بىر كۈنى كەچتە «كەڭساي»دا ئۇنى-بۇنى كۆرۈپ ئولتۇراتتىم، بىر تونۇشۇمدىن تىلفۇن كەلدى. تىلفۇننى ئالدىم، ئۇ باشقىلاردىن مۇنداق بىر خەۋەرنى ئاڭلاپتۇ: ئاتۇشتا بىر مۆجىزىلىك قوي تۇغۇلۇپتىمىش، ئۇ قوينىڭ قورسىقىنىڭ بىر تەرىپىدە«ئاللاھ» دېگەن خەت، يەنە بىر تەرىپىدە «مۇھەممەت» دېگەن خەت، قۇيرۇق تەرىپىدە بولسا بىر رەقىمى بارمىش، كەڭساي تورىدا سۈرىتى بارمىش، تاپالماپتۇ، مەن تېپىپ ئۇنىڭغا يوللاپ بىرىدىكەنمەن. ئۇنىڭ كۆڭلى ئۈچۈن، كەڭساي تورىنى خېلى ئىزدىسەممۇ، ھېلىقى مۆجىزىلىك قوينىڭ سۈرىتىنى تاپالمىدىم. ئىزدەش تور بىكىتىدىن ئىزدەپ تېپىپ ئۇنىڭغا QQ دىن ئەۋەتىپ بەردىم، ئۇ ماڭا ناھايىتى كۆپ رەھمەت ئېيتىپ كەتتى...
خېلىدىن بىرى بەزى قېرىنداشلىرىمىز مۆجىزە كۆرۈشكە بەك ئامراق بولۇپ كېتىۋاتىدۇ، ئاڭلىشىمچە، ئاتۇشتا تۇغۇلغان ھېلىقى پاقلاننى كۆرگىلى تەرەپ-تەرەپتىن كىشىلەر بېرىپ كۆرۈپ كېتىۋېتىپتىمىش...
بۇ ئىشلارنىڭ بولغىنىغىمۇ بىر نەچچە كۈن بوپقالدى، بەلكىم مۆجىزىگە ئامراق قېرىنداشلىرىمىز ئۈچۈن بۇ مۆجىزە كونىراپ قالدى. قىزىقساڭلار، مەندە يېڭى مۆجىزىلەر بار، كىلىپ كۆرۈشنى خالىساڭلار، قارىشى ئالىمەن.
بىرىنچى مۆجىزە: شەك- شۈبھىسىز ئىشىنىشىڭلار كېرەككى، بۇ خەتلەرنى مەن ئۆز قولۇم بىلەن يازدىم، چۈنكى ئاللاھ ماڭا قەلەم بىلەن خەت يېزىشنى ئۈگەتتى.
ئىككىنچى مۆجىزە مەن، مەن ئاللاھنىڭ ئۇلۇغ بىر مۆجىزىسى، چۇنكى ئۇ (ئاللاھ) مىنى لەختە قاندىن ياراتتى.
ئۆز سورۇنداشلىرىڭلارنى (ياردەمگە) چاقىرىپ مىنى كۆرگىلى كىلىڭلار، سىلەر ئۈچۈن ئىشىكىم ھەر ۋاقىت ئوچۇق...
ھازىرچە موشۇ ئىككى مۆجىزە يىتەرلىك بولدى دەپ ئويلايمەن، يەنە مۆجىزىگە ئىھتىياجىڭلار چۈشسە مەن بىلەن ئالاقىلىشىڭلار، ياكى ئۆزۈڭلاردىن ئىزدىسەڭلارمۇ مۆجىزە تاپالايسىلەر..
