(پاكىستانلىق ئىسلام ئۆلىماسى ئەكبەر ئەھمەدنىڭ " مۇسۇلمانلار نېمە ئۈچۈن ئارقىدا قالدى ؟ " سەرلەۋھەلىك ماقالىسىدىن ئۈزۈندە)
مۇسۇلمان داھىيلاردا يەنە بىر سەھۋەنلىك بار. غەرب جەمئىيىتىدە ياشاۋاتقدن مۇسۇلمانلار ئىرقىي كەمسىتىشكە ئۇچراۋاتقانلىقىدىن زارلىنىۋاتىدۇ، ئەمما ئۇلار كەينىگە قايرىلىپ ئۆز-ئۆزىگە، جەمئىيەتنىڭ ھالىتىگە قاراپ باقسۇن. ئوخشاشلا بىر پاكىستانلىق تۇرۇپ ئىرقى ئوخشاش بولمىغانلىقتىنلا قارىشى تەرەپنى ئۆلتۈرۈدۇ. بۇنداق ئىش سىند ئۆلكىسىدە كۆپ يىل داۋاملاشتى، ئۆلتۈرۈش ۋاسىتىسى ئىنتايىن قەبىھ ، ھەتتا سىياسىي خەۋەرلەرنى قارىشى تەرەپتىكى مىللەتنىڭ دۈمبىسىگە چاپلاپ قويغانلارمۇ بار. ئىراقتا كۇردلار مۇسۇلمانلار تاشلىغان زەھەرلىك گاز ۋە بومبا ئاستىدا ئۆلۈپ كەتكەن. بېنگالنىڭ داككا شەھىرىدە 500 مىڭغا يېقىن بىھار مۇساپىرلىرى پاسكىنا، قالايمىقان لاگېرلاردا تۇرۇۋاتىدۇ. ئۇلارنىڭ ئېچىنىشلىق ھالىتىنى سۈرۈشتۈرۈدىغان ئادەم يوق. بىمارلار سىرتتىن كەلگەن، دەپ كەمسىتىلگەن، ئەمما ئۇلار ئۆزلىرىنى پاكىستاننىڭ قانۇنلۇق پۇقراسى، دەپ قارايدۇ. ئۇلارنىڭ خاتالىقى پاكىستاننىڭ بىرلىككە كەلگەن ئىناق ئىسلام دۆلىتى بولۇپ قۇرۇلىدىغانلىقىغا ئىشەنمىگەنلىكىدە. 1791-يىلىدىن كېيىن ئۇلار بېنگالدا خائىن، دەپ قارالدى. ئىسلام دىنىغا ئېتىقاد قىلىدىغان پاكىستان ئەسلىدە قانۇنلۇق پاكىستان پۇقراسى بولغان ئۆز چېگراسى ئىچىگە كىرگۈزۈشنى خالىمىغان ئىدى، ئوخشاشلا ئىسلام دىنىغا ئېتىقاد قىلىدىغان بېنگالمۇ ئۇلارنى ئۆز دۆلىتىدە قالدۇرۇشنى خالىمىدى. شۇڭا ئۇلار ئىزچىل تۈردە پاسكىنا، قالايمىقان مۇساپىرلار لاگېرىدا ياشاپ كېلىۋاتىدۇ، ئۆزلىرىنىڭ قاياققا بېرىشىنى ، نېمە قىلىشىنى بىلەلمەيۋاتىدۇ. " ئۈممەت " (مۇسۇلمانلارنىڭ ھەممىسى بىر قېرىنداش، دېگەن مەنادا)ئىنتايىن ياخشى مەنادىكى ئۇقۇم، ئەمما ئۇ ئەمەلىي ئۈنۈم بېرەلمىدى. شۇڭا مۇسۇلمانلار بۇ جەھەتتە ھەسسىلەپ تىرىشچانلىق كۆرسىتىشى كېرەك. دەۋرىمىزدە نۇرغۇنلىغان مۇسۇلمان داھىيلىرى ۋە ئىسلام ئەللىرى باشلىقلىرى ئوق يەپ ئۆلدى. مەسىلەن، مىسىر پرېزىدېنتى سادات، سەئۇدى ئەرەبىستانىنىڭ سابىق پادشاھى فايسال، بېنگال دۆلىتىنىڭ قۇرغۇچىسى مۇجبىل رەھمان، شۇنىڭدەك ئافغانىستاندا ئارقا-ئارقىدىن ئۈزۈلمەي سادىر بولۇۋاتقان ئېتىپ ئۆلتۈرۈشلەر، ئۇنىڭدىن باشقا يەنە دارغا ئېسىپ ئۆلتۈرۈشلەر، مەسىلەن : پاكىستاننىڭ سابىق پرېزىدېنتى زۇلفقار ئەلى بۇتتو، يەنە پارتىلىتىۋېتىلگە پرېزىدېنت زىيائۇل ھەقمۇ بار. مۇسۇلمانلارنىڭ داھىيلارغا قوللانغان ۋاسىتىسى رەھبەرلەرنىڭ مۇسۇلمان ئاممىغا قوللانغان ئەسكىلىكلىرىگە يەتمەيدۇ. ئۇلار ھاكىمىيەت