتىجا ›› لارىمىز مۇناسىپ نەتىجە بەرگەن ،  ‹‹ ئەل قوينى ئالتۇن بۆشۈك ›› ئىكەنلىكى يەنە بىر قېتىملاپ كۆز ئالدىمىزدا ئىسپاتلانغان ئىدى

يېقىندىن بۇيان ئىلھامجاننىڭ كېسەللىك ئەھۋالىنىڭ مۇقىملىشىشى ، داۋالاش لايىھەسىنىڭ ماس ھالدا ئاددىيلىشىشى سەۋەبىدىن دوختۇرخانا تەرەپ ئىلھامجاننى كۇچاغا يۆتكەپ ، كۇچا ناھىيىلىك خەلق دوختۇرخانىسىدا داۋاملىق داۋالاش تەكلىپىنى بەرگەن. دوختۇرخانا تەرەپ كۇچا ناھىيىلىك دوختۇرخانا بىلەن ئالاقىلاشقان بولۇپ،

 بۇنداق بولغاندا ئىلھامجان ئائىلىسىدىكىلەرگە ئىلھامجاننىڭ ئەھۋالىدىن خەۋەر ئېلىشقا تېخىمۇ زور قولايلىق تۇغۇلىدىكەن ( ئاتا – ئانىسى 6 ئايدىن بېرى ئۆيگە قايتىپ باقمىغان ئىدى ) . بۇندىن باشقا ئىلھامجاننىڭ كېسەللىك ئارخىبى بېيجىڭدىكى بىر دوختۇرخانىغا يوللانغان بولۇپ، دۆلەت بايرىمىدىن كېيىن دوختۇرخانا تەرەپتىن جاۋاب كېلىشى مۇمكىن. ئەگەر ئۇ دوختۇرخانا داۋالاشنىڭ يېڭىچە ئۇسۇلىنى ئوتتۇرىغا قويسا ، بەلكىم كېلەر ئاي بېيجىڭگە يۆتكىلىپ داۋالىنىشىمۇ مۇمكىن.

يەنە بىر خۇش خەۋەر شۇكى ، مەكتەپ تەرەپ ئەتراپلىق مۇزاكىرە قىلىش ئارقىلىق ئىلھامجاننىڭ داۋالىنىش خىراجىتى ئۈچۈن 200 مىڭ يۈەن ئاجرىتىپ بەرگەن (بۇندىن باشقا، دەسلەپتىلا  65مىڭ يۈەن ياردەم پۇل ئاجرىتىپ بەرگەن ئىدى )

شۇنداق قىلىپ، بۈگۈن ئىلھامجان ئەلى كۆمۈر كان دوختۇرخانىسىدىكى بىرىنچى باسقۇچلۇق داۋالىنىشىنى ئاخىرلاشتۇرۇپ ، بالنىتسىدىن چىقتى. ئەتە خۇدا خالىساكۇچاغا قاراپ يول ئالماقچى. بىز ئۇلۇغ ئىگىمىزدىن بۇ بىر ئائىلە كىشىلىرىنىڭ سەپىرىگە ئاق يول ، ئىلھامجان ئېنىمىزنىڭ كېسىلىگە شىپا تىلەيمىز! . بۇ ئىلھامجان ئەلىنىڭ ئاتا – ئانىسى ۋە كەڭ تورداشلارنىڭ كۆڭلىنى سۆيۈندۈرگىدەك كاتتا ئىش ئەلۋەتتە. بىز بۇ جايدا شىنجاڭ يېزا ئىگىلىك ئۇنىۋېرسىتېتى پارتكومى ، مەكتەپ تەشكىلىگە ئەڭ ئالىي ئېھترامىمىزنى ۋە چوڭقۇر تەشەككۈرىمىزنى بىلدۈرىمىز!
كۇچا ناھىيىلىك دوختۇرخانا ئىلھامجاننى ھازىرقى داۋالاش لايىھەسى بويىچە داۋالاشنى داۋاملاشتۇرۇش شارائىتىنى ھازىرلىغان ئىكەن.
 
كۇچا دىيارىدىكى تورداشلارنىڭ ئىلھامجان ئەلىنىڭ داۋالىنىش ئەھۋالىغا يېقىندىن كۆڭۈل بۆلۈپ تۇرۇشىنى ، داۋالىنىشى ۋە باشقا ئەھۋاللىرى ھەققىدىكى ئۇچۇرلارنى بىزگە خەۋەر قىلىپ تۇرۇشىنى تۆۋەنچىلىك بىلەن سورايمىز!
ئەسلى مەنبە يۈكسەل بلوگى:

          

قايتىدىن تۇغۇلغاندەك بۇپتۇدە.................... ئاللاھ بارلىق مۇسۇلمان قېرىنداشلىرىمىزنىڭ كىسەللىرىگە شىپالىق بەرسۇن

ئىلھامجاننىڭ  سالامەتلىگىنى ئاللادىن تىلەيمىز .

مەكتەپنىڭ ئەسلىدىنلا تولەم جاۋاپكارلىقى بار ئىدى ،بۇ قېرىنىدىشىمىز مەكتەپتىكى ۋاقىتتا سۇغۇرتىغا قاتناشقان بولغۇيتى ؟ تىزرەك ساقىيىشنى ئۈمىت قىلىمەن!!!  

بۇنڭدىن مۇ ياخشى بولۇپ كىتە ......