يوللاندى 02.08.2012 07:11:42 UTC

ت ر ت ئاۋازى  خەۋىرى: تاشقى ئىشلار مىنىستىرى ئەھمەد داۋۇتئوغلۇ، ئىراقنىڭ شىمالىدىكى كوردىستان رايونلۇق ھۆكۈمەتنىڭ باشلىقى مەسئۇد بارزانى بىلەن ئەربىلدە كۆرۈشتى.
داۋۇتئوغلۇ، ئۇچرىشىشتىن كېيىن بايانات بېرىپ، «رايونلۇق ھۆكۈمەت تۈركىيەنىڭ مۇددىئاسىنى چۈشەندى» دېدى.
تۈركىيەنىڭ كۈتىدىغانلىرىنىڭ ناھايىتى روشەن ئىكەنلىكىنى تەكىتلىگەن داۋۇتئوغلۇ، سۈرىيە مەسىلىسى، تېررورىزمغا قارشى كۈرەش قاتارلىق مەسىلىلەر بويىچە مۇزاكىرە ئېلىپ بارغانلىقلىرىنى بىلدۈردى.
تۈركىيەنىڭ پۈتۈن رايون بىلەن مۇناسىۋەتلىك ئەتراپلىق قاراشلىرى ۋە ئەندىشىلىرىنى ئوچۇق – ئاشكارا ئورتاقلاشقانلىقلىرىنى ئەسكەرتكەن داۋۇتئوغلۇ، بىرلىكتە بەزى قەدەملەرنىڭ تاشلىنىشى ئۈچۈن، چۈشىنىش ھاسىل قىلغانلىقلىرىنى قەيت قىلدى.
داۋۇتئوغلۇ، مۇخبىرلارنىڭ «رايونلۇق ھۆكۈمەت مۇددىئانى چۈشەندىمۇ؟» دېگەن سوئالىغا «مۇددىئانى چۈشەندى» دەپ جاۋاب بەردى.
بۇ باياناتتىن كېيىنلا، تۈركىيە بىلەن رايونلۇق ھۆكۈمەت نامىدىن قوشما بايانات ئېلان قىلىندى.
باياناتتا، «سۈرىيەدىكى نوپۇز بوشلۇقىدىن پايدىلىنىشقا ئورۇنىدىغان تەشكىلات ئورتاق خەۋپ، دەپ قوبۇل قىلىنىدۇ... يېڭى سۈرىيەدە ھەر قانداق بىر تېررورىست ياكى ئاشقۇن تەشكىلاتنىڭ مەۋجۇتلۇقىغا رۇخسەت قىلىنماسلىقى لازىم... ھەر ئىككى تەرەپ سۈرىيەدىكى پاجىئەدىن ئەندىشە قىلماقتا» دېگەن ئىبارىلەرگە ئورۇن بېرىلدى.
ئىگىلىگەن ئۇچۇرلارغا ئاساسلانغاندا، ئەتراپلىق مۇزاكىرە ئىجابىي كەيپىيات ئىچىدە ئۆتكەن.
تەرەپلەر، يېڭى سۈرىيەدە بارلىق ئېتنىك، دىنىي ۋە مەزھەب خاراكتېرلىك گۇرۇپپىلارنىڭ ھەق – ھوقۇقلىرىنىڭ قوغدىلىشى كېرەكلىكى مەسىلىسىدە بىرلىك ھاسىل قىلدى.

 

يوللاندى 03.08.2012 13:19:32 UTC

 سۈرىيە چېگراسىدا ھەربىي مانېۋېر ئېلىپ بېرىلدى.
شانلىئۇرفا 20 - بىرونىۋېك قىسمى قوماندانلىق ئىشتابى ئاقچەقەلئە ناھىيەسى گۈلتەپە پونكىتى ئەتراپىدا ھەربىي مانېۋېر ئېلىپ باردى.
شانلىئۇرفادا چېگرانىڭ نول نۇقتىسىغا ئورۇنلاشتۇرۇلغان بىرونىۋېكلەرمۇ مانېۋېرغا قاتناشتى.
مانېۋېردا بىرونىۋېكلەرنىڭ سۈرئىتى ۋە ھەرىكەت قابىلىيەتلىرى سىناق قىلىندى.
مانېۋېرغا قاتناشقان ئەسكەرلەرنىڭ ھەر بىر بۇيرۇقنى تۇلۇق بىجانىدىل ئىجرا قىلىدىغانلىقى نامايان قىلىندى. مانېۋېر ئەتە ئاخىرلىشىدۇ.
چېگرا رايوندا باشقا بىرونىۋېك قىسىملارنىڭمۇ پات - پات مانېۋېر ئۆتكۈزۈپ تۇرىدىغانلىقى بىلدۈرۈلدى.
ئالاقىدار مەسئۇللار بۇنىڭ قائىدە بويىچە داۋاملىق ئېلىپ بېرىلىۋاتقان نورمال ھەرىكەت ئىكەنلىكىنى ئېيتتى.