ھوقۇقىدىن، يەنى ئەسكەر كۈچى ۋە ساقچىلاردىن پايدىلىنىپ گۇناھسىز پۇقرالارنى تۈركۈملەپ ئۆلتۈرۈپلا قالماستىن بەلكى سۈرىيە ، شەرقىي پاكىستان(ھازىرقى بېنگال ) ، ئىران ، ئىراق قاتارلىق جايلاردا پۈتۈن بازاردىكى ئادەملەرنىڭ ھەممىسىنى قىرىپ تاشلىغان ئەھۋاللارمۇ بولغان. ئۇنىڭدىن باشقا، نېفىت ئېلىپ كەلگەن مىسلىسىز زور بايلىقنى ھەددى-ھېسابسىز بۇزۇپ-چېچىش ئەھۋالى تېخىمۇ ئېغىر. بۇزۇپ-چېچىش ئەھۋالىمۇ تارىختا ئەزەلدىن كۆرۈلۈپ باقمىغان. ئەسلىدە سالامەتلىكنى ئاسراش، مائارىپ ۋە باي-نامراتلىق فەرقىنى ئازايتىشقا ئىشلىتىلسە تامامەن بولىدىغان پۇلنى كاتتاباشلار لوندوندىكى كۈتكۈچى خېنىملارنىڭ باغىرداقلىرىغا قىستۇرۇشقان ، فرانسىيەنىڭ غەربىدىكى قىممارخانىلارغا ، ئامېرىكىنىڭ ئات فېرمىلىرى ۋە شۋېتسارىيەنىڭ داچىلىرىغا تاشلىۋەتكەن . ئىسلام دۆلەتلىرىنىڭ نېفت بايلىقى بەزى مۇسۇلمانلارنى ئۆزىنى بىلەلمەيدىغان ، ئائىلە ، ئۇرۇق-تۇغقانلىرى بىلەن بىرلىشىپ خالىغىنىنى قىلىدىغان كىشىلەرگە ئايلاندۇرۇۋەتكەن . ئۇلارنىڭ خىلمۇ-خىل ئەخمىقانە ، كۈلكىلىك قىلىقلىرى ، رەزىل قىلمىشلىرى ئەسلىدىنلا مۇسۇلمانلارنى مەسخىرە قىلىش كويىدا يۈرگەن غەربنىڭ ھەجۋىي يازغۇچىلىرىنى مەسخىرە دەستىكى بىلەن تەمىن ئېتىپ بەرگەن . ئادەتتىكى مۇسۇلمان ئامما ئەلۋەتتە ئۇلاردىن نارازى بولىدۇ . ئادىل ھاكىمىيەت ، ئاسايىش جەمئىيەت قۇرۇش بىر تەخرسىز ئۇقۇم . بەزى ئوتتۇرا شەرق مەسىلىلىرى ئۇزمانلىرى (مۇتەخەسىسلىرى) پۇقرالار قانۇن ئارقىلىق ئىدارە قىلىنىدىغان جەمئىيەتنىڭ كەمچىل بولۇشى 21 - ئەسردە مۇسۇلمانلار جەمئىيىتىنىڭ بىر چوڭ ئىللىتى بولۇپ قالىدۇ ، دەپ قاراشماقتا. ھازىرقى مۇسۇلمان جەمئىيىتىنىڭ ئالاھىدىلىكى __ بېسىش ھەم ئېچىۋەتمەسلىك ، بىر ئىزدا توختاپ قېلىپ تەرەققىي قىلماسلىق ، قانۇن ۋە ئاخبارات ساھەسى ئەركىن فۇنكسىيە يۈرگۈزەلمەسلىك ، سودا - سانائەت بولسا مەيلى دۆلەت ئۆزىنى سوتسىيالىزم ياكى كاپىتالىزم ئىقتىسادىي تۈزۈلمىسىدىكى دۆلەت ، دەپ ئاتىۋالغان بولسۇن ئوخشاشلا ھۆكۈمەتنىڭ تىزگىنىدە بولۇپ كېتىۋاتىدۇ . گەرچە مۇشۇنداق بولغان تەقدىردىمۇ پۈتۈنلەي ئىستىقبالى يوق ، دېگىلىمۇ بولمايدۇ . ئەنگلىيە ئالىملىرى مىسىرنىڭ ئۇزۇن داۋاملاشقان مۇستەبىت ھۆكۈمرانلىقى ئاستىدىمۇ يەنىلا تەرەققىي قىلىپ پۇقرالارنى قانۇن ئارقىلىق ئىدارە قىلىدىغان ، ئىجتىمائىي ھوقۇق ئايرىلغان ھاكىمىيەت قۇرغانلىقىنى ھەمدە ئۇنى ئۇزاققىچە داۋاملاشتۇرالىغانلىقىنى قەيت قىلىشىدۇ . (تەرجىمان:ماھمۇد ئابدۇلرەھىم ، "مىراس"نىڭ 2002-يىللىق 6-سانىدىن)
مەنبە:شەۋقى مۇنبىرى
[ بۇ يازمىنى13899196193 2012-04-19 21:48قايتا تەھرىر ]
