ئوت قويماقتا روھىمغا تەمبۇر
مۇكاپاتلىق ئەسەرگە ئاتاپ
يەنە بىر باھار،
كۆكلىدى دۇنيا.
كۆكلىدى ھەم ئازاپلىرىممۇ،
كۆكلىدى مەي شاراپلىرىممۇ.
يىغلىدى ئاسمان،
يىغلىدى ھەم كۆز ياشلىرىممۇ.
ئوت قويماقتا روھىمغا تەمبۇر،
قىينىماقتا مىنى ياتىقىم.
بىلىق كەبى سۈزۈك قەدەھتە،
بالقىپ تۇرار يېشىڭ ئامرىقىم.
شۇنچە شىرىن سۈزۈك بۇ ئازاپ،
ئۆتەر شامال چىچەكنى يالاپ،
گۇمانلاندىم ئۆزۈم ئۈزۈمدىن،
ئەينەكتىكى ئۆزۈمگە قاراپ.
دىلىمدىكى گۈزەللىك قېنى،
ياشايمەن دەپ......
مەن بولدۇممۇ پاھىشە جالاپ.
ياق ياشايمەن تېخى،
كەتسىمۇ تىنىمگە،
ئازاپنىڭ قۇرىتى مىغىلداپ يامراپ.
ئاخىرقى نۇر ئۈچۈن ئۆمىلەيمەن،
تۇرسىمۇ ئازاپتىن قارا نۇر تاراپ.
يىغلا چاغرى، يىغلا تەمبۇرۇم .
يىغلا ئامرىقىم يىغلىسۇن ئاسمان.
يۇيۇلسۇن كۆز ياشتا گۇناھلىرىمىز.
سۈزۈك ھىسيات جىلۋىسى ياشتا،
قول تۇتۇشۇپ ياشايمىز چىداپ،
كۆز ياشلارغا سىڭگەچ مۇھەببەت،
مەڭگۈ ئۇندا تۇرار نۇر چاقناپ.
2008.5قەشقەر